Transcription
رايح تخطب أو عندك انترفيو أو عندك ميتنج مهم جدا. لو انت بتسأل نصيحة ناس هتقول لك دايما خلي عندك أي كونتاكت، خلي عندك اتصال بصري. ورغم أن الموضوع يبان أن انت تقدر تعمله بسهولة، إلا أن فكرة الاي كونتاكت دي ممكن تكون فكرة صعبة جدا على ناس كتير.
في دراسة كده حديثة اتنشرت في "إنجن د ك" بتقول فيها أن أكتر من 55% من الطلبة الجداد مش بيقدروا في الانترفيوهات اللي هم بيعملوها في البداية أن هم يكون عندهم الاي كونتاكت، رغم أن هم أصلاً بيتقال لهم كتير وانت في الانترفيو تعمل إيه؟ اعمل أي كونتاكت.
اني حاجة على فكرة بيعملوها هؤلاء الطلبة الجداد لما بيدخلوا أي مكان علشان يعملوا انترفيو، هم أن هم بيسألوا أسئلة ما ينفعش تتسأل زي: "هل يا ترى عملت كويس في الانترفيو ده ولا لا؟" أو "هتكلميني إمتى؟" كل الحاجات الغريبة دي.
عامة يعني، تعال نرجع لموضوع الاي كونتاكت. فكرة الاي كونتاكت هي فكرة في الأساس ممكن يكون ليها دوافع نفسية كتير قوي بتخلينا ما نقدرش أن احنا نعملها. زي مثلا دافع الخوف والقلق. بعض الناس بيكون عندها مشاكل في أن هي مش واثقة في نفسها أو خايفة من اللي ممكن تكون هتقابله، وبالتالي مش قادرة أن هي تعمل أي كونتاكت. واللي بيحصل بجد أن لما الناس بتحاول أن هي تعمل هذا الاتصال البصري في الأول، بيحاولوا أن هم يعملوه لثواني صغيرة، ولكن في الآخر بتلاقيهم بيبصوا في كل حتة.
طيب ويعني يا مايكل إيه المشكلة؟ ما هتخلي ناس تبصوا في أي مكان. يعني ليه لازم نعمل فكرة الاتصال البصري ده؟ ليه لازم نبص لبعض في عينين بعض واحنا بنتكلم؟ بغض النظر عن كل الكلام اللي بيتقال بقى على فكرة الثقة بنفسه وكل الكلام الحلو ده اللي الاي كونتاكت أو الاتصال البصري ممكن يكون بيعمله.
فالاتصال البصري ده هو الوسيلة الأساسية أن انت ممكن تبني بيها تراست أو ثقة بينك وبين اللي قدامك. فما ينفعش مثلا أن أنا أكون في ميتنج مهم جدا وأكون بحاول أتفادى الكلام مع الشخص الثاني بشكل أو بآخر علشان أنا عندي مشاكل ممكن تكون ليها علاقة بالشك أو بأن أنا مش واثق في نفسي كفاية.
الكلام ده مش بس على فكرة في موضوع البزنس، لا ده كمان في العلاقات الشخصية. تخيل معايا علاقة حب بين اتنين مش بيبصوا في عين بعض. "حبيبي انت ليه مش بتبص لي في عينيا؟" "حبيبي وانت مش بتحبني ولا إيه؟" انت تسمع كلام كتير قوي لو مش بتعرف تعمل الكلام ده.
حتى برضه مع الأطفال الرضع. دراسة حديثة اتنشرت وبتقول أن الاتصال البصري مع الطفل الرضيع ده ممكن يكون بيبني بيني وبينه علاقة ويفهم أنا مين ويحاول أن هو يتعرف علي.
طب يا مايكل الموضوع مهم ومش عارفين نعمله إزاي؟ أنا هقول لك في الحلقة دي من الآخر كده، زيتونة 15 حاجة ممكن تكون بتعملها تساعدك في أنك تعمل اتصال بصري حقيقي. بس قبل ما نروح للحلقة دي وأقول لك إيه الـ 15 حاجة، نتكلم عليها، أنا عايز أقول لك أن في فرق بين الاتصال البصري والبحلقة. هقول لك عليهم في الحلقة.
السلام عليكم، أنا مايكل راشد، وانت بتشوف برنامج الزيتونة. ما تنساش الحلقة دي أنك تكون عامل اشتراك هنا في البرنامج ومفعل خاصية الجرس عشان يوصلك أول بأول كل الفيديوهات واللي ممكن تفرق وتغير حياتك، ول على الأقل كده بنسبة 1%.
قلت لكم أن في فرق بين الاتصال البصري والبحلقة. يعني الاتصال البصري معناها أن أنا أقدر أجري حوار بالعينين، يعني أقدر أبص لك في عينيك وأنا بتكلم، ولكن في نفس الوقت برضه أقدر أرمش، يعني أقدر أرمش، أقدر أبص في حتة تانية وأرجع لك تاني. إنما البحلقة هي محاولة بعض الناس في أن هم يعملوا اتصال بصري ودايما يكونوا مجبرين نفسهم كده أن هم يعملوه، فيلاقوا نفسهم بيبصوا لشخص ما في عينيه بشكل كبير قوي، والموضوع ده بيكون ويرد وبيكون غريب وبيكون غير مريح لكل الأطراف. وده مش اللي احنا بنتكلم عليه تماماً.
طيب، إيه هي الـ 15 حاجة اللي ممكن أكون بعملها فتساعد مني أني أعمل هذا الاتصال البصري؟
أول حاجة هو أنك تبدأ تمارس هذا الاتصال البصري ولكن في المراية. تبدأ أنك تعمل حوار من الآخر مع نفسك وأنت باصص لنفسك وبتحاول أنك تشوف بني آدم تاني اللي هو أنت في الأساس يعني، وهو باصص لعنيك وأنت باصص لعنيه وقادر أنك تجري هذا الحوار. وفي كل مرة تعمل حاجة زي كده حاول تكتب زي سكور جنبها. يعني مثلاً أنا النهاردة ده أول مرة أهو بتكلم قدام المراية، فلقيت أن أنا مش كويس قوي، فهدي لنفسي اتنين من خمسة. المرة اللي بعدها أنا لقيت أن أنا قادر أني أعمل اتصال بصري بشكل كويس، المرة دي بقيت تلاتة من خمسة وهكذا.
الفكرة التانية، فكرة اسمها الفيجوال ريمايندر. يعني عارف الريمايندرز اللي أنت بتحطها على الموبايل بتاعك عشان تفكرك أن أنت تجيب حاجة من السوبر ماركت أو تفكرك أن أنت تتصل بحد معين. ممكن برضه لو أنت نفترض أن أنت بتفتح زوم ميتنج أو أنت دلوقتي قاعد في أونلاين ميتنج، تعمل كده زي نوت كده صغيرة جنب اللاب توب أن أنت بص للكاميرا، بص للناس واتكلم معاهم. قبل ما تحاول أن أنت تتكلم وتبص في أي حتة وخلاص. واعمل ريمايندر دي في أن هي تكون موجودة في أي كونفرزيشن حقيقية موجودة في يومك الطبيعي. يعني لو بتسأل مديرك أنت هتترقى إمتى المرة الجاية، وأنت بتسأله حاول كده تحط ريمايندر ليك أن أنت تبص في عينيه وأنت بتسأله، لأن ده هيجري محادثة حقيقية.
الفكرة التالتة، العب في البداية مع الناس السهلة. شوف بقى الناس اللي هما أصحابك اللي قريبين، شوف الناس اللي هما موجودين في العيلة عندك، شوف أولادك، شوف حد تقدر تجري معاه اتصال بصري فترات أطول شوية وحاول أنك تتعود أنك تركز في الاتصال البصري مع الناس القريبين دول.
الفكرة الرابعة، أوعى، أوعى، أوعى تنسى أنك ترمش. لأن أنت زي ما قلت لك كده لو أنت فضلت ما ترمش وتعمل يعني اتصال بصري قوي جدا، غير أن هو الموضوع هيكون ويرد وهيكون غريب بالنسبة لكل الأطراف، أنت نفسك بعد فترة هتتعب من هذا الاتصال البصري. أنت هتحس أن في حاجة غريبة، أنت هتحس أن ده مش الطبيعي.
الفكرة الخامسة اللي ممكن تكون بتعملها هو أنك تجرب الموضوع ولكن مع حيوانات أليفة. عندك بقى كلب في البيت، عندك قطة، وول أنك تجرب أنك تتكلم معاهم وأنت بتعمل أي كونتاكت. في الغالب يعني الكلاب في حد ذاتها مش بتعرف تعمل أي كونتاكت لأن هي بتحس أن هي أقل من الماستر بتاعها أو من اللي هو السيد بتاعها. وبالتالي تلاقي الكلب لو أنت بتتكلم معاه ممكن يكون بيبص تحت. طبعاً مش هينفع أقول للناس ما تبقاش كلب.
الخمس أفكار اللي فاتوا دول ممكن يخللوك تبدأ أنك تمارس فكرة الاتصال البصري. طب تعال ناخد خمس أفكار كمان ممكن تساعدك بقى أنك تطور الموضوع أكتر مع الوقت.
الفكرة السادسة اللي موجودة هي أنك مع الوقت تبدأ تبص لهذا المثلث. المثلث بين الحواجب والمناخير. ده مثلث ممكن يكون بيساعدك أنك تعمل اتصال بصري لفترات أطول من غير ما أنت تحس أن أنت متضايق أو أنت مش عارف تشوف في أنهي عين بالضبط يعني أو مش عارف تعمل الموضوع إزاي.
الفكرة السابعة اللي موجودة هي فكرة أن أنت تعمل الاتصال البصري بقاعدة الـ 50-70. أن أنت لما تكون بتتكلم تعمل اتصال بصري بنسبة 50%، ولما تكون بتسمع تعمل الاتصال البصري بنسبة 70% من الوقت اللي أنت بتتكلم فيه أو بتسمع فيه ده.
الفكرة الثامنة، لو لقيت نفسك متشتت ما بين العينين وعمال بقى تعمل اتصال بصري كده ما بين اتنين عين للشخص اللي قدامك ومش عارف حتى تبص للبريدج اللي هو أو هذا المثلث اللي موجود، حاول أنك تركز على عين واحدة. الموضوع هيمشي أحسن ما ما يكونش فيه اتصال بصري خالص أو أحسن ما تكون عينيك رايحة وجاية في كل الاتجاهات.
الفكرة التاسعة، فكرة كده اسمها "ثلاث ثواني من التحدي" في أن أنت تكون بتعمل اتصال بصري في الأوقات الصعبة. عارفين أكتر وقت إحنا بنحاول أن إحنا نتجنب فيه الاتصال البصري لما إحنا نكون مثلا بنطلب حاجة أو نكون عايزين نتكلم على حاجة مهمة جدا بالنسبة لنا. تلاقي مثلا واحد عايز يقول لمديره هو أنا هترقى إمتى، فيروح يقول له "بقولك إيه يا ريس هو أنا مش هترقى؟" ويبص في كل حتة ما عدا عين الريس اللي هو بيكلمه ده. أو تلاقي واحد عايز يقول لخطيبته أو للبنت اللي هو بيحبها أن هو بيحبها، فيروح يقول لها بكل الطرق إلا أن هو يبص في عينيها ويقول لها "أصلاً".
فالقاعدة دي بتقول أن أنت في ثلاث ثواني محتاج أنك تركز فيهم قوي وأنت بتقول الحاجة المهمة جدا، أنك تكون عامل اتصال بصري. واحد، اتنين، تلاتة. وأنت في الثلاث ثواني دي أنت بتقول الحاجة اللي أنت عايز تقولها.
الفكرة رقم 10، واللي هتساعدك أن أنت تطور برضه فكرة الاتصال البصري هو أنك تحاول تعمله في الأماكن العامة. يعني مثلا المرة الجاية كده وأنت رايح تطلب أكل أو رايح تطلب قهوة أو أياً كان، حاول أنك وأنت بتتكلم مع الناس الموجودين في الأماكن العامة دي أنك تعمل اتصال بصري معاهم. دول كده كده ناس أغراب، ممكن ما يشوفكش تاني وممكن يعني لو أنت عملت حاجة غلط تعدي. فحاول أنك تدرب مع الناس الأغراب دول، وده هيساعدك لما تتعامل مع الناس الحقيقية اللي موجودة في حياتك.
الخمس أفكار اللي فاتوا دول هيساعدوك بشكل أساسي أن أنت تعمل إيه؟ أن أنت تطور هذه المهارة. في خمس أفكار تالتة بقى هيساعدوك أن أنت تكون متقن لهذه الفكرة اللي هي الاتصال البصري.
فمثلاً الفكرة رقم 11 هو أنك بقى تربط الاتصال البصري مع فكرة زي الفويس توناليتي أو فكرة زي الطريقة اللي أنت بتتكلم بيها أو حتى في بعض الأحيان مع وقفاتك. عارفين اللي هو مثلا دلوقتي أنا بتكلم معاكم كده وبعد كده قمت وقفت كلام. فكرة أن أنا أمكس أن أنا ألعب ما بين الاتصال البصري وما بين كلام أو صمت وما بين نبرة صوت بتعلى أو بتوطى. كل الكلام ده لما بشغله مع بعض ببقى أنا بجد حريف.
الفكرة رقم 12، ودي فكرة هتساعدك أن أنت تكون مؤثر. حاول أنك تتكلم قدام كاميرا وتسجل لنفسك، زي مثلا كاميرا الموبايل السيلفي بتاعك. حاول أنك تتكلم وتبص في الكاميرا وحاول دايما تشوف فين العدسات اللي أنت ممكن تكون بتركز عليها.
الفكرة رقم 13، حاول أنك تستخدم فيشيال إكسبريشنز أو تعبيرات وجه ليها علاقة بالعينين، زي مثلا أنك تفتح عينك أو تقفلها، أو أنك تلعب بالطريقة اللي عينك بيها بتعبر عن مشاعرك. زي مثلا "دي كانت حاجة حلوة جدا" أو "أنا آسف أن أنا عملت كده".
الفكرة رقم 14، ارجع بقى للسبب الحقيقي اللي بيخليك مش عارف إزاي أنك تبص للناس لفترات طويلة أو مش عارف تعمل اتصال بصري حقيقي. يمكن يكون قلق من المجتمع اللي أنت ممكن تكون عايش فيه لهذا المجتمع بالتحديد، أو ممكن يكون قلق فيك أنت شخصياً. ارجع بقى كده للسبب الحقيقي واعرف هو أنا مشكلتي فين؟ من الآخر ارجع كده واعرف هو أنت قلقك ده جاي من إيه؟ التوتر الاجتماعي ده جاي من إيه؟ هذه الرهبة الاجتماعية جاية من إيه؟ وعلى فكرة إحنا بناخد كل هذه المواضيع في برنامج الكوتشينج.
الفكرة بقى الأخيرة اللي هتساعدك بقى أن أنت تكون بجد ماستر في هذا الموضوع هو أنك تتعود تتكلم مع أكتر من حد وتعمل بقى معاه اتصال بصري زي الناس اللي بتكون بتدي محاضرة لأكتر من حد قدامهم، فبيقسموا المكان ممكن يكون بالمربعات، مربع قدام ومربع ورا ومربع الناحية التانية برضه قدام وورا، أو بيحاولوا يلفوا بعينيهم في شكل دايرة مع كل الناس اللي ممكن تكون موجودة في هذا المكان. فكرة أن أنت تكون بتمارس البابلك سبيكينج أو أن أنت تكون بتتكلم قدام ناس كتيرة مع أن أنت تكون مركز على فكرة زي الاي كونتاكت. الفكرة دي في حد ذاتها بتخليك مع الوقت تبقى أنت الماستر في هذا الموضوع. تعرف بقى بسهولة جدا لما تتكلم مع شخص واحد تعرف أنك تركز معاه وتتكلم معاه من غير ما يكون أنت عندك بقى الخوف والقلق ده، وهتكون عارف بالضبط إزاي هتبص.
في النهاية، أنا عايز أقول لك أن هذا الموضوع هو مجرد مهارة، والمهارات محتاجة أن إحنا نكون بنعرف نعملها إزاي وبنطبقها في حياتنا بشكل كبير ويكون عندنا خبرة فيها مع الوقت. فلو أنت عجبك أي فكرة من الأفكار اللي إحنا قلناها النهارده دي، ما تنساش أنك تكتبها لنفسك كده في نوت على جنب. ما تنساش أنك تحطها في الريمايندرز بتاعتك وحاول دايما أنك تعمل كل الكلام ده كل يوم لحد ما تتعود عليها.
في النهاية، أنت ممكن تكون بتفوت فرص كبيرة قوي لأن أنت مش قادر تتواصل مع اللي قدامك بشكل كويس، ويمكن يكون أول طريقة للتواصل هو أن إحنا أصلاً بنشوف بعض.
لو عجبتك الحلقة دي، ما تنساش تعمل لايك للحلقة واكتب لنا في التعليقات اللي تحت إيه أكتر حاجة سمعتها وقالت معاك. وما تنسوش برضه تعملوا شير أو مشاركة للكلام ده عشان تساعدوني أن إحنا نوصل الكلام ده برضه لناس تانية. شكراً لكم وأشوفكم على خير الحلقة الجاية إن شاء الله. كان معكم مايكل راشد، برنامج الزيتونة.