روسيا تدخل الحرب و ضربة ضخمة لامريكا و السعودية تتحرك لانهاء ايران

لا، كده احنا دخلنا في حته خطيره جدا. أول اعتراف أمريكي إن روسيا ضربت الجيش الأمريكي، ده كلام خطير جدا. بس أنا عايز أقول لك حاجة قبل ما نخش في التفاصيل، حاجة قلتها لك من زمان جدا، قلتها لك بعد 7 أكتوبر على طول.

تخيل إن حرب إيران الحالية السبب الرئيسي فيها هي روسيا. معقولة؟ ده إيران حليفة روسيا. أنا عايزك بس تسمع الكلام ده عشان الكلام ده هينور لك حاجات كتيرة قوي وهيرتب لك الأمور كلها. بعد أكتوبر قلت لك إن اللي حرك إيران وحرك الحركات منها، حماس وغيره، يعملوا الضربة ضد إسرائيل كانت روسيا. والهدف هو غرس أمريكا في منطقة الشرق الأوسط، مستنقع يتصنع لأمريكا، زي ما أمريكا صنعت مستنقع أوكرانيا. والحقيقة روسيا نجحت نجاح باهر. بدأ الأمر إن أمريكا بدأت تنشغل بالكامل في حرب الشرق الأوسط وسابت أوكرانيا. وهنا بعد ما كانت روسيا متأخرة في أوكرانيا، اتقدمت وتقريبا تمكنت من أوكرانيا.

بس مش بس كده، حالياً حصل ضربة لإيران ودخلت أمريكا بجيشها بكل قوتها وغرزت. وهنا الروس عايزين الأمريكان يغرزوا أكتر. بس الروس ما يقدرش ينزلوا بجيش على الأرض أو حتى يبعتوا معدات. بس عندهم اللي أقوى من كده وعملوه. والتقارير طالعة من أمريكا إن إحنا اتضربنا من روسيا. 7 أكتوبر هو السبب الرئيسي في ضرب إيران، وكان خطة 7 أكتوبر برعاية روسية. ده غير بقى مكاسب بوتين وروسيا من ضرب إيران. مش عايز أقول لك بوتين بيزغرط، عمال يزغرط دلوقتي في روسيا فرحان وسعيد جدا.

النهاردة يا جماعة عندنا حلقة ثقيلة جدا هتكشف لك السيناريو كله وهتبين لك إزاي روسيا بهدوء شديد بتسحب مكاسب من الأمريكان لا تحصى. في البداية بس بطلب منك تعمل إعجاب على الفيديو وتشاركه. لو حياك جديد اشترك عندي وأكيد مش هتندم. ويلا نبدأ على طول.

خلينا نبدأ ومع واشنطن بوست اللي بتقول لك كلام خطير جدا. هي نفسها بتقول لك الموضوع دخل في مرحلة خطيرة وإن في دولة كبرى، روسيا، بدأت تبعت كل تحركات الأمريكان. مش التحركات العادية. أصل أي حد يا جماعة ممكن يجيب التحركات العادية. يعني إيه؟ النهارده قمر صناعي يجيب لك الكرة الأرضية. لكن التفاصيل الدقيقة دي ما تقدرش عليها غير دول ثقيلة، دول كبيرة. فهي بتقول لك إن روسيا أدت للإيرانيين التفاصيل الدقيقة اللي أدت إن في ضربات دقيقة جدا حصلت، بالذات موضوع الرادار ضد أمريكا. طب ده إيه هدفه؟ هدفه إنه يعطل أمريكا ويخلي الحرب الإيرانية تطول على قد ما تقدر. لأن كل ما الحرب الأمريكية تطول روسيا بتكسب مكاسب غير عادية. حد هيقول لي طب ما إيران بتدمر؟ ولا هيفرق مع روسيا. المهم المكاسب اللي تاخدها سياسياً واقتصادياً وإزاي هتتمكن من أوكرانيا بسبب إيران. اللي قال الكلام ده للصحيفة الأمريكية تلات مسؤولين كبار لهم علاقات بالمخابرات الأمريكية. دي كلام مخابرات مش لعب عيال.

وخلي بالك الجيش الأمريكي طلب من المخابرات الأمريكية يبعتوا جيش مخابرات للشرق الأوسط يقعدوا 100 يوم عشان يواجهوا اللي بيحصل هناك. اللي بيحصل من خلال حرب مش بين إيران وأمريكا، حرب مخابراتية بين أمريكا وروسيا. التقرير بيقول لك من أول يوم في الحرب بدأت روسيا تزود إيران بتفاصيل خطيرة جدا، تفاصيل مخابراتية عن كل تحرك للقوات الأمريكية، إن كان في البحر أو في البر أو حتى في الجو.

خلي بالك بيسألوا وزير خارجية إيران: "هي روسيا والصين بيساعدوكم؟" قال: "آه، بيساعدونا بالسياسة وأمور أخرى." خدت بالك من كلمة "أمور أخرى" دي؟ فروسيا بتعمل دور هام جدا. خلي بالك روسيا عندها ثأر ضد أمريكا. هتقول لي إزاي؟ لأن أمريكا عملت نفس الدور ده مع أوكرانيا وكانت بتزود أوكرانيا بكل حاجة عن روسيا، وكلها أمور استخباراتية. وده أكتر حاجة ساعدت أوكرانيا في الحرب الطويلة مع روسيا.

الغريب بقى لما سألوا وزير دفاع أمريكا عن روسيا والصين، تحب تقول لهم إيه؟ قال لك: "أنا ما عنديش حاجة أقولها لأن مالهمش دور مؤثر." ده اتقال في العلن، لكن في الكواليس الكلام حاجة تانية خالص.

لكن الصين بقى في وضع مختلف. المسؤولين الأمريكان بيقولوا الصين ما بتدخلش خالص في الحرب دي، ولا بمعلومات ولا حتى بمعدات. وبتكتفي بالعلاقة القوية بينها وبين إيران. وطبعاً الصين يهمها جدا العلاقة مع أمريكا. أنا فهمتك قبل كده يا جماعة أقوى علاقة في العالم هي الأمريكية الصينية. الاثنين دول ما ينفعوش يضربوا بعض. حد بيقول لي مثلاً: "أصل أمريكا يا جون عايزة تتحكم في الطرق وتتحكم في البترول علشان تقطعه عن الصين." الكلام ده غلط. أمريكا عندها مشكلة كبيرة جدا لو قطعت البترول عن الصين. ده أمريكا أول واحدة هتشتغل عشان تبعت البترول للصين. كمان الطرق؟ ليه؟ لأن اقتصاد أمريكا في جزء كبير منه بيعتمد سلاسل الإمداد اللي بتيجي من الصين. ده لما سلاسل الإمداد دي تتعطل، بس اتعطلت قبل كده شفناها في كورونا، اقتصاد أمريكا بيتضرب وبيحصل تضخم. فعلاقة الدولتين دول يا جماعة علاقة زواج كاثوليكي. أمريكي لازم تفهموا ده كويس جدا.

الأخطر بقى إنهم بيقولوا إن روسيا هي اللي قتلت الست جنود في الكويت. وقالوا إن الضربة دي كانت ضربة موجهة وضربة حساسة جدا وما ينفعش تخرج الإحداثيات بتاعتها غير من دولة كبرى. يعني من الآخر بيقولوا مش إيران اللي قتلت الجنود، اللي قتلوا الجنود هم الروس. خلي بالك وده كلام خطير جدا وده تفكير واضح إن هو تفكير روسي.

في ناس قالوا لواشنطن بوست إن في مشكلة كبيرة جدا في استنزاف الأسلحة الدفاعية الأمريكية وده ممكن يعمل مشكلة كبيرة جدا لأمريكا. وفكرة اللعب من خلال استخدام أسلحة رخيصة جدا إيرانية بضرب ضربات كبيرة جدا بالذات جوه الخليج. خلي بالك الخليج ده هيبقى مشكلة كبيرة جدا بعد فترة شوية. وإنك تخلص على أسلحة الدفاع الجوي مش مشكلتها على فكرة إن هي غالية. الخليج يدفع 100 مليار مش فارق معاه. مشكلتها إن تصنيعها صعب وبياخد فترة طويلة. يعني كمان مهما دفع الخليج توفيره مش بالكم اللي مطلوب في حرب ممكن تطول. وأنت عندك دولة تانية اسمها إيران عندها الطيارات المسيرة دي وهي الخطرة اللي على الخليج على فكرة مش الصواريخ زي ما أنت عايز. طب لما يحصل فجأة إن الخليج اللي كل يوم يوقع له 100 و200 و300 و500 طيارة مسيرة ما يبقاش في حاجة بتوقع؟ إيه الحل؟ تخيل إن الحل هيجي من أوكرانيا، عدوة روسيا. ليه؟ لأن أوكرانيا كانت عندها نفس المشكلة مع روسيا. روسيا كل شوية تغرقها بطيارات مسيرة، تغرقها بطيارات مسيرة وهم يضربوها ضربات غالية تتكلف. راحوا عملوا إيه لأوكرانيا؟ راحوا اخترعوا طيارة مسيرة صغيرة تطلع تطلع تضرب الطيارة المسيرة. فإذا الحل إيه؟ إن لازم يكون عند الخليج عندهم أسلحة تكون رخيصة لضرب الطيارات المسيرة. يعني إيه رخيصة؟ وكمان سهل تصنيعها. يعني أنت عندك مثلا 100 ألف طيارة مسيرة رخيصة بتضربها عليا؟ أنا هجيب لك برضه 100 ألف طيارة مسيرة بتضرب الطيارات دي. ده الحل. عارفين يا جماعة المثل اللي بيقول لك "الحاجة أم الاختراع". ده اللي حصل مع أوكرانيا. هم عاملين ضربوا بطيارات مسيرة فاخترعوا الطيارات اللي تضربها.

بس عارفين إيه المشكلة الكبرى اللي ممكن تقابل إيران لو الدفاع الجوي قل؟ ده الكلام اللي قاله ترامب. ترامب قال لك إيه؟ قال لك: "أنا هبيد إيران." طب هو فعلاً يقدر يبيد إيران؟ أيوه. الأسلحة الأمريكية والضربات اللي معاهم والطيارات والقاذفات والحاجات دي كلها اللي موجودة تقدر تبيد إيران. بس إزاي؟ ضربات بقى غير محسوبة وهنا هيموت أعداد كبيرة جدا من المدنيين. لكن أمريكا ساعتها هتشوف إيه؟ إن هي مش هتستحمل الضربات لأن هي ما عندهاش دفاع جوي قوي، بالذات في دول الخليج. فهتضطر ساعتها تتـوحش أكتر ما هي متوحشة ونشوف أصعب موقف للشرق الأوسط.

تعالى أوريك إزاي بوتين هو أكتر مستفيد من الحرب دي. أمريكا فجأة أعلنت عن إعفاء للهند 30 يوم إن هي تاخد بترول من روسيا. والبترول ما شاء الله بقى دخل في 90 يورو. فانت بتتكلم عن أسعار فوق جدا. وفي نفس الوقت إيران واقفة والخليج واقف والدنيا واقفة. ما بقاش في غاز في العالم ولا بترول غير عند الروس. أنا بقول لك غصب عن بوز الأوروبيين هياخدوا من بوتين. بوتين يقول لك: "أنا مش هدي الأوروبيين بس." هو هيدي وهيدي بكميات ضخمة جدا. هو في أزمة اقتصادية كبيرة. فجأة اتفتح له طاقة القدر في رمضان أهو. يلا خش خد يلا حبيبي هتلم مليارات وتبدأ تحط رجل على رجل. ده غير إن هو هياخد أوكرانيا. فاللي يقول لي إن هو مش مبسوط بحرب إيران يبقى مش فاهم. خلي بالك إيران منافس لروسيا في الطاقة. فانت بتتكلم حالياً عن مكاسب خلال الشهور اللي جاية. روسيا تعوض كل مشاكلها. جمعية سولوديز اللي هي أكبر جهة تأمين في العالم دي موجودة في إنجلترا بتقول لك إن في 1000 شاحنة محبوسة في الخليج مش عارفين يخشوا. 1000 شاحنة. أنت عارف ده معناه إيه؟ إن البترول هيتعطل في العالم وارتفاع أسعار غير عادي لروسيا. طب روسيا بتبيع البترول بأسعار أرخص؟ آه، بس النهارده هتقول له الصين عايزة بترول؟ لا ادفعي بقى، ادفعي السعر الحقيقي وادفعوا بـ 90. الهند نفس الكلام. لأن ما فيش غير عندي. ده الدنيا كلها واقفة. وسيبك من فكرة إنهم بيعدوا السفن الصينية. هو لو قفل لازم يقفل للكل. ولو الحرب دي طولت المكاسب اللي هياخدها بوتين مهولة.

طب ليه أمريكا قالت للهند خدي بترول لروسيا؟ هي أمريكا عايزة يعني تفيد روسيا؟ لا. أمريكا ما بتعملش حاجة غير لما تستفيد منها. ما أمريكا عارفة كمان إن لو وقفت بترول روسيا، أسعار البترول هتغلى أكتر. فتحت للروس والروس أكبر منتج للبترول. يلا ادي للصين، ادي للهند، مشي الأمور عشان الأسعار تهدى. مجرد بس مطران بيقول أنا هسمح للروس ببيع البترول والغاز الأسعار هتهدى. فهو بيلعبها لصالحه برضه خلي بالك. فافهم اللعب عامل إزاي. ما هو المشكلة إن كله متشابك في بعضه.

بس تعال أقول لك بقى كلام صادم جدا. معد الحرب الأمريكي بيقول إن الضربات اللي اتضربت على دول الخليج ثمان أضعاف الضربات اللي اتضربت على إسرائيل. يا نهار أبيض. طب بفكرك كده مين صاحب فكرة ضرب الخليج؟ مين اللي دماغه مخابراتية وابن جنيه؟ حد هيقول لي لما إيران ضربت الخليج هي جيش العالم ضدها وعملت عمل غلط؟ لا. إيران عرفت توجع أمريكا كويس قوي. ضرب الخليج ده لوحده بيعلي أسعار كل حاجة في العالم وهياثر على الأمريكي بعد شوية. خلي بالك لسه الأمريكي ما اتأثرش وأمريكان هناك مش في دماغهم الحرب. لكن أول ما تلاقي فرق بقى كبير في أسعار البنزين، ما برضه ترامب مش سهل. مظبط الدنيا هناك هتلاقي الدنيا بدأت تتغير. روسيا شايفة إن ضرب الخليج وقفل مضيق هرمز ووجود الأمريكان وإني أطول الحرب من خلال إني أدي معلومات لإيران، ده كله ينصب في مصلحة إيران رقم واحد.

عارفين أغرب حاجة في الحرب دي إيه؟ أكتر اثنين استفادوا من الحرب مش في دماغك إنهم دول. أول بلد هي روسيا. ثاني بلد إسرائيل. ليه؟ إسرائيل مظبطة نفسها قبل الحرب. حرب الناس قاعدة تحت الأرض شوية مباني بتقع مش مشكلة بعد كده أبنيها سهل جدا. في نفس الوقت أنا دخلت بعمل اللي أنا عايزه في جنوب لبنان والطحن شغال هناك بقضي على أعدائي. أنا عايز أقول لك إن حصل إن البورصات الإسرائيلية علت لأن الناس شايفة إن اللي جاي فيه إسرائيل مكاسب وسلام في الفترة اللي جاية لإسرائيل بعد ما الدنيا كلها تهدى. ففي مكاسب بتعملها إسرائيل وبتعملها مين؟ روسيا. أكتر اثنين خسرانين في رأيي إيران وأمريكا. وده الغريب في الموضوع. يعني تحس كده إن الحرب دي ما بين أمريكا وإيران لصالح دول أخرى. لكن اللي اكت منهم كلهم خسران هي دول الخليج. خلي بالك دول الخليج الخزانات بتاعتها بتتملي. يعني كم يوم يقول لك هوقف الإنتاج ودي كارثة. كارثة لدول الخليج وللعالم كله. ومين اللي هيستفيد ومين اللي هيطلع الإنتاج؟ تاج الروس بس.

الإمارات بقى قررت تضرب إيران في مقتل. وول ستريت جورنال بتقول إن الإمارات بتفكر تجمد أصول إيران. ولو أنت عندك فكرة إن إيران بعد العقوبات كانت واخدة الإمارات، دبي بالذات كمركز ليها للتعامل مع الخارج، فيعني إيه الكلام ده؟ يعني الإمارات لو جمدت أصول إيران، وقفت تحركاتها اللي من خلال دبي، هيحصل أزمة اقتصادية مرعبة لإيران أكتر ما هي في أزمة أصلاً. وبالتالي ممكن تشوف إن حتى السلع مش موجودة في إيران وتلاقي الناس مش لاقية حتى الأكل. لأن كل التعاملات اللي كانت بتعملها إيران مع الخارج كانت من خلال دبي. ده مش كده وبس. الإمارات بعتت تحذير خطير لإيران وقالت لها إن لو ضرباتك استمرت أنا هجمد الفلوس وكمان هجيب الشركات بتاعتك كلها اللي هي وجهة ليكي اللي بتبعد عن العقوبات وأكشفها للعالم كلها وأقول إن دي شركات تعمل لصالح الحكومة الإيرانية وساعتها هتبقى العقوبات أقوى بكتير وأنت ساعتها مش هتعرفي تدخلي حتى الأكل، حتى احتياجاتك اليومية للدولة الإيرانية. ده غير بقى إن في علاقات قوية جدا تجارية ما بين الإمارات. الإمارات أكتر دولة بتتعامل مع إيران. لكن ممكن إيران تعتبر ده إعلان حرب وتضرب الإمارات ضربات مميتة. بقول لك الوضع في دول الخليج حساس جدا. إن أكتر الدول القلقان عليها الإمارات وكمان الكويت. الكويت وضعها صعب جدا.

طيب ده الشغل اللي بتعمله روسيا والشغل اللي بتحاول ترد بيه الإمارات على إيران. إسرائيل بتعمل إيه؟ في 50 طيارة إسرائيلية دخلت وضربت مخبأ هو الأقوى والأخطر داخل إيران. المخبأ ده بيقولوا عليه إن هو محصن جدا في القيادة كلها اللي موجودة داخل إيران. وطبعاً بعد اللي حصل وموت المرشد أكيد قاعدين فيه وبيقول لك تم تدميره. طب مين اللي مات فيه؟ خلي بالك الوضع في إيران فيه لخبطة شديدة. لحد هذه اللحظة مش عارفين يعلنوا مين المرشد الجديد. لأن لازم يحصل اجتماع. في نفس الوقت هم خايفين إن هو يعلن النهارده المرشد اسمه كذا، بكرة يكون مقتول. نيويورك تايمز بتقول لك إن موضوع إعلان المرشد مش مشكلته سبب سياسي أو فني. مشكلته سبب أمني. لأن ترامب قال لك: "المرشد ده لو جه مش على مزاجي هنقتله." وليهم حق بصراحة. أنا من رأيي ما يقولوش اسمه. تخيل أنت إعلان عن اسم المرشد تاني يوم يتقتل؟ هتبقى فضيحة كبيرة جدا لإيران وهتهز إيران وهتهز الشعب الإيراني كله.

بدأ الكلام يروح على المجتبى خامنئي وده عمره 56. أنا ابن خامنئي. وهنا بقى على طول ترامب طلع قال لك: "ده شخص ضعيف ومش على مزاجي وأنا لازم أختار مين اللي هيكون المرشد أو رئيس دولة إيران." تختار؟ مش كده وبس وزير الدفاع الإسرائيلي قال لك: "لو تم تعيينه هيكون هدف لينا." وكلنا عارفين إن في تمكن في الأرض لإسرائيل إن كان من خلال عملاء أو من خلال قوة كبيرة جدا وهي قوة التكنولوجيا. فانت حالياً في وضع صعب مش عارف تختار حتى حاكم إيران. خلي بالك لو تم اختيار مجتبى ده هيدل إن التيار المتشدد في إيران لسه هو المتمكن وهيدل كمان إن هم بيتحدوا أمريكا. بس الخوف إن يتم قتله.

بصوا ترامب بيقول كلام وعكسه. الناس تقول لك: "أصل هو كداب، أصل هو عنده ربع ضرب، أصل هو مجنون." يا جماعة دي سياسة. هي دي سياسته. قال لك ممكن قوي نعمل حرب برية فيخلي الجيش الإيراني يتحرك ويفكر ويضرب هناك ويروح على الحدود ويظبط نفسه ويعمل تحركات كبيرة ويرجع تاني يقول لك: "لا، الحرب البرية دي مالهاش لازمة خالص دي مضيعة للوقت." زي ما قال. الكلام ده في مقابلة مع الـ NBC. هو مش راجل كداب أو هو غاوي كذب أو هو بيتراجع أو متخلف. هو بيلاعب الإيرانيين، بيلاعب العالم. بصوا يا جماعة سياسة ترامب الخطيرة في رأيي إنك أنت عمرك ما تعرف هو هيعمل إيه. هي دي سياسته من أول يوم جه فيه. وده على فكرة سياسة كل رجل أعمال في العالم. رجال الأعمال لما بيتنافسوا مع بعض وأنا عندي خبرة في الموضوع ده كويسة قوي. دايماً بيلعبوا بعض. اللي هو فكرة إيه؟ أنا داخل مناقصة فهطلع منها وأروح هنا. ألاعبك طول الوقت وأخليك أهم حاجة ما تعرفش الخطوة اللي جاية هتكون إيه. فدي سياسته إن أنا ألخبطك طول الوقت ما تعرفش أبداً أنا هعمل إيه.

أنا أعتقد إن ترامب لو هيخش الحرب دي بري هيستخدم الأكراد وممكن يستخدم دول تانية زي أذربيجان وممكن يستخدم الجيش الإسرائيلي. لكن عمره ما هيستخدم الجيش الأمريكي. هتقول إزاي؟ طب هم الإسرائيليين هيقبلوا ويخشوا بري والأمريكان لأ؟ أه خلي بالك الأمريكان ضد الحرب البرية بسبب العراق. والأمريكان لو ترامب دخل حرب برية هيقلبوا الدنيا. لكن إسرائيل لأ. لأن 70% من الشعب الإسرائيلي وتقريباً ده كل اليهودي اللي هناك لأن فيه عرب مع قرار الحرب وهيقبلوا قوي إنهم يخشوا بري داخل إيران. وخلي بالك إسرائيل كتير قوي دخلت بري في كل المنطقة بتاعتنا. فدخولهم بري مش هيكون مشكلة كبيرة لنتنياهو زي دخول بري أمريكي بالنسبة للشعب الأمريكي مع ترامب. فلازم تفهم اللعب. هل في حرب برية؟ أه ممكن قوي. بس مش بالجيش الأمريكي. وخلي بالك إن أذربيجان اللي هي تعتبر حليف إسرائيل الأول في المنطقة اتكلمت إن هي هتعمل ضربات ضد إيران. وأذربيجان هتكون الأرض اللي هيكون فيها الجيش الإسرائيلي لو فكر يخش. أنا بقول لك لو فكر. فدخول جيش أمريكي في الحرب هتبقى غباء من ترامب وترامب مش عبيط. لكن إحنا شايفين إن إسرائيل بتسحب 100 ألف جندي للاحتياط. ممكن الفترة اللي جاية دي تظبط جنوب لبنان وتفكر إن هي على الأقل تشارك في دخول بري داخل إيران.

الحقيقة من أكتر الأمور اللي بتخوفني. لأن أنا بشوف إن دول الخليج دي دول ناجحة جدا. الأمراء هناك بيخافوا على الشعوب بتاعتهم وعملوا نجاح كبير جدا. هو ضربات صعبة لدول الخليج وأنا بصراحة بعز جدا دولة الكويت. هتقول لي ليه؟ ده أنت زمان كنت بتتخانق معاه وكنت بتتخانق مع الإخوة الإخوان اللي فيهم. لكن لما جه الأمير مشعل وأيديه قوية وقدر يلم الناس هناك ويلم الدنيا هناك ويلم الإخوان ويظبط البلد الوضع اختلف تماماً. وأنا هكون حزين جدا لو حصل أي مشكلة لدول خليجية وبالأخص الكويت. طيب ليه في خطر على الكويت؟ لأن في ميول غير عادية في العراق لإيران. وإيران ممكن تقول لك: "أنا عايز أولع الدنيا، عايز أخربها خالص." فيفكروا إن هم يعملوا حتى هجوم بري على الكويت. ودي هتبقى كارثة. لو حصل حاجة زي كده يا جماعة مصر ما ينفعش تسكت. زي ما قبل كده وقفنا مع الكويت لما صدام دخل. لو حصل احتلال على الأرض أو محاولة احتلال على الأرض لأي دولة في منطقة الخليج. أنا بقول لك مصر هتتحرك. فانت بتوسع الموضوع بطريقة غير عادية.

في النهاية يا جماعة عندي ليكم سؤال: هل ممكن إيران توسع عملياتها في الخليج؟ هل ممكن الأمر يصل لتحركات برية داخل الخليج؟ الكلام ده خطير جدا وصعب. أنا عارف بس ما فيش حاجة في الحرب دي ممكن ما تحصلش. في النهاية بشكركم وأشوفكم على خير في لقاء قادم إن شاء الله. مع السلامة.