إعادة ترتيب

تقبل الناس زي ما هم، لكن حطهم في المكانه اللي بينتموا إليها. ما تشتكيش، ما تقولش أصل فلان عامل إزاي وفلان بيتصرف إزاي. شايفه مش جدع، حطه في منطقة التسلية وقعدة الصحاب وخلاص. شايف دمه تقيل، ما تسافرش معاه. معرفة خير سطحية، أنا أفيده وهو يفيدني، وانتهى.

فلان ده ما بيسألش عليا زي ما أنا بسأل عليه، مش مهتم يكون أقرب صديق ليك، سيبه. خد المسافة اللي هو حابب ياخدها، نتقابل في الأعياد. لست عليهم بمسيطر. اللي يبادلك حماسك، اللي يبادلك طاقتك، اللي يبادلك اهتمامك، على العين والراس. واللي مش بيبادلك، حلو برضه، عايزينه ليه؟ نتعصب بدون مشاعر سيئة، بدون ما أزعل منك. لو عملت معاك موقف ولقيت المقابل مش قد التوقعات، حلو جدا. ماعملش بقى الموقف الثاني والثالث والخامس والسابع، وأرجع أشتكي وأقول ده مش بيبادلني. ما هي باينة من أول مرة.

إعادة ترتيب. كل الناس بتدخل حياتنا بشكل سطحي، وبياخدوا ترقيات حسب المستجدات. لو أنا استعجلت وأديت إنسان مكانة عالية جدا، ما يصحش أبدا. ده أنا ألوم نفسي على سوء تقديري، دي غلطتي مش غلطته. احنا كل اللي نقدر عليه نختار الناس يفضلوا في حياتنا ولا يمشوا، لكن ما نقدرش نجبرهم يلعبوا أدوار معينة مناسبة لتوقعاتنا وعلى مقاسنا.

ما ينفعش أروح لشخص كده وأقول له أنا عايزك أنت شريك حياة، عايزك في حياتي الدعم والسند. مش بالعافية، يمكن هو ما عندوش ده، دور أكبر من اللي يقدر يقدمه. واحنا كل اللي علينا نشوف العلامات ونحدد الأدوار، وكلهم مرحب بيهم في حياتي. كل واحد منهم ليه وقته وأهميته، وهم كمان بيحتاجوني في مساحات مختلفة من حياتهم.

لما بتبدأ تتعامل مع نفسك على أنك المسؤول الأول عن توقعاتك ومشاعرك، وتبدأ تحط كل إنسان في المكانة اللي على مقاسه، بتكتشف أنك كنت وجع قلبك كتير على الفاضي.