٧ علامات انك مكتئب ولست حزين

في ناس بتفتكر إن الاكتئاب معناها إن انت تكون زعلان أو مهموم أو مش طايق لنفسك أو مش طايق الحياة أو مش طايق شخص معين، ولكن الحقيقة ممكن تكون أعمق من كده. في الحلقة دي هنتكلم مع بعض عن سبع علامات ممكن تقول إن انت بتعدي باكتئاب، والعلامات دي هي من كتب ومن أبحاث غرضها الأساسي التوعية، مش غرضها إننا نقوم بدور المختص النفسي. ولكن غرضها إننا نشاور لو في مشكلة بجد أو في حاجة من الحاجات اللي إحنا هنتكلم عليها النهارده إن انت تفكر إن انت بجد محتاج تكون بتتابع مع مختص عشان تعرف بجد إزاي تتعامل مع هذا الاكتئاب.

وحتى لو انت مش حاسس إن العلامات دي موجودة عندك دلوقتي أو ما فكرتش في هذا الموضوع، فيمكن يكون الموضوع ده مهم جدا ليك في المستقبل لو انت هتتعرض يعني لا قدر الله لأي حاجة من الحاجات دي، أو لو انت شفت حد انت بتحبه وهو عنده نفس الأفكار دي. مشكلة ناس كتير جدا في موضوع الاكتئاب إن هي أصلاً ما بتدركش إن هي عندها اكتئاب، وعشان كده الفيديو ده توعوي من الدرجة الأولى إننا نفكر إن يمكن يكون عندنا هذه المشكلة. لو عايزين تعرفوا أكتر إيه هي السبع علامات، تابعوا مع الحاجة دي كويس جدا من برنامج الزيتونة.

[موسيقى]

السلام عليكم، أنا مايكل راشد، وانت بتشوف برنامج الزيتونة. لو دي أول مرة بتتابعني، البرنامج هنا بقدم فيه كتب دايماً كتير وبنقدم تلخيصات وبنقدم أبحاث علمية غرضها الأساسي هي رفع درجة الوعي اللي عندنا، وغرضها الأساسي هو إننا نغير حياتنا ولو على الأقل بنسبة واحد في المائة للأفضل.

في كتب كتير بتتكلم على المشاكل النفسية اللي إحنا ممكن نكون بنعدي بيها، والحلقة دي هي تجميع على أكتر من كتاب عشان نطلع بهذا الاستنتاج: هل أنا دلوقتي عندي علامة من علامات الاكتئاب ولا لأ؟ وطبعاً كل الكتب اللي هنتكلم عليها النهارده هي كتب كاتبها علماء نفس أو كاتبها دكاترة نفسيين، وهكون حاطط لكم اسم الكتاب عشان لو أنتم عايزين تعرفوا أكتر عنه أو عايزين تقروه بعد كده.

العلامة الأولى اللي موجودة معانا النهارده هي فكرة إن انت مش قادر تستمتع بأي حاجة. والكتاب اللي اتكلم عن هذا الموضوع كتاب اسمه "Feeling Good: The New Mood Therapy" لديفيد بيرنز. بيقول إن من أشهر علامات الاكتئاب فكرة كده اسمها "الانهيدونيا". هو المصطلح اسمه كده: أنهيدونيا. والفكره دي معناها بمنتهى البساطة هو إن انت ما بقتش بتستمتع بحاجات هي يمكن تكون بتخليك مبسوط قبل كده. يعني مثلاً زمان كنت بحب القراءة، ولكن دلوقتي ما بقتش أحبها ولا بقى فارق معايا القراءة. زمان كنت أحب أتفرج على أفلام أو أروح السينما أو إني أقعد مع شخص معين، ولكن دلوقتي ما بقاش الكلام ده كله بيفرق معايا.

العلامة الثانية الموجودة معانا النهارده هي اضطرابات النوم. إن أنا لا إما بنام قليل قوي، لا إما بنام كتير قوي. هو في مرجع حلو جدا لهذا الموضوع اسمه "The Noonday Demon: An Atlas of Depression" لأندرو سلمان. في الكتاب ده شرح فكرة إن الساعة البيولوجية لينا ممكن تكون بتتاثر بالفكره بتاعة الاكتئاب اللي إحنا ممكن نكون بنعدي بيه. ولو انت مش فاهم الساعة البيولوجية، هشرحها لك بشكل بسيط. جسمنا بيفز هرمونات في أوقات معينة في الجسم بتاعنا زي هرمون الميلاتونين عشان ينظم عملية النوم والاستيقاظ، وإحنا بنطلق على هذه العملية الساعة البيولوجية. ففي ناس بتنام بدري، في ناس بتنام متأخر. إحنا لما بنكبر في السن برضه الميلاتونين ده بيتم إفرازه بدري شوية، فبتلاقي إن الناس لما بتكبر في العمر بيميلوا أكتر إن هم يناموا بدري عن إن هم يناموا متأخر. ولكن مش السن بس هو اللي بيغير الساعة البيولوجية بتاعتنا، كمان الاكتئاب بيغيرها. في النهاية، انت بتشوف الموضوع ده إن النوم بتاعك مش منتظم، انت بتنام أوقات كبيرة جدا أو بتنام أوقات قليلة، أو بتنام وبتحس إن جودة النوم نفسها مش كفاية.

العلامة الثالثة ودي علامة هتلاقي ناس كتير جدا بيعدوا بيها هي فكرة فقدان الطاقة والتركيز. "Lost Connections" ده كتاب حلو جدا في موضوع الاكتئاب، وعلى فكرة كنا كاملين عليه من حوالي ثمان سنين تقريباً، وهو كتاب بيشرح إن الاكتئاب ليه أفكار كتيرة أو ليه أسباب كتيرة. وكان من ضمن الأفكار اللي موجودة جوه هذا الكتاب إن لو أنا فقدت التواصل مع التركيز بتاعي أو مع عقلي، فده ممكن يكون سببه الأساسي الاكتئاب. في بعض الأحيان الاكتئاب بيكون سببه اختلال في عناصر ممكن تكون موجودة جوه الجسم، زي مجموعة من الهرمونات اللي ممكن تكون موجودة عندنا، أو زي مواد الجسم بتاعنا بيفرزها عشان يبتدي إن هو يحسن الأداء العام للجسم. انت لو عندك هرمون السيروتونين والدوبامين اختل التوازن بتاعهم، ممكن يسبب لك مشاكل نفسية وجسدية كتير جدا. ساعات بتكون علامة قاطعة إن انت ممكن يكون عندك اكتئاب هو إن انت ما بقتش قادر إنك تركز، أو ما بقاش عندك طاقة إنك تعمل حاجة، مش عشان الاكتئاب نفسه، ولكن عشان السبب الأساسي لهذا الاكتئاب.

العلامة الرابعة ودي برضه علامة قوية جدا هي فكرة جلد الذات. في ناس بالطبيعي بتحب إن هي تلوم نفسها، ولكن جلد الذات بيكون أكبر بكتير جدا في حالات الاكتئاب. وده شرحها دكتور ستيفن سيلسون في كتابه "The Depression Cure". واللي كانت بيتكلم فيها إن الاكتئاب في بعض الأحيان بيكون عامل زي السايكل، وكان هذا الاكتئاب هو كائن عايز يكون عايش جواك، والطريقة الوحيدة إن هو يكون عايش بيها هو إنه يحسسك دايماً إن انت فيك مشكلة، ويبتدي إن هو يخليك تجلد ذاتك. فتفضل انت بقى دايماً في دوامة، دوامة ممكن تكون ابتدت بحدث مش كويس في حياتك، تكمل لـ فكرة جلد الذات، جلد الذات يعمل لك مشكلة، فترجع تاني تحس إن انت الحزن اللي عندك يخليك تبقى مكتئب أكتر، وبعد كده ترجع تاني تجلد ذاتك على المشكلة اللي حصلت، وهكذا. هتلاقي في هذه السايكل أو في هذه الدورة إن جلد الذات بقت فكرة أساسية وبتتكرر دايماً عندك.

العلامة الخامسة. الكاتب عدى بجد بتجربة الاكتئاب، والكتاب اسمه "Reasons to Stay Alive" أو "أسباب تخليك عايش". وهو مات بيتكلم في هذا الكتاب على فكرة العزلة. إن الاكتئاب ابتدى إن هو يخليه يحس دايماً إن هو عايز ينعزل عن باقي الناس، والعزلة دي كانت أكتر الحاجات اللي برضه بتخليه تاني يرجع يحس باكتئاب، شبه شوية الكلام اللي كان موجود في الكتاب اللي قبله، إن هي الموضوع بيتحول لـ فكرة سايكل.

العلامة السادسة الموجودة معانا النهارده هي فكرة تغيير الشهية، سواء أنا بقيت آكل كتير قوي أو بقيت آكل قليل. وهو عامة اضطرابات الأكل اللي إحنا اكتشفناه إن هي برضه بتكون جزء أساسي منها حالتنا النفسية. كان في ترابط ما بين عقلي ومعدتي، والكلام ده على فكرة موجود جوه كتاب برضه اسمه "The Mind-Gut Connection". فهو دكتور أمرد في هذا الكتاب بيقول إن مشاعرنا بتاثر بشكل كبير جدا على اللي إحنا بناكله وبناكله إزاي. فهو في علاقة كبيرة جدا ما بين عقلي وما بين معدتي، ولو أنا فهمت معدتي صح، ممكن ده يكون حاجة تفهمني أكتر عن عقلي.

قبل ما نتكلم على العلامة السابعة والأخيرة، حابب أقول لكم إن إحنا بنقدم برنامج لايف كوتشينج دلوقتي من ذات. طبعاً إحنا كلنا عارفين إن اللايف كوتشينج هو مختلف تماماً عن فكرة العلاج النفسي، ولكن في الكوتشينج إحنا بنقدم دعم لنفسنا عن طريق إننا نفهم نفسنا أكتر ونفهم إحنا واقفين فين دلوقتي والخطوات الجاية فين. في بعض الأحيان إحنا ممكن نكون تايهين أو مش عارفين إيه هي الخطوة الجاية بتاعتنا، وده هو دور الكوتش. لو انت شايف إن انت بتعاني من هذا الموضوع وعايز تدخل البرنامج عشان مش حد يعمل لك كوتشينج، ولكن انت اللي تعرف بنفسك هو إيه الكوتشينج ده وتعمل لنفسك حاجة اسمها سيلف كوتشينج، فممكن تتواصل معانا من خلال اللينك الموجود في الديسكربشن تحت.

العلامة السابعة اللي موجودة معانا النهارده هي فكرة السميات الموجودة في حياتنا، واللي ممكن يكون منها العلاقات السامة اللي موجودة. في كتاب حلو جدا اسمه "Attached"، وده بيتكلم على فكرة التعلق وبيتكلم على أنماط التعلق وإزاي هي ممكن تكون بتاثر على حالتنا النفسية. في بعض الأحيان إحنا بنكون متعلقين بسمات في حياتنا ممكن تكون علاقات أو ممكن تكون حاجات تانية، ولكن كل ما إحنا بنكون متعلقين بهذه السميات، على كلام هذا الكتاب، كل ما ده بيساعد أو بيخلينا ندخل أكتر في حالة من حالات الاجتهاد. حتى برينيه براون في كتابها برضه اللي اسمه "Daring Greatly" كان بتتكلم على إن العلاقات اللي بتخلينا نحس من الخجل من نفسنا أو إن إحنا مش كفاية أو إن إحنا فينا مشكلة، هذه العلاقات ممكن تخلينا نحس بحزن كبير، وهذا الحزن ممكن يوصل لدرجة الاكتئاب. فشكل بسيط جدا لو انت عندك علاقات سامة في حياتك بشكل كبير، مش معناها إن العلاقات السامة إن الناس وحشة، ولكن الانطباع اللي بتسيبه لنفسك بعد تتعامل معاهم بيكون مش كويس. لو ده موجود في حياتك، فممكن نسميهم كده إن دي علاقات سامة. لو العلاقات السامة دي موجودة، فده ممكن يكون بشكل أو بآخر سبب من أسباب الاكتئاب الموجود عندك، وده ممكن يكون هو أصلاً الحاجة اللي تشاور لك وتقول لك: خلي بالك إن انت عندك اكتئاب.

في النهاية، حابب أقول لك إن لو عندك علامة أو أكتر من العلامات دي، فمش الحل إن انت تزعل من نفسك أو تحس إن انت عندك مشكلة كبيرة. أولاً، انت مش لوحدك. كون إن في كتب وفي أبحاث كتير قوي اتكلمت عن هذا الموضوع ده معناها إن في ناس كتير ممكن تكون بتعدي باللي انت عديت بيه دلوقتي. والحل بمنتهى البساطة مش إن انت تفضل مكمل في الحياة وكان يعني ده حزن عابر وهيروح. الحل إنك ما تقفلش على نفسك، وإنك تروح لمساعدة حد متخصص. معرفتك بالمشكلة هي أول خطوة إنك تحل هذه المشكلة، وده كان هدف الفيديو الأساسي إنه يقدم لك فكرة توعوية عشان تبتدي تحط إيدك على المشكلة لو هي بجد موجودة. الموضوع ممكن يكون أبسط بكتير مما تتخيل. ممكن الناس بيكون عندها وهم إن هي عندها اكتئاب، ولكن الحقيقة إن هم ما بيكونوش كده. ولكن دايماً بنقول إن الوقاية خارج من العلاج. يعني لو أنا دلوقتي شاكك، فممكن أبتدي أستشير خير حد، أو ممكن أروح لحد متخصص، ده هيكون أفضل بكتير جدا من إن أنا أستنى لغاية يعني لما كل حاجة تضلم في وشي وبعد كده أبتدي أشوف إيه العلاج.

في النهاية، حابب إن أنا أكون فدتكم بأي شكل من الأشكال في هذا الفيديو. ولو عجبك، ما تنساش إن انت تديه أو تبعته لحد ممكن يكون حاسس إن هو عنده اكتئاب. وأشوفكم على خير الحلقة الجاية إن شاء الله. كان معكم مايكل راشد، برنامج الزيتونة.