تجنب الفشل الكلوي بهذه الطريقة

بسم الله والحمد لله والصلاة والسلام على رسول الله.

من أخطر الأمراض التي ممكن تصيب الإنسان فشل الكلى. أنا عارف طبعًا أن كلمة "الكلى" تُقال هكذا غير سليمة، هو الصح "كُلى" بضم الكاف، بس إحنا مش واخدين على هذا الموضوع عشان الناس ما تبقاش مستغربة. الأصح إن هي "كلية" أو "كُلْوَة"، الاثنين لغتين سليمتين يعني، وبالتالي جمعها "الكُلَى". لكن إحنا بنقول "الكِلَى" يعني كلغة دارجة.

إصابة الكلى بالفشل موضوع خطير جدًا جدًا ومنتشر. الكلى مش بس بتخلص الجسم من الفضلات والسوائل الزائدة، الكلى بتنظم ضغط الدم، الكلى بتساهم في إنتاج خلايا الدم الحمراء، الكلى بتعمل نوع بتنشط نوع من أنواع فيتامين دال، يعني الكلى بتنظم الكالسيوم في الجسم وبالتالي بتؤثر على العظام وعلى الأسنان وعلى غيره من الأعمال، تحافظ على توازن الأملاح في الجسم بشكل خطير جدًا جدًا ومهم جدًا. فشل الكلى يؤدي إلى فشل كل هذه الأعمال، بيؤثر على كل جزء في الجسم.

فشل الكلى للأسف الشديد منتشر جدًا جدًا، بيزيد بمعدلات يعني سريعة في العالم كله. هقول لك إحصائية غريبة جدًا جدًا وهي الصحيحة: 10% من سكان العالم عندهم فشل كلوي. 10% يعني أرقام مفزعة، قريب من مليار إنسان في العالم عنده فشل كلوي.

لو إحنا في الحلقة بنحاول إننا نقدم نظام يحافظ لك على الكلى، الكلى إيه اللي خلى التداعيات تبقى زايدة كده؟ النظام بتاعنا في الحياة مش كويس، إحنا عايشين بأسلوب همجي شوية ما فيهوش ما فيهوش اهتمام بالصحة. وبالتالي لو أنا اهتميت ببعض القواعد العادية في نظام حياتي، ممكن إن شاء الله أحفظ كليتي وكلية أسرتي من الفشل الكلوي.

أول شيء نمرة واحد: حافظ على رطوبة الجسم. رطوبة الجسم يعني إيه؟ يعني اشرب ميه كتير. معدل البالغ إنه يشرب من لتر ونص للترين في اليوم، يعني حوالي ثمان كوبايات ميه. أفضل سائل هو سائل الميه، لكن السوائل بشكل عام مهمة. السوائل دي بتحافظ على وظيفة الكلى، بتزيل الصوديوم والبوتاسيوم وأشياء سموم ضارة من الجسم، وبتمنع تكوين الحصوات وبتقلل التهابات الكلى، وبالتالي بتحافظ على وظيفة الكلى أكتر. يبقى نمرة واحد إن أنا أزود شرب الميه على قد ما أقدر.

نمرة اثنين: الحفاظ على غذاء صحي ما يضرش الكلى ويفيدها. في أغذية بتضر الكلى زي الحاجات اللي فيها مواد حافظة، اللحوم المصنعة أو المنتجات المصنعة، الشيبسيات والحلويات والحاجات اللي في أكياس دي كلها دي فيها مواد حافظة مضرة، فيها صوديوم عالي، فيها سكريات عالي عالية، فيها دهون عالية، فيها أمور كتيرة كلها بتضر الكلى. كمان الإفراط في البروتين الحيواني ده يضر الكلى. ما بقولش نمنع أكل اللحمة ولا أكل الفراخ ولا كده، لكن الإفراط فيهم، أكل بشراهة في هذه الأمور بتؤثر على وظائف الكلى.

في نفس الوقت في أكلات مفيدة للكلى. احرص على أن يكون عندي حبوب كاملة في الغذاء بتاعي، حبوب كاملة زي البرغل مثلا، البليلة، القمح اللي هو غير مبشور، زي الأرز البني. الحاجات دي بتفيد الكلى. احرص على أكل الأسماك، الأسماك الدهنية بشكل عام مفيدة للكلى. الأغذية اللي فيها صوديوم قليل زي القرنبيط مثلا، دي برضه من الحاجات المفيدة للكلى. بعض الفواكه المفيدة للكلى زي التوت والفراولة، أنواع التوت المختلفة والفراولة والتفاح والفلفل الأخضر من الخضروات. الفلفل الأحمر أكتر كمان فيه فايدة أكتر للك الكلية. والاعتماد في الدهون على زيت الزيتون أخفهم ضررًا، أقلهم ضررًا بالنسبة لأنواع الزيوت والسمنة المختلفة. واهتم بوجود الثوم وخاصة لو كان مطبوخ في الطعام. دي بعض الأكلات اللي ممكن تساعد الكلى وبعض الأكلات اللي تضر الكلى اللي المفروض تتجنبها.

يبقى نمرة واحد الحفاظ على رطوبة الجسم، نمرة اثنين الحفاظ على نظام غذائي صحي مناسب للكلية.

نمرة ثلاثة: الحفاظ على الوزن المناسب. السمنة من الأمراض اللي بتعمل أضرار كبيرة في الكلى وبتعمل أضرار في الجسم بشكل عام، وتؤدي إلى تفاقم الضغط والسكر. والضغط والسكر لو تفاقموا بيزودوا مشاكل الكلى بشكل كبير جدًا. يبقى نمرة ثلاثة إن أنا أمتنع أو أحافظ على جسمي ما أخشش في جانب السمنة. ولو عندي سمنة لازم أستشير طبيب يدلني إيه الطريق العلمي للتخلص من السمنة. إنما جدول كبير وأعمال كبيرة.

نمرة أربعة: الحفاظ على مستويات السكر. أكل سكر كتير ده بيضر بالكلى، وخاصة عند مرضى السكر. السكر من أكثر الأمراض اللي بتؤثر على الكلى. وبالتالي فأنا عايز أحافظ على مستويات منخفضة من السكر نسبيًا في الدم. والاجيلي مرض في الكلى بالاضافة إلى السكر.

الحاجة الخامسة: مراقبة ضغط الدم. ضغط الدم المرتفع بيؤثر على الكلى بشكل مباشر. في ناس بتاخد الموضوع ببساطة، بيجيلها أعراض ضغط الدم مرتفع وبيسيبه سنة واثنين وثلاثة وأربعة من غير علاج، أو بيكون عنده مرض ضغط الدم معروف ويسيب ضغط الدم فوق 140 على 90، وده طبعًا كتير. هو الطبيعي 120 على 80 أو 90 ويستمر على كده. مع مرور وقت يؤثر على الكلى. مش بس الضغط يبقى عنده ضغط وعنده كلى.

نمرة ستة: الحفاظ على نظام صحي من ناحية الرياضة. الرياضة مفيدة جدًا للكلى وبتحافظ على تنظيم الضغط بتاع الإنسان وتعزز صحة القلب، وده كله في الآخر بيصب في مصلحة الكلى. والرياضة اللي إحنا نقصدها مش لازم تكون بطل رياضي كبير أو تعمل ماراثون يعني. لا، مطلوب المشي المنتظم، امشي نص ساعة كل يوم، أو الجري الخفيف، أو استعمال الدراجة، ركوب الدراجة. الحاجات دي كلها من الحاجات اللي ممكن تعزز من وظيفة القلب وبالتالي تعزز من وظيفة الكلب.

نمرة سبعة: مهمة جدًا جدًا تجنب التدخين. ما فيهوش أي مصلحة، التدخين كله مشاكل. فأنا أتجنب التدخين. التدخين بيؤثر على الأوعية الدموية بتاع الجسم كله ومنها الكلى. الأوعية الدموية اللي داخلة للكلى بتبقى بيحصل فيها أنواع من التكلسات وتراكم كوليسترول وحاجات كتيرة بنتيجة التدخين، فبيصغر القطر بتاعها، وبالتالي الدم اللي واصل للكلى بيقل، وبالتالي بتعاني الكلى من الفشل الكلوي. غير إن التدخين نفسه مربوط بأمراض السرطانات في الجسم كله بما فيها الكلى، مربوط بسرطان الكلى، مربوط بسرطان الحالب، مربوط بسرطان المثانة، وكل ده بيؤثر على وظيفة الكلى. يبقى ده نمرة سبعة.

وطبعًا الكحول دخل مع النقطة دي في النقطة السابعة دي اللي هي تدخين. دخل معاها الكحول. ده الكحول من برضه من الأمور اللي بتسبب أضرار كبيرة جدًا في الكلى وفي الكبد وفي بقية أعضاء الجسم.

نمرة ثمانية: تجنب الإكثار من المسكنات. دي خطيرة جدًا جدًا. ناس كتيرة جدًا من اللي عندهم أمراض مؤلمة مزمنة واخده على المسكن، مسكنات بيجيب من الصيدلية زي ما هو عايز بدون وصف طبيب ولا شيء، يروح يجيب مسكنات ويسكن الألم. بس الناس بالذات الناس اللي عندها تعب في العظم في المفاصل، عنده صداع مزمن، يروح يتعود على المسكنات. إحنا عندنا في المسالك مرض اسمه كده: إصابة التهابات الكلى نتيجة المسكنات، أنالجيسك نفروباثي، اللي هو مرض التهاب في الكلى نتيجة أخذ المسكنات. بعض الدراسات بتقول إن ده 30% من الفشل الكلوي. تخيل 30% نتيجة إن أنا بأخذ مسكن. يعني بيعمل حوالي 3 مليون من الـ 10 مليون اللي عندهم إصابات في الكلى أو عندهم فشل. ده رقم ضخم جدًا جدًا ومتجنب. أنا ممكن لو رحت للطبيب المختص وقلت له والله أنا عندي مشكلة كذا مؤلمة، يديني بقى طرق العلاج المختلفة، يعالج أصل السبب، يديني مسكنات ما تضرش الكلى، يتخف يعني يجيب معايا أفضل طريقة ممكنة لعلاج الألم بدون ما أضر الكلى.

نمرة تسعة: من الأشياء المهمة جدًا برضه فحص وظائف الكلى بشكل مستمر. يعني أنا أعمل فحص دوري للكلى، وظائف الكلى، وأعمل الفحص ده كل سنة، كل ست شهور، كل سنتين. معدلات مختلفة حسب الحالة. الناس اللي محتاجة تعمل فحص دوري كتير كل ست شهور أو جايز أقل من كده. الناس اللي هي إحنا بنقول عليها تحت خطر داهم من إصابة الكلى، الناس اللي عندها ضغط، الناس اللي عندها سكر، الناس اللي عندها سمنة مفرطة، الناس اللي عندها تاريخ أسري بأمراض الكلى. يعني الناس دي المفروض إن هي تتابع. كبار السن يتابعوا الموضوع ده عشان يعرفوا إذا كان عندهم كلى ولا لا ويتداركوا الموضوع بدري ويأخذوا النظام الغذائي المناسب للكلى لو كان عندهم كلى، لأن اللي عنده فشل كلوي قصير أو بسيط ممكن ما يتطورش لو اتبع النظم السليمة.

نمرة 10 ونختم بيها: إن نسأل الله عز وجل العافية في البدن. دي نقطة مهمة جدًا جدًا. أنا أثرت أخليها في الآخر عشان الأمور اللي هي الأسباب الأخرى الصحية والطبية تاخدها، لكن تبقى فاهم إن المرض كله والشفاء منه بيد الله عز وجل. عشان كده الرسول صلى الله عليه وسلم علمنا إن هو كل يوم الصبح وكل يوم في المساء ثلاث مرات الصبح، ثلاث مرات في المساء. إذا بناخد الدواء، أنت بتاخد الدوا يقول لك الدكتور بيقول لك ثلاث مرات في اليوم أو مرتين في اليوم ليه حساب. كذلك النبي صلى الله عليه وسلم كان يقول في أول اليوم ثلاث مرات: "اللهم عافني في بدني، اللهم عافني في سمعي، اللهم عافني في بصري، لا إله إلا أنت". دي وصفة طبية رائعة مع الكلى، مع الكبد، مع المعدة، مع أي جزء من أجزاء الجسم، حفاظ للجسم بشكل دوري. ثلاث مرات الصبح، ثلاث مرات بالليل، ثلاث مرات في أذكار الصباح، ثلاث مرات في أذكار المساء. "اللهم عافني في بدني، اللهم عافني في سمعي، اللهم عافني في بصري، لا إله إلا أنت".

مسؤولية الحفاظ على الكلية مسؤولية مهمة جدًا جدًا ليك ولأولادك ولأسرتك. ونسأل الله عز وجل أن يحفظنا من كل سوء. جزاكم الله خيرًا. السلام عليكم ورحمة الله وبركاته.