علامات النضج

ايه العلامات اللي ممكن نشوفها في بني ادم ونقول عليه ده انسان ناضج؟ أكتر من نقطة. أولاً، نظرته للحياة بتختلف. بيكون متصالح مع فكرة وجود الخير والشر، مش رافض وجود الشر فبيتصرف بسذاجة أو عمال يتصدم ويتجلى علشان رافض يتعلم، ولا بينكر وجود الخير تماماً فقرر يكون ناشف وشديد مع الكل. النضج هو أن تتصالح مع وجود الفكرتين وتبدأ تهدى وتتعامل بحكمة أكبر.

النضج كمان أنك تقلل العشم. بتفهم أنك مالكش حاجة عند حد. بتبدأ تكون خفيف على الناس. بتفهم أن العلاقات هشة جداً، وأن الإنسان يكون محظوظ لو في حياته حد أو اثنين كويسين محترمين بيحبهم ويحبوه، وبيخف عليهم عشان ما يخسرهم.

النضج هو استيعابك أنك مهما كنت مظلوم أو ظروفك مش أفضل حاجة، أن ما حدش مهتم وما حدش فاضي وما حدش مسؤول عن أن حياتك تكون أحسن بكرة غيرك أنت. حتى لو اتأذيت من شخص سيء وكلنا متفقين معاك وبنطبطب عليك، أنت مسؤول عن حماية نفسك، مسؤول عن إيقاف الأذى. لغاية هنا، ما ترميش مسؤوليتك كاملة على حد تاني، أنت اللي هتخسر مش هم.

النضج هو أنك تفهم أن أغلب الأحداث السلبية أو الإيجابية اللي هتحصل لك هي مجرد مراحل. شوية وتهدى، هتفكر بشكل موزون أكتر. هيجي عليك أيام مختلفة بعقلية مختلفة، وشعورك ده مش هيدوم للأبد.

النضج هو إعطاء الأمور حجمها الطبيعي. النضج كمان بيخليك تلتمس عذر للناس أكتر. بتفهم أنك مليان عيوب ومشاكل، فتقبل فكرة أن غيرك عنده مشاكل هو كمان. ما هو ما حدش هيقدر أبداً يفهم مشاعرك وهو منفصل تماماً عن مشاعره، وفهمك لمشاعرك واتصالك بها هو من أكبر علامات النضج.