٣ تصرفات هيخلوا أي حد يحبك من أول مقابلة 🏆

الناس هتحبك من أول مقابلة لو أنت عملت الثلاث تصرفات دول.

أولًا: قل له إن أنت حاسس إن أنت شفته قبل كده. وبعدين افتح حسابه على الفيسبوك بسرعة وشوف مين الأصدقاء المشتركة اللي بينكم. وبعدين قل له مثلًا: "إيه ده، أنت تعرف أحمد فلان ومصطفى علان؟ دول حبايبي! إيه ده، وعمر؟ عمر ده ابن خالتي! تعرفه منين؟ سبحان الله، ده الدنيا صغيرة قوي!" بس، وفجأة أنت كده ما بقتش غريب، وده بيخلق إحساس فوري بالراحة والثقة والتقارب.

ثانيًا: اسأله عن رأيه في أي موضوع، وبعدين اسمعه كويس. وبعدين، واحدة واحدة كده، ابتسم بالراحة وقول: "ده أنا كنت فاكر إن أنا الوحيد اللي شايفها كده!" فجأة هيحس إن أنت شبهه، نفس المبادئ، ونفس القيم، ونفس طريقة التفكير. والناس بطبيعتها بتحب اللي شبهها.

ثالثًا، ودي أهم نقطة: خليه يتكلم عن نفسه على قد ما تقدر. اسأله مثلًا: "هو أنت إزاي قدرت تعمل ده في سنة بس؟ معقولة!" الناس بتحب يا جماعة إنها تحكي عن نفسها جدًا، طالما حاسين إن أنت معجب جدًا بكلامهم. فاعمل نفسك معجب، هيحس إن هو نجم القعدة، واللي أداله المسرح كان أنت. بصوا يا جماعة، الناس بتفتكر الشخص اللي خلاهم يحسوا إن هم مهمين، مش الشخص اللي حاول يحسسهم إن هو مهم.