Transcription
في مواقف كده بتحس فيها انك مسحوب غصب عنك تمشي في شارع عمرك ما بتمشي فيه علشان تشوف موقف معين كانك لازم تيجي هنا في اللحظه دي. لسه امبارح طلعت في وقت مش بنزل فيه بعد نص الليل، دخلت شارع مش بمشي منه خالص.
لاحظت بياع غزل بنات من التعب طول اليوم نايم على ايده ورافع كده غزل البنات فوق على عصايه. ولفت نظري اجتهاده وصدقه في عمله اللي مقعدك في الشارع في وقت متاخر زي كده. العربيات قلت وصعب تبيع طبعا. ربنا اعلم بحاله بقى، ما قدرش يروح ايديه فاضيه مضطر فقرر يفضل في مكان رزقه حتى لو هينام. قرر يعمل ولو اضعف الايمان يفضل موجود وبس.
فسبحان الله ينزل لك واحد من بيته في البرد بدون اي سبب واضح يروح لك ومعاه جزء بسيط من رزقك لغايه عندك. مش عايز اتفلسف بقى وابقى كليشيه واقول لك شوف الموعظه. لكن الصراحه الراجل ده نبهني لحاجه مهمه جدا وهي معنى مبدا رزقك مكتوب لك.
في ناس بتفهمها ان طب خلاص مكتوب لي اتعب ليه مش هو مضمون مش محتاج بقى اشتغل ولا اخطط ده وانا قاعد كده رزقي هيجي لي. لكن موقف الراجل المحترم الشقيان ده بيوضح الفرق وبيتجلى فيه المعنى وهو العكس تماما. اظهر اثبت وجودك قدم السي في اعرض خدماتك نزل الفيديو فكر خطط في اسلوبك وافضل اظهر واعمل اللي عليك كله حتى لو كان اللي باقي في طاقتك بس انك تبقى موجود. خليك موجود بين وشك المهم تكون بتعمل حاجه.
وفي النهايه هيجيلك قد ايه دي بقى فيها توفيق ورزق وعوامل كتير مالناش اي تحكم فيها فما تحرقش فيها تفكير كتير دي ربنا كريم ومطلع ومستحيل ينسى مجهود انسان اخلص في عمله.