Transcription
إذا كنت بتحاول تبطل مشاهدة المواد الإباحية، فلازم تكون عارف إنك غالبًا مش هتقدر تعمل ده لوحدك. عشان كده، إحنا فريق واعي هنا جايين نساندك، جايين نساعدك، جايين نديلك بعض التوجيهات والإرشادات اللي تقدر تخليك تبطل مشاهدة المواد الإباحية.
إحنا في فريق واعي عارفين إن في كتير جدًا من اللي بيتابعونا بيعانوا من استخدام المواد الإباحية. عشان كده، إحنا دايما دايما بنحرص إننا نكون جنبهم، نساندهم، نساعدهم، ونعيد ليهم الأمل مرة تانية والثقة إنك تقدر فعلاً تبطل مشاهدة المواد الإباحية. كتير من الناس، على الرغم من إنهم أقروا وعرفوا إن المواد الإباحية أصبحت مشكلة في حياتهم، وأقروا واعترفوا بالآثار الضارة للمواد الإباحية اللي أثرت على علاقاتهم، على حياتهم الشخصية، على عملهم، على جميع أوجه حياتهم، إلا إنهم مش قادرين يبطلوا.
لأن لازم تعرف إنك غالبًا، مش بقول مستحيل، غالبًا مش هتقدر تبطل لوحدك. لازم يكون في حد يرشدك، يوجهك، يعرفك الطريق. النهاردة هنتكلم في الفيديو ده عن ثمان نصائح صغيرة باختصار هيساعدوك جدًا جدًا إنك تبطل المواد الإباحية باقتدار.
أول حاجة، أول حاجة: لا تتوقف فقط، بل استبدل. إيه الكلام ده؟ يعني في ناس كتير جدًا لما بييجوا يبطلوا إباحية، كل تركيزهم إنهم يوقفوا المواد الإباحية، يوقفوا استخدامهم، يوقفوا مشاهدتهم، ويوقفوا ممارسة الاستمناء. لكن في المقابل، إيه اللي بيحصل؟ بيرجعوا تاني. ليه بيرجعوا؟ لأنهم ما عملوش الخطوة التانية المصاحبة أو اللي لازم تكون مصاحبة للتوقف، وهي الاستبدال.
طيب ليه؟ لأن مشاهد الإباحية أو مدمن المواد الإباحية بيكون غالب وقته وغالب فراغه بيقضيه في استخدام المواد الإباحية ومشاهدة الإباحية وممارسة الاستمناء. لما يبطل، بيترك هذا الفراغ، فسرعان ما يعود مرة تانية. فلازم مع التبطل، الاستبدال. تملى الفراغ ده بعادات صحية، زي إيه؟ زي ممارسة الهوايات، زي الرياضة، القراءة، وهوايات أخرى زي الرسم، لعب الشطرنج. المهم تسد الفراغ ده. فلما تسد الفراغ ده، صعب ترجع تاني.
ننتقل للنصيحة التانية. النصيحة التانية: تناول الطعام الجيد ونام كويس. نام نوم جيد والعب رياضة. الأبحاث بتقول إن الرياضة والتمارين الرياضية قادرة إنها تعيد إنتاج الخلايا العصبية مرة تانية، وقادرة إنها تعيد مستقبلات الدوبامين. وده بيساهم بشكل كبير جدًا في عودة الحيوية والصحة والنمو والشفاء لقشرة الفص الجبهي للدماغ (بري فرونتال كورتكس) اللي بتُتأثر جدًا جدًا بإدمان الإباحية.
لازم تعرفوا إن قشرة الفص الجبهي للدماغ دي هي المسؤولة عن الوظائف التنفيذية للدماغ. زي إيه؟ زي اتخاذ القرارات السليمة، حل المشكلات، التخطيط للمستقبل، الذكاء، التركيز، الذاكرة. كل هذه الوظائف اللي بتديك قدرتك أنت كبشر على اتخاذ قرارات سليمة والعيشة حياة صحية وناجحة ومستقرة، بتُتأثر تأثر كبير جدًا وبتضعف بسبب إدمان الإباحية.
لما تلعب رياضة، الرياضة بتعيد بناء هذه الخلايا العصبية ومستقبلات الدوبامين اللي قلت أو اتقفلت بسبب استخدامك المواد الإباحية وقللت متعتك في الحياة عن إنك تشعر بأي متعة في الحياة. كل ده بيرجع. يبقى إذا، أنت لما تاكل أكل صحي، لما تاكل، لما تنام نوم جيد، لما تلعب رياضة، ده بيمدك بالوقود والطاقة والقدرة والحيوية إنك تقدر تواجه أي توتر وما تقعش بسهولة في مشاهدة المواد الإباحية مرة تانية.
النصيحة التالتة، وركز معايا، وأنا عايزك تكتب الكلام ده: التعرف على محفزاتك ومُحرِّضاتك. لأن أنا بلاحظ إن في ناس كتير بتوه. ابدأ من فين؟ خد الفيديو ده بداية. اكتب كل حاجة ورايا وابدأ نفذها. ولو نفذت بعضها، لا تتجاهل الآخر. إذا كنت بدأت فعلاً التعرف على محفزاتك أو مُحرِّضاتك اللي بتحرضك على الإباحية.
العلماء قالوا إن في علماء السلوكيات قالوا إن في مُحرِّضات ومحفزات كتيرة جدًا جدًا ممكن تخليك تلجأ إلى الإباحية وتقع في فخ الإباحية وتنزلق في فخ الإباحية. أهمها أربعة اختصروها في كلمة "هالتش" (HALT): Hungry, Angry, Lonely, Tired. أنت بتقع في الإباحية إمتى وتنزلق فيها إمتى وأي سلوكيات غير صحية؟ لما تكون جعان، غضبان، وحيد، تعبان. جميل.
يبقى أنا لما أتعرف على هذه المحفزات والمُحرِّضات وغيرها، ودي أهمها، مش هنجرف للإباحية على طول لأن عندي وعي بيها. فلما أنا أشعر باندفاع رهيف ورغبة في الوصول إلى الإباحية، أه، أرجع خطوة لورا وأقول: أنا إيه؟ هل في حاجة مضايقاني؟ هل أنا تعبان النهارده؟ ما نمتش كويس؟ هل أنا جعان؟ ما أكلتش أكل صحي؟ ها؟ هل أنا منهك؟ هل أنا قاعد لوحدي؟ أه. لو في حاجة من الحاجات دي، بسرعة اتصرف سريعًا. اتصل بصديق، انزل زور حد من قرايبي أو صديق صالح اقعد معاه واكلمه. أه، آخد قيلولة، أنام عشان لو كنت ما نمتش كويس وده مؤدي إلى التعب. أدخل آكل أكل صحي زي مثلاً أعمل لي شوية شوفان بالحليب. تمام. أقوم ألعب رياضة لو بقى لي فترة ما لعبتش رياضة. اتحرك، موف، موف، موف. مهمة جدًا جدًا.
رابع حاجة: قضاء وقت أقل على الهاتف. الهاتف الذكي اللي في إيديك ده، سمارت فون، مشكلة كبيرة جدًا وسبب من أسباب الانزلاق في الإباحية المتكرر. لازم تعرف إن تصفح وسائل التواصل الاجتماعي، خاصة ليلاً، واصطحاب هاتفك إلى غرفة النوم عند نومك، بيدي فرصة كبيرة جدًا جدًا ليك إنك تنزلق وتقع. طب نعمل إيه؟ بكل اختصار، أربع حاجات كمقترحات:
إنك تقلل من استخدام الهاتف الذكي. وضع حد زمني للاستخدام. تقول لنفسك: أنا مش هستخدم الهاتف الذكي (سمارت فون) ده أكتر من ساعتين في اليوم. تمام. دي أول حاجة. تاني حاجة: ماخدش الموبايل معايا إلى غرفة النوم. أحطه في غرفة تانية. وممكن أجيب منبه بثمن قليل خالص يصحيني إذا كانت دي الحجة بتاعتك. جميل.
تالت حاجة: أعمل إيه؟ تالت حاجة إن أنا أستخدم برامج للحجب والتصفية علشان لو أنا بتصفح ما أقعش بسهولة في الإباحية. جميل. إيه تاني؟ ما استخدمش الموبايل لوقت متأخر منهم. يعني حط حد معين. أنا بعد الساعة 10 بالليل أو 11 بالليل مش هفتح الموبايل.
خامسة: تخلص من العار. الأبحاث بتقول إن الشعور بالعار بيدفع الناس إيه؟ في الواقع إلى العودة إلى السلوكيات الغير صحية. أنت ممكن تكون ارتكبت أخطاء كبيرة في حياتك، لكن ربك غفور. وطالما أنت رجعت وعهدت ربنا وتبت إنك ما ترجعش تاني، وإنك تحسن من حياتك، وإنك تغير نفسك تغيير حقيقي، لا تسترجع تلك الذكريات وانسى الماضي وبص للمستقبل المشرق اللي هينتظرك لو بطلت اللي بتعمله.
لكن طول ما أنت عمال بتفكر في دايرة العار، صعب تخرج. فلازم تتذكر إنك مش إنسان سيء. أنت لست شخصًا سيئًا لأنك تعاني من إدمان الإباحية، طالما أنك تحاول، تحاول على أنك تنجح في التعافي وتنجح في أنك تبعد عن هذه السلوكيات الغير صحية. اسمع، كن لطيفًا مع نفسك، كن صبورًا أثناء تقدمك، واستمر في المحاولة.
ثلاث حاجات: كن لطيفًا مع نفسك، كن صبورًا أثناء تقدمك، واستمر في المحاولة.
سادسة: أخبر أحدًا. العادات الغير صحية للأسف بتزدهر وتنمو في الخفاء وفي السر. فإحنا عشان نبطل العادات الغير صحية دي، لازم نكون منفتحين بمشاعرنا وأفكارنا مع آخرين. علشان ده بيقلل تأثير العار علينا وبيفتح لنا مجالات لحل المشكلات اللي ممكن بتوقعنا في تكرار هذه السلوكيات الغير صحية. ممكن تلجأ إلى معالج يساعدك على التعافي. ممكن تدخل جروبات واعي على التليجرام، موجود فيها آلاف الأشخاص، سواء كان جروبات الفتيات للفتيات أو جروبات الشباب للشباب. صدقوني، فرق كبير جدًا بين شخص بيطلب مساعدة من الآخرين وشخص آخر منزوي ومنطوي على نفسه لا يتحدث، لا يتكلم عن مشكلته.
لما تتكلمه، لما تتحدثوا، لما تطلبوا المساعدة، ده هيساعدكم على حل مشكلات أساسية كبيرة جدًا بتؤدي للإباحية. وأيضًا بيساعدكم على تغيير العادات الصحية إلى أن تكون صحية، العادات الغير صحية إلى أن تكون عادات صحية. جميل.
سابعة: تحميل تطبيق واعي وزيارة موقع واعي. موقع واعي أو تطبيق واعي منصات تستند إلى العلم وتعمل بالفعل. كتير من الناس اللي استخدموا تطبيق واعي على أندرويد أو على آبل، سيان، أبلغوا إن ده ساعدهم في التغيير طويل المدى، وساعدهم على تقليل استخدام المواد الإباحية، وساعدهم على تقليل الاكتئاب والقلق والعزلة اللي كانوا عايشين فيها.
آخر حاجة والنصيحة الثامنة: كن صبورًا أثناء تقدمك. لازم تعرف قاعدة التعافي. التعافي عمره ما بيمشي في طريق وخط مستقيم. لازم شوية تعرجات، وطريق، طريق النجاح مليان بالأشواك، مليان بالعقبات. والصالح الفالح الناجح الواعي هو اللي يقدر يفهم المعلومة دي ويصبر.
لما تنزلق، لما تنتكس، فانتكاستك دي مش معناها إنك فشلت أبدًا أبدًا، ولكن معناها إنك لازم تستمر في المحاولة. كل اللي نجحوا في الوصول لأهدافهم قصيرة المدى، بعيدة المدى، هم اللي قدروا يحاولوا مرة واثنين وعشرة، ولحد ما يوصلوا لهدفهم. أما اللي ما حاولش، ما وصلش للأسف.
فأنا عايز أقول لك تاني النصيحة: كن صبورًا مع نفسك، كن لطيفًا، استمر في المحاولة. وأوعى أي انتكاسة أو أي انزلاقة تيأسك وتقول لنفسك: ما فيش فايدة مطلقًا، مطلقًا، مطلقًا.
وعايز أقول لك كلمة من قلبي: إذا كنت أنت عشت أو أنت عشتِ جزء من حياتك طويل مع الإباحية والعادات الغير صحية والعلاقات المحرمة، ده مش معناه أبدًا إن دي شخصيتك وإنك تعيش هذه الحياة إلى الأبد. ولكن معناه إن أنت لازم تاخد قرار التغيير، وإن هي ما تكونش جزء من حياتك طول حياتك. [تنحنُح] إلى الأبد. ولازم تاخد قرار التغيير.
جميل قوي. لازم كمان تعرف إن هذه العادات الغير صحية ليست جزء من هويتك. أنت أفضل من كده بكتير. أنت أحسن من كده بكتير. أنت تستحقي إيه؟ وأنت تستحق تعيش حياة صحية رائعة سعيدة. لأن الإباحية بتقتل الفرحة، بتقتل النجاح، بتعوق تقدمك، بتخطف منك طاقتك، تمتصها. بتشوف الحياة على غير وضعها. بتشوف الحياة غير الحياة. بتشوف الناس اللي حواليك بشكل تاني.
جرب تتعافى وشوف إيه التغير الإيجابي اللي هتشوفه. هتشوف شخص تاني. هتشوف شخصك الحقيقي اللي أنت نفسك تكون إيه. العيش حياة صحية بعيدًا عن الإباحية هو الهدف الأسمى ليك، وأنت وصلت له دلوقتي. أوعى تتخلى عنه. أوعى تتخلى عنه. انسى العار، انسى الشعور بالعار، انسى أخطائك. ابدأ حياة جديدة. هناك أمل. استمر في المحاولة.
إذا عجبتكم الحلقة دي، شاركوها مع أصدقائكم يمكن يستفيدوا. ولايك وشير. كتير من اللي بيتابعونا وبيشاهدوا حلقاتنا مش مشتركين في القناة. محتاجينكم إنكم تفعلوا الاشتراك وتفعلوا الجرس علشان نقدر نستمر في العطاء. فريق واعي بقى له ثمان سنين ومستمر إن شاء الله نحو [تنحنُح] التقدم عشان نقدر نوصل رسالتنا ورؤيتنا لكثير من الناس في العالم اللي محتاجين مساعدة، محتاجين مساندة، محتاجين دعم. إحنا وراكم، خلفكم، في ضهركم، بنساندكم، بنساعدكم. وكونوا معانا.
سؤال أخير قبل نهاية الحلقة دي: شاركونا في تعليقاتكم. كل واحد بدأ طريق التعافي من أبطالنا وبطلاتنا في العالم العربي ومتابعينا، يحكوا لنا في التعليقات إيه أكتر حاجة من اللي أنا قلتها دي، المانية دي، ساعدته في إنه يتعافى ويحكي لنا عن تجربته علشان يكون ده طريق ينور كل الأبطال والبطلات اللي في بداية الطريق دلوقتي.
شكرًا لحضراتكم. كان معكم الدكتور محمد عبد الجواد، مؤسس فريق واعي.