استثمرت ٥٥ ألف ريال لمدة سنة كاملة في تمرة.. وش صار؟

السلام عليكم ورحمه الله. هل فكرت يوم أن فلوسك تشتغل عنك بدل ما تخليها نايمة في الحساب؟

اليوم بتكلم عن منصة تمرة، أحد أبرز تطبيقات الاستثمار الآلي أو الذكي في السعودية. وترى هذا الفيديو مو دعاية، دخلت بتجربة شخصية واستثمرت أكثر من 55,000 ريال. وبكل شفافية راح أشارككم كل التفاصيل: الأرباح، الخسائر، وكيف كانت تجربتي مع كل محفظة.

لكن السؤال الأهم: هل تمرة هي الخيار الأفضل لاستثمار فلوسك؟ أو هل في خيارات أفضل في السوق؟ في هذا الفيديو مو راح تعرف الإجابة بس، لكن راح تكون عندك الصورة كاملة عن الاستثمار الآلي أو الذكي وأي محفظة مناسبة لأهدافك. تابعوا للنهاية عشان تعرفون كم ربحت وكم خسرت، وباذن الله ما ينتهي الفيديو إلا وأنت عارف كل شيء عن تمرة ومعلومات مهمة عن الاستثمار.

طبعاً منصة تمرة هي أول منصة أو تطبيق راح أتكلم عنه من تطبيقات الاستثمار الآلي. والـ فكرة إني بتكلم عن كل تطبيقات الاستثمار الآلي باذن الله: تمرة، أبيان، ملاءة، الاستثمار الذكي من الراجحي، دراهم، وغيرها. وراح يكون في نهاية السلسلة، بعد ما أتكلم عن كل واحد على حدة، فيديو مقارنة بين كل هذه التطبيقات: كم جاني ربح من كل تطبيق، وإيش سلبيات وإيجابيات كل تطبيق. بسم الله نروح للبداية.

طيب، منصة التمرة واحدة من التطبيقات اللي توفر خاصية الاستثمار الآلي. تقدر تستثمر عندهم بأي مبلغ، حتى لو بريال. وعندهم حالياً خمس محافظ تقدر تشترك فيها:

المحفظة الهادئة: مستوى المخاطرة منخفض. يعني إيش مستوى المخاطرة منخفض؟ يعني أنك تخسر أموالك نسبتها قليلة، لكنها موجودة. يستثمرون 60% من فلوسك في الصكوك، 25% في الأسهم، 10% في الذهب، و 5% في العقارات. يعني مثل ما تشوفون، الاستثمارات مخاطرها منخفضة. وبناءً على ذلك، فالمفترض أنه نسبة الربح أقل من المحافظ اللي بقول لكم إياها الحين. لكن هل هذا اللي صاير فعلاً أو لا؟ بتشوفون معي بعد شوي.

المحفظة المعتدلة: هي متوسطة المخاطر. 40% تستثمرها في الأسهم، 40% صكوك، 10% ذهب، 10% عقار.

المحفظة المغامرة: مستوى المخاطرة مرتفع. يستثمرون فلوسك 50% في الأسهم، 30% في الصكوك، 10% في الذهب، و 10% في العقار.

المحفظة المجازفة: مرتفعة المخاطر جداً. يستثمرون فلوسك 74% أسهم، 11% صكوك، 10% ذهب، و 5% عقار.

في عندهم محفظة طوارئ: مستوى المخاطرة فيها غير موجود، يعني منعدم. لكن في المقابل الربح قليل جداً جداً، لكنها تحفظ رأس مالك وتزيده شوي، أفضل مما يجلس في حسابك البنكي. هذه المحفظة أنا أشوفها جيدة. تسألني ليش؟ لأنه لو عندك مبلغ تحتاجه مثلاً بعد ست شهور أو ثلاث شهور أو سنة، بس تخاف تستثمر في محافظ فيها خطورة أعلى، ممكن تخسر جزء من رأس مالك وأنت أصلاً محتاج هذا المبلغ عشان تشتري سيارة، تتزوج، تأثث، تروح إجازة، أو أي سبب. فتضع فلوسك في هذه المحفظة، تعطيك مقابل بسيط، لكن أفضل من أنه يكون في حسابك الجاري بدون ربح.

طيب، نسمع عن الاستثمار الآلي أو الاستثمار الذكي. إيش الاستثمار الآلي أو الاستثمار الذكي؟ الاستثمار الآلي أو الذكي ببساطة أنه التطبيق هذا ياخذ فلوسك، يوزعها في عدة قطاعات: أسهم، صكوك، ذهب، عقارات، إلى آخره. وكل مرة تضيف مبلغ، يروحون يرجعون يوزعون المبلغ على كل هذه القطاعات. وكل ما جاك ربح، ياخذون الربح ويرجعون يوزعونه ويستثمرونه لك مباشرة. ولو لا قدر الله صار في أي مشكلة بأي قطاع، ممكن يعدلون الاستراتيجية، يعني يقللون الأسهم، يحطون فلوسك في صكوك، يخشلون الصكوك، يحطون فلوسك في عقار، وغيره. السبب عشان يقللون خسارة ويزيدون الربح. يعني باختصار، هم يسوون كل شيء نيابة عنك. أنت بس عليك تضيف مبلغ كل شهر أو متى ما بغيت.

التسجيل في منصة تمرة متاح لكل السعوديين أو المقيمين. تقدر تحمل التطبيق وتلقى التطبيق الرسمي في الوصف وتسجل مباشرة وبسهولة. وإذا عندك سؤال، اكتبه في التطبيقات. شيء مهم جداً، أرجوكم أرجوكم، حملوا التطبيق الرسمي. كل تطبيقات الاستثمارات الذكية فيه مثلها روابط أو تطبيقات مزيفة تلقونها لما تبحثون في جوجل أو حتى في تويتر. يجي واحد يقول: أنا موظف في تمرة أو أبيان أو الراجحي، وهم محتالين. والبعض يصدقهم ويرسل فلوسهم. حملوا التطبيقات الرسمية فقط.

خلوني أعطيكم مميزات تطبيق التمرة، ولا تنسون أني بتكلم عن رسومها بعد شوي في الفقرة اللي بعدها.

أول شيء، كم مدة السحب والإيداع؟ إذا أودعت أو سحبت أو حولت مبلغ من محفظة لمحفظة، فتستغرق العملية بحد أقصى سبع أيام عمل. يعني لو فرضنا أودعت مبلغ 1,000 ريال في المحفظة الهادئة أو المجازفة، فغالباً راح يأخذ سبع أيام عمل عشان يبدأ الاستثمار الفعلي للمبلغ. والعكس كذلك ينطبق على السحب أو حتى التحويل من محفظة إلى محفظة.

طيب، كيف تستثمر؟ بعد ما تختار المحفظة اللي تبي تستثمر فيها من اللي قلت لكم عنها قبل شوي، تختار أو تودع فلوسك عبر التحويل البنكي، يعني عبر حسابه مباشرة، أو عبر Apple Pay، أو عبر البطاقات الائتمانية. والأهم، تقدر تختار الإيداع المتكرر. يعني تقدر تقول: كل شهر أبي أودع وأستثمر مبلغ 100 ريال، 200 ريال، 1,000 ريال، اللي تبي، في المحفظة الهادئة و 200 في المجازفة، إلى آخره.

تقدر تستثمر أيضاً في عشر محافظ مجاناً. يعني تقدر تختار محفظة هادئة أو تسميها "شراء سيارة" وتصير تضيف لها. هذا الشيء راح يسهل عليك معرفة المحافظ أو أنك تجعل لكل محفظة هدف معين يهمك أنت شخصياً، يعني زواج، تأثيث، سيارة، سفر، جامعة، اللي أنت في بالك.

في عندهم كذلك ثلاث آلات حاسبة:

آلة حاسبة للاستثمار: فمثلاً، مثل ما تشوفون على الشاشة، تقدر تختار المدة الزمنية ثلاث سنوات وتقول: أبي في نهاية الثلاث سنوات يصير عندي مبلغ 50,000 ريال. وفي آخر خانة بيطلب منك المبلغ اللي بتستثمره مبدئياً، يعني المبلغ اللي راح تضعه أول مرة، بتحوله أول مرة. بعدين تضغط على "احسب" ويطلع لك النتيجة، فيقول لك: لازم تستثمر شهرياً مثلاً 1,145 عشان توصل لهدفك. ويعطيك نصيحة وش أفضل محافظ مناسبة لك، وشارت وتوضيح كامل.

الآلة الثانية هي حاسبة التقاعد: تعطيك المبلغ اللي لازم تستثمره عشان توصل للراتب التقاعدي اللي في بالك واللي تبيه لما يوصلك أو لما توصل سن التقاعد، بعد عمر طويل بإذن الله.

الآلة الثالثة: آلة الزكاة. وهي آلة ممتازة جداً، بحيث أنك ما تحتاج تكتب شيء. هو مباشرة يعطيك محافظك وكم مفروض تزكي، ويربطك مباشرة بمنصة زكاتي اللي تقدر تدفع لهم الزكاة، أو تأخذ المبلغ أنت بنفسك وتحوله للجهات اللي أنت تثق فيها مثل إحسان أو غيره، أو للأشخاص المستحقين للزكاة اللي تعرفهم أنت شخصياً.

عندهم شيء اسمه "المكافآت"، وبصراحة ما أعجبتني فكرتها، ولا المكافآت، لذلك ما راح أشرحها.

في شيء اسمه "قائمة الأطفال التابعين"، وهي قائمة رائعة تقدر تضيف الأطفال اللي يتبعون لك وتبدأ تستثمر عنهم مباشرة. فكرة جميلة جداً، منها أنك تبدأ بعمل محفظة استثمارية لأطفالك منذ الصغر، ومنها أنك تستثمر لهم وتعوّدهم وتعلمهم عن الاستثمار.

أنواع الأصول اللي يستثمرون فيها: الأسهم، والسندات، والصناديق. طبعاً مثل ما وضحت لكم، يستثمرون لك في مجموعة متنوعة من الأصول، كل محفظة لها نسبة معينة وشرحتها بالتفصيل ببداية الفيديو.

هل لك تجربة في منصة تمرة؟ اكتبها في التعليقات عشان المشاهدين يستفيدون منها ويشوفون تجربتك، والجميع بإذن الله يدعي لك.

كل التطبيقات تضع لك من ضمن التسويق الأداء التاريخي، فيقول لك: المحفظة الفلانية ربحت 30% أو 40% في السنة، وأنت تقول: أوف، والله نسبة جامدة، و بأشترك معهم.

بعطيكم معلومة مهمة: لما يقول لك أي تطبيق أن المحفظة الفلانية المجازفة مثلاً ربحت في سنة من السنوات 25%، 30%، 40%، 50%، فلا تتوقع أنك بتدخل وتربح هذه النسبة. هذه صارت يمكن مرة وقد لا تتكرر. فيجب الحذر وعدم وضع أموالك كلها في محافظ أو صناديق عالية المخاطر. وبعد شوي بتشوفون نسبة ربح الحقيقية والواقعية كم.

رسوم تمرة: الرسوم عندهم تختلف باختلاف الأعمار. اللي أعمارهم 25 سنة فما فوق، إذا المبالغ اللي تستثمرها أقل من 60,000 ريال، فالرسوم الشهرية هي 20 ريال بحد أقصى، بدون ضريبة القيمة المضافة. يعني إذا افترضنا أنك تستثمر 5,999 ريال، فالنسبة هي 0.033% شهرياً أو 0.4% سنوياً بحد أقصى. أما إذا المبلغ في كل المحافظ 60,000 ريال فما فوق، راح ياخذون ما نسبته 0.033% أو 0.4% السنوية. يعني لو عندك 100,000 ريال، فراح ياخذون منك 33.30 ريال بدون الضريبة شهرياً. وكل ما زاد مبلغ الاستثمار يزيد مبلغ الإدارة تناسباً. ولك عشر محافظ مجاناً.

اللي أعمارهم بين 18 و 25، واستثماراتهم أقل من 60,000 ريال، فالمبلغ هو 1 ريال شهرياً، ولكن ما تقدر يكون عندك أكثر من محفظتين مجاناً، يعني عندك محفظتين مجاناً، واللي بعدها برسوم. وإذا المبلغ 60,000 ريال فما فوق، راح ياخذون ما نسبته 0.033% شهرياً على كل المبالغ. وتقدر يكون عندك عشر محافظ مجاناً. وحركة أنه يكون عندك رسوم الإدارة 1 ريال لهذه الأعمار إذا استثماراتهم أقل من 60,000 ريال، أعتبرها رائعة كنوع من الدعم، فألف شكر لتمرة.

طبعاً تذكرون لما قلنا تقدر تسوي محافظ للأطفال؟ كم رسوم هذه المحافظ؟ للناس اللي راح يسوون محافظ للقصر اللي أقل من 18 سنة، يعني الأب والأم راح يستثمرون لأطفالهم. كم الرسوم؟ إذا الاستثمار بمبلغ 15,000 ريال، فالرسوم الشهرية 5 ريال بدون الضريبة. إذا فوق 15,000 ريال، فالرسوم زي الباقيين 0.033% شهرياً على كل المبالغ. طبعاً ولي الأمر يقدر يفتح محفظتين فقط لكل ابن أو ابنة.

هذه كل الرسوم، وتقدر تشوف الفواتير شهرياً عبر الدخول للتطبيق والذهاب للمزيد ثم "فواتيري"، وتشوف كل المبالغ اللي عليك بالتفصيل بشكل جميل وواضح.

طيب، مقارنة الرسوم بالمنافسين مثل ملاءة، أبيان، دراهم، الراجحي، وغيرهم. أشوف أن رسوم تمرة هي الأقل بين كل المنافسين. لكن الأقل رسوماً لا يعني الأفضل، فالربح بينهم يختلف، لكنهم بشكل عام متقاربين، ما عدا أبيان اللي تعتبر مرتفعة، وكذلك الراجحي. ولا تنسون الفيديو الأخير راح يكون مقارنة بالتفصيل بين كل هذه التطبيقات وكم ربحت منها، كل التفاصيل الأخرى مثل الرسوم.

طيب، هل الرسوم تستاهل مقابل الخدمة والاستثمار؟ أشوف الجواب نعم. 0.4% سنوياً مبلغ منطقي جداً مقابل استثمار أموالك، ولا أشوفها نسبة مرتفعة جداً، خصوصاً هم يستثمرون عنك، ويبيعون ويشترون، ويغيرون الاستراتيجية متى ما بغوا، ويحاولون يبحثون عن الخيارات الأكثر ربحاً. ليه؟ لأنك لما تربح، فأنت بتستمر، وبيجي غيرك كذلك راح يربحون منهم.

طيب، بتكلم عن خدمة العملاء. أنا شخصياً ما تهمني كثير، لكني لاحظت أنه أغلب المتابعين يزعلون مني أني ما أسوي تجربة. ولذلك في كل تطبيق من التطبيقات الأخيرة والتطبيقات القادمة، سويت تجربة أنا شخصياً مع كل تطبيق. تطبيق، أتأكد من خدمة العملاء في التطبيق. في مركز مساعدة، في أسئلة كثير، تقدر تشوف كل سؤال وتعرف الجواب بطريقة جداً ممتازة. كذلك عندهم رقم هاتف لخدمة العملاء، وكذلك إيميل. جربت أتواصل مع الإيميل وتم الرد خلال خمس دقائق، والتلفون تم الرد وإعطاء المعلومة خلال دقيقتين بس، وكان الجواب في كل الحالتين ممتاز والموظفين عندهم معلومات جيدة. لذلك أشوف خدمة العملاء جيدة جداً، بل ممتازة في تمرة. طبعاً جربت أتواصل معهم في أوقات العمل الرسمية، تقريباً الساعة 11 الصباح.

تجربتي الشخصية عن تمرة: أشوف تطبيق تمرة تطبيق ممتاز جداً. حتى الآن، كان التطبيق نفسه واستخدامه غير جيد في البداية، يعني كواجهة مستخدم، لكنه الآن ممتاز وسهل وواضح جداً، ويمكن يكون من أكثر التطبيقات سهولة ووضوح في الاستخدام، يعني ما في فلسفة.

طيب، كم ربحت أو كم خسرت لا قدر الله؟ بقول لكم الحين كم أرباحي أو خسارتي إن وجدت في تمرة. وللتفكير، بعد هذا الفيديو بيكون في أكثر من فيديو عن دراهم، أبيان، ملاءة، والراجحي الاستثمار الذكي، وبعدها بيكون في مقارنة كاملة بينهم: كم ربحت من كل تطبيق، وكم خسرت، ومين الأفضل من وجهة نظري الشخصية، وكل التفاصيل الأخرى.

استثمرت في تمرة مبلغ 55,000 ريال تقريباً لمدة سنة أو أكثر شوي. وبعطيكم ملاحظة مهمة وغريبة شوي بعد ما أقول لكم كم ربحت. وللمعلومية، عدت صورت هذه الفقرة مرتين، لأني صورت الفيديو بعدين جا هبوط أبريل ونزلت الأرباح، بعدين صورت مرة ثانية وبعدين ارتفعت الأرباح في جميع المحافظ. لذلك حاولت أنه، مو بحاولت، أنا فعلاً جميع المحافظ: تمرة، دراهم، ملاءة، أبيان، والراجحي وغيرها، كلهم أخذت أرباحهم في نفس الوقت، استثمرت في نفس الوقت، وأخذت أرباحهم بنفس الوقت.

المهم، الربح: بعطيكم إياه بالنسبة المئوية، وبعدها عشان أسهل الفهم، راح أعطيكم مثال على مبلغ المحفظة الهادئة. ربحت فيها ما نسبته 12%. المحفظة المعتدلة ربحت فيها 10.5%، مع العلم أنه وقت نزول الأسواق كان ربحي 3.56%. شفتوا كيف الفرق خلال شهر أو أشهر قليلة؟ المحفظة المغامرة ربحت فيها 10%، والمجازفة 12.55%. محفظة الطوارئ أو الادخار 3.55%.

ملاحظة مهمة وهي أن المحفظة الهادئة، اللي هي المفروض الأقل ربح، هي من الأكثر ربح خلال سنة قريبة من المجازفة.

طيب، لو أنك استثمرت 100 ريال في كل محفظة، كم الربح تقريباً بيكون بعد سنة؟ الهادئة راح تكون ربحت 1200 ريال. المعتدلة 1050 ريال. المغامرة 1000 ريال. المجازفة 1255 ريال. والطوارئ 355 ريال.

وأرجع أذكر أنه المحافظ والاستثمار تتعلق 100% بوضع السوق. يعني ممكن لو أسوي فيديو عن نفس هذه الاستثمارات بعد ست شهور، تصير الهادئة منخفضة والمجازفة مرتفعة، أو العكس، أو تصير خسران في محفظة وربحان في ثانية كانت أصلاً خسرانة. يعني السوق غير منطقي للأسف، غير واضح. وزع استثماراتك في أكثر من مكان، وابتعد عن الأكثر خطورة، أو خذها نسبة قليلة من استثماراتك، ولا تبيع أو تخسر بسبب بيعك المتكرر عندما ينزل السوق.

طيب، هل تمرة مناسب لمن يرغب بالاستثمار؟ وهل أنصح فيها؟ أنا أشوف تمرة خيار ممتاز جداً، خصوصاً رسومها تعتبر جيدة ومن الأفضل. لكني دائماً ضد الاستثمار في مكان واحد، ومع توزيع الاستثمارات في أكثر من منصة أو بنك.

شرفني بالاشتراك في القناة والإعجاب بالفيديو، ولا تنسون مشاهدة الفيديوهات الجاية اللي بتكون على المنصات الأخرى، وراح يكون فيها تفصيل مهم جداً. أتمنى أني وفقت في الشرح. أنا محمد الخضير، شكراً لوقتك، وفي أمان الله.