Transcription
محمد شاب زي أي شاب عنده 27 سنة، اتخرج، اشتغل، حب واتحب، وقرر يكمل نص دينه فخطب وجمع الشبكة والمهر، وفلوس العفش والفرح والفوتو سيشن، وكل حاجة تمام. لكن وهو قاعد في قعدة صفا مع أصحابه، واحد منهم جاي من بلاد بره فسأله: "هو أنت صحيح عملت تحاليل الجواز ولا لسه؟" أوبا، الشريلة كلها قعدت تضحك وتتريق عليه، ومحمد كان قاعد مستغرب قوي. وكلمة من هنا على ضحكة، على أفيه من هناك، قال يعمل تحاليل جواز؟ قالوا: "احنا ابننا راجل، بلاش خيبة".
فالشاب اللي اتكلم على حوار التحاليل ده قال لهم: "ثانية واحدة بس يا شباب، على فكرة محمد فعلاً محتاج يعمل تحاليل جواز. فعشان تفهم القصة، شد لك كرسي وهات كوباية شاي وتعالى أحكي لك الموضوع من البداية. الحلقة دي لكل أب وأم بيربوا أولادهم، ولكل شاب عاوز يطمن على نفسه، فهنعرف كل حاجة بالتفصيل بعد [موسيقى] الفاصل.
أهلًا بكم في حلقة جديدة من فارمست. قبل ما نبدا الحلقة، ما تنساش تتأكد إن أنت مشترك في القناة ومفعل الجرس، وإن أنت كمان متابعني على انستغرام. مستنيكم على الانستغرام بعد الحلقة، لو حد عنده أي سؤال أو لو حد عنده أي فكرة لحلقات قادمة. يا ترى امتى بيحصل التمييز بين الجنسين في الحمل؟
في حصة العلوم في سنة خمسة ابتدائي، أخدنا إن كل إنسان بيكون عنده 23 زوج من الكروموسومات، 22 زوج كروموسومات جسدية، وزوج واحد كروموسومات جنسية. والكروموسومات الجنسية دي بتكون نوعين: يا إما إكس إكس عند الإناث، يا إما إكس واي عند الذكور. بس اللي ما كناش نعرفه وقتها، إننا كلنا بنكون واحد عند التكوين بتاع جسمنا في البداية، يعني أثناء المرحلة الأولى من الحمل اللي هي تقريبًا لحد الأسبوع السابع، يكون الجهاز التناسلي فيها لسه عبارة عن أنبوبة مالهاش ملامح، إلا إن يتم إفراز الهرمون الكينج عمهم كلهم، التستوستيرون. فده بقى طبعًا اللي بيميز الذكور عن الإناث. عشان كده في اعتقاد عند كبار السن، دايمًا بيقولوا للحوامل الجدات إن لو البيبي اتحرك بدري أكيد يبقى ولد.
فبيبدا التستوستيرون فرض سيطرته نتيجة وجود الكروموسوم واي، وتبدا الأعضاء التناسلية إن هي تتكون بالتدريج بداية من الأسبوع التاسع، فبيحصل استطالة للأنبوبة اللي اتكلمنا عليه من شوية، وبيتكون القضيب. أما بقى لما نوصل للأسبوع العاشر، بتظهر براعم صغيرة، وهتتطور لغدة البروستاتا، ودي هنتكلم عنها كمان شوية، بس خليك فاكرها. والجهاز البولي بيكتمل تكوينه في الأسبوع الـ14. فالغريب بقى في المرحلة دي، إن مستوى هرمون التستوستيرون بيوصل لأعلى مستوياته في الأسبوع الـ16، بمعدل يشبه راجل بالغ تقريبًا، وبعدها بينزل تاني ويقل تدريجيًا ما بين الأسبوع الـ16 والأسبوع العـ. فلما الواحد بيشوف التفاصيل دي، بيقول سبحان الله، كل معلومة في خلق الأجنة بيكون فيها إعجاز علمي. يعني تخيل كده إن لحد دلوقتي العلماء لسه بيدرسوا ليه التستوستيرون بيوصل لأعلى مستوياته في الأسبوع الـ16، وبعدها بينخفض.
القضيب بيكمل نموه عادي جدًا خلال الثلث الأخير من الحمل، وبتنزل الخصيتين المتعلقتين في البطن، اللي مكانهم في كيس الصفن، عند الأسبوع 26 تقريبًا. وبكده أنت بدأت تفرض قوتك وسيطرتك عشان تخرج لنا بالسلامة كراجل مكتمل المعالم. فأيه بقى اللي بيخلينا نتحول من طفل كيوت وأمور، لبني آدم وش كله حبوب وبيجعر في البيت؟ خليني الأول أوصف لك جسمك عامل إزاي، عشان لما أفهمك اللي هيحصل لك تكون مستوعب معايا.
أداؤك كراجل أو كذكر مش معتمد بس على الأعضاء اللي أنت شايفها، لكن في مصنع مسؤول عن كل حاجة بتحصل لك. فخليني أعرفك بسرعة كده عن اللعيبه المسؤولة عن الماتش ده، ونقدر هنا نقسمهم لفرقتين: أول فرقة هي الأعضاء الخارجية اللي بتكون ظاهرة بره الجسم، وثاني فرقة هي الأعضاء الداخلية اللي بتكون شغالة في الخفاء مالهاش أي صوت.
نبدا بالأعضاء الخارجية وإبرازهم: القضيب ده بيكون مسؤول عن التبول، وكمان هو اللي بيتم من خلاله نقل الحيوانات المنوية وقت العلاقة الزوجية. بيحتاج تقريبًا لـ130 ملي دم عشان يحصل له انتصاب كامل، لأن الدم هو اللي بيملى التجاويف اللي جواه، وطبعًا الكمية دي ممكن تختلف من شخص للثاني. ثاني حاجة في الأعضاء الخارجية هي الخصيتين، وهي دي مصنع الرجولة، لأن الخصيتين بيكونوا هم المسؤولين عن إنتاج الحيوانات المنوية، هرمون التستوستيرون، والتستوستيرون زي ما احنا عارفين بيكون هو المسؤول عن أغلب الصفات الذكرية. والخصيتين بيكونوا موجودين بره الجسم، جوه كيس الصفن، لأنهم بيكونوا محتاجين درجة حرارة أقل من درجة حرارة الجسم الداخلية، عشان الحيوانات المنوية تفضل سليمة بشكل كامل. عشان كده بنلاحظ إن في الشتاء الخصيتين بيكونوا قريبين شوية من الجسم، وكذلك برضه في الصيف بيبعدوا شوية، وده بسبب قُهية طبيعية للحفاظ على درجة حرارتهم. فدايمًا درجة حرارتهم بتكون أقل من درجة حرارة الجسم بحوالي 2 لـ4 درجة مئوية. أما بقى كيس الصفن بيكون هو البادي جارد اللي بيحافظ على درجة حرارة الخصيتين، وبيحميهم كمان من أي إصابة.
ثانيًا الأعضاء الداخلية اللي بتكون شغالة في الخفاء، وماحدش سمع عليها صوت، لكن دورها بيكون مهم جدًا. أول حاجة البربخ أو المخزن، ده بيكون عبارة عن أنبوب طويل ملفوف فوق كل خصية، وده المكان اللي بتدخل فيه الحيوانات المنوية عشان تكمل نموها لحد ما تخرج بالسلامة بره الجسم، وده أكثر مكان بيتأثر بالعدوى الجنسية اللي زي السيلان أو الكلاميديا. ثاني حاجة القناة المنوية، وده بيكون طريق السفر، القناة دي هي اللي بتنقل الحيوانات المنوية من البربخ لحد مجرى البول وقت القذف. أما بقى ثالث حاجة الحويصلات المنوية أو مصنع الطاقة، وهي دي اللي بتفرز السائل المغذي للحيوانات المنوية، وبتساعدهم إن هم يفضلوا ناشطين أثناء رحلتهم. رابع حاجة غدة البروستاتا اللي هي محطة التحميل، فاكر من شوية لما قلت لك هنتكلم عنها بالتفصيل لأنها مهمة جدًا؟ أحب أقول لك إن البروستاتا هي اللي بتكون مسؤولة عن إفراز جزء من السائل المنوي المغذي الحيوانات المنوية، لا ومش كده وبس، دي كمان بتساعد في تحفيز حركة الحيوانات المنوية. ومع التقدم في السن، البروستاتا ممكن يحصل فيها تضخم نتيجة لالتهاب أو عدوى، وطبعًا ده بيأثر على عملية التبول عند الرجالة بشكل كبير جدًا. في دراسة بحثية اتعملت في بريطانيا، أثبتت إن واحد من كل ثمانية رجالة معرض للإصابة بسرطان البروستاتا، وإن خطر الإصابة بيه بيزيد عند الرجالة فوق سن الـ50 سنة، وإن أصحاب البشرة السمراء اللي بيكون عندهم تاريخ مرضي في العيلة بالإصابة بالمرض ده بيكون فرصتهم، مع الأسف، أكبر بكثير من البشرة البيضاء.
خامس حاجة غدة كوبر أو عامل النظافة، هي دي بقى اللي بتنظف وبتمسح وترش مية كده عشان الحيوانات المنوية تعدي بسلام، لأنها بتفرز سائل شفاف قبل القذف، والهدف منه إنه ينظف مجرى البول من أي بقايا حمضية، والهدف هنا إنه يحمي الحيوانات المنوية ويوفر لها بيئة مناسبة للحركة. يا ترى هي مراحل النضج عند الذكور؟ دلوقتي أنت عرفت شكل جسمك وأنت في اللفة لحد ما توصل تقريبًا لسن ثمان سنين، ودي اللي بنسميها مرحلة الهدنة. يا ترى إيه بقى اللي بيحصل بيخليك تتحول من الطفل البريء لكائن غريب مش فاهم نفسه؟
سنة 1965، العالم جيمس تانر عمل جدول سماه تصنيف النضج الجنسي إس إم أر، وقسمه بالضبط لخمس مراحل. المرحلة الأولى تقريبًا بتبدأ عن سن ثمان سنين، ودي اللي بنسميها مرحلة التجهيز، ما فيش تغيرات واضحة، لكن الجسم بيحضر نفسه للخطوة الجاية، الغدة القظرية بتبدأ تشتغل، الخصيتين في وضع ثابت، طول الجسم بيبدا يزيد بس بشكل مش ملحوظ، وما فيش أي ظهور للشعر في أي أماكن جديدة. أما بقى المرحلة الثانية بتستمر تقريبًا من سن ٩ لـ١٤ سنة، بتبدأ بقى هنا أول التغيرات إن هي تظهر، الجسم بيبدا يدي إشارة للخصيتين إن خلاص وقت الشغل بدأ، الخصيتين وكيس الصفن بيبداوا في النمو، ودي أول علامة حقيقية على بداية البلوغ، الشعر بيبدا يظهر حوالين القضيب وتحت الإبطين، لكنه بيكون لسه خفيف جدًا في الأول، وطول جسمك بيزيد بمعدل ٥ لـ٦ سم في السنة، فبنلاقي إن تكوين الجسم بيتغير، والدهون في الجسم بتبدأ تقل شوية، بتبدأ ملامح العضلات إن هي تظهر بشكل خفيف، وريحة الجسم بتبدأ تظهر لأول مرة. ده بقى الوقت اللي الولاد بيكتشفوا فيه أهمية مزيل العرق.
أما بقى المرحلة الثالثة بتبدأ من سن ١٠ لـ١٦ سنة، هنا الجسم بيدوس بنزين، وكل حاجة بتتغير بسرعة، حجم القضيب والخصيتين بيكبروا أكثر، وهنا ممكن الولد يبدا يلاحظ الاحتلام الليلي، شعر العانة والإبطين بيبدا يغمق وبيكون أكثر كثافة، وطول الجسم بيبدا يزيد بشكل أكبر، يعني ممكن يطول من ٧ لـ٨ سم في السنة، لا وكمان بيلاقي إن الهيكل العظمي بتاعه بيبدا ياخد شكل رجولي أكثر، صوته طبعًا بيبدا يتغير، في الأول بيكون مخنشر، بعدها بيبدا يثبت على النغمة النهائية، كتلة العضلات بتبدأ تزيد، وهنا بيبدا الولد يحس إنه أقوى، لكن في نفس الوقت في حوالي ٥٠٪ من الذكور في المرحلة دي بيعانوا من تضخم بسيط في حجم الثديين، وده اللي بنسميه التثدي، وده بيكون طبيعي جدًا. ومشكلة التثدي بتحصل هنا لأن الجسم في المرحلة دي بيكون عنده اضطراب ما بين التستوستيرون والإستروجين، لكنها غالبًا بتختفي لوحدها خلال سنتين.
نيجي بقى للمرحلة الرابعة اللي بتكون من سن ١١ لـ١٦ سنة، ودي بقى مرحلة النضج الحقيقي، المرحلة اللي بتكتمل فيها رحلة التحول. بنلاقي إن القضيب بيكبر أكثر، كيس الصفن لونه بيغمق، وتبدأ ثنيات الجلد إن هي تظهر عليه، يبدا الشعر في باقي الجسم إن هو يظهر بشكل واضح، سواء في الرجلين أو تحت الإبطين أو حتى في الصدر، نمو الطول بيبلغ ذروته وبيوصل لـ١٠ سم في السنة، الوش بيبدا يتغير ويظهر معاه حب الشباب، وطبعًا ده بيكون كابوس لأغلب الشباب، لأن مشكلة حب الشباب بتحصل بسبب زيادة نشاط الغدد الدهنية، فده اللي بيخلي البشرة تفرز زيوت بشكل أكثر من اللازم. أما بقى المرحلة الخامسة من سن ١٧ لـ٢٠ سنة، هنا الجسم بيكون وصل لشكل الراجل البالغ، لكن هل كده رحلة خلصت؟ بصراحة مش بالضبط قوي، لكن نقدر نقول إن الطول مثلًا بيستقر، لكن بعض الشباب ممكن يطولوا لحد أوائل العشرينات، حجم العضلات بيزيد، والصوت بيثبت على نغمة واحدة، في بعض الشباب ممكن يلاحظوا نمو شعر العانة لحد أعلى الفخدين، وده طبيعي جدًا، العضلة التناسلية بتكون اكتملت بشكل نهائي، ومستويات هرمون التستوستيرون بتوصل لأعلى معدل ليها، شعر الذقن بيبدا يظهر بقوة، وبتحتاج تحجز مكان بدري عند الحلاق ليلة العيد. كل العلامات دي بتظهر على الذكور بالتوالي، في الوقت اللي بيكون فيه الولد مضطرب جدًا ومتلخبط، عشان كده نوّهت في أول الحلقة إن لازم الآباء والأمهات يفهموا المرحلة دي كويس، ويوعوا أولادهم ليها، عشان في ولاد كتير جدًا بيعانوا من الاكتئاب في الفترة دي، لدرجة إنه بينام كتير، وبتلاقيه كمان مش حابب يتكلم معاك، وبيدور دايمًا على مساحة خاصة بيه لوحده. طب يا ترى المرحلة المزعجة دي بتخلص امتى بالضبط؟ غالبًا مرحلة البلوغ الجنسي بتكمل معانا لحد سن ٢١ سنة، لما بيثبت الطول النهائي، والكتلة العضلية للجسم بتكتمل، والعظام بيكتمل نموها، أما البلوغ الجنسي بيكون لحد سن ١٦ لـ١٧ سنة، وبيكون الذكر قادر على الإنجاب من أول قذف يحصل له، يعني كل قذف ممكن يطلع فيه حجم معلقة صغيرة من السائل المنوي، بيكون فيه من ٢٠٠ لـ٥٠٠ مليون حيوان منوي على الأقل. ومن الاعتقادات الخاطئة اللي بتكون عند الشاب في السن ده، إن القدرة الجنسية بتكون معتمدة على حجم القضيب، لكن أحب أقول لك إن دي معلومة مش صحيحة.
طيب، امتى الإنسان ممكن يحس إنه متأخر في البلوغ، أو امتى يبدا الآباء والأمهات في القلق على صحة ولادهم الذكور؟ تأخر بلوغ معناه إن علامات البلوغ مش بتظهر في الوقت المتوقع اللي احنا قلناه من شوية، فلو الولد وصل لسن ١٤ سنة ولسه ما فيش نمو في الخصيتين أو القضيب، أو لو وصل ١٦ سنة ولسه صوته ما تغيرش، أو ما ظهرش شعر في الجسم، في العانة أو في الوش، فأحب أقول لك إن ما فيش أي قاعدة ثابتة لسن البلوغ، لدرجة إن هم بيكونوا إخوات وأحيانًا توأم، واحد منهم يبلغ بدري قبل الثاني. ودراسات أثبتت إن غالبية الذكور اللي بيتأخروا في البلوغ بدون سبب واضح، بيحصل لهم البلوغ بعدها عادي جدًا بدون أي تدخل طبي. طب ليه أصلًا ممكن يحصل تأخر في البلوغ؟ عندنا هنا أكثر من سبب، ممكن يكون عامل وراثي من الأب أو من أي حد في العيلة، وممكن يكون بسبب بعض الأمراض المزمنة اللي زي أنيميا الخلايا المنجلية، وممكن يكون بسبب نقص في التغذية، وممكن يكون بسبب خلل في الغدة النخامية، وده بيأثر على الهرمونات كلها بشكل عام. فعشان تحافظ على صحتك وعلى مصنع الرجولة، خليني أقول لك على شوية أرقام وإحصائيات هتخليك تراجع نفسك في حياتك.
أول عامل ممكن يدمرك هو قلة النوم، إن الدراسات أثبتت إن قلة النوم لمدة أسبوع على الأقل ممكن تسبب نقص كبير جدًا في إفراز هرمون التستوستيرون بنسبة ١٥٪ عند الرجالة. ثاني حاجة الأكل الصحي، خليك عارف دايمًا الأكل الصحي لازم يكون أسلوب حياتك، لأن ببساطة الأكل مليان بالسكر والدهون المهدرجة، بيزود الدهون في الجسم بشكل كبير، وده بالتالي بيقلل من تأثير هرمون التستوستيرون. ثالث حاجة نقص الفيتامينات، تحديدًا فيتامين د والزنك، دول بيأثروا بشكل مباشر على إنتاج الهرمونات، ونقص الزنك تحديدًا ممكن يقلل التستوستيرون بنسبة ٥٠٪. رابع حاجة التدخين وشرب الكحول والمخدرات اللي زي الحشيش مثلًا، والحاجات دي بتلخبط إنتاج الهرمونات، وبتقلل من جودة الحيوانات المنوية، يعني ممكن يكون عندك حيوانات منوية بعدد كبير، لكنها مشوهة، وممكن تسبب لك تأخر في الإنجاب. خامس حاجة قلة ممارسة الرياضة، خصوصًا تمارين المقاومة، لأنها من أقوى الطرق الطبيعية لرفع كمية التستوستيرون في الجسم، وزيادة الكتلة العضلية، فطبعًا مش محتاج أقول إن الرياضة مهمة جدًا، وإن نزول الجيم لازم تكون روتين في يومك، ما هياش رفاهية.
طب إيه بقى يا ترى التحاليل اللي محمد كان محتاج يعملها قبل ما يتجوز عشان يطمن على نفسه؟ أول حاجة تحليل السائل المنوي، بيحدد عدد الحيوانات المنوية وحركتها وشكلها، ولو في أي مشكلة ممكن تتعالج بدري. ثاني حاجة تحليل الهرمونات، تحديدًا هرمون التستوستيرون المسؤول عن الطاقة، وعن الرغبة الجنسية، وعن الخصوبة، ولازم يكون في مستوى الطبيعي، والنسة الطبيعية بتكون من ٣٠٠ لـ١٠٠٠ نانو جرام لكل ديسيلتر. ثالث حاجة تحليل الأمراض المعدية، ودي دي تعملها عشان تطمن على صحتك وعلى صحة شريك حياتك، زي تحاليل التهاب الكبد الوبائي فيروس بي وفيروس سي، وكمان الإيدز. رابع حاجة تحليل فصيلة الدم والأمراض الوراثية، مهم جدًا لو تخلف إنك تعمل تحليل أر اتش لو فصيلة دم الزوجة سالبة، وتعمل فحص للكروموسومات لو هتتجوز واحدة قريبتك، وتعمل كمان اختبار الأمراض الوراثية لو في تاريخ عائلي لأي مرض جيني في العيلتين، يعني عندك مثلًا مرض الثلاسيميا، أنيميا خلايا المنجلية، كل دي من الأمراض الوراثية الأكثر انتشارًا في العالم العربي. فلما محمد يعمل كل التحاليل دي وتطلع تمام، أقدر أقول له ألف مليون مبروك، وبالرفاه والبنين، وأنا متأكد إن بعد الحلقة دي أي حد بيتفرج عليها ومقبل على الزواج مش هيتردد أبدًا في إنه يطمن على نفسه.
شوفكم الحلقة الجاية، لو المحتوى اللي بنقدمه عجبك وعايزنا نستمر، اشترك في قناة فرمستان على يوتيوب، وما تنساش تشغل الجرس، هتلاقي المقص تحت الفيديو، هتلاقي معهم أكونت الشخصي بتاعي على انستغرام لو حابب تتابعني بشكل شخصي. تابعنا باستمرار، وكن مواطن في جمهورية فرماست، السلام [موسيقى] [موسيقى].