ارتجاع المرئ والحموضة وكلام ستسمعه لأول مره والكحه والنهجان #دكتوروليدشوقى

الدكتور وليد شوقي من برنامج استشارة طبية. النهارده هنتكلم عن مرض العصر، ولكن كلام أنا نفسي أول مرة أقوله لك عن الحموضة والارتجاع. هتكتشف إن السبب في ناس كتيرة جداً نوع من الفتق بيحصل إن الصمام الفاصل ما بين المريء والمعدة بيطلع لفوق في الصدر. طب إيه ده؟ ونحل المشكلة دي إزاي؟ ده هتكتشف كمان إن كتير جداً من الناس اللي بيجيلهم كحة وبيجيلهم نهجان بيكون بسبب هذه الحموضة. وهتكتشف إنك لو ما عملتش الكلام اللي هقوله لك النهارده، مع الوقت هذا النهجان والكحة بيقلب بتليف في الرئة، تليف في الرئة.

فالكلام النهارده في غاية الخطورة، وهنتطرق فيه لحاجات كتير منها التهاب الزور، تاكل الأسنان اللي بيحصل بسبب الحموضة، ريحة البق المش كويسة، إزاي أتعامل مع الارتجاع وليس الحموضة فقط، وإزاي أخلي هذه الأعراض ما تحصلش. كمان الحموضة لو ما عملتش الكلام اللي هقوله لك النهارده في حلقة النهارده، بتفضل تكوي في المريء، وده مش مكان المفروض الحموضة تكوي فيه، وده اللي بيعمل لك الحرقان الشديد اللي في الصدر ده. ممكن يعمل حاجة اسمها بارت أيوفي جس، ودي مكتوبة في الكتب كلها، تقدروا تقروا عنها. ودي حاجة اسمها بريكسس، يعني مرحلة سرطانية، وده من أشهر الأسباب أو ما قبل السرطان يعني، وده من أشهر أسباب سرطان المريء.

ولكن ما تخافش، مش معنى إن أنت عندك حموضة يبقى خلاص أنت جالك سرطان المريء، لا لا لا. أنا النهارده هقول لك إزاي تمنع ده إنه يحصل. طب أعرف إزاي إن ده يا دكتور ما حصلش؟ طالما ما حصلش يبقى ما حصلش ولا هيحصل لو أنت عملت اللي أنا هقول لك عليه النهارده. فما تخافش. كده بس رجاء زي ما اتعودت، شير ولايك وكومنتات كتير جداً على اللايف ده عشان الناس تعرف إن في لايف على الصفحة وعشان يوصل لكل الناس. فبشكركم جداً.

هبتدي زي ما اتعودت مع حضراتكم وزي ما أنتم علمتوني، إننا نشرح كل حاجة عشان نفهمها. فهنبدأ زي كده الطلبة والسبورة زي ما بيقولوا. فبص معايا على الرسمة دي، لأن الرسمة دي هتبقى مهمة جداً جداً جداً بالنسبة لنا. المريء بينزل بالشكل ده، والمعدة بتبقى بالشكل ده، وبيبقى هنا في عضلة اسمها عضلة الحجاب الحاجز. فلما بنقول بصوا على المنظر اهو، لما بنقول إن هناك صمام هنا اهو، الصمام ده لازم يبقى مستواه أسفل العضلة بتاعة الحجاب الحاجز. خلي بالك عشان الكلام ده مهم جداً. طب إيه اللي بيحصل في القصة بتاعة الفتق اللي بيحصل؟ اللي بيحصل في الفتق ده إن بيطلع جزء من المعدة دي فوق هنا اهو ويرتفع الصمام من مكانه اللي هنا إلى مكانه اللي هنا. فهنا الضغط بيبقى في الراس إيه؟ سلبي، فيفتح الصمام ده وتلاقي إنك عايش طول الوقت بإيه؟ بارتجاع عمال يرجع لفوق، والحمض اللي في المعدة اللي مش مفروض يطلع فوق تلاقيه طالع لفوق جوه صدرك.

طيب تعال فهمنا أكتر، هو إيه أصلاً اللي بيسبب المشكلة دي؟ عادات خاطئة جداً إننا ناكل وندخل ننام. فلما بناكل وندخل ننام الضغط بيزيد قوي على المعدة بتاعتنا لأن بطني مليانة ويفضل يزق على هذا الصمام ويفضل يزق على المعدة، ودي فتحة موجودة في عضلة الحجاب الحاجز في النص فتضعف مع الوقت. فهبص ألاقي المعدة طلعت من مكانها لفوق، يبقى مفيش قفلة ما بين المعدة والمريء بتاعي، خلاص فتحوا على بعض. ولما يفتحوا على بعض هيحصل الارتجاع. وده اللي هيخليني النهارده أقول لك إني في حاجات هنقولها النهارده غير دوا الحموضة، لأن دوا الحموضة لا يعالج الارتجاع. إنما مهم جداً ليه؟ لأنه بيقلل كمية الحمض المرتجعة. طب أمال إيه اللي يقلل الارتجاع ده؟ اللي هنقوله النهارده.

بس قبل ما أقوله عايز أطلع معاك بحتة تانية. لما يطلع هنا في صدري الحموضة دي أو الارتجاع ده، أبدأ أحس بنار هنا ويفضل يطلع ده. لما أنام يوصل للزور فيعمل التهاب هنا في الزور ويعمل ريحة بوق مش كويسة، وخليني في البلع يوجعني أحياناً. يبدأ يحصل تاكل لطبقة الإينامل بتاعة السنان من الحمض ده. لما يجي هنا في المنطقة دي اللي هي ورا اليزو فنتس، يبدأ هنا بيفتح حاجتين زي ما بيفتح المريء بتفتح كمان القصبه الهوائية. وأنتم عارفين من العلوم بتاعة أولى ابتدائي كويس قوي إن في هنا لسان المزمار اللي لما بتيجي تبلع يروح قافل على الحتة دي. وهنقول أدوية الحموضة على فكرة إزاي يا دكتور نقول إن دوا الحموضة مهم؟ هقول أدوية الحموضة دلوقتي. هقول إيه اللي هنعمله في كل الخطوات والعلاجات كلها، بس افهم معايا عشان تبني صح.

فلسان المزمار يقفل على الرئة. لو ما قفلش وأنت بتتكلم وأنت بتاكل تشرق. تمام. ولكن اللي بيحصل وأنت نايم لسان المزمار ده مفيش قصة البلع دي شغالة. فيبدأ يحصل إيه؟ إن نقط خفيفة من الحمض ده لما توصل في المكان ده، أنت تستنشقها فيحصل لك حاجة اسمها أسبريشن، أنت متصبت، خدت الحمض جوه الرئة بتاعتك. فيعمل التهاب في الرئة وتعمل أشعة بتاعة الرئة نلاقي فيها بطش بيضا كده في الرئة من تحت وتؤدي إلى التليف إن لم تعالج. يقول لك ده أنا بيجيلي كحة كتير. تروح تسأله على الحموضة تلاقيها. تعالج الحموضة بعدها بأسبوعين تلاتة يقول لك نفس يرتاح يا دكتور، الكحة والبلغم راحوا يا دكتور. أه. ليه بقى؟ ليه؟ لإن شرحنا القصة.

طب أنا عايز أعالج بقى دلوقتي؟ أول حاجة نخلص من أدوية الحموضة، وبعد كده عايزين نتكلم عن ميكروب المعدة الحلزوني، وعايزين نتكلم عن الفتق ده. فخليني قبل ما أقول الحموضة معلش، هقول حاجات إزاي أقلل الارتجاع. رقم واحد، ممنوع الأكل قبل النوم بثلاث ساعات بأي حال من الأحوال. وهذا لحكمة ما. إيه هي؟ إن الأكل بيقعد في المعدة الثلاث ساعات دول. بعد الثلاث ساعات يغادر الأكل من المعدة ويروح للاثنى عشر. فلما أنا ما آكلش قبل النوم بثلاث ساعات، يحصل إيه؟ معدتي فاضية فيقل هذا الارتجاع.

رقم اتنين، ممنوع أكل الحاجات خصوصاً في آخر وجبة من اليوم اللي بتزود الحموضة عندي. وهتلاقي نفسك عارفهم. ما تجيش تاكل صلصة الطماطم، ما تاكلش المسبكات، ما تاكلش الحاجات بتاعة الحموضة اللي هي اللي هي المشطشطة، السبايسي فود. بلاش ناكل. ما تشربش دخان سجاير وما تشربش كحوليات. وما تاخدش الأكلات اللي هي إيه؟ اللي بتتعبك، اللي بتتعبك.

طيب إيه تاني؟ الوضع بتاع الجسم. أنا عايز أرفع المريء. ركز في الكلام اللي هقوله ده وجربه وهتدعيلي. أنا عايز أرفع مستوى المريء عن مستوى المعدة. قانون الجاذبية بيقول إن الحاجة بتمشي مع الجاذبية. لما أنا بنام بيقل الحركة الدودية بتاعة الأمعاء غصب عن أي حد فينا، ده طبيعة الجسم. ولكن أنا عايز أخلي الأكل ما يرجعش في المريء. فلما المريء يبقى في مستوى أعلى ما يرجعش في الأكل. طب أعمل إيه؟ أرفع الرجلين بتوع السرير اللي ناحية الراس. دي جديدة دي ما قلناهاش قبل كده. مش أرفع المخدة. ركز في دي. السرير بتاعي بالمنظر ده، راس الناحية دي، هروح رافع دي كام؟ 8 إنش. يعني إيه 8 إنش؟ يعني حوالي 20 سم. هرفع الرجلين حوالي 20 سم. وده هيخلي الأكل ما يرجعش جوه المريء. تقول لي طب ما سهلة أحط مخدة وأرفع راسي 20 سم؟ بتتني ضهرك وبتتنك وبتأثر على العمود الفقري. ولاقوا إن هي مالهاش دور قوي، لإنك أنت لما ترفع راسك ما زال المنطقة دي، أنت بترفع الحتة دي، يعني بتنحني ضهرك كده أو رقبتك، وما زال الحتة دي بتتعرض للارتجاع، ما زالت وبيزيد مش بيقل. أنت ما إلا ضغط الضغط على البطن بالطريقة دي، فبيد الارتجاع مش بيقل بالطريقة دي. يعني ده مش صح. صح هو إننا نرفع السرير، رجلين، حط طوبتين أي حاجة 20 سم ترفع الناحية بتاعة إيه؟ الراس فقط.

طيب إيه تاني؟ النوم على الجانب الأيسر. وهذا ليس له علاقة بأي أمر ديني. وأنا قلت ده قبل كده. أنا بتكلم في حالة مرضية. والحالة المرضية يعني لو أنت دكتورك شايف إنك ما تصومش رمضان يقول لك افطروا بتفطروا. فالحالة المرضية تختلف عن أي معتقدات أخرى أو أي حالة غير مرضية. لما بنام على الجنب الشمال ده بيخلي المريء بتاعي يبقى في مستوى أعلى. لإن هي باختصار شديد جداً المعدة على الناحية الشمال. فانا لما أنام على الناحية الشمال المعدة تبقى والمرق يبقى عالي. وطبعاً عشرات ومئات الآلاف من الرسائل جت قالت لي بنشكرك على الحتة دي، لإن فعلاً فرقت معانا.

ما تشربش قهوة بعد الساعة خمسة. أربعة. أنا قلت قبل كده بدوس على نفسي وأقول لكم 4:30 الظهر. يعني بعد الساعة 4 الظهر لا قهوة ولا شاي. لإن ده بيؤدي برضه إلى انبساط هذا الثمار. ما تاخدش حاجة فيها نعناع أبداً لو عندك ارتجاع وحموضة. أبداً. لإن الحاجة اللي فيها النعناع بتقلل أو بتعمل انبساط في العضلات بتاعة الجهاز الهضمي. فتلاقيها تحسن القولون قوي. يعني لو واحد عنده شد في القولون وألم في القولون لما ياخدها يرتاح. ولكن اللي عنده حموضة هو هتلاقيه مجرب وعارف الكلام اللي أنا بقوله كويس. فما ناخد حاجة فيها النعناع بأي صورة، ولا شاي بالنعناع، ولا لبن طعمه نعناع، أي حاجة فيها نعناع ممنوع. اللي هو البيبر منت.

طيب إيه تاني؟ نعالج الميكروب الحلزوني إن وجد. يعني في ناس عندها وده متوطن قوي في مصر قوي. لإن ما فيش رقابة على المطاعم اللي بره بشكل كافي. وللأسف مش الكل، ولكن كثيراً من الناس اللي شغالين في المطاعم بيدخلوا دورة المياه ما يغسلش إيده كويس ويطلع يشتغل. يحط الهيليكوباكتر بايلوري الميكروب الحلزوني في السندوتشات للناس. فالناس تاكلهم وتتعب. دكتور ده أنا قرفت وزهقت وتعبت. ده أنا كل ما أعالجها ترجع تاني. ما هو أنت لو عالجتها النهارده وأكلت بعد بكرة هترجع تاني. لإن الدوا ده مضاد حيوي، اتنين مضاد حيوي، وواحد مضاد للحموضة. مش أي اتنين مضاد حيوي. لازم نتكلم مع العيان عشان ندي الدوا. ما ينفعش نقولهم لكل ناس. مش كل ناس دوا واحد. خلاص. فالدوا بيقتل البكتيريا الموجودة عندي. طب أنا أكلت بكتيريا بعد بكرة؟ لا يكون الجسم مناعة ضد إذا العدوى قد تحدث بها مليار مرة عادي جداً. طول ما أنت رحت أكلت من نفس المطعم. مش كل المطاعم معفنة والناس كويسة. وفي ناس كويسة وناس مش كويسة. ولكن من نفس المطعم اللي حط في البراز في الأكل اللي هو يبقى معفن اللي عمل كده. طبعاً لو عمل كده دي هتتع تاني. ولما نعالج الميكروب الحلزوني نعالج البيت كله كله. أي حد عنده نعالجه. لإن لو حد عنده متعالجش ودخل الحمام مغسلش إيده كويس هيعدي التانيين. إيه كويس ده يا دكتور؟ كلنا بنغسل إيدينا. إيه الكلام اللي أنت بتقوله ده؟ هو في حد ما بيغسلش إيده بعد ما يدخل الماية؟ أه. في ناس عادي جداً. في وغسيل إيده كويس. في كتير بيغسل إيده ما يعرفش الغسيل الكويس إيه. أغسل إيدي كويس يعني 20 ثانية. يعني ابني الصغير لما بيدخل يغسل إيده في دورة المياه اللي عنده ست سنين بيغني أغنية ABC ليه؟ عشان يتأكد إنه غسل إيديه لمدة 20 ثانية. علمته كده. فيغسل إيده 20 ثانية دي إزاي برضه؟ تغسل إيديك كده وضهر إيدك بالميه والصابون. طبعاً يكون الصابون على إيدك حضرتك وصباع صباع وبين الصوابع كده وكده وكده وقمة الأصابع كده. ها. كلنا بنغسل إيدينا كده؟ ما أعتقدش. وتغسل تحت الميه. وما أقفل الحنفية بإيدي اللي أنا غسلتها. لإن أنا إيدي كانت مسكت الحنفية فتحت غسلت إيدي مسكت الحنفية. أقفل وسختها تاني. فبمنتهى اللي أنا نشفت بإيدي بروح قافل الحنفية أو بهدومك يعني. ما تمسكهاش بإيدك تاني. هو ده غسيل الإيد المظبوط. طب طب أنا يا دكتور بعقم الحنفية قبل ما أخلص وبغسلها معايا والكلام ده؟ مش تعملها كل مرة الحكاية دي. ما فيش حد بيعمل الكلام ده كل مرة. أنت تحرض على إن المياه تروح في داهية. إيه 20 ثانية وأنا بغسل إيدي دي وسايب الماية مفتوحة؟ لا ما تسيبش الماية مفتوحة. بليت إيدك، خدت شوية صابون حطيتهم على إيدك، قفلت الحنفية، خد ال 20 ثانية بتغسل في إيديك. والآخر اغسلها بالميه وخلصنا.

طيب نيجي بقى لأدوية الحموضة. خليتها لكم في الآخر بس أنتم بتحبوا الأدوية زي عينيكم. فلازم نقولها. هل وأنا عندي ارتجاع محتاج الدوا ده؟ الحقيقة آه. لإنك لما بتقلل الحمض بتقلل كل الألم دي. ولكن الدوا لوحده ما بيجيبش نتيجة. وأنت عارفين إن ما بيجيبش نتيجة كافية لوحده. لكن لو عملت اللي أنا قلتهم من شوية دول، اللي هيجيبوا نتيجة حقيقية. فالعلاج بينقسم لثلاث شرائح، ثلاث حاجات. أنا قربت أخلص عشان اللي زهق وعايز يمشي يكمل الدقيقتين دول بس.

فواحد من الأدوية دي اسمه بروتون بمب انهيبيتور، اللي هو بيقفل الحنفيات بتاعة الحمض. اللي هو أمثلته زي الأوميبرازول. هنا في أمريكا جسترازول، لوسك، كونترلوك، بزول، إم، كتيرة جداً. وهذه الأدوية بتقفل المحبس. يعني أنت لو خدتها بعد ما تاكل ويتفرد الحمض ليس لها أي قيمة. يقول لك والله عندي حموضة هات لي يا ابني حباية الكونترلوك. ياخدها ما تحسنت. طب ما مش هتتحسن. لإنك لو ما أخدتهاش قبل الأكل بنص ساعة مش هتجيب نتيجة. عشان كده الدكاترة انقسمت لمدرستين. والاثنين مش غلطة. واحد فيهم يقول لك خدها قبل الفطار بنص ساعة عشان ما تفرزش حمض. هي بتشتغل 24 ساعة. واحد فيهم يقول لك الحموضة أكتر حاجة والارتجاع بالليل. خدها قبل العشاء بنص ساعة. وده يبقى الأفضل. فمدرسة ودي مدرسة. أخد 20 ولا 40؟ بنبتدي بتركيز 20. لو ما جابش نتيجة هم اللي بياخدوا 40. أنا من وجهة نظري إن أنت ما ينفعش تمشي عليها سنين كتيرة قوي. فحاول تغير في الأنواع بدل بينها وبين الاتش تو بلاكر. يعني ممكن تاخد دي أسبوع ودي أسبوع. فكسرت السلسلة وما تعرضت لدوا لمدة سنين طويلة عشان العرض الجانبي بتاعه.

فالدوا التاني اللي هو زي الفاموتيدين، زي الرانيتيدين، زي الأسماء اللي هم البسد والحاجات دي. ده برضه لازم يتاخد قبل الأكل بنص ساعة. لأنه بيشتغل برضه بقفل المحابس بس شغال على مستقبل تاني اللي هو اتش تو بلوكر. طب أنا عندي حموضة دلوقتي حالا ومعدتي مولعة نار. فال الحموضة اللي عندي دي أعمل فيها إيه دلوقتي عشان أخففها دلوقتي؟ أنت بتقولي لو أخدت الدوا ده أو ده مش هيجيب نتيجة. لكن أنا عكيت في الأكل وجالي حموضة دلوقتي. عندي حموضة دلوقتي ومش عارف هي من القلب ولا من الحموضة. يبقى تاخد دوا مضاد للحمض اللي هو اسمه انسد. إيه الانتس ده؟ اللي هو حاجة اسمها أفضلهم حاجة اسمها كالسيوم بيكربونات. بيكربونات الكالسيوم. ليه أفضل من الصوديوم؟ لإن الصوديوم بيرفع الضغط سن. لكن الكالسيوم هو مفيد. كالسيوم فيش مشكلة فيه. هنا موجود في أمريكا تحت اسم تومس. في مصر بقى في حاجات زي الأكوجين والمكوجي. ادخل الصيدلية بس اختار حاجة يكون مكتوب عليها إيه؟ كالسيوم بيكربونات. بالمناسبة ده أرخص واحد فيهم. وبياخد عند اللزوم فقط.

طب أنا عملت اللي أنت قلت عليه. رفعت رجلين السرير، ما أكلتش قبلها بنص ساعة، نمت على الجنب الشمال، ما عنديش الميكروب الحلزوني بتاع المعدة، والدنيا معايا مستقرة. آخد دوا؟ لا. ما عندكش أعراض ما تاخدش دوا. عندي أعراض وبقدر أسيطر عليه بمضاد الحمض بس اللي أنت قلت عليه الأخير ده. خير وبركة. عندي أعراض ومضاد الحمض ده ما بقاش يجيب نتيجة. هطلع لواحد في الاثنين التانيين. سهلة أهي.

تمام. ربنا يوفقكم ونشوفكم على خير في فيديو جديد ومعلومة يمكن تكون تفيدكم. وسلام.