السبب الحقيقي لارتجاع المريء وحموضة المعدة، وكيف تعالجه بطرق مجانية من منزلك

ازاي نزود حمض المعدة؟ ازاي نقوي حمض المعدة؟ انتوا عارفين سالت السؤال ده كام مرة خلال يومين؟ 2000 مرة عشان كتبت بوست قلت فيه ان ادوية الحموضة اللي بتاخدوها هي مش حل ولا علاج للمشكلة، بالعكس هي بتقضي تماماً على الحمض اللي هو خط الدفاع المناعي الأول وأهم حاجة لهضم وامتصاص الأكل والعناصر الغذائية والفيتامينات والمعادن. وفجأة اكتشفت تقريباً إني بقالي أكتر من خمس سنين بكلم نفسي.

طيب ده معناه إيه؟ هسيب مثلاً هبطل أتكلم عن الحلول؟ لا طبعاً، هتكلم في الموضوع ده عادي جداً، بس هنتكلم عن أهم نقطة في موضوع زيادة حمض المعدة، إن الطرق التقليدية اللي بنتكلم عنها دايماً واللي أغلبنا عارفينها زي مثلاً خل التفاح والبيتين هيدروكلورايد ما بتكونش طرق مناسبة في حالة وجود التهاب أو قرح في المعدة. فبنحتاج الأول إننا نعالج الالتهاب ده وبعدين نبتدي نزود الحمض.

طيب لحد ما نعالج الالتهاب والقرح نعمل إيه؟ لأن ساعات ألم الارتجاع بيكون شديد جداً ومزعج، فمحتاجين حل يساعد من أول يوم. فالنهاردة بقى هنتكلم عن حاجات كتير أغلبها حاجات بسيطة جداً وسهلة وكل الناس تقدر تعملها علشان تخفف الارتجاع وتساعد في زيادة الحمض واحنا بنعالج الالتهاب والقرح في نفس الوقت. والأهم هنجاوب تاني على السؤال الأزلي: إزاي حمض المعدة قليل واحنا أصلاً مشكلتنا ارتجاع الحمض؟ يعني الحمض عندنا زايد عن اللزوم.

مش عايز أطول أكتر من كده، عايزة أدخل في الموضوع على طول علشان أنا عايزة الحلقة تكون قصيرة قدر الإمكان، مفيدة قدر الإمكان، بس باختصار هتقدر تعالج الارتجاع بحاجات بسيطة ومجانية وموجودة عندك في البيت. بس هفكركم سريعاً قبل ما نبدأ إن حجز الاستشارات بيتم عن طريق الموقع الإلكتروني أو عن طريق أرقام الواتساب الموجودة في التعليق المثبت. ما تنسوش تعملوا لايك وشير للحلقة، سبسكرايب للقناة لو انتوا أول مرة تشوفوني، ويلا بينا نبتدي. أنا ندى حرفوش ودي قناة "بي عشان نبدأ على نور".

وماحدش لسه هيقول لي: إزاي الحمض قليل وأنا عندي ارتجاع وحموضة؟ ده كده الحمض زايد. اللي بيحصل باختصار إن الحمض لما بيقل عمليات الهضم بتكون أبطأ، الأكل يقعد في المعدة وقت أطول، ما يتنقلش للأمعاء بسرعة، يبدأ يدخل في مرحلة تخمر تنتج عنها غازات تسبب انتفاخ، تضغط على المعدة، الضغط ده يدفع محتويات المعدة لفوق. نقص الحمض كمان يؤثر على صمام المريء اللي وظيفته إن هو يمنع ارتداد الطعام لفوق. الصمام ده بيعتمد على درجة حموضة المعدة علشان يفضل مقفول. مجرد ما تضعف درجة الحموضة يبدأ يرتخي، فمع الضغط وارتخاء الصمام الحمض الضعيف ده يرتد. لكن مهما كان الحمض ضعيف، المريء حساس جداً للحمض، فنبدأ نحس بأعراض الارتجاع والحموضة.

فباختصار لو حمض المعدة قوي هيكون الهضم سريع، بالتالي ما فيش لا تخمر ولا غازات ولا ضغط. هيكون في صمام مريء قوي، فما فيش ارتجاع. طول ما عكس بيحصل ده معناه ضعف الحمض مش زيادته ولا قوته. متفقين؟ علشان بس نقفل الحتة دي وما نرجع لهاش تاني.

أسباب نقص حمض المعدة كتير: جرثومة المعدة، السيبو، توتر مزمن، نقص الزنك، الأمراض المناعية، حساسية الطعام أو عدم التحمل. مع السن كمان قدرة الجسم على إفراز الحمض بتقل. وكثير من الأسباب دي بتكون سبب ونتيجة في نفس الوقت. مثلاً لو حمض المعدة عندي قوي مش هيجي لي جرثومة. جرثومة المعدة بس لو اتصبت بجرثومة المعدة ده بيأثر على إفراز الحمض بشكل مضاعف، فبالتالي الإصابة تبقى أقوى ومدمرة أكتر وهكذا.

طيب إزاي أكسر الحلقة دي؟ دايماً نقطة البداية في علاج أي مشكلة هضمية هي زيادة حمضية المعدة. طيب نعمل ده إزاي؟ في طرق كتير جداً أغلبنا يعرفها وسمعنا عنها قبل كده: خل التفاح، بيتين هيدروكلورايد، المكملات الهضمية، في طرق كتير. ولكن هنا بنصطدم بأهم مشكلة، اللي هي إيه؟ إن أغلب الناس اللي عندهم ارتجاع أو حموضة أو نقص في حمض المعدة هم أصلاً عندهم التهابات وقرح في المعدة. وكل الحاجات اللي أنا قلتها دي ممنوع تناولها في حالة وجود قرحة أو التهاب، لأنها هتسبب تهيج وهتزود الالتهاب.

يبقى لازم نبدأ بعلاج الالتهابات وترميم جدار المعدة والغشاء المخاطي. جميل، لكن العملية دي بتاخد وقت، يعني محتاجة في المتوسط حوالي ثلاث شهور. وصعب جداً حد يقدر يتحمل الارتجاع والحموضة لمدة ثلاث شهور متواصلين. فالناس بتضطر إن هي تلجأ لأدوية الحموضة اللي مستحيل مع تناولها أي إصلاح، لأنها بتقضي على الحمض تماماً. ومع الاستمرار عليها لفترات طويلة بتضعف قدرة الجسم الطبيعية على إفراز الحمض.

هل في طرق لزيادة حمض المعدة علشان نلاقي تحسن في أعراض الارتجاع بدون ما تسبب تهيج للالتهاب اللي موجود، ونقدر نعملها في نفس الوقت واحنا بنعالج الالتهابات والقرح؟ آه، في كتير، وفي منها طرق بسيطة جداً ومجانية تقريباً، ونقدر نعتبرها عادات يومية محتاجة تغيير يفرق كتير جداً في تحسين الأعراض.

رقم واحد: الأكل بسرعة، وإننا ما ناخدش وقتنا في مضغ الأكل كويس. الأكل المنضغ كويس بيوصل للمعدة تقريباً نص مهضوم ومفتت، فبيحتاج حمض أقل لهضمه ولتفكيكه، ويقعد في المعدة كمان وقت أقل. وده بيقلل الغازات اللي بتنتج عنه، بيقلل الضغط على الصمام، بالتالي الارتجاع بيقل. فكل ما أخدنا وقتنا في المضغ، الارتجاع يقل.

رقم اثنين: بلع الهواء. ده بيخلي الارتجاع أسوأ، وإحنا عمرنا ما بنعرف إننا بنبلع هواء أثناء الأكل. طيب إيه أهم سبب لبلع الهواء؟ الكلام وقت الأكل. الارتجاع هيقل.

رقم ثلاثة: شرب المية في وسط الأكل. هو مش سيء جداً، بس هو بيخفف تركيز الحمض اللي هو أصلاً ضعيف عندي، وده بيخلي الأعراض أسوأ. خلي المية قبل الأكل أو بعد الأكل بنص ساعة على الأقل.

رقم أربعة: طبعاً دي حاجة أعتقد إن كلكم تعرفوها، النوم بعد الأكل مباشرة. الاستلقاء عموماً، حتى لو مش هننام، أكل وأقوم أتمدد شوية على الكنبة، ده بيسهل ارتداد الحمض بدرجة كبيرة. طيب أمال أعمل إيه بعد الأكل؟ اتمشى 10 لـ 15 دقيقة. طيب لو مش همشي، أفضل واقفة على الأقل. على الأقل خالص ماخدش وضع ميل بجسمي.

ضحك علينا سنين كتير واتقال لنا الحموضة والارتجاع ما لهمش علاج غير أدوية الحموضة، خصوصاً لو في التهابات. هل في حاجة ممكن آكلها أو أشربها تقلل الحموضة والارتجاع وما تسببش تهيج للالتهابات والقرح؟ في حاجات كتير هقول لك عليها كلها، وكلها تقريباً مجانية ومش هتكلفك أي حاجة.

أول حاجة: كوباية مية مضاف عليها رشة من ملح البحر أو ملح الهيمالايا مع خمس قطرات من الليمون وخمس قطرات، يعني خمس قطرات مش نص ليمونة عشان إحنا مستخسرين نرمي الباقي. لا، هتتاخد قبل الأكل بربع ساعة. الملح مهم لأن هو بيحتوي على الكلورايد. الكلورايد عنصر مهم جداً لدعم تكوين حمض المعدة. الليمون بيدي حمض، لكن حمض خفيف مش قوي زي الخل، فبيحفز الهضم من غير ما يسبب تهيج والتهاب شديد. فالمشروب كله بيحفز إفراز العصارة الهضمية. فالنتيجة النهائية تقليل الارتجاع والحموضة. طيب لو أخدت المشروب ده وحسيت بألم أو تهيج في المعدة أعمل إيه؟ هستبعد الليمون. هيكون بس مية مضاف عليها رشة من الملح فقط.

تاني حاجة: شريحة من الزنجبيل أو الجنزبيل الفريش نمضغها قبل الأكل ونتخلص من الألياف بتاعتها، يعني هنبلع بس العصارة بتاعتها. الجنزبيل من أقوى محفزات إفراز حمض المعدة. طيب في ناس الالتهابات عندهم والتقرحات بتكون شديدة جداً وبرضه بيحسوا بتهيج مع الجنزبيل. في بديل؟ في بديل. بذور الشمر. عارفين الشمر؟ الشمر اللي هو بيغلوه ويدوه للأطفال لما يكون عندهم غازات أو مغص أو انتفاخ، هو ده. نمضغ نص معلقة صغيرة من الشمر قبل الأكل. بتحسن وبتسرع الهضم وبتقلل الارتجاع. وبذور الشمر بعد الأكل بتقلل الانتفاخ والغازات. فعلاً ما زالت بتستخدم لنفس الغرض في كل مطابخ الدول الآسيوية، لأن هم أكلهم بيكون غني جداً بالتوابل، فلازم حاجة تقلل الانتفاخ بعده.

رقم ثلاثة: ودي بتقلل الارتجاع وبتهدي الغشاء المخاطي وبتسرع ترميم والتئام بطانة المعدة. يعني تقريباً بتعمل كل حاجة مفيدة بالنسبة للحالة اللي إحنا بنتكلم عنها، هي عصير الألوفيرا. ده من أكتر أكتر الحاجات اللي ممكن تحس بعدها بتحسن سريع، خصوصاً في الإحساس بالحرقة اللي بيحصل أو الارتجاع ده. ولو هندخل عصير الألوفيرا يبقى أفضل طريقة هي إني آخده قبل مشروب الملح والليمون أو قبل الجنزبيل. بيتاخد منه 30 لـ 50 ملي مخفف على كوباية مية قبل الأكل بـ 20 دقيقة.

ورقم أربعة: آخر وأهم وأفضل حاجة في كل اللي إحنا قلناه، العرقسوس. أفضل حاجة ممكن تستخدمها لحل كل المشاكل دي. العرقسوس بيقوي الغشاء المخاط اللي بيحمي جدار المعدة، بيقلل الالتهابات، بيسرع التئام القرح، بيهدي الارتجاع، وبيساعد بدرجة كبيرة جداً في علاج جرثومة المعدة. عايزين إيه تاني؟ لو أقدر أجيب مستخلصات لعرقسوس يا ريت. ولو ضغطي عالي أستخدم الـ DGL. ولو مش قادرة أجيب المستخلصات، استخدم العرقسوس العادي. لو هجيبه جذر كده في صورته الأصلية، امضغ منه قطعة صغيرة. ولو هجيبه مطحون هعمل منه شاي العرقسوس، نفس اللي إحنا بنعمله في رمضان. كلها حاجات سهلة ومجانية تقضي على مشكلة الارتجاع بدون الحاجة لأدوية الحموضة نهائياً.

في نقطة تانية مهمة جداً، مهم إننا نتكلم فيها. نوعية الأكل، لأن في أنواع من الأكل بتخلي أعراض الارتجاع أسوأ وهي ضارة في العموم، وإحنا كده كده محتاجين نبعد عنها لو إحنا عايزين ننهي المشكلة. وفي أنواع تانية ممكن تضايقنا برضه أو تسبب لنا أعراض مزعجة، لكن هي ضرورية جداً للتعافي. فمهم جداً نعرف نتعامل معاها إزاي علشان ما تسببش الأعراض دي ونقدر برضه نستفيد منها.

الأكلات الأسوأ والأكثر تسبباً في الارتجاع والحموضة: رقم واحد وعلى رأس القائمة، المقليات. طبعاً غير أضرارها الكتير المعروفة. المقليات عبارة عن خليط من البروتين زائد كميات كبيرة من الدهون. الميكس ده هضمه بطيء جداً وبيحتاج لكمية كبيرة من حمض المعدة علشان يتهضم ويتفكك، وده بيخلي الأعراض أسوأ بكتير.

اثنين: القهوة والشاي والمشروبات اللي بتحتوي على الكافيين. حامضية فبتسبب تهيج والتهاب القرح، بتعمل ارتخاء في صمام المريء فبتزيد أعراض الارتجاع. الشوكولاتة كمان ينطبق عليها نفس الكلام.

البصل والثوم الني. محتواهم عالي جداً من حاجة اسمها الفروكتانز، ودي مركبات بيحصل لها تخمر في الأمعاء، فبتزيد الغازات، فتزيد الضغط داخل المعدة، فتسبب ارتجاع.

أربعة: المشروبات الغازية. غازات كتير، تمدد، فضغط على المعدة، فارتجاع.

خمسة: وده هيفاجئ ناس كتير، النعناع. النعناع مشهور إنه مشروب مهدئ للجهاز الهضمي. ناس كتير بتاخده لما يكون عندها غازات، لكن في حالات الارتجاع هو آخر حاجة لازم نفكر فيها، مش أفضل مشروب بالمرة. النعناع بيعمل ارتخاء في صمام المريء، وده أهم سبب للارتجاع.

آخر وأهم حاجة بقى، اللحوم الحمراء. اللحوم الحمراء أصعب طعام في الهضم على أي حد مصاب بالارتجاع أو عنده نقص في حمض المعدة. دايماً تلاقي عنده الشكوى بتاعة: اللحمة تقيلة عليا جداً، هضمها صعب، وأول ما آكلها أبدأ أحس بغثيان أو ألم في بطني، انتفاخ شديد، والارتجاع يزيد. ممكن مش عندك كلهم مع بعض، بس شوية منهم. لكن دايماً هتلاقي شكوى من اللحوم الحمراء بالتحديد. يمكن نفس الشخص مش بيعاني من نفس الصعوبة مع بقية أنواع البروتين. ودي شكوى أنا سمعتها من ناس كتير قوي: أنا باكل أسماك وفراخ وبيض وأي نوع بروتين عادي، لكن اللحوم الحمراء بالتحديد بتتعبني جداً. والشكوى دي حقيقية جداً.

هل ده معنى إن اللحوم الحمراء وحشة؟ لا. لكن اللحوم الحمراء مش أصعب في الهضم، لكن هي أبطأ وبتحتاج حمض المعدة قوي علشان تتكسر وتتهضم. لكن المشكلة إن مريض الارتجاع والتهاب المعدة هو أكتر شخص محتاج لحوم حمراء، لأن هي اللي فيها كل المركبات اللي بترمم بطانة المعدة. فتجنبها ضرره بيكون أكتر من فايدته. غير إن هو غالباً أصلاً بيكون عنده فقر دم ونقص في البي فيتامينز بسبب سوء الامتصاص، ودول برضه أهم مصدر ليهم هو اللحوم الحمراء.

طيب نعمل إيه؟ في حلول كتير، طرق كتير تساعدنا نخلي اللحوم الحمراء أسهل في الهضم، فما تسببش الأعراض المزعجة دي ولا الارتجاع.

أول حاجة: بلاش ناكل اللحمة الحمراء سليمة كده قطعة. الأفضل في الحالة دي هو اللحم المفروم. فرم اللحمة بيتكسر الأنسجة بتاعتها، فهضمها بيكون أسهل وأسرع وبتحتاج حمض أقل، وبتفضل محتفظة في نفس الوقت بكل الفوايد بتاعتها.

تاني حاجة: لو الخيار المتاح هو اللحم القطع، يبقى نسويها كويس جداً. وأفضل طريقة للتسوية في الحالة دي هي طريقة الطواجن أو اليخني. اللحمة تستوي في المية بتاعتها على درجة حرارة قليلة جداً لوقت طويل. وابعدوا تماماً عن موضوع ننزل باللحمة في حلة سخنة جداً عشان تاخد الصدمة. صدمة في قلب عدوينك يا حبيبتي! الصدمة دي بتخلي الأنسجة تشد وتبقى متصلبة أكتر وهضمها بيبقى أصعب. يعني باختصار، نبعد عن اللحمة المشوية أو اللي سواها قليل. يعني لو عندك ارتجاع ما تروحش تاكل حتة ستيك ميديام رير وتقول لي أنا عندي ارتجاع ليه؟ حتة الستيك دي سيبها لي أنا هاكلها، مش هنرمي النعمة [ضحك]. لكن أنت تاكل لحمة مفرومة لحد ما نعالج.

ثلاثة: وده أفضل حاجة بقى في نظري. ركزوا لي أكتر على أعضاء الحيوانات مش على اللحوم نفسها، وبالتحديد زي الكبدة، القلب، الكلى. فيها أضعاف أضعاف فوايد اللحوم الحمراء، وفي نفس الوقت الأنسجة بتاعتها أسهل بكتير في الهضم، وبتساعد في التئام القرح والالتهابات أكتر.

كل الحاجات دي لو طبقناها هيقل عندنا أعراض الارتجاع بدرجة كبيرة جداً. في نفس الوقت لازم نشتغل بالتوازي على ترميم والتئام القرح. مبدئياً، البعد عن كل الأكل اللي بيسبب التهابات أو تهيج، ده أهم خطوة. وده كل شخص يقدر يحدده بنفسه عن طريق الملاحظة. علاج أي مشكلة اتسببت في الالتهابات دي، سواء كانت جرثومة معدة، سيبو، كانديدا، طفيليات، أياً كانت مشكلتك فيهم أو حتى غيرهم، هتلاقي علاجها حلقة أو أكتر على القناة موجودة، ممكن ترجع لها هتساعدك كتير.

بس أنا هقول لكم دلوقتي على أفضل ثلاث حاجات استخدامهم مع بعض يسرعوا التئام القرح في وقت قياسي: الجلوتامين بجرعة 5 جرام يومياً مع 75 مليجرام من زنك الكارنوزين مع جذور المارشميلو. ولو بنستخدم العرقسوس، نخليه معاهم هيكون إضافة عظيمة جداً. النظام ده يضمن لنا التخلص من الالتهاب والقرح والارتجاع في فترة قياسية فعلاً. هتلاقوا كل الحاجات اللي أنا اتكلمت عنها في الحلقة موجودة في التعليق المثبت.

وبس، بس دي كانت كل حاجة عندي النهارده. ما تنسوش تكتبوا لي في التعليقات تحبوا نتكلم عن إيه من مشاكل الجهاز الهضمي في الحلقات اللي جاية. ما تنسوش تعملوا لايك وشير للحلقة، سبسكرايب للقناة لو انتوا أول مرة تشوفوني. ما تنسوش كمان تبصوا على رابط وأرقام حجز الاستشارات في التعليق المثبت، وتبصوا كمان على رابط قناة المراجعات. أشوفكم الحلقة الجاية، باي باي.