هل لو عليت التكييف فاتورة الكهربا تزيد؟

السلام عليكم ورحمه الله وبركاته.

الصيف دخل ومع موجه الحر اللي بقت كل سنه اشد من قبلها، التكييف بقى واحد من اكث الاجهزه اللي شغاله في البيوت. وطبعا لا يخفى على حد انه برده من اكث الاجهزه اللي بتسحب كهربا. وعلشان كده في سؤال مهم مرتبط بالتكييف والفاتوره. سؤال ناس كتير بتساله وهو: اظبط درجه التكييف على كام؟ وهل لو زودت البروده فاتوره الكهرباء هتزيد؟ يعني مثلا لو حد مشغل التكييف على 25 وحداني مشغله على 18 هيبقى في فرق في فاتوره الكهرباء ما بينهم؟ ولو في فرق، الفرق هيبقى كبير ولا قليل؟ وايه احسن طريقه نتعامل بيها مع التكييف اصلا في الحر الشديد ده بحيث نبرد الجو وفي نفس الوقت الفاتوره تبقى حنينه؟

اهلا بكم، انا عمرو عابدين. بس قبل ما نبدا، لو لسه جديد في القناه ما تنساش تعمل سبسكرايب وتفعل الجرس علشان توصلك فيديوهاتنا اول باول.

علشان نقدر نجاوب على سؤال هل لو علينا التكييف فاتوره الكهرباء بتزيد ولا لا؟ محتاجين الاول نفهم ايه اللي بيحصل جوه التكييف لما بنغير درجه الحراره. وخلونا في الاول نتفق، "نعلي التكييف" دي نقصد بيها نزود البروده، يعني مش نعلي الرقم اللي مكتوب على الشاشه.

فايه اللي بيحصل بقى جوه التكييف؟ ناس كتير بتبقى متخيله ان احنا لما بنمسك الريموت ونخليه على درجه حراره قليله وليكن مثلا 18، فده معناه ان التكييف كده بيطلع هواء ابرد من الاول. الهواء هو نفسه بيكون اسقع، لكن الحقيقه الكلام ده مش مظبوط اطلاقا. لما بنظبط التكييف على 18، احنا مش بنخلي الهواء اللي خارج من التكييف يبقى ابرض ولا حاجه. الهواء اللي بيطلع من فتحه التكييف في الحالتين درجه حرارته بتكون ثابته وبتكون في حدود 10 ل 12 درجه مئويه. فلو ظبطنا التكييف على 25، هيخرج هواء درجه حرارته 10. لو ظبطناه على 18، برده هيخرج هواء درجه حرارته 10.

الله، امال ايه الفرق؟ وايه اللي بيخلينا لما نظبطه على 18 الجو فعلا بيبقى اسع؟ الفرق هو المده اللي الكومبروسر بيشتغلها. جهاز التكييف ببساطة هو عباره عن نظام فصل وتشغيل أو نظام تحكم في السرعة. في الموديلات الجديده اللي هي الانفرتر، بيكون جواه ثيرموستات أو حساس حراره طول الوقت بيقيس درجه حراره الاوضه وبيراقب تغير الدرجات. فلما بنظبط التكييف على 25 درجه، الترموستات بيبعت اشاره للكومبراسر ويقول له اشتغل. الكومبروسر يبدا يلف ويضغط الفريون ويمشي في المواسير ويوصل للوحده الداخليه، وهناك المروحه تزق الهواء عند المواسير الساقعه، فالهواء يبرد ويدخل الاوضه ساقع. ويفضل الكومبريسر اللي هو الوحده الخارجيه شغال لحد ما الترموستات يلاقي ان درجه حراره الاوضه وصلت للدرجه اللي انت محددها اللي هي 25 مثلا، وساعتها يقوم مدي امر للكومبريسر يقول له خلاص كده تمام، الله ينور، ارتاح انت. وبعد شويه لما درجه الحراره تبدا تعلى ثاني وليكن توصل ل 26 أو 27، الترموستات يحس بالتغيير فيدي امر للكومبروسر يشتغل من جديد لحد ما يوصل الحراره ثاني للمستوى المطلوب، وبعدها يف يفصل ثاني. وتفضل الدوره تتكرر طول ما التكييف شغال.

لكن بقى لما بنمسك الريموت ونخلي درجه الحراره 18، فاحنا بنقول للتكييف: انا مش مكتفي ب 25، انا عايز الاوضه تفضل تبرد لحد ما تبقى 18. وساعتها الكومبروسر بيفضل شغال مده اطول وما بيريحش، لانه لسه ما حققش الهدف المطلوب. وفي عز الصيف وخصوصا في معظم الشرائح المصرية، الوصول لدرجه حراره 18 بيكون صعب جدا. وعلشان كده الترموستات بيفضل مستني الاوضه توصل للدرجه دي، والكومبروسر ممكن ما يفصلش خالص.

وده بياخدنا بقى لنقطه ثانيه مهمه وهي استهلاك الكهرباء. ايه بقى تاثير الكلام اللي قلناه ده على الفاتوره؟ الكومبريسرور هو اكث جزء في التكييف بيستهلك كهربا. والاستهلاك بيكون مرتبط ارتباط مباشر بعدد الساعات اللي الكومبروسر بيفضل فيها شغال وبيعافر مع حراره الجو. وعلشان كده الاحصائيات في مجال الطاقه بتقول ان كل درجه بنقللها تحت 25 بتزود استهلاك الكهرباء بنسبه تتراوح من 3% ل 5%. وفي بعض التقديرات ممكن توصل ل 8% في حالات الحر الشديد. يعني انت لو ظابط التكييف بتاعك على 18 بدل 25، فانت حرفيا بتزود فاتورتك بنسبه تتراوح من 30 ل 40% عن لو كنت ظابطها 25.

يعني بلغه الارقام والفلوس، لو حد عنده تكييف 3 حصان بيستهلك 2200 وات في الساعه واشتغل في اليوم ده لمده ثمان ساعات مره على 25 ومره على 18. في حاله ال 25، الثمان ساعات دول دول الكومبريسر مش هيفضل داير فيهم طول الوقت، هيشتغل حوالي 50% أو 65% من الوقت، يعني تقريبا اربع ساعات أو اربع ساعات ونص. اما في حاله ال 18، ففي خلال الثمان ساعات الكومبروسر هيفضل داير من 85% ل 100% من الوقت، يعني تقريبا هيشتغل سبع ساعات أو سبع ساعات ونص. ولو افترضنا ان العداد على الشريحه الخامسه باسعار النهارده، درجه 25 هتعمل فاتوره كهرباء في الشهر بحوالي 600 جنيه، ودرجه 18 هتعمل فاتوره كهرباء في الشهر بحوالي 950 جنيه تقريبا. مش بعيد عن ضعف المبلغ. وهنا احنا بنتكلم عن استهلاك التكييف ده وبس، ما لناش دعوه لو في تكييف ثاني وبقيه الاجهزه اللي في البيت كلها.

وعلشان كده معظم التوصيات بتقول ان درجه 25 أو 24 هي الدرجه الذهبيه، لان دي درجه الحراره اللي جسم الانسان بيحس فيها بالراحه، وفي نفس الوقت التكييف بيقدر يوصل لها بسهوله وهو مرتاح من غير ما يشتغل كتير. في مصر الجو بيكون 37، 38، 39 أو حتى 40. فالفرق بين 40 و 25 هو 15 درجه بس، وده حمل معقول بالنسبه للتكييف. لكن لما ننزل بقى 18، فاحنا كده دخلنا في منطقه الاجهاد الحراري غير جهاز، لان دلوقتي بقى في فرق 22 درجه مئويه.

طيب، بالنسبه بقى للناس اللي عندهم تكييف انفرتر من الجديد، هل بينطبق عليهم نفس الكلام؟ علشان نفهم الفرق، في التكييف العادي الكومبروسر بيبقى شغال بنظام يابيض يا اسود، يا اما شغال بكامل قوته، يا اما مطفي. اول ما الاوضه تسقع يفصل، واول ما تسخن يشتغل تاني. لكن في الانفرتر بقى، الموتور بيكون ذكي. لما بيقرب من درجه الحراره المطلوبه وليكن 25، بيبطا سرعته ويفضل شغال باقل قدره تحقق درجه الحراره المطلوبه. لو محتاج 10% بس من قدرته، هيشتغل ب 10%. محتاج 30%، هيشتغل ب 30% وهكذا. وطبعا دي ميزه قويه جدا، لان التكييف العادي ما بيقدرش يعمل ده، لانه لو فعليا محتاج 10% بس، برده هيشتغل بال 100% لان ما عندهوش اوبشن سرعات. وده انعكاسه على الكهرباء بشكل عام ان التكييف الانفرتر بيكون اوفر في استهلاك الكهرباء من التكييف العادي. معدل التوفير بيتراوح من 30 ل 50% في فاتوره الكهرباء.

لكن هنا برده في حاجه مهمه، لو عندك تكييف انفرتر وبرده ظبطته على 18، فانت كده مش مستفاد قوي بالانفرتر، لانك برده هتكبر الكومبروسر يفضل شغال اغلب الوقت ب 100% من قوته علشان يوصل لدرجه الحراره الصعبه دي، فهياكل كهربا زيه زي التكييف العادي. ميزه الانفرتر بتظهر لما تشتغل بيه على 24 أو 25. كل ما تقل عن الدرجه دي، الاستفاده من ميزه الانفرتر بتبدا تقل.

واخيرا بقى نروح للسؤال اللي يخص الفريون. طب يا ترى لو بنقرص على التكييف ونخليه فعلا 18، هل ده بياثر على الفريون مثلا او ممكن يخلصه؟ مبدئيا، الفريون ما هواش وقود زي البنزين بتاع العربيه مثلا. هو عباره عن غاز مضغوط موجود في دوره مقفوله، ولا بيتحرق ولا بينقص مع الاستخدام طالما المواسير سليمه ما فيهاش تسريب. كل دور الفريون انه وسيط بينقل الحراره. بياخد الحراره من جوه الاوضه ويطردها لبره.

طيب، هل كفاءه التبريد بتقل لو شغلنا التكييف على درجه قليله؟ الاجابه الغير متوقعه: اه بتقل. الوحده الداخليه بتاعه التكييف فيها جزء اسمه المبخر، ودي عباره عن مواسير بيمشي فيها الفريون البارد، ومروحه التكييف بتعدي هواء الاوضه على المواسير دي، فالفريون يسحب السخونيه من الهواء ويخرجه ساقع. لو حصل بقى ان الكومبروسر فضل شغال فتره طويله وبرد هواء الاوضه الزياده عن اللزوم، والفلتر مثلا كان مسدود ومش بتنضف كويس، ساعتها حراره المواسير ممكن تنزل لاقل من صفر مئويه. وبالتالي، بدل ما الهواء اللي في الاوضه كان بيلمس المواسير وبخار الميه اللي فيه يتكثف ويطلع منه نقط الميه اللي بنشوفها، اللي هيحصل ان بخار الميه اول ما هيلمس مواسير الفريون، بدل ما ينزل ميه سائله، هيتحول لثلج ويلزق في المواسير. في البدايه هتبقى طبقه رفيعه، لكن مع الوقت الطبقه هتزيد وتزيد لحد ما تغطي جزء كبير من المبخر، حاجه كده شبه الثلج اللي كان بيتكون في الفريزر بتاع الثلاجات القديمه. وده بيشتغل كعازل حراري، وبالتالي كفاءه التبريد هتقل، والكومبروسر هيفضل شغال اكث لانه حس ما بردتش، وطبعا فاتوره الكهرباء هتزيد وهندخل في حلقه مفرغه.

ده غير طبعا ان احنا لما بنشغل التكييف على درجات حراره قليله جدا زي 18 طول الوقت، ده بيقلل العمر الافتراضي للجهاز بشكل ملحوظ. الشغل المستمر في عز الحر بيخلي الزيوت اللي جوه الكومبريسر تفقد لزوجتها مع الوقت، وده بيقلل عمر الموتور وبيخلي الكفاءه تقل مع مرور السنين، وممكن تلاقي الجهاز بعد ثلاث او اربع سنين ما بقاش يبرد زي الاول وصوته بقى عالي واستهلاكه للكهربا زاد علشان بس يقدر يدي نفس النتيجه. ده غير ان الوضع ده بيزود الضغط والحراره في المواسير كمان، وعلى المدى البعيد ممكن تضعف اللحامات او تسبب تسريب. فانت لما بتستخدم التكييف على درجه حراره 24 أو 25، انت مش بس بتوفر كهرباء، انت كمان بتطول عمر الجهاز.

بس كده، خلصنا. مين وصل لحد هنا؟ انتوا اجدع ناس. اعملوا لنا بقى لايك قبل ما تخرجوا علشان نعرف كم واحد وصل للاخر. وما تنسوش لو في سؤال بيجيلكم في نص الليل ومحيركم، اكتبوه لنا في التعليقات تحت الفيديو علشان نجاوب عليه. سلام.