Transcription
كنت قاعد كده بتفرج على مسلسل اسمه "ويعني". اللي منكم ما يعرفش، ده مسلسل بيتكلم عن ناس أغنية جدا. المفروض إن المسلسل ده بيعلمك إزاي بقى تعمل بيزنس، وإزاي تكون أنت ناجح في شغلك، وحاجات زي كده.
ولكن قعدت أفكر كتير قوي إزاي حياة الأغنياء اللي موجودة في المسلسل ده حياة مستفزة طول الوقت. في طيارات خاصة، وطول الوقت في فلوس بتترمى يمين وشمال، ومراهنات على ملايين الدولارات، وحاجات غريبة جدا تخليك أنت مستفز جدا من حياة الأغنياء دي.
والسؤال اللي هنا: هل بجد حياة الأغنياء المنظر اللي إحنا بنشوفه أو المنظر اللي إحنا بنتخيله ده؟ أصل لو دي حياة الأغنياء، أنا هبقى سعيد جدا. عايز أقولك، لأن أنا نفسي في يوم من الأيام أوصل زيهم كده، ونفسي في يوم من الأيام أكيد أعمل كل الحاجات اللي هما بيعملوها.
والحقيقة إن مش أنا بس اللي بسأل هذا السؤال. في حركة جريئة جدا عملها اتنين من الباحثين، واحد اسمه ويليام ستانلي والتاني اسمه ويليام دانكو، اللي بيقرروا كده إن هم ينزلوا ويقابلوا آلاف المليونيرات ويعملوا معاهم لقاءات، ويشوفوا بيقضوا حياتهم إزاي. عملولهم يعني كده زي تحليل لكل شيء هما ممكن يكونوا بيعملوه في الحياة، ويفاجئوا بنتيجة مختلفة شوية عن اللي أنت متوقعه.
فيقولولنا إن أفكارنا عن الناس الأغنياء قوي أفكار مغلوطة، والعادات اللي بيعملوها غريبة جدا جدا، لدرجة إن أنت ممكن يكون جارك اللي ساكت جنبك هو شخص مليونير، ولكن أنت أصلاً ما تعرفش.
وعشان كده، في هذه الحلقة هاشارك معاكم أغرب تمن حاجات بيعملوها الناس الأغنياء. وهنبتدي بترتيب من الأقل غرابة، المركز الثامن، ونوصل لغاية المركز الأول، ودي هتكون الأكثر غرابة في الحاجات اللي بيعملوها الأغنياء. تعالوا بينا نتعرف عليها.
السلام عليكم، أنا مايكل راشد، وأنت بتشوف برنامج "الزتونة". الموضوع اللي بنتكلم فيه النهارده هو موضوع ما لوش علاقة بس بفكرة إن إحنا نشوف العادات الغريبة اللي بيعملوها الأغنياء، ولكن ما يمكن لما نعمل عاداتهم ربنا يكرمنا كده وناخد حاجة منهم، ناخد حاجة منهم شخصيا، ولكن يعني ربنا يكرمنا ونبقى زيهم يعني.
ولو هنبدأ زي ما قلنا بالعادة رقم 8، واللي هتكون الأقل غرابة شوية، هتكون فكرة الاستثمار في التعليم. يا مايكل، يعني وإحنا مش متعلمين؟ لا يا سيدي، كلنا متعلمين وكل حاجة. ولكن نلاقي الناس الأغنياء، على كلام هذا البحث، بيحاولوا إن هم يدوروا يتعلموا أي حاجة بغض النظر هي ممكن أصلاً تكون هتفيدهم ولا لا. فتلاقيهم بقى بيصرفوا على كتب ومؤتمرات وكورسات وحاجات كتير قوي، ولكن يعني ممكن ما يكونوش محتاجينها. ولكن بيحاولوا يجتهدوا إن هم يلاقوا المعلومة الصح.
وتيجي أنت تحاول تقنع واحد إن هو ياخد كورس عشان يعرف يشتغل، زي مثلا حاجة بسيطة زي سوفت سكيلز، يقولك: "لا يا عم، أنا مش عايز آخد كورسات وأوجع دماغي". يعني وممكن ما أعرفش أجيب تمن الكورس ده. بنجامين فرانكلين كان عنده مقولة كده ويقولك إن استثمار في المعرفة هو ده أهم عائد أنت ممكن توصله في يوم من الأيام. فبينما إن في ناس بتحاول إن هي يعني تقلل مصاريفها في إن هي تكون بتستثمر في نفسها عشان تستثمر في حاجة تانية، إلا إن الأغنياء عندهم الفكرة دي فكرة أساسية وموجودة.
العادة الـ 7 اللي هنتكلم عليها هي فكرة إن هم بيتكلموا عن الفلوس بصراحة. الحقيقة يعني الموضوع ده أنت هتلاحظه على فكرة بنفسك. الناس الأغنياء يعني مثلا تشوف حد ملياردير كده وهو بيتكلم، حد بقى مثلا زي نجيب ساويرس ولا أبو هشيمة بيتكلموا على موضوع زي الفلوس، هتلاقيهم بيقولوا هم معاهم كام، وبيقولوا الفلوس دي جابوها إزاي، وبيقولوا للناس ممكن يعملوا إيه عشان يجيبوا فلوس. وعامة هتلاقي الناس الأغنياء بتحب تشارك مع الناس القريبين منهم فكرة الفلوس اللي ممكن يكونوا موجودين معاهم دلوقتي، وفكرة الفلوس اللي ممكن يحصلوا عليها من استثمار قادم.
وأنا كنت بشوف إن هذا الموضوع هو شكل من أشكال الفشخرة مثلا، أو ناس تانية هتقولك إن الناس الأغنياء دول ما بيحبوش يتكلموا عشان الحسد. هم بيتكلموا بس ممكن ما يكونوش بيتكلموا معاك أنت بس، بيتكلموا مع ناس قريبة منهم. والحقيقة إن في تقرير طلع في سنة 2021 من مؤسسة اسمها "ثنرا" بيقول كده في هذا التقرير إن الناس الأغنياء بتحب إن هي تشارك مواضيع الفلوس مع ناس قريبة منها عشان ده بيديهم وعي مالي أكتر، أو بيخليهم يفكروا في الفلوس بشكل أفضل. زي ما إحنا بنقول كده: "السرية دايما بتخلق جهل، ولكن الانفتاح هو القوة". فالناس الأغنياء عندهم هذه الفكرة، بيحبوا يناقشوا مشاريعهم، ويحبوا يناقشوا الفلوس اللي موجودة معاهم، يمكن ده يديهم أفكار مختلفة. خليك أنت بقى كده إيه قاعد عمال تقولي: "أنا مش عايز أقول لحد على الـ 2000 جنيه اللي عندي في البنك عشان ما أتحسدش وخليهم زي ما هما كده".
العادة الـ 6 اللي معانا النهارده وهي بجد عادة يعني غريبة جدا، هي إن هم بيستعينوا دايما بالخبراء. هؤلاء الناس الأغنياء يعني ممكن يكونوا بيعرفوا يعملوا حاجات كتير، يعني ممكن مثلا واحد منهم يكون شاطر في التسويق، واحد منهم يكون شاطر في البيع، ولكن لما تيجي تبص على شغلهم، هم دايما بيحاولوا يستعينوا بالخبير في أي مجال. وأنت بتقعد تسأل نفسك كل شوية هذا السؤال: "ليه واحد شاطر جدا يعني في فكرة مثلا زي التسويق يكون أصلاً جايب ناس يشتغلوا عنده ويكون عنده خبير في التسويق؟" يعني ليه أنا أجيب خبير طالما أنا بعرف أعمل حاجة؟ توني روبنز في كتاب "أو المال أتقن اللعبة" كان بيتكلم على الفكرة دي، وكان بيقول إن اللي يوصلك أسرع من النقطة 1000 لنقطة ب، مش إن أنت تكون بتعرف تعمل كل حاجة، ولكن اللي بيوصلك أسرع هو إن أنت يكون عندك الخريطة العامة وتدور على ناس تساعدك في هذه الخريطة. بشكل بسيط، ما هو لو أنا بعرف أعمل كل حاجة، إذا أنا مش هعرف أكبر في مكاني ده. هتلاقي دي مشكلة ناس كتير لما بتيجي تفتح البزنس الخاص بيها، إن هم بيفكروا إن هم يقدروا يعملوا كل حاجة. فتلاقي صاحب البزنس هو اللي بيعمل التسويق، وهو اللي بيعمل البيع، ساعات بيعمل الـ SEO، وساعات يعمل الإيميلات، وساعات يعمل الـ Ads، وساعات يعمل كل حاجة، لأن هو عارف إن هو أفضل حد هيعملها. ولكن المحصلة النهائية إن أنت ممكن تكون بتعملها بشكل كويس، ولكن أنت هتفضل محدود. بصوا على الناس الأغنياء قوي، مش بيعملوا حاجة أصلاً، هم بيجيبوا خبراء في هذا المجال.
والحتة دي أصلاً هتنقلنا للعادة الـ 5 اللي هي شبهها بشكل كبير قوي، إن الناس الأغنياء دول بيهتموا بالوقت أكتر ما يهتموا بالفلوس. يعني إيه الكلام ده؟ وخد المفاجأة، هو ممكن أو هي ممكن يدفعوا فلوس عشان يوفروا بعض الوقت. بمعنى بسيط قوي، لو أنت يعني شخص عادي كده زي حالاتي وبتفكر إن أنت تسافر من هذا المكان اللي أنت فيه، نفترض إن أنت قاعد في القاهرة وعايز تسافر تروح للاسكندرية، أنت ممكن تفكر إن أنا ممكن آخد العربية بتاعتي، يعني هاسوق كده وأستمتع، وهي ساعتين 3 وهأوصل. إنما الشخص الغني يفكر إن هو: "لا، أنا ممكن الساعتين 3 دول أعمل فيهم شيء مهم أو أعمل فيهم شيء كويس". طيب أنا عايز حد يسوق لي العربية، أنا عايز أروح بطيارة، أنا عايز أحاول الوقت ده ما يضيعش وخلاص، أنا عايز أستغل وقت أقصى استغلال ممكن، حتى لو هدفع فلوس زيادة. وده اتسق على فكرة بشكل كبير جدا مع اللي قاله وارن بافيت في يوم من الأيام، قال: "أنا أقدر أشتري كل حاجة بالفلوس". وهو عنده حق، إلا حاجة واحدة بس. لا مش السعادة، ومش إن أنت يكون بالك فاضي، والكلام ده كله، ولكن الحاجة اللي أنت ما تقدرش تشتريها بالفلوس هي الوقت. أنت وقتك اللي راح هو خلاص راح، مش هيرجع تاني.
قبل ما أقولك على عادة رقم 4، حابب أقولك على تنويه مهم جدا. لو أنت حابب إن أنت تطور من نفسك أو تطور من فكرك أو شغلك حتى، فإحنا بنقدم برنامج في الكوتشنج، برنامج متكامل فيه أفكار من لايف كوتشنج اللي هو بشكل شخصي، وفيه أفكار من البيزنس كوتشنج. ده غير أفكار وكورسات كتيرة ممكن تلاقوها من خلال اللينك الموجود في الـ description تحت. حاجات ليها علاقة بالتسويق أو بالمبيعات أو بالـ Branding، أو حتى بتدريب القادة. فلو عايزين تعرفوا أكتر عن كل هذه الأمور، ممكن تنزلوا وتبصوا على اللينك الموجود في الـ description تحت.
العادة بقى رقم 4 اللي بيعملها الأغنياء بشكل كبير قوي، هم إن هم بيركزوا على صحتهم بشكل أساسي، ويصرفوا كتير جدا على شكلهم وعلى صحتهم الجسدية، وأن هم دايما ما يكونش عندهم أي مشكلة. ولذلك تلاقيهم بيعيشوا كتير، على عكسنا إحنا الناس اللي بتحاول إن هي تشتغل كتير قوي، حتى لو الشغل ده يعني هيجي على حساب صحتي. ونقعد حتى نحلل الفكرة دي لنفسنا ونقول: "وإيه المشكلة؟ ما هو كل شغل في العالم ليه المشاكل بتاعته وليه الحاجات اللي بتيجي على صحتك من خلال هذا الشغل". ولكن الإنسان الغني هو عارف ومدرك إن قيمته الحقيقية في إن هو يبقى لسه موجود وواقف على رجليه. وعشان كده بيجتهدوا بشكل كبير جدا إنه يحافظوا على صحتهم. بيعملوا تشيك أبس، بيعملوا زي كشف دوري، وبيحاولوا إن هم يلعبوا رياضة على قد ما يقدروا، وبيحاولوا إن هم يطلعوا برا الأفكار والمشاكل وياخدوا كده عزلة ويعني ويروحوا يصيفوا ولا يروحوا يعملوا أي حاجة مختلفة لمجرد إن هم يجددوا نشاط وطاقة، ولمجرد إن هم يعملوا أو أنشطة مختلفة عشان يقدروا إن هم يطوروا من صحتهم الجسدية دي. جيف بيزوس بيقول إن أنا ما أقدرش آخد أي قرار مالي غير لما أنام 8 ساعات قبلها. وبيقول إن ده هو أهم قرار هو أخده في حياته. أنا أعرف ناس بيكون عندهم شغل مهم تاني يوم أو عنده إنترفيو، يقعد طول الليل يحضر لأنه متخيل إن هو كده هيقدر إن هو يعدي في الإنترفيو أو يعمل شغل بشكل كويس. ما هو إذا صحتي أنا مش مضبوطة، كل اللي أنا هعمله ممكن ما يكونش مضبوط بعد كده.
العادة رقم 3 اللي موجودة معانا النهارده هي إن هم بيشوفوا الفلوس وكأنها لعبة. في ناس بتشوف إن الفلوس صداع. يعني يعني معايا كام في البنك؟ طيب أنا القسط هياخد مني كام؟ طيب أنا في مديونيات عليا بكام؟ ويقعدوا يفكروا دايما في الفلوس كمورد بيخلص وخلاص. ولكن الأغنياء مش بيشوفوا كده. الأغنياء بيشوفوا إن الفلوس دي ممكن تكون موجودة معاهم لعبة. إزاي ألعب اللعبة اللي تخلي الفلوس دي تزيد؟ أو إزاي أعمل حاجة مختلفة تخلي الفلوس دي تكتر أكتر؟ فعندهم بقى حاجات ليها علاقة بالاستثمار والتجارب والاستراتيجيات المختلفة، وإن هو ياخد مخاطرة كبيرة في بعض الأحيان. كل ده بالنسبة له كانه بيلعب، مش بيقعد يفكر إن أنا عشان عملت مثلا مشروع والمشروع ده ما نجحش من أول مرة يبقى أنا كده فشلت. لا، هو بيقول: "أنا بجرب وبألعب وبشوف الدنيا هتوصلني لفين". وده بيخليه يتعلم بشكل أسرع. إنما الشخص اللي بيقعد يبص على الفلوس ويحزن عليها ويتخيل إن هي حاجة أساسية، يفضل دايما مش غني. أو ممكن نقولها كده بزتونة بسيطة قوي: "حب الفلوس تسيبك؟ سيب الفلوس تحبك". هي ما كانتش الفلوس طبعًا، هي كانت حاجة تانية، بس يعني هتمشي.
العادة الـ 2 والغريبة جدا اللي أنت مش عارفها عن الأغنياء، هم إن هم مش بيفكروا في نفسهم، لا، هم بيفكروا في الأجيال اللي بعدهم. ركز معايا عشان ده كلام جد قوي. في الحياة دي أنت بتفكر إزاي ممكن أقضي الشهر ده أو أقضي السنة دي، ولكن الغني من البداية بيفكر إزاي يصرف على الأجيال اللي جاية من بعده. يعني إزاي أعمل حاجة لأحفادي وأحفاد أحفادي؟ فيحاولوا إن هم يعملوا مؤسسات، ويحاولوا إن هم يعملوا شركات كبيرة، ويحاولوا إن هم يعملوا شركات استراتيجية مع ناس تانية. كل ده عشان مستقبل الأحفاد. مين بقى اللي لقطهم؟ واحد اسمه جيمس هيوز في كتاب اسمه "فاميلي ويلث" لما كان بيقول إن الثروة مش مجرد هدف في حد ذاتها، ولكنها أمانة للأجيال الجاية. يعني الناس دي بتفكر إن أنا لازم أبني إمبراطورية تمتد مني لغاية كل أحفادي. وأنا من هنا حابب أوجه يعني دعوة كده لجدي الله يرحمه، وأقول له: "شكراً يا جدي إن أنت فكرت في نفسك".
أما عن العادة رقم 1 والأكثر غرابة اللي أنت ممكن تكون بتعرفها عن الناس الأغنياء، هم إن هم معاهم عربيات تويوتا كورولا. طبعًا أنت بتقولي دلوقتي: "يا مايكل، هي تويوتا كورولا دي حاجة قليلة؟ دي حاجة كبيرة". ولكن المغزى إن هم مش بيشتروا الحاجات اللي أنت متخيل إن هم بيشتروها. روبرت كيوساكي، واللي عملنا كتاب حلو جدا يمكن اتكلمنا عليه أكتر من مرة، واللي كان اسمه "ريتش داد بور داد"، كان بيتكلم على مبدأ كده موجود عند عقليات الناس الأغنياء، وهو إن هم دايما بيحاولوا يشتروا حاجة تكون بالنسبة لهم أصول وليست حاجة تكون بتاخد منهم دايما فلوس. والجملة الشهيرة بتاعت روبرت هنا كانت إيه؟ "الأغنياء يشترون الأصول، أما الفقراء أو المتوسطين اللي زي حالتنا، فبيشتروا الالتزامات". وهو ده السبب اللي بيخلي الغني بجد يزداد غنى، لأن هو دايما بيفكر إزاي يوسع قاعدة الأصول. إنما تلاقي إن الشخص المتوسط دايما بيفكر في إيه؟ الحاجات اللي محتاج إن هو يمتلكها. الشعور بالنقص ممكن يكون موجود عنده.
لما نيجي نبص على العادة رقم 1 دي، تلاقي إن بجد في أغنياء كتير بيسوقوا عربيات مستعملة، أو ماشيين بعربية تويوتا كورولا موديل التسعينات، أو تحس إن هم مش بيلبسوا اللبس اللي بيعبر عن قد إيه هم أغنياء. عايشين حياة بسيطة، مش عشان يوريك إن هو مش معاه فلوس، ولكن لأن كل الكلام ده بالنسبة له مش فارق. هو مش محتاج يثبت فكرة معينة، هو بالفعل عايش الغنى. على عكس واحد تاني هو عايز يثبت إن هو عايش الغنى، لأن هو مش عايشه بجد.
تخيل معايا الثمن عادات اللي إحنا اتكلمنا فيهم دول، واللي جمعهم ستانلي ودانكو. خدها كده وكتبوها في كتاب حلو قوي كان اسمه "The Millionaire Next Door" أو "المليونير اللي ساكن جنبي"، عشان يقولولك إن الناس الأغنياء واللي معاهم فلوس كتير مش بالضرورة زي ما أنت شايفهم في الأفلام. بل بالعكس، الفكرة بتاعت الأفلام دي هي اللي بتخليك فقير.
مايكل، الناس الأغنياء بتورث الفلوس، وده اللي إحنا بنشوفه. الحقيقة عكس الكلام ده، لأن 80% من الأغنياء اللي موجودين في أمريكا بنوا نفسهم بنفسهم. آه يا مايكل، بس بلادنا لا تسمح لنا. مش هرد على السؤال ده، لأن في ناس برضه عندك في بلدك اللي أنت بتقول إن هي ما بتسمحش، في ناس من بلدك قدروا برضه إن هم يكبروا وقدروا إن هم يعملوا حاجات كتير، حتى لو ما عملوهاش في بلدك، ولكن عملوها في أماكن تانية. وده تاني رجعنا لفكرة إيه؟ إن الغنى ما هواش مجرد إن أنا بعيش لايف ستايل معين، ولكن الغنى هو العقلية اللي توصلك لهذه المرحلة. الغنى مش بيبدأ بـ "أنا عندي إيه"، الغنى بيبدأ بـ "أنا بفكر إزاي".
وده كان الهدف الرئيسي من هذا الفيديو، إن إحنا نشوف عادات الأغنياء، يمكن ده يغير طريقة تفكيرنا. أنا عارف إن في عربية أنت هتموت وتجيبها، وعارف إن في بيت في الساحل الشمالي أنت نفسك إن أنت تجيبه، وشايف إن هو ده الاستثمار. أنا عارف إن أنت عندك كل الأفكار دي، ولكن اقف واسأل نفسك سؤال: هل بجد لو أنت إنسان غني، كنت فكرت إن أنت محتاج الحاجة دي؟ ولا لأ؟
عامة، تعال أتحدّاك تحدي إن أنت تكون غني لمدة أسبوع واحد. اختار عادة من الثمانية اللي إحنا اتكلمنا عليهم، اكتبها لنا في التعليقات تحت، وحاول إن أنت تعيش الأسبوع ده بس وأنت عندك العادة دي، وتعال بعد أسبوع وقولنا إيه الأخبار. وأنا أتحدّاك لو ما حسيتش بفرق. يعني هأرجع لك فلوسك اللي أنت ضيعتها عليا في هذا الفيديو وأنت بتتفرج عليه، يعني إن أنا وقتك ثمين جدا.
في النهاية، حابب أشكركم إذا فضلتوا معايا لحد الوقت ده من الفيديو. وأوعدكم إن الفيديو الجاي هيكون قوي جدا جدا، ولكن محتاجين إن أنتم تكونوا عاملين اشتراك في البرنامج ومفعلين خاصية الجرس. شكراً ليكم، وأشوفكم على خير الحلقة الجاية إن شاء الله. كان معاكم مايكل راشد، برنامج الزتونة.