🔥 أسوأ يوم في تاريخ إسرائيل: خطة أمريكا لتدمير إيران وسر سكوت الصين الصادم!

ايه الأخبار يا جماعة؟

المفروض حالياً إيران بتقول إن هي هتحرق إسرائيل بالكامل، وبالفعل الضربات اللي على إسرائيل ضربات شديدة جداً يا جماعة. صاروخ خيبر ده، خيبر ده مالوش حل يعني، بيخش يخيبر فعلاً، يعني بيجيب من الآخر. ففعلاً الضربات ثقيلة جداً.

بس امبارح كان يوم خطير جداً بالنسبة لإيران وكان مفترق طريق، يعني لما كانوا بيتكلموا إن هم هيعملوا مفاجآت والضربات اللي هتيجي هتكون مختلفة، ده بدأ امبارح. فلازم نفهم، وقبل ما أبدأ معاكم لازم تعرفوا إن أنا الصوت للأسف تقريباً قليل جداً. في طبعاً أصوات تانية اللي بتقول الحقيقة، في أصوات بسميها أنا أصوات الصحاف، اللي هي تقول لك أصل إيران عندها مليون طيارة مسيرة، والعالم كله فيه ما بين 50 و100 ألف طيارة مسيرة. أصل إيران عندها 100 ألف صاروخ بالستي، ونفس الكلام. فانت لو أنا عايزني أخدعك، امشي. مش هتلاقي الكلام اللي فيه خداع والكلام اللي هيريحك عندي. أنا هقول لك الحقيقة من الطرفين. زي ما قلت لك، حالياً إسرائيل بتاخد المفروض ضربات ثقيلة، رغم إن عدد الصواريخ قل بكتير جداً عن الأول، لكن الصواريخ نوعية. يعني إيه نوعية؟ زي ما قلت لك كده، صاروخ خيبر، خيبر ده بيخيبر من الآخر.

بس في البداية كده يا جماعة، قبل ما نبدأ على طول، لو سمحتوا الكل يعمل إعجاب، الكل يشير، الكل يكتب تحيا مصر، ومعاها تحية لرئيس السادات اللي مخلينا النهاردة بسياسته والسياسته اللي استمرت لحد النهاردة واللي بيكملها الرئيس السيسي عايشين في سلام يا جماعة. الرئيس السادات ده ما فيش زيه في العالم كله في آخر 100 سنة. الراجل ده أذكى رجل كان بيحكم دولة على مستوى العالم. فخلينا نكمل مع بعض.

بصوا امبارح يا جماعة كان يوم غير عادي. امبارح بالنسبة لإيران هو تحول واضح جداً في استراتيجية أمريكا وإسرائيل. طب إيه اللي حصل؟ بدأ امبارح يعملوا خطة خطيرة جداً وهي ضرب البنية التحتية. في الأول كانوا مركزين على الصواريخ، على أماكن عسكرية، أماكن أمن، وده كان كويس، ماشي كويس. حرب حالياً بقى بدأ الضرب الخطير في النفط. هقول لك النفط الإسرائيلي والمقارنة بينهم، النفط الإيراني. بدأ الضرب الخطير أخطر في الميه، وإيران عندها مشكلة كبيرة جداً في الميه، وعندها العاصمة تقريباً ما فيهاش ميه، والميه هناك بيستخدموا الميه الـ... المحلاة. فلما تضرب محطات الميه، أنت كده بتعمل كارثة ضخمة جداً. طيب هل تم ضرب برضه مصافي البترول في إسرائيل؟ هحكيلك دلوقتي.

أه تم ضرب. هل الضربات الكبرى اللي بتاخدها إسرائيل ثقيلة جداً، غير مسبوقة، وما حصلتش في تاريخ إسرائيل؟ طب فين المشكلة؟ المشكلة إن إسرائيل بتلعب على لعبة خطيرة جداً ما بعد الحرب، إن هي هتسيب إيران ما فيهاش ميه، ما فيهاش بترول، عليها عقوبات، الأكل قليل، حتى الميه قليلة، وما فيش كهربا. ممكن يخشوا يضربوا الكهربا. طب ما أنت هتقول لي برضه ما ده هيحصل في إسرائيل؟ هقول لك أه، بس إسرائيل صغيرة، وهم ما عندهمش عقوبات، وهم عندهم مالية العالم كله. اللي يتكسر دوت خلال سنة يرجعوه تاني بـ 10، 15 مليون يرجعوه تاني. لكن إيران، الدولة الضخمة الـ 100 مليون، الخسائر فيها هتبقى بمئات المليارات مع وجود العقوبات. ده لسه العقوبات هتزيد.

أنا عايز أقول لك إن الفكر اللي موجود إن بعد ما الحرب تخلص أمريكا هتعلن البترول مقابل الغذاء زي ما حصل في العراق، ويبدأوا يسحبوا فلوس من إيران يدوه للخليج تعويضات على اللي حصل في الخليج، ويبدأوا يقولوا لك لا ده إحنا كمان أي فلوس لإيران في أي دولة في العالم، منها دول الخليج، هنعمل لها تجميد. فاللعبة بتاعة ترامب الخطيرة إيه؟ إن هو هيخش تك تك تك تك تك يكسر كل البنية التحتية. بعد كده قال لك هنعمل، هيعمل عملية إنزال، ياخد اليورانيوم، وهيقول لك أنا أخدته، حتى لو ما خدوش هيقول لك أنا أخدته. وبعد كده يقول لك إيه؟ الحرب خلصت، سلام عليكم، أنا هسيبكم بقى تظبطوا الدنيا مع الشعب بتاعكم. وهنا هتكون الوضع بتاع الإدارة الإيرانية صعبة جداً. بلد متمرة عليها عقوبات، الناس عايزة تاكل وتشرب وتعيش، عايزين كهربا، وفجأة هيلاقوا ده كله مش موجود. دي الخطة الأمريكية الإسرائيلية، ودي الحقيقة اللي أنا بس اللي بقولها لك. للأسف الناس التانية بتبقى عايزة تخدعك. أنا بسميهم الصحاف زي ما قلت لك. واحد قال إن إيران عندها مليون طيارة مسيرة حربية. أنت عارف في العالم كله الطيارات الحربية المسيرة ما بين 50 ألف و100 ألف، والأرقام موجودة. العالم كله، أنا بكلمك على الطيارات الحربية ما بين 50 و100 ألف. فإزاي إيران عندها مليون؟ أو يقول لك إيران عندها 100 ألف صاروخ بالستي. أرقام يعني. ده ناس يا جماعة بتقول إيه؟ يقول لك كل شوية ده أسروا 500، قتلوا 300، ضربوا 700. كل ده صحاف بيكذب عليك وبينيمك في العسل. هتصحى من النوم هتلاقي وضع تاني خالص. أنا ضميري ما يسمحش إن أنا أعمل كده. على فكرة يا جماعة اللي أنا بقوله دوت، لو أنا قعدت كل يوم أقول لك إيران مليون طيارة يا جماعة، اضرب ده أمريكا بتتفتك، ده إسرائيل انتهت، أنا الأعداد عندي هتبقى 10 أضعاف. لكن أنا ضميري ما يسمحش أبداً إن أنا أخدع الناس اللي بتسمعني. لا يمكن ضميري هيسمح لي بكده.

وخلينا نكمل. خلينا نكمله مع بعض. بصوا يا... خلينا نشوف المواضيع إيه بالظبط ونقرأها ونتكلم مع بعض كده حتة حتة. سماء طهران النهاردة حرفياً كانت يعني... سودا. نار، مخازن النفط، دخان طالع من العادم. الكلام كله بيتقال إن الميه نفسها بقت ملوثة لدرجة إن الناس بتقول إن المطر بقى نازل زيت أسود، أو الميه بقى فيها لون الزيت الأسود. المشهد كله بيقول إن الضرب وصل لنقطة خطيرة جداً وهي العصب الاقتصادي، مش بس الجيش. لما تضرب العصب الاقتصادي، أنت كده بتعمل مشكلة للإدارة في المستقبل، مش في وقت الحرب.

طيب إسرائيل امبارح شنت هجوم تثقيل على أكتر من 30 منشأة نفطية جوه إيران. الفكرة مش بس القذف، الفكرة إنها بتضرب المكان اللي بيمول الدولة كلها. يعني بدل ما بتضرب دبابة أو قاعدة، بتضرب الحاجات اللي بتجيب الدبابة والقاعدة، وهو البترول اللي بيعيش الناس وبيحرك الناس وبيحرك الجيش. ما فيش جيش بيتحرك غير من غير بترول. هتضرب لي المخازن، هتوقف الجيش كله. طيب الضربات دي ولعت حرائق ضخمة في طهران ومدن تانية، والموضوع كبر لدرجة إن انفجارات مخازن النفط بدأت تأثر حتى على شبكات الصرف والميه. في تقرير إعلامي بيقول إن المطر اللي نزل... في كان ملوث بزيوت ومواد نفطية.

طب إيران عملت إيه؟ ما سكتتش. إيران طبعاً راحت، إيران ردت بسرعة وضربت مصافي بازان اللي موجودة في حيفا، ودي أكبر مصافي بترول في إسرائيل. الضربة دي حولت المكان تقريباً لكتلة نار. كتلة نار كلها. بس الضربة ما وقفتش عند المصفى، خلي بالك. إيران أطلقت الموجة 28 من عملية الوعد الصادق، والصواريخ ضربت تل أبيب وبئر سبع. وفي لقطة اتصورت على فكرة، أنتوا عارفين إن إسرائيل عاملة بلوك، ما حدش هيقدر يطلع فيديوهات. فيديوهات قليلة جداً اللي بتطلع، لكن بالصدفة NBC صورت... صاروخ خيبر، وزي ما قلت لك، صاروخ خيبر ده بيخيبر. فهم بيتخيطوا في إسرائيل من ناحية، بيتخيطوا وبيتخيطوا. لو ده... عايزك تنبسط من الناحية دي، أه في تخييط في إسرائيل. لكن أنا مشكلتي اللي بيحصل في إيران، مش لأن إسرائيل... أنا ما بحبش حد يقلل من العدو. إسرائيل بتبقى عاملة خطة، والخطوة بتاعتها عارفة خسائرها فيها كام، ومين اللي هيموت، وإيه اللي هيتضرب، والتعويضات هتكون عاملة إزاي، وهتجيب ده إزاي. على عكس إيران. إيران في وضع مرعب. ويا جماعة، أصلها كلها أيام وأنتم هتشوفوا بعينيكم اللي أنا بقوله ده. هتشوفوه بعينيكم في أيام جاية.

طيب خلينا نكمل. بص بقى يا سيدي، الحرب دلوقتي ما بقتش ما بين إيران وإسرائيل بس. لا، الموضوع وسع. إيران ضربت مواقع أمريكية في البحرين وفي الكويت والإمارات كمان. ضربت مواقع مدنية في الدول دي. الهجمات دي أدت لمقتل جنود أمريكان. ما حدش عارف عددهم. هم بيتكلموا عن ستة، سبعة. ما حدش عارف عدد الجنود الأمريكان اللي ماتوا. الرقم ده هم بيقولوا 21، إيران. لكن أمريكا ما أكدتش الرقم ده. في الكويت تحديداً حصلت ضربات ثقيلة جداً، ويا جماعة أنا شخصياً واقف جداً مع الكويت. على الرغم إن أنا زمان على فكرة كنت بختلف مع إخوان موجودين في الكويت، لكن الأمير مشعل ده، الراجل ده راجل كويس جداً، وجه في الوقت المناسب. الراجل ده جه هدى الدنيا وخلى الكويت مرتاحة وخلى الدنيا تمام في الكويت. لكن اللي بيحصل ضد الكويت خطير جداً، لأن ممكن الأمر يصل حتى للبري. ممكن تلاقي فجأة هجوم بري على الكويت من جماعات موجودة في العراق. فالكويت فعلاً وضعها صعب.

طيب، طبعاً قاعدة العيدري في الكويت اتضربت بسبب مسيرات. الهجوم ضرب مبنى القيادة وخزانات الوقود ومراكز صيانة المروحيات. ضربات جامدة يعني. اللي بيحصل إن إيران، ودي بقى بصراحة قوة إيران، رغم إن إيران بتتضرر، لكن نتيجة الخطة اللي هم حاطينها، كل ضابط في إيران بيضرب من دماغه. اضرب هنا العراق، اضرب، اضرب هنا، أسف، الكويت، اضرب هنا السعودية، اضرب هنا إسرائيل. فالضربات قوية جداً.

طيب، في بقى لقطة مثيرة للجدل ظهرت في أمريكا. إيه بقى؟ شرطة نيويورك أعلنت وفاة ضابط أمريكي كان موجود في الكويت بسكتة قلبية. قال لك أه، ده أكيد ده اتقتل. فهم بس مش عايزين يقولوا إن اتقتل، فقال لك إن هو مات بسكتة قلبية. حلو. عايز بس أقول لكم على حاجة كمان قبل ما أكمل كلامي. في لجان يا جماعة تابعة لإيران. للأسف لجان، وبيقولوا إن هو... لجان بيبقى عبارة عن اسم واحد يخش يكتب لك تعليقات كتير. والعكس بيكون عند حد مؤيد لإيران. يا جماعة، إحنا مش ضد إيران. إحنا بنحلل واقع. إيران دولة مهمة. سقوط إيران كارثة لمصر. لو إيران سقطت، دي مصيبة سودا لمصر. لكن أنا كمان ضد اللي بيعمله الحكومة الإيرانية، لأن هي ضيعت البلد بالحسابات الغلط. لكن إيران دولة مهمة جداً ولازم تفهموا ده كويس. كوني بقول الحقيقة، مش معنى كده إن أنا بشجع أمريكا. كوني بقول الحقيقة، إن أنا مش بخدعك.

خلينا نكمل. في الإمارات ظهر خبر غريب جداً إن في برج سكني اسمه مارينا 23 في دبي. بيقول إن الإيرانيين بيقولوا إن البرج ده ضربناه عشان فيه ضباط أمريكان. ده كلام الإيرانيين. البرج اتضرب بمسيرة إيرانية حسب التقارير. في كلام عن إصابات، لكن لحد دلوقتي ما فيش أرقام واضحة. المثير بقى إن بعدها مباشرة طلع خبر تاني. صحيفة عبرية قالت إيه؟ إن الإمارات ضربت محطة تحلية مياه في إيران. زي ما يكون إسرائيل عايزة تلبس الإمارات في حرب. لكن طلعت الإمارات ونفت الكلام ده وقالت الكلام ده ما حصلش.

نروح بقى للجنون اللي عايز يعمله ترامب. ترامب عايز يعمل إيه؟ ترامب عايز يعمل ضربات مكثفة الفترة اللي جاية، الثلاث أربع أيام اللي جايين دول، أو ممكن توصل لأسبوع. ضربات مكثفة جداً على إيران. هتشوف ضربات مرعبة. بعد كده عايز ينزل فرقة، والفرقة دي كوماندوز، تروح حسب موقع اكسيوس. وطبعاً الكلام ده قالوه مسؤولين إن هم... إن إسرائيل وأمريكا ناقشوا سيناريو إرسال قوات خاصة داخل إيران. مش احتلال، لكن عملية خاصة إن هم ياخدوا اليورانيوم. طب إزاي هينزل قوات خاصة؟ ما هيموتوا. لا، ما هو يستخدم أسلحة جديدة. الأسلحة دي بتخلي الناس اللي موجودة في المنطقة كلها بالكامل ينزلوا دم مناخيرهم. ما يقدروش يركزوا، ويبقى كأنهم مفصولين عن الحياة تماماً. فهو هيعمل، هيضرب السلاح، هينزل القوات الأمريكية، تنزل تاخد، تاخد اليورانيوم. والخطير بقى إن هو عايز يبعت علماء نووي معاهم، علشان في احتمال إن هم ما ياخدوش النووي، لكن يخففوه، يخلوا له لازمة. إذاً أنت أمام مشاهد يا جماعة، مشاهد غير مسبوقة. مشاهد غير مسبوقة.

طيب، بصوا يا جماعة ببساطة كده، الأمريكان مش هيدخلوا إلا بعد ما يتأكدوا إن الأرض دي بقت آمنة 100%. عشان كده الضربات هتكون قوية الفترة اللي جاية. هيعملوا، هيستخدموا السلاح، يأمنوا المنطقة كلها. الضباط والعساكر الأمريكان هينزلوا، ما فيش حد قدامهم، يبدأوا يشتغلوا ويخرجوا مرة تانية.

وكلكم فاكرين طبعاً اللي عملوه في فنزويلا. هم عايزين يكرروه، بس مش مع أشخاص. عايزين يكرروه مع اليورانيوم. مسؤول إسرائيلي قال للموقع إن ترامب وفريقه بيدرسوا بجدية إرسال وحدات خاصة لتنفيذ المهمة. لكن التفاصيل اتقالت أكتر من كده شوية. قالوا إيه؟ قال لك إن الإدارة الأمريكية، بحسب مسؤول أمريكي، عملت خيارين. اتكلموا عن خيارين. هياخدوا الخيارين دول. الخيار الأول: إزالة المواد النووية بالكامل من إيران، يعني نقل اليورانيوم خارج البلاد. الخيار الثاني: إرسال خبراء نوويين، زي ما قلت لك، للموقع نفسه لتحليل درجة التخصيب، ويبقى اليورانيوم مالهوش لازمة. الخطة المحتملة بحسب التقرير، بتبقى عبارة عن عناصر من القوات الخاصة الأمريكية، علماء نوويين، ربما كمان خبراء من الوكالة الدولية. يعني العملية لو حصلت هتكون مزيج بين عملية عسكرية وعملية علمية وفيها مدنيين. لو ترامب نجح في العملية دي، هيطلع على التلفزيون ويعلن انتصاره، وإن هو خد اليورانيوم، وإن هو دمر إيران ودمر كل البنية التحتية، ويلا يا حبيبي، كل الجيش الأمريكي يرجع لي ورا، اطلع من المنطقة، وسيب المنطقة بقى... تتعامل مع بعض مع نفسها. سيب الحكومة الإيرانية تتعامل مع الشعب الإيراني. سيب الدول الخليج تتعامل مع إيران. إحنا عملنا المهمة بتاعتنا واتعشينا وهنمشي. وطبعاً هيطلع هو بمنظر تلفزيوني، أنتوا عارفين طبعاً ترامب وطريقة قعدته التلفزيونية، وهيبدأ بقى يتكلم عن إيه؟ إن أنا انتصرت، إن أنا خلصت الحرب في وقت قياسي، إن المكاسب غير عادية، إن إيران دي كانت هتدمر العالم وتضرب أوروبا، وأنا البطل اللي جيت أنقذت العالم من إيران. بس ببساطة شديدة.

طيب، تعال بقى نروح للسعودية. السعودية بعتت رسالة لطهران. أربع مصادر مطلعة قالوا لوكالة رويترز إن السعودية بعتت رسالة واضحة لإيران. الرسالة ببساطة كانت إن السعودية تفضل الحل الدبلوماسي للحرب، لكن لو الهجمات الإيرانية على المملكة وقطاع الطاقة استمرت، السعودية ممكن ترد بالمثل. يعني السعودية يا جماعة بتفكر تخش الحرب. وأنا ضد الكلام ده تماماً، لأن ساعتها يبقى الضربات على السعودية غير عادية.

موقع إسلام آباد بوست، وده طبعاً موقع تبع مين؟ باكستان. نشر معلومة تثقيلة قوي قال إن قائد الجيش الباكستاني، ستاني عاصم منير، قال كلام واضح لوزير الدفاع السعودي: لو إيران فكرت تضرب السعودية مرة تانية، باكستان هتضرب إيران. ده إحنا كده الدنيا هتخرب. ده إحنا كده بدل ما إسرائيل في القصة، بقت باكستان وبقت إيران، والموضوع هيبقى قصة تانية خالص.

طيب، مشكلة الجملة دي إن باكستان مش دولة صغيرة بتتكلم على هوا كده. لا، باكستان دي دولة عندها جيش كبير من أكبر جيوش العالم. طبعاً وهي دولة نووية. وطبعاً باكستان، باكستان أصلاً دخلت على الخط، وفي علاقة قوية بين باكستان والسعودية، والسعودية تقريباً هي ممول باكستان الأول. وطبعاً كلنا عارفين إن في بينهم معاهدة دفاع مشترك. طيب، بس باكستان تاريخياً بتعتبر نفسها جزء من المظلة الأمنية السعودية. فإحنا أمام خطر حقيقي على المنطقة كلها.

طيب، خلينا بس نفكر في حاجة مهمة جداً. في التسعينات وبداية الألفينيات يا جماعة كان في كلام كتير داخل مركز الدراسات العسكرية في باكستان، ممكن تكون الضامن النووي غير المعلن للسعودية. يعني باكستان والسعودية من الآخر واحد. فدي مشكلة كبيرة جداً.

طيب، عايز بقى أكلمكم في كلام هو الخلاصة والكلام المهم، والأيام هتثبت لكم إن أنا كلامي كله هو اللي هيطلع صح. بصوا يا جماعة، من الآخر كده، إيران دولة للأسف الشديد مخترقة اختراق غير عادي. 7 أكتوبر أدت إن الدولة دي للأسف الشديد يحصل لها كارثة في رأيي، وهي فكرة إيه؟ إن إيران السبب في كل ده. فإحنا هنضرب إيران. فين الصين من القصة؟ هقول لك خبر عجيب النهاردة. الصين طلعت بيان بتقول إن أنا... إن الصين وأمريكا عايزين بقى إيه السنة دي تكون سنة فاصلة والعلاقات تبقى أفضل، وترامب هيجي الصين، وبعد كده الرئيس الصيني هيروح... وهنظبط الأمور. زي ما قلت لك، إن الصين وأمريكا حبايب. مش كده وبس. هي ليه الصين ساكتة على موضوع البترول؟ رغم إن البترول بيغلى وده يضرب اقتصادها؟ هقول لك الفولة كلها. حضرتك عارف إن الصين مخزنة 2 مليار برميل بترول. تقدر تسحب ست شهور من البترول اللي عندها من غير ما تستورد لتر واحد. يعني الصين يا جماعة عندها مخازن بترول 2 مليار برميل. جميل؟ ده رقم مرعب. ده رقم أنا مش مصدقه. أنا يعني لما قريته برضه حاسس إن في حاجة غلط. عايز أتأكد منه. في الآخر، الصين عندها كم ضخم جداً من البترول يقدر يخليها تقعد ست شهور من غير ما تاخد أي بترول من الخليج. فالسعر بقى يعلى، السعر يوطى، السعر يخش شمال، أنا قاعدة ست شهور. أكيد الحرب هتخلص فالدنيا هتبقى تمام بالنسبة لي. طب ده معناه إيه؟ ده معناه إن إحنا أمام موقف صيني مش مهزوز. حتى إغلاق مضيق هرمز، أه هتتضايق، لكن عندها القدرة إنها تكمل. ما فيش أي مشكلة بالنسبة لها.

طيب، طبعاً في كلام عن قناني دوت، اللي هو الراجل اللي كل ما يحصل عملية يطلع حي، وبيقولوا إن تم إعدامه في إيران. لسه مش متأكد من الكلام ده. وت الراجل ده يا جماعة، كل عملية إعدام حصلت أو عملية اختيار كان موجود فيها، وبيمشي من المكان قبلها بدقائق. فالكل بيقول لك إن الراجل ده هو رجل إسرائيل. وخلي بالك، للأسف الشديد، في عملاء في الإدارة الكبيرة تبع أمريكا وإسرائيل، وهم عايزين يختاروا منهم واحد يكون المرشد الكارثة. ليه؟ لإيران لحد هذه اللحظة مش قادرة تعلن المرشد، لأن لو أعلنت اسمه هيقتلوه. فإيران يا جماعة، أي واحد يشوف إن إيران في وضع سهل، أو إن إيران مش رايحة لاتجاه مدمر، يبقى إنسان بيكذب على نفسه أولاً، وإنسان مش بيواجه الواقع، وإنسان عايز اللي يضحك عليه وعايز الصحاف. الصحاف موجود، روحوا تسمعوه، موجود على فكرة، وبيعمل تهجسات غير عادية. في الأول قال لك إن الرئيس... قال لك إن المرشد ما ماتش. والله العظيم ما ماتش. والله العظيم قالها لك ثلاث مرات. بعد كده قال لك فيه مليون طيارة مسيرة، وإن أمريكا مات فيها 50 ألف واحد، وإن الطيارات الأمريكية، إيران وقعت 7000 طيارة. ده كلام الصحاف. بنسمعه زمان.

فأنا عايزك كده تكون عا... حتى الإخوة في العراق لازم يكونوا عندهم. أنا عارف الميول وعارف المحبة لإيران. وصدقني، أنا بحب إيران. أنا عندي هنا إيرانيين، والشعب الإيراني جميل، والبنات الإيرانيين أجمل بنات في العالم. هنا في هولندا عندنا إيرانيين كتير جداً ولطاف، والشعب على فكرة شعب لطيف جداً. يعني مش شعب كده غلس ولا غبي. لا، وعنده كرامة. لكن ده حاجة، وإني أقول لك الحقيقة حاجة تانية خالص. أنا بزعل قوي لما ألاقي الثقافة عندنا فيها مشكلة في مواجهة الحقيقة. مواجهة الحقيقة هي أقوى حاجة بتخليك إنسان قوي. الهروب من الحقيقة هو اللي بيخلينا عايشين في الوحدة.

في الآخر يا جماعة، بشكركم، ودايماً اكتبوا تاني تحيا مصر، وتحية لرئيس السادات، وتحية لرئيس السيسي. مصر الدولة الوحيدة اللي في المنطقة كلها في الشرق الأوسط اللي في أمان. عشان كده احتمالات إن الخليجيين في الفترة اللي جاية تلاقي أعداد ضخمة جاية مصر، ده ممكن يحصل جداً. شكراً يا جماعة، وأشوفكم على خير. مع السلامة.