Transcription
يا جماعة في بجد ناس غريبة عايشين معانا. ناس كده تبقى انت هتموت وتسالهم: يا ابني هو انت غبي ولا انت عبيط ولا انت ساذج ولا أهبل ولا انت إيه قصتك بالضبط؟ انت بتشوفهم في كل حتة، بتشوفهم في الشغل وفي علاقاتك وفي الشارع وانت رايح تجيب حاجة. في ناس بجد كده بيخلوك تتسائل: هو انت غبي ولا إيه؟
سنة 1976 في مؤرخ اقتصادي اسمه كارلو تشيبولا. هذا الرجل كتب مقالة كنوع من أنواع الدعابة بينه وبين أصحابه. المقالة دي اتنشرت جداً وبقت نظرية اسمها "قوانين الغباء البشري الأساسية". وفي حلقة النهارده جاي أحكيلكم أكتر عن القوانين دي ونعرف مين هو الشخص الغبي أو الأحمق، ومين هو الشخص اللي بيضحك عليك، ومين هو الشخص اللي بجد غلبان، ومين هو الشخص اللي مش باينله ملامح. أنا مش هطول عليك، تعالى ألخص لك حاجات كتير بتحصل في حياتك مش ليلة تفسير في هذا الفيديو فقط.
السلام عليكم، أنا مايكل راشد وانت بتشوف برنامج الزتونة. تعالى ندخل على طول في موضوعنا النهارده من غير أي مقدمات وأقولك إن تشيبولا قسم أنواع الناس لأربع أنواع رئيسية.
النوع الأول: الشخص الـ "إينفيل" أو الشخص العاجز. ده الشخص اللي بتصرفاته بيضر نفسه ولكن يفيد غيره. يعني تخيل مثلاً معايا واحد بيضحي بوقته عشان ينقذ وقت الآخرين، أو واحد بيشتغل من غير مقابل، أو واحد بيعمل حاجة عشان يساعد الناس ولكن هذه الشيء أو هذا الحاجة اللي بيعملها هي بتضره.
النوع الثاني: الشخص الذكي. ده شخص تصرفاته بتفيد نفسه وبرضه بتفيد غيره. زي كده موضوع الـ "وين-وين" هو بيحقق مصلحته وبيحقق مصلحة الآخرين. بيشتغل بياخد فلوس كويسة وبيبقى مبسوط في حياته وفي نفس الوقت برضه بيفيد المكان اللي هو موجود فيه. في علاقاته كلها "خد وهات"، بيديلهم حاجة وبياخد حاجة في المقابل.
النوع الثالث: اسمه "باندت" أو اللص أو قاطع الطريق. ده شخص تصرفاته بتفيده هو فقط ولكنها بتضر بباقي الناس. يعني هو أهم حاجة بالنسبة له إن هو ياخد مصلحته على حساب الآخرين. يبقى مثلاً موجود معاك في الشغل وتلاقيه هو بيحاول يستذكى ويستنصح ويعمل حاجة عشان هو اللي يطلع كسبان وباقي الناس تخسر.
أما عن الشخص الرابع، وده محور حلقتنا النهارده، هو اسمه في هذا البحث "الأحمق" أو "الغبي". وعلى تعريفه تشيبولا لهذا الشخص، فده الشخص اللي تصرفاته بتضره وبتضر الآخرين. ما انت غبي بقى، أو على الأقل على كلام تشيبولا هي ممكن يعني تضر الآخرين ولكن ما تفرقش معايا يعني، ولا تطلعه ولا تنزله، اللي هو عمال تضر على الفاضي. عارف لما تبقى انت قاعد بتلعب مع واحد صاحبك كده مثلاً ترنيب ولا حاجة وهو يرمي ورقة يعلى بيها عليك وما فيش حد تاني معاه ورق غيركم، فانت تقعد تقوله: يا ابني انت غبي، يعني انت ليه بتضرنا؟ ما انت بتضر نفسك وبتضرني معاك. هو ده بقى الشخص الغبي اللي احنا هنتكلم عليه النهارده.
تشيبولا حط خمس قوانين للغباء البشري. الحقيقة كلهم أحلى من بعض يعني. واحنا بنتكلم على موضوع الغباء ده انت يعني هتنبسط قوي وهتكتشف إن الموضوع يعني موجود في حياتك ولكن بس ما كنتش عارف تمسكه.
فمثلاً القانون الأول للغباء البشري، تشيبولا بيقولنا فيه إن عدد الحمقى أكتر بكتير قوي من اللي احنا ممكن نتخيله. اللي هو الشخص رقم 4 ده، ده مش شخص نسبته في الحياة 25% أو نسبته في المجتمع 25%. قد يكون ده هو الطبيعي. وانت حتى فكر فيها كده، ليه في عدد كبير من النصابين موجودين في هذه الحياة إذا ما كانش في الضحية نفسه اللي هو الشخص الأحمق أو الغبي ده؟
القانون الثاني: الغباء ما لوش أي علاقة بأي صفة أو بأي شهادة أو بأي منصب انت فيه. الغباء هي صفة مستقلة بذاتها على كلامه تشيبولا. يعني انت ممكن تلاقي واحد هو صاحب شركة، هو مدير، هو عنده أملاك وعنده ثروات وعنده حاجات كتير جداً ولكنه غبي. ممكن تلاقي دكتور غبي، وممكن تلاقي مهندس غبي، وممكن تلاقي واحد واخد شهادات دكتوراه من أحسن جامعات العالم ولكن برضه في الآخر هو غبي. ليه؟ لأن الغباء على كلام تشيبولا هو نظرية سلوكية ما لهاش علاقة بالمعرفة اللي موجودة عندك. يعني انت ممكن يكون عندك معرفة حلوة ولكن تصرفاتك مش أحسن حاجة.
القانون الثالث: الغبي دايماً يساوي خسارة. الغبي وجوده في أي مكان يحمل معاه الخسارة. على حسب يعني برضه التعريف اللي احنا قلناه من شوية للشيبولا عن هذا الكائن اللي هو الغير ذكي. فانت سهل جدا تعرف أي مكان أو أي علاقة أو أياً كان المجتمع ده في ناس أغبية ولا لا. إذا لقيت إن في خسارة في هذا المجتمع أو في هذه الشركة أو في هذا المكان، اعرف كده إن المكان اللي بيخسر أكيد في ناس أغبية. الفكرة اللي ما بتشتغلش في الأغلب في ناس أغبية وراها.
القانون الرابع: ده قانون غريب جداً بيقولك إن الناس الأذكياء بيقللوا من خطورة الشخص الغبي. لأن هم متخيلين إنه بذكائهم هيقدروا إن هم يتحكموا فيه. ولكن هيهات على كلامه تشيبولا إن التعامل الناس الأذكية مع الناس الأغبية دي أكتر غلطة ممكن يقعوا فيها. لدرجة إن هذه الغلطة في حد ذاتها هتنقلهم دايركت لكده أو يعني مباشرة لقناة الناس الأغبية. وده ببساطة لأن هذا الشخص الغبي يعني هو غير متوقع وتصرفاته غير مسؤولة. ومهما كنت انت حاولت أو بتحاول إنك تتحكم فيه، فصعب جداً إنك تعمل كده.
وده ينقلنا للقانون رقم 5: إن الشخص الغبي أو الأحمق على كلام تشيبولا هو ده أخطر شخص انت ممكن تتعامل معاه. أخطر حتى من الـ "باندت" أو من اللص. لأن انت متوقع اللص ده إن هو داخل يأذيك، انت متوقع إن هو عايز يسرق حاجة معينة، انت متوقع إن هو بيلف وبيدور عشان ياخد مكسب معين. ولكن الشخص الغبي انت لا تتوقعه. فتخيل معايا لو في شخص أحمق أو غبي على هذا التعريف وصل لمنصب كبير أو وصل لنفوذ كبيرة، ممكن يعمل فينا إيه؟
مايكل، أنا حاسس إن الحلقة دي دمها خفيف كده، أنا مبسوط وأنا بسمعك. ولكن خليني أقولك إن إحنا قدام كارثة. اللي أنا عايز أقولهولك في الفيديو ده إن في ناس لو إحنا بنتعامل معاهم، هم ممكن يكونوا أخطر ناس على حياتنا أو على مستقبلنا أو على شغلنا. يعني كل إن أنا بتعامل مع شخص هو لص أو هو عايز إن هو اللي يكسب والباقي يخسر، قد يكون ده أفضل بكتير جداً مني إني أتعامل مع شخص هو غبي.
وراحت شيبولا مسودة علينا أكتر وقلنا أصلاً إن كمان ما فيش حل لهذا الموضوع لأنهم موجودين وبكثرة. لكن يمكن الحل الوحيد هو في وعيك انت للناس الأغبية اللي ممكن يكونوا موجودين حواليك. كان بالفيلم اللي هو بتاع "لاين كينج" الأسد الملك لما كان بيقول: أنا محاط بشلة متخلفة. وهي فعلاً هذه الشلة المتخلفة اللي اللي خليته يخسر. يعني هو شرير وحواليه أغبياء. لو كان شرير وحواليه أذكياء كان الموضوع بقى مختلف.
فالمرة الجاية وانت بتختار علاقاتك أو وانت بتختار ناس بتشتغل معاهم أو وانت بتحاول إنك يعني تكون فريق من أي شيء، حاول تسأل نفسك دايماً هذا السؤال: هل في هنا الناس بهذا التعريف ممكن يكونوا موجودين ولا لا؟ وحاول إنك تقسم الناس بين الأربع أفكار اللي إحنا اتكلمنا فيهم. يمكن الشخص الـ "إينفيل" هو شخص بس محتاج يعرف إزاي يهتم بنفسه أكتر. يمكن الشخص اللص محتاج يعرف إيه هي القوانين أو الأنظمة اللي تردعه إن هو يعمل حاجة زي كده. يمكن الشخص الذكي محتاج تشجيع دايماً إن هو يقدر يفيد نفسه ويفيد الناس الـ "وين-وين". ولكن الشخص الغبي هنعمل معاه إيه؟ انتوا سيبولي رأيكم في التعليقات وقولولي شايفين الموضوع إزاي وشايفين فعلاً إن هذا الكلام هو كلام حقيقي ولا لا.
عامة في أفكار كتير حلوة جاية في الطريق ليها علاقة بيه إزاي ممكن أطور من قدراتي العقلية. فما تنساش إن انت تكون عامل اشتراك هنا في البرنامج ومفعل خاصية الجرس عشان تتابع أول بأول كل هذه الفيديوهات. وطبعاً يعني عايز أقولك: اوعى تبعت الفيديو ده لأي حد لا يحس إن انت بتلقح عليه، ولكن يكفي إن انت تعمله شير وتقول هاشتاج مقصودة، وأكيد الناس هتفهم قصدك إيه.