خيانة موسكو .. اثيوبيا تدخل السباق النووي من بوابة القيصر

أنا الصراحة مش عارف أجيب لك إزاي لحد دلوقتي يعني بحاول أدور على صيغة مناسبة كده. وده لأن سد النهضة اللي اتعمل وبدأ تشغيله رسمي بعد ست شهور تقريبًا لحد لحظة تصوير الفيديو ده، واللي من ساعة تشغيله في سبتمبر اللي فات تقريبًا، اللي هو وقت الافتتاح لحد النهارده ما طلعش كهرباء خالص. آه والله ما طلعش ولا حتى لمبة.

ولكن مش دي المشكلة. المشكلة إن إثيوبيا النهارده بتسعى لامتلاك نووي، أو بمعنى أصح، امتلاك مفاعل نووي لتوليد الطاقة. هم تقريبًا قرروا كده، إن السد إيه ما اشتغلش، ما طلعش الكهرباء خلاص، يبقى نعمل مفاعل بقى. أصل يعني، أصل بص لو فكرت فيها كده، مالهاش حل تاني أو مالهاش أي تفسير تاني.

وده اللي المفروض يحصل بقى عن طريق مين؟ أو تشغيل المفاعل ده بالتعاون مع مين؟ مع روسيا. أيوه روسيا وبوتين، اللي هما أهم حلفاء مصر والشريك الأساسي في تنفيذ محطة مفاعلات الضبعة النووية في مصر، اللي تقريبًا ما فيش زيها في أفريقيا. طب إزاي روسيا اللي هي الشريك الأساسي لمصر في محطة الضبعة، وإزاي هي في نفس الوقت المفروض إنها الدولة اللي إثيوبيا هتستعين بيها لتشغيل المفاعل الخاص بها؟ وده اللي ممكن يضر بالعلاقات، أو بمعنى أصح، بالمصالح المصرية.

الحق، قصة تشغيل إثيوبيا لفكرة مفاعل نووي دي مليانة مفارقات أغرب من بعض والله. ولكن اللي يهمنا، وإننا يعني ده بيدينا إشارة واضحة إن الحكاية بتاعة سد النهضة دي ما كانتش كهرباء وبس. لأن باختصار، إثيوبيا لو كانت بتدور فعلًا على طاقة، كانت ركزت فعلًا في مشروع مفاعل نووي، يعني وكانت هتولد كهرباء أكتر وأكبر وأرخص بكتير من السد.

وده يخلينا نسأل شوية أسئلة مهمة: هي ليه روسيا ممكن تساعد إثيوبيا رغم يعني مصالحها الكبيرة مع مصر؟ وإيه موقف مصر من المشروع ده؟ وهل إثيوبيا بتفكر فعلًا فيه؟ يعني وإزاي؟ وإيه عبارة عن إيه المشروع ده بالنسبة لهم؟ دي تفاصيل مهمة قوي. وقت ما الناس كلها مركزة مع إيران، لا فيه حاجات تانية بتحصل خلي بالك. يعني منطقتنا دي ما شاء الله مليانة أحداث. فجهز لي حاجات أشربها كده، وفكرك تعمل اشتراك في القناة زي ما إحنا متفقين، وخلينا ندخل في التفاصيل على طول. أنا محمد خالد وقهوتك وحصن.

وتواصل قواتنا حاليًا قتالها مع العدو بنجاح. قبل ما نبدأ، حابب أقول إن الحلقة دي برعاية واحد من أكبر المطورين العقاريين في مصر، وهي شركة مصر العظمى للتطوير العقاري "أوديكو"، واللي بتقدم لنا النهارده مفاجآت ضخمة في العاصمة الإدارية. تفتكر كده لما شركة يبقى عندها خبرة أكتر من 40 سنة في المقاولات والتطوير العقاري، ونفذت أكتر من 100 مشروع قومي من طرق وكباري ومحاور ومشاريع غيرت شكل الخريطة العمرانية تمامًا، ولو بقت شركة مطورة بقى هنا هتعمل مشروعات عاملة إزاي؟ وده غير إنها ساهمت في تشغيل سلاسل كاملة من العمال، مهندسين، فنيين، وموردين، ومصانع. والميزة الأهم إن جادوكو بتنفذ مشاريعها بمعدات وتنفيذ داخلي بدون الاعتماد على أطراف خارجية. وده يخلينا نسأل، اسم نيبو جه منين؟

دايمًا بحس إن أنا لما بتكلم على إثيوبيا كدولة وسياستها تحديدًا، يعني هتلاقيها شبه صاحبك اللي دايمًا يعني بيفرّق كده. تقول له يا ابني بطل فرّق، أنت تعبت هنا. واللي غاوي يقلدك في كل حاجة ويزاولك في نفس الوقت. يعني أصلًا إحنا بنتكلم على دولة يعني أول ما بتيجي سيرتها كده بيجي في بالنا موضوع سد النهضة والمشاكل اللي عاملاها إثيوبيا مع جيرانها، سواء مثلًا عشان السد نفسه، أو عشان تلاقي نفسها منفذ على البحر الأحمر. وطبعًا أمن مصر المائي يعني فكرة السد الإثيوبي ده بيهددوا بشكل مباشر. عشان كده لما نشوف خبر إن إثيوبيا بتسعى لإنشاء مفاعل نووي لتوليد الكهرباء، ما ينفعش ده خبر يعدي علينا كده والسلام. حتى وسط الأحداث السخنة اللي بتحصل دلوقتي.

لأن إثيوبيا قعدت سنين طويلة تقول إن السد ده هدفه وبشكل أساسي توليد الكهرباء والتنمية، وإن مصر واقفة في طريق طموحها في تحقيق التنمية دي، وإن إثيوبيا مظلومة على أهلها، وما فيش غير السد ده وشوية التربينات بتاعته هما اللي هيدوا إثيوبيا النور لأهلها، وهنقدر نستفيد منه ونوصل للتنمية اللي إحنا عايزينها ونزود ود الاستثمارات في الدولة كمان. طب وماله، ما فيش مشكلة. طب هو برضه سؤال، هو مش سد النهضة ده معمول عشان يطلع كهرباء؟ صح ولا لأ؟

المفاجأة إن من وقت افتتاح سد النهضة في إثيوبيا من شهر تسعة اللي فات بشكل رسمي لحد النهارده، وبعد أكتر من ست شهور، السد ما طلعش كيلو وات واحد من الكهرباء. وده مش كلامنا ولا جدعنة مننا كده، ده كلام الخبراء والمتخصصين اللي بيتابعوا المشروع أول بأول وبيقيموه عن طريق الأداء بمراقبة الأقمار الصناعية. هتقول لي يا محمد، لا ثواني، إزاي الكلام ده؟ سينيور أبي أحمد نفسه أكد لي وأكد للشعب وأفريقيا وللعالم كله إن السد شغال، الله ينور، وهيطلع لنا كهرباء ومش هيخلي بيت فيك إثيوبيا يتقطع عنه نور تاني.

وده لأن فعلًا دي الرواية الإثيوبية اللي بتقولها، إن السد فعلًا بينتج كهرباء وتم ربط إنتاجه بشبكة خطوط إثيوبيا للطاقة. وكمان أديس أبابا بتقول إن السد عنده طاقة تشغيلية توصل لأكتر من 5000 ميجا وات من الكهرباء. وده رقم ضخم جدًا بيساوي ضعف إنتاج إثيوبيا من الكهرباء قبل بناء السد. وعشان تتخيل معايا حجم الأرقام اللي بنتكلم فيها، إثيوبيا بتقول إن السد ده المفروض هينتج لوحده، لوحده كمشروع كهرباء، يكفي حوالي 60% من السكان اللي ما كانوش بيحصلوا على كهرباء قبل كده، وعددهم يوصل لحوالي 60 مليون بني آدم. أنت واخد بالك ما نتكلم على مشروع عملاق إزاي.

لكن الحقيقة إن سوق الأقمار الصناعية بتروي قصة تانية خالص عن الرواية الإثيوبية وبتقول إن السد الإثيوبي فشل فعلًا في توليد الكهرباء بسبب مشاكل تقنية في التربينات. وبالمناسبة، ده كلام الخبراء وكمان الصور اللي بتطلع. وأضيف على كده أسباب واضحة جدًا ومادية، إن كل ما يحصل فيضان، فيضان إثيوبيا بتضطر إنها تفتح بوابات السد لتصريف الميه بشكل عشوائي. وأظن كنا حضرنا الكلام ده قبل كده، وده كان بيعمل أزمات مائية لدول المصب، والسودان شهدت فيضانات بسبب الموضوع ده. ومصر اضطرت إنها تعيد هيكلة نفسها وكانت مستوعبة الموجة اللي جاية دي، والحمد لله ده حصل. يعني لولا اللي إحنا مراقبين بالقمر الصناعي وعارفين ده وعندنا شبكة نوزع عليها الميه الزيادة دي، كان زماننا غرقنا.

وعشان نفهم بقى إن القصة هنا من السد مش مجرد توليد طاقة، أو مش لتوليد الطاقة أصلًا. الغريب أكتر النهارده هو إعلان أديس أبابا عن حاجة في منتهى الغرابة، وهو السعي للتعامل مع شركة روساتوم الروسية لتشغيل مفاعل نووي لتوليد الكهرباء. وهذا ما لم نسمع به من قبل في إثيوبيا، يعني وفي أفريقيا عمومًا. تحس إن لسان الحال الحكومة الإثيوبية هناك بتقول: واشمعنى يعني؟ هي مصر أحسن مني في حاجة؟ عندهم السد العالي عادي، ما أنا بقى عندي سد النهضة خلاص، مش مهم بقى بيطلع كهرباء ولا لا، ما تدخنيش يابا في التفاصيل دي دلوقتي. بيجهزوا محطة مفاعل الضبعة واللي هتكون الأولى في أفريقيا بالشكل ده. لا ماليش فيه، أنا هجيب روسيا وبرضه نفس الشركة اللي شغالة معاهم تعمل لي ده. ما هي مش أحسن مني برضه.

أنا عارف الكلام ممكن يكون غريب، بس ترتيب الأحداث والتصريحات اللي هما بيقولوها ما بيقولش حاجة غير كده. وده ليه غريب؟ بل إنه من أغرب ما يمكن كمان، لأن موضوع توليد الكهرباء من المفاعل النووي أكيد هيكون أرخص وأفضل بكتير من إنك تعمله بسد، أو تطلع كهرباء من سد عملاق بمشروع زي سد النهضة يكلفك أكتر من 4 مليار دولار، لسه بتدفع في قصادههم لحد النهارده ولسنين طويلة قدام كمان. يعني بمعنى واضح، لو القصة قصة طاقة وتنمية وكهرباء، كان ممكن إثيوبيا تخش على طول من 2011 إنها تبني أو تسعى إنها تعمل مفاعل نووي بدل سد بالضخامة دي، بدل ما هي دلوقتي بعد أكتر من ست شهور من افتتاح السد بشكل رسمي مش عارفة تطلع منه كيلو وات واحد من الكهرباء، وتيجي تقول لك النهارده: لا ده أنا كمان عايز أعمل مفاعل نووي. طب بذمتك أنت كمشاهد، تفسيرك إيه الوضع زي ده لما تشوفه؟

واللي حصل كمان ببساطة إن إثيوبيا مش بتتكلم عن الموضوع ده كطموح نووي عن طريق التصريحات وبس. لا، دي دخلت بالفعل في خطوات رسمية واضحة جدًا. لأن في أول يوم من أبريل في 2026، وكالة الأنباء الإثيوبية الرسمية "ENA" نشرت خبر بيقول إن وزير الخارجية الإثيوبي اللي هو جيدون موث، مش عارف أنا إيه الاسم الصعب ده، ما ترجعوا لنا يا جدعان دينا مفتي ده كان كان لطيف كنعرف نتكلم معاه. المهم يعني إن الراجل ده استقبل نيكولاي سابسكي، وده نائب المدير العام لمؤسسة روستوم الروسية. وخلال اللقاء ده، المسؤول الروسي أبلغ الوزير الإثيوبي إن فيه خارطة طريق استراتيجية لتطوير الطاقة النووية من إثيوبيا، يعني عن طريق روسيا. وده تم توقيعه رسميًا. الوكالة قالت إن الوثيقة دي فيها خطط عمل مشتركة، يعني بتحدد اتجاه التعاون المستقبلي بين الجانبين.

وخلينا نقول إن الموضوع ده متخذ فعلًا بدرجة عالية من الجدية، لدرجة إن مفوض هيئة الطاقة النووية الإثيوبية، آه بقى عندهم هيئة للطاقة النووية دلوقتي، قال إن المباحثات مع الوفد الروسي ركزت على الطرق الخاصة للعملية لتنفيذ الاتفاق اللي كانت وقعت قبل كده في سبتمبر اللي فات، وده بخصوص إنشاء أو استخدام السلمي للطاقة النووية. ولو رجعنا خطوة لورا هنلاقي إن نقطة البداية المهمة فعلًا كانت في 25 سبتمبر 2025. وده بالمناسبة كان نفس الشهر اللي افتتح فيه سد النهضة لأول مرة. يعني هما ناويين الموضوع من بدري، مش فكرة بقى سد وبتاع، لا، هما يعني عندهم خطة غريبة كده في دماغهم.

ولما وكالة رويترز نشرت تقرير قالت فيه إن روسيا وإثيوبيا وقعوا وثيقة تدعو إلى التخطيط والبدء في إنشاء محطة طاقة نووية في إثيوبيا. وثقت رويترز هنا التوقيع ده يعني خلال منتدى نووي اتعمل، وده كان بين المدير العام لروستوم وبين الرئيس التنفيذي لشركة الكهرباء الإثيوبية نفسها. الوثيقة تضمنت إعداد خطة تفصيلية لبناء خارطة طريق فنية واقتصادية واتفاق حكومي مستقبلي يسمح بالمضي قدمًا. وكمان تضمنت بند مهم جدًا خاص بتدريب الكوادر الإثيوبية على تشغيل المحطة وتطوير القطاع النووي هناك في إثيوبيا. طب ما هو الموضوع جد أهو. أمال إحنا بقى يعني قاعدين كل ده في سد النهضة من بدري ليه؟ طب ما كنا سعينا وخدنا الموضوع ووفرنا على بعضنا.

الحقيقة إن إثيوبيا بتروج للمشروع ده، أو الخطوات دي كلها بتاعتها باستخدام سردية غريبة جدًا وبتقول على لسان يعني أبي أحمد إن الطاقة الكهرومائية والطاقة الشمسية والرياح مش كافية لوحدهم لتشغيل المستقبل اللي هما عايزينه من الكهرباء. بالإضافة إن أبي أحمد بيقول إن إثيوبيا عايش فيها أكتر من 130 مليون نسمة، وما بقاش عندهم رفاهية الانتظار، وإن الطاقة النووية ضرورية جدًا لتأمين التنمية الطويلة لأجل تنويع ومزج مصادر الطاقة مع بعض.

وهنا ده يقول لنا مفارقة غريبة جدًا، إن على مدار أكتر من 10 سنين، الخطاب الإثيوبي الرسمي في ملف ملف سد النهضة كان قائم على فكرة إن السد هو مشروع تنموي لتوليد الطاقة، وإن ركيزته الأساسية حل أزمة الطاقة، وإنه حق سيادي للدولة، وإن الاعتراض عليه فيه مبالغة أو تمس يعني بحقوق إثيوبيا للتنمية. طب لما نفس الدولة النهارده ونفس القيادة السياسية ما اتغيرتش ونفس المؤسسات الرسمية تطلع بعد كده تقول إن الطاقة الكهرومائية النهارده اللي إحنا بقى لنا 10 سنين بنتكلم فيها دي لوحدها النهارده مش كافية، وإن الاعتماد عليها هيعتبر هش كده بسبب تغيرات المناخ، وإن البلد محتاجة محطة نووية عشان تأمن احتياجاتها المستقرة من الطاقة لفترة طويلة الأجل شوية. يعني إحنا هنا قدام اعتراف ضمني إن السد مهما كانت أهميته ما كانش هو الحل الوحيد أو السحري زي ما إثيوبيا كانت بتروج له لأكتر من 10 سنين فاتوا.

بمعنى تاني، لو كانت إثيوبيا نفسها بتقول إن الكهرباء يعني اللي بتيجي بالتشغيل الكهرومائي مش كافية لوحدها، فإزاي هنا كانت بتقدم سد النهضة طول السنين اللي فاتت دي كلها ورفضت حتى إنها تتفاوض أو يعني ننظم تشغيل السد عشان ما يمنعش فكرة إن إحنا نطلع كهرباء للإثيوبيين وبتاع، وإنه لحد النهارده برضه ما طلعش كهرباء. وبصرف النظر يعني على الهري ده، أصله بص، ما فيش أي سبب منطقي للرواية الإثيوبية، فهو يندرج تحت بند الهري ده. أظن ما أنت زي ما أنت شايف. لو أنت كمشاهد شايف حاجة مقنعة في الكلام ده أو شايف وجهة نظر تانية، اكتملنا في الكومنتات، ما إحنا بنتكلم مع بعض يعني.

بس أنا يعني بحاول والله. بعيدًا بقى عن الموضوع ده، وإن أصلًا معروف سد النهضة يعني اتعمل ليه وامتى والهدف منه إيه بالظبط، زي ما إحنا شفنا. بس خلينا بقى نسأل سؤال مهم من الصعيد الآخر، هي إزاي روسيا اللي بتساعد دولة زي إثيوبيا النهارده في مشروع زي ده؟ يعني إزاي ده بيحصل في ظل إن روسيا هي واحد من أكبر الشركاء لمصر في مشروعات كتير جدًا، مش بس فكرة الطاقة النووية. يا راجل ده بوتين لسه كان طالع من يومين كده بيقول للعالم علنيًا إن العالم لازم يسمع لوجهة النظر المصرية في قضايا الشرق الأوسط لأنها مهمة. اقعدوا اسمعوا الراجل أبو محمود ده بيقول كلام مهم على فكرة، أنتوا مش مركزين معاه. أنت ممكن تكون فاكرني بهزر، بس الراجل طالع جد يعني. أنا مستغرب بصراحة. أو مش هتستغرب قوي والله، ما إحنا كنا عارفين فيديو من شوية، الترحيب ما بين الاثنين كان شكله عامل إزاي.

بالمناسبة، ما تستغربش قوي شكل العلاقة بين بوتين وسيسي، لأن الاثنين مدارسهم واحدة، والاثنين رجال مخابرات بالمناسبة. وده غير إنه قال بعدها إنه بيدرس إنشاء مركز الحبوب في مصر وشوية حاجات كده كانت لطيفة قوي. كان تصحيح من كام يوم كان قالها يعني الأخ بوتين. فمنين أنت كشريك رئيسي لمصر، ومنين يعني بتروج للتعاون مع إثيوبيا في مشروع حرج زي ده واللي بينها وبين ما صنع الحداد هنا؟ لو إحنا بنتكلم بالصيغة دي، فإحنا مش بنتكلم بمنطق السياسة خالص. لأن السياسة يعني بشكل واضح بتقول إن عادي أنت تمشي في مسارين في شكل واحد. وده شيء أظن مش محتاج أديك أمثلة عليه. الصين وأمريكا اللي يعني ما بينهم حرب تجارية شرسة دلوقتي وفي تحرك لقطع عسكرية زي ما هنعرف في الأيام اللي جاية كده، شوف حجم التبادل التجاري ما بينهم عامل إزاي. فالموضوع هنا مالوش علاقة قوي، عادي أنا بقى ماشي في ملف وملف، فمالوش علاقة.

لأن أنت برضه بتبص للموضوع من منظور واحد. مش مصر دي شريكة لروسيا وروسيا شريكة لينا ويعني مساعدين لنا من زمان وعلاقتنا معاهم سمنة على العسل، ليه عملوا حاجة زي كده؟ أنتوا بتلعبوا على كل الأطراف. الحقيقة الإجابة هنا بتقول إن من خلال الأرقام، إن الواقع مختلف شوية، وهي إن روسيا لسه متمسكة جدًا بتوسيع شركاتها مع مصر في نفس الوقت اللي بتفتح فيه مسار مع إثيوبيا. يعني عادي زي ما قلت لك إنها تكمل في الاثنين. أو الأرقام بتأكد الكلام ده. لأن العلاقة ما بين موسكو وما بين القاهرة بتعيش حالة من الازدهار حاليًا، ده زي ما من كام سنة يعني وهي مكملها الحمد لله في الموضوع ده. يعني عندك مثلًا لسه من يعني من أقل من يوم يعني كان يعني الرئيس الروسي فلاديمير بوتين طرح خلال لقائه مع وزير الخارجية المصري بدر عبد العاطي، طرح فكرة إنشاء مركز الحبوب وتوسيع إنشاء الطاقة أو التعامل مع الطاقة في مصر. بل إن الراجل قالها كده إن فيه أفكار كتير مثيرة للاهتمام للتعاون مع مصر وتقدر من خلالها روسيا كمان تستفيد، مش بس مصر.

باختصار، روسيا بتتعامل بشكل براجماتي مع الموضوع، بتقوي علاقتها بمصر، لكن في نفس الوقت بتلعب تجارة واستثمار مع إثيوبيا. والمنطق الروسي هنا هو منطق النفوذ متعدد المسار. لأنك لو ما تعرفش، روسيا عندها ذراع نووي ضخم اسمه "روساتوم". الشركة دي مش مجرد شركة طاقة، دي أداة جيوسياسية كاملة. لما روسيا توم تدخل بلد، هي مش بتبني مفاعل وتمشي، لا لا لا، دي بتربط البلد حرفيًا بروسيا، دولة الأم، بالوقود النووي والصيانة والتدريب والتحديثات والمساعدات الفنية والوقود، بص كل اللي أنت عايزه. وبما إن أحيانًا التمويل يعني يتم لعقود طويلة جدًا، فهي ضمنت وجود مصالح مشتركة مع الدولة الأولى بتقيم فيها المفاعل ده وشوية حاجات جنبه كمان. وكمان فيه حاجة مهمة جدًا ما ينفعش نتجاهلها، وهي إن إثيوبيا دولة مهمة جدًا بالنسبة لروسيا بالتحديد في منطقة حرجة جدًا زي القرن الأفريقي، وبتحاول يكون لها منفذ على البحر الأحمر، اللي هي إثيوبيا، وكمان عدد السكان فيها كبير جدًا وكلها موارد. وبالتالي الوجود الروسي هناك مهم جدًا لموسكو.

دي كلها معلومات حقيقية وفعلاً فيه أهمية. ولكن برضه أهمية إثيوبيا بالنسبة لروسيا مش بأهمية مصر. ده أساسي يعني. لو عملنا سيناريو افتراضي وغير واقعي يعني وقلنا إن موسكو عليها إنها تختار بين علاقتها مع مصر وعلاقتها مع إثيوبيا، فبشكل براجماتي كده ولو جمعنا النقط، عدد النقاط اللي عند مصر يغلب عدد النقاط عند إثيوبيا. ده أي نعم السياسة ما بتمشيش كده، ولكن إحنا بنتكلم بشكل نظري واضح. ما فيش وجه مقارنة. روسيا بتتعامل مع مصر كدولة كبيرة ليها مركز وثقل في منطقة حرجة زي الشرق الأوسط، وبتتعامل معاها بمنطق الشريك المهم جدًا تتعاون معاه في منطقة زي دي. يعني الاستقرار فيها عملة نادرة. لكن منطقة منطق التعامل مع إثيوبيا منطق مختلف تمامًا، وهو منطق التاجر أو الدولة اللي بتحاول تساعد دولة تانية على التنمية قصاد إنها تاخد منها شوية حاجات أكتر بكتير وتوسع نفوذها هناك أكتر.

لكن المهم في الموضوع دلوقتي بقى، طب هي المحطة دي أصلًا ممكن تضايق مصر أو تكون يعني إيه ضد مصالحنا؟ وإيه السبب؟ ومين ممكن يقول حاجة زي كده إن مصر ممكن تتضايق من مفاعل ممكن يتم في إثيوبيا؟ بحسب المحللين الإثيوبيين يعني، في مزاعم يعني إن مصر مش عاجبها الحال ولا عاجبها إن إثيوبيا تعمل مفاعل نووي بالتعاون مع روسيا. وطبعًا مش محتاجين نقول إن يعني ده أي كلام حرفيًا وادعاءات غريبة. ما حدش عندنا قال الكلام ده. لأن موقف مصر من إثيوبيا موقف واضح، وإن مصر ما عندهاش أي مشكلة شخصية مع إثيوبيا أو الشعب الإثيوبي. بالعكس، مصر عرضت أصلًا على إثيوبيا إنها تساعدها في التنمية في أكتر من حاجة، أهمهم سد النهضة. يا راجل، إحنا عرضنا مساعدة في سد النهضة، هما رفضوا. هما مقصرين مننا بجد يعني.

وده لأن في مرحلة من مراحل المفاوضات مصر قدمت مقترح لإثيوبيا وقالت لها: طب طالما هدفكم التنمية فعلًا، طب ما نساعدكم. والمساعدة هنا مش هتقف بس عند السد، ونكون شريك معاكم في حاجات كتير. ودي تنزانيا جنبكم، ما عملنا سد جوليوس نيريري وبعتنا المقاولين العربي وبعتنا السويدي وظبطوا الأداء والدنيا كانت تمام والناس بسم الله ما شاء الله هناك أهو والدنيا تمام. طب ما أنا سايبكم وإحنا عندنا خبرة في ده. ولكن عشان إحنا عارفين إن الموضوع ده نواياه خبيثة، وكنا يعني ده أنت لو متابع الموضوع أصلًا أو عندك فكرة بسيطة على الموضوع هتبقى فاهم أنا بتكلم في إيه. وفاهم إن في مبنى وزارة الزراعة في إثيوبيا أو وزارة الري في دور بحاله كده معمول لأولاد الأحبة. كنا اتكلمنا في الموضوع ده قبل كده لو أنت متابعنا يعني. زراعة اللبيب في إثيوبيا وفي مشروع سد النهضة بالتحديد، وفي القطاع المائي هناك والاستثمار، وحتى الدفاع والسلاح كبير جدًا. فعشان كده هما مش قابلين منك حاجات كتير. هما رايحين في سكة مختلفة تمامًا.

ولو ركزنا شوية في البيانات الصادرة عن المؤسسات المصرية، فهنلاقيها بشكل واضح كده بتقول إن مصر ما عندهاش مشكلة أبدًا في التنمية إنها تحصل في أفريقيا. بالعكس، دي هي حابة تكون إن التنمية دي تطلع من البوابة المصرية. إحنا دي هدفنا في المرحلة دي أو من فترة طويلة كمان. ما أنت حواليك يا ابني دول أفريقية تانية زي تنزانيا وكينيا وحتى جيبوتي، والدول دي كلها بتاخد حاجات مننا وعندنا معاهم مشاريع على المدى المتوسط والطويل والقصير كمان. ف أنت عندك أزمة في إيه؟ مشاريع مصر ممتدة في دول زي الصومال وفي كينيا وفي تنزانيا وفي جيبوتي، واريتريا، و يعني كل مشروع تقريبًا من شرق لغرب أفريقيا عندنا فيه ولو مشروع واحد على الأقل. في مقاول مصري شغال هناك. لازم بنعمل لهم حاجة في العاصمة بتاعتهم، بنبل لهم كوبري، بنعمل لهم سد، مزرعة طاقة شمسية. ده كله موجود بالمناسبة. يعني خد كل حاجة من دول عشان تأكد على كلامي. يعني خد كل حاجة من اللي أنا قلتها لك دي، أو اكتب كده بس بشكل واضح كده، مش جي بي تي حتى، اكتب له كده "المشاريع المصرية في أفريقيا" وسيبه يرصلك بقى، هيقعد يكتب كتير.

نفهم الكلام ده حقيقة مهمة، وإن مصر أكدت إن ما عندهاش مشاكل خالص مع إثيوبيا حتى في فكرة المفاعل النووي للأغراض السلمية. وده أمر ما يخضش مصر قوي طالما هي مش هيضرها ولا هيجي على مصلحتها، وطالما إن الهدف ده تنموي. بالعكس يعني، في ظروف تانية مصر ممكن تشوف ده كويس. ولو عندنا حاجة نساعدكم بيها هنساعدكم، ليه لا؟ الخطر الحقيقي بالنسبة لمصر هو موضوع سد النهضة اللي كل يوم والتاني بيتضح أهدافه إنها بشكل واضح بعيد عن التنمية. طب طالما أنت عايز تطلع كهرباء من السد، راح تطلع كهرباء من المفاعل ليه يا راجل يا يا المهم؟ فين التنمية اللي في بلادك يعني؟ ست شهور مش عايز تطلع كهرباء من أو مش عارف معنى أصح، تطلع كهرباء؟ طب يوم التشغيل الواحد ده عليك بكام؟ السيزون اللي بيعدي بتاع الأمطار ده، وملايين ملايين إيه؟ مليارات الأقدام أو المترات المكعبة من الميه دي اللي بتروح مش عارف أستخدمها خالص. مش عيب عليك يا راجل؟

قصة بناء إثيوبيا للمفاعل النووي ده هي إشارة واضحة وصريحة لصحة وصدق الرواية المصرية، واللي بتقول إن إثيوبيا مش هدفها التنمية من سد النهضة، مش هدفها غير الإضرار بمصالح مصر المائية وتهديد أمنها المائي. ولو حبينا يعني نلخص المشهد ده كله، فخلينا نقول إن إثيوبيا دخلت رسميًا في مسار نووي مدني جاد، مش بس تصريحات، لكن بالهيئات والاتفاقات والانخراط في الدعم الفني. وروسيا كونها شريك استراتيجي لمصر في مشروع الضبعة، مش بتناقض نفسها. خصوصًا زي ما أنا قلت لك، مصر ما عندهاش مشكلة إن إثيوبيا يكون عندها مؤسسة نووي. يا عم مش أزمة، ما أنت يمين شمال مش هتعرف تعمل منه حاجة غير الطاقة السلمية، ده لو وصلت لها أصلًا يعني. ولكن ده يأكد لك إن موضوع سد النهضة ده تحديدًا يعني حاجة كده. أصل بص، فكر فيها، إيه اللي يخلي يعني دولة زي إثيوبيا تخش في مشروع تداين بيه نفسها بـ 4 مليار دولار أو أكتر كمان لطوب الأرض؟ واخدين فلوس من الصين ومن أمريكا ومن دول الخليج، وواخدين من مين تاني؟ وسلفين من طوب الأرض عشان يعملوا المشروع ده؟ وفي الآخر كل اللي استفادوه يعني مش هما اللي استفادوه كمان. أظن ناس تانية هما اللي استفادوه. لما حاولوا يفتحوا الحنفية مرة واحدة وغرقوا بيها السودان، وإحنا الحمد لله فلتنا، ويعني بنا نعرف نتعامل مع الموضوع ده لأن إحنا كنا فاهمين ده من بدري وعرفنا نتعامل معاه إزاي. وبالمناسبة، ما أعتقدش دي ممكن تكون آخر مرة. الله أعلم.

ولحد ما نشوف الأساتذة دول ناويين يعملوا إيه تاني أو مبيتين إيه في نيتهم، هيظهر مع الوقت. بفكرك طبعًا تعمل اشتراك في القناة. وبس كده.