Transcription
الأسبوع اللي فات تقريبًا، شهر كامل ما عملتش فيه أي تمارين تأمل. جربت ده كتجربة، يعني أشوف إيه اللي هيحصل لما أبطل التأمل بعد سنتين متواصلة. لاحظت كمية حاجات غريبة اتغيرت.
أول حاجة، بقيت أسكرول أكتر من العادي. أنا ما كنتش بسكرول كتير، لكن لقيت نفسي فجأة أسكرول على الإنستجرام، وأقول: هو أنا إيه اللي فتحني الإنستجرام؟ وألاقي إيدي فتحت يوتيوب عشوائيًا وقعدت أسكرول. دي حاجة ما كانتش بتحصل قبل كده. (استنى نجيب الشاي). ابتديت ألاحظ حاجات كتير زي كده، فهمت إن تركيزي قليل، وطاقتي في اليوم العادي كانت نازلة، دي حاجة ما كانتش موجودة قبل كده.
إيه تاني؟ بقيت أسوأ في التعامل مع الناس، ما بقيتش متواجد قوي في الكلام، ما بقيتش مركز في اللي الناس بتقوله، عايز أنجز وأخلص، مهاراتي الاجتماعية قلت. لاحضت كمان إن التحكم في نفسي قل، زي النهاردة الصبح، رحت أكلت أكل مع إنِّي ما باكلش عادة. [موسيقى] قلّة انضباط بصفة عامة، يعني في عادات بقيت أسكيبها، في أيام المفروض أقرأ فيها، أقول لأ، وأقعد أشوف فيديوهات يوتيوب، حتى لو فيديوهات تعليمية، بضيع وقتي عشان مش عايز أقرأ.
صلاتي، خشوعي فيها قل، ألاقي نفسي نسيت بقول إيه، لازم أرجع أكرر الكلام من الأول، أحيانًا أركع ركعة واحدة وأقوم، أقول: ثواني، ركعتين، وأنا بعمل إيه؟ أحيانًا بنزل، المفروض أقول "سبحان ربي الأعلى"، ألاقي نفسي بقول "سبحان ربي العظيم"، وأمسك نفسي: إيه ده؟ أنا بقول إيه؟ تركيزي وخشوعي في الصلاة قل جدًا. ده أكبر حاجة لاحظتها.
دي بعض الحاجات اللي لاحظتها بعد ما وقفت التأمل شهر. النهاردة أول يوم رجعت فيه للتأمل، وحاسس إني أحسن بـ ١٠٠ مرة حرفيًا. صورت ثلاث فيديوهات، قعدت ساعتين أقرأ، ورجعت صورت فيديوهات تانية. في الساعتين دول عملت تأمل، وحسيت بالفرق، حسيت بالتركيز والهدوء والتواجد في اللحظة. ده بيبين أهمية التأمل.
ممكن يكون سبب إدمانك للبورن، أو سكرولك المستمر، أو لعب الفيديو جيمز، هو إنك مش بتعمل تأمل. التزم بالتأمل. الفيديو ده للتوضيح، مش هطول. دي بعض الحاجات اللي لاحظتها من ساعه ما بطلت التأمل، لأن التأمل بينمي التواجد، والانضباط، والصحة النفسية عامةً. لو مش بتعمل تأمل، لازم تبتدي دلوقت.
أنا بستخدم تطبيق "مديتو" (Medito) بسيط جدًا، مجاني، تختار وقت التأمل (٥ دقائق، ١٠ دقائق) وتركز على نفسك. مش عبادة، ولا تأمل، مجرد تركيز على نفسك، تصفية الأفكار، وتواجد في اللحظة. معناها إنك مش سرحان، بتعلم دماغك ما يكونش سرحان، تستمتع بالحياة أكتر، تركيزك وطاقتك بتزيد. الميديتيشن علاج للسرحان (Mindfulness) و(ADHD) اللي زاد من كتر السكرولينج. الخُشوع في الصلاة، الانضباط، قوة الإرادة، كلها حاجات قلت من ساعه ما بطلت التأمل. أتمنى يكون الفيديو ده سبب يرجعك للتأمل. النهاردة أول يوم أرجع فيه للتأمل بعد شهر، ودي عادة مش هبطلها.