Transcription
لو قلت لك أن الموبايل ده بيدعم ببجي الـ 120 فريم، ومش بس كده، ده كمان بيجي بشاشة مبهرة، وبطارية بحجم 6000 ملي أمبير، وشاحن بقدرة 90 وات. والاهم من ده بقى هو التسعير اللي بيجي بيه، واللي يعتبر صفقة قوية جدا. ولكن، زي أي موبايل، هيكون فيه بعض التنازلات وكم عيب كده، هنتكلم عليهم في مراجعتنا النهاردة للبوكو اكس 7 برو.
البوكو اكس 7 برو يعتبر ترقية للبوكو اكس 6 برو، ودائما الاصدار الجديد بيكون فيه تحديث في بعض مميزات. ولكن البوكو اكس 7 برو جاي بتغيير 180 درجة، مش مجرد ترقية من اصدار للثاني، لأنك هتعتبر ماسك موبايل في فئة جديدة بعيدة عن فئة الـ X. في الفيديو ده هتعرف كل شيء عن البوكو اكس 7 برو، وان كان مناسب يكون موبايلك الأساسي في 2025 ولا لا. خلينا كده بقى نروح لـ آنبوكسنج للبوكو اكس 7 برو.
أول ما تفتح العلبة، هتلاقي دبوس الشريحة مع الكتيبات الورقية اللي بتكون متوفرة داخل العلبة، وجراب من الجلد، وبالنسبة لي أفضل بكثير من الجراب الشفاف اللي بيتغير لونه مع الوقت. الشاحن المتوفر داخل العلبة هنا بقدرة 90 وات، ودي حاجة مميزة، وكيبل الشحن هنا من نوع التايب سي. وأخيرا، البوكو اكس 7 برو. دي كانت المحتويات الموجودة داخل العلبة. وخلينا بقى نروح للتصميم.
لو هنتكلم عن التصميم بشكل عام، هتلاقي تغير كبير جدا على الاصدارات اللي كانت موجودة قبل كده. النسخة اللي معايا دي من اللون الأسود، وبتيجي بتدرج لوني ما بين الأسود والرمادي، أو تقدر تقول عليه جزء لامع وجزء غير لامع. الموبايل مقسوم ما بين لونين، مش مجرد تدرج لوني متداخل، وبصراحة التصميم ده مختلف وعاجبني شخصيا. ولكن، للاسف، النسخة اللي باللون الأسود كانت بتبصم، بعكس نسخ الالوان الثانية، وده اللي بنصحك بيه إنك تشتري يا اما النسخة اللي باللون الأصفر اللي بتيجي بتدرج مع اللون الأسود، أو النسخة اللي بتيجي باللون الأخضر، هيكونوا أفضل من النسخة اللي باللون الأسود، ومش هتواجه معاهم مشكلة التبصيم. حتى لو معاك النسخة اللي بتيجي باللون الأسود، الجراب الموجود هيحل لك النقطة دي. الموبايل هنا بيجي بخامات من البلاستيك بالكامل، ولكن إطار الكاميرات بتيجي من المعدن، وفي نسخة ثانية متوفرة من الجلد اللي هي بتكون باللون الأصفر. مسكة الموبايل في الإيد كويسة جدا، مش هتواجه معها أي مشاكل. سمك الموبايل هنا 8.3 ملم، وده سمك محترم جدا، خصوصا مع بطارية بحجم 6000 ملي أمبير، وكمان في نسخة ثانية موجهة للهند بتكون بحجم 6550 ملي أمبير. وزن الموبايل هنا بيكون في حدود الـ 185 جرام لـ 199 جرام، وده وزن كويس جدا بالنسبة للبطارية بالحجم ده، فما تقلقش، مش هتواجه هنا أي مشكلة في وزن أو ماسكة الموبايل. ما عنديش أي مشكلة في تصميم الموبايل بشكل عام، بالنسبة لي تصميم مميز، ونقطة التصميم دي بترجع لذوق كل واحد. أكيد المميز في الموبايل ده أنه بيجي بطبقة حماية جوريلا جلاس 7، ودي أقوى مرتين لمقاومة السقوط عن جوريلا جلاس 5، وكمان أقوى مرتين لمقاومة الخدوش بالنسبة لجوريلا جلاس 5، ودي بالنسبة لي مرضية جدا بالنسبة لحماية الشاشة، ولكن برضه لازم تحافظ على الشاشة على قد ما تقدر.
في الأسفل هنلاقي هنا منفذ السيم كارد من نوع نانو سيم، ومنفذ تايب سي 2.0، ولكن كنت أتمنى إن احنا نشوف بقى سرعات نقل أعلى زي مثلا 3.1، مع ميكروفون رئيسي، ومنفذ للسماعات. في الجانب الأيمن بيتوفر زر باور مع زر خفض ورفع الصوت. وفي الجانب الأعلى هنلاقي ميكروفون عازل للضوضاء، وسماعة ثانوية، وكمان منفذ الـ IR بلاستر. ولكن بقى المبهر في البوكو اكس 7 برو هي الشاشة. الموبايل هنا بيجي بشاشة مسطحة بحجم 6.67 إنش من نوع الـ LTPS AMOLED، بدقة 1.5K، تدعم 68 مليار لون، وبمعدل تحديث 120 هرتز، ونسبه سطوع قوية بتوصل لـ 3200 نيتس. كمان بتدعم حساسية لمس بمقدار 480 هرتز، وتقنية PWM Dimming اللي بتحمي عين من الأشعة الضارة، بتردد 1920 هرتز. وبما إني قلت لك إن الشاشة دي مبهرة، لأن ما فيش حاجة أنت محتاجها في أي شاشة مش موجودة، زي تقنية الـ HDR10+، وتقنية دولبي فيجن، وكمان تقنية Pro HDR Display اللي بتديك أقصى سطوع محتاجة تحت أشعة الشمس، كمان بتحسن بين التباين بين الألوان الفاتحة والألوان الغامقة، علشان تديك تفاصيل أكثر دقة في الصور والفيديوهات. أما بخصوص البصمة، فبتيجي مدمجة في الشاشة، وأداؤها سريع وممتاز جدا. وطبعا بالنسبة للحماية، فاحنا اتكلمنا عليها في بداية الفيديو.
ولكن بقى اللي فارق كتير جدا في البوكو اكس 7 برو هو المعالج، الـ Dimensity 8400، بتقنية 4 نانوميتر، وعلى حد علمي ده أول هاتف في العالم بيجي بالمعالج ده، وبنسخة من الرام 8 جيجا و12 جيجا بايت، مع مساحة تخزين بتوصل لـ 512 جيجا بايت. وكمان الموبايل فيه ميزة إنك تقدر تزود حجم الرام لـ 12 جيجا بايت إضافية، وتعتبر الميزة دي مهمة جدا دلوقتي. فلو أنت جايب نسخة الـ 12 جيجا بايت رام، وزودت الـ 12 جيجا بايت رام إضافية، فأنت كده معاك 24 جيجا بايت رام، فهيديك أداء خرافي. بالنسبة للبطارية، ف النسخة العالمية بتيجي بحجم 6000 ملي أمبير، وشاحن بقدرة 90 وات، ولكن في نسخة موجهة فقط للهند بتيجي ببطارية بحجم 6550 ملي أمبير. أداء البطارية هنا يعتبر مميز، ومش هتواجه معاها أي مشاكل، وهتقدر تشحن الموبايل من صفر لـ 100% في حدود الـ 42 دقيقة لـ 45 دقيقة تقريبا. ذاكرة الرام في البوكو اكس 7 برو هنا من نوع LPDDR5X، وذاكرة التخزين من نوع UFS 4.0، وده معناه سرعات القراءة والكتابة في الموبايل ده سريعة جدا.
أما بقى بالنسبة لتجربة الموبايل ده في الألعاب، فالموبايل هنا حقق 1600 نقطة في النواة الواحدة على Geekbench، وفي النواة المتعددة حقق أعلى من 6000 نقطة، وده شيء مميز جدا، وبالنتيجة دي هو بيقرب شوية من معالجات كوالكوم الرائدة، وده بالنسبة لي شيء كويس جدا بالنسبة للفئة السعرية بتاعته. ومش بس كده، ده كمان محقق أكثر من مليون ونص نقطة على Antutu. فأنت هنا هتلعب معظم الألعاب على أعلى إعدادات، وطبعا هنا ببجي هتلعبها على 120 فريم مرتاح جدا. وبالمناسبة، موضوع الـ lag اللي بيحصل في الفريمات تقريبا مش هتلاقيه موجود، لأن غرفة التبريد هنا جايه بنظام متطور، وهو Liquid Cool Technology 4.0، وهو الجيل الرابع من تقنية التبريد السائل باستخدام أنابيب حرارية مملوءة بسائل بيمتص الحرارة من المعالج، وبعد كده بيتبخر وبينقل لمنطقة الثانية للتبريد، وده طبعا بيساعد على تقليل حرارة الجهاز بسرعة. وكمان بيتوفر على نظام تبريد خاص بالبوكو، وهو Poco 3D Ice Loop System، وده نظام تبريد جديد من البوكو بيعمل بتصميم ثلاثي الأبعاد لتوزيع الحرارة بشكل أفضل، وده بيساعد على منع تراكمها في جزء معين من الهاتف. وأخيرا بقى، البوكو اكس 7 برو بيتوفر على مضخة حرارية كبيرة بمساحة 5000 ملم مربع، وده طبعا بيساعد على توزيع الحرارة بسرعة أكبر. حبيت أوضح لك حاجات تكنيكال شوية، ولكن البوكو اكس 7 برو فعلا أفضل موبايل هيديك أفضل تجربة للجيمنج، ولعبة ببجي في الفئة المتوسطة، ولاي جيمر بيدور على موبايل قوي يديله 120 فريم، أرشح لك البوكو اكس 7 برو.
أما بقى بخصوص الملتي ميديا والوسائط المتعددة، فأنت هتاخد هنا تجربة قوية. شاشة الـ LTPS AMOLED بحواف رفيعة جدا هتديك رؤية مميزة، وكمان تقنية الـ HDR10 ودولبي فيجن، اللي من خلالهم هتستمتع بمنصات الستريمنج، وبالمناسبة نتفليكس بتدعم بدون أي مشاكل. وكمان الموبايل بتوفر على سماعات ستيريو، ومن أفضل السماعات الموجودة اللي هتديك تجربة صوت قوية في الفئة دي، والموبايل هنا بيدعم Dolby Atmos. لو اتكلمنا بقى على المستشعرات اللي بيدعمها البوكو اكس 7 برو، أول حاجة بيتوفر على قارئ للبصمة مدمجة في الشاشة، وأداؤها ممتاز وسريع جدا، وكمان الموبايل بيدعم الـ Face Unlock. أما بخصوص الاتصالات، الموبايل هنا بيدعم الـ Wi-Fi 6، وتقنية الـ 5G، وبلوتوث 5.3، وخاصية الـ NFC اللي بقت مهمة حاليا، وكمان خاصية الـ IR Blaster اللي من خلالها بتقدر تتحكم في أجهزتك المنزلية. والموبايل كمان بيتوفر على جميع المستشعرات الموجودة، مستشعر للتقارب، وكمان بيدعم الـ Gyroscope.
أما بقى بخصوص الواجهة ونظام التشغيل، الموبايل هنا بيجي بواجهة MIUI 15، والمميز هنا إن الموبايل بيدعم ثلاث سنين من تحديثات الأندرويد، وأربع سنين من تحديثات الأمان. بالنسبة للناس بتقلق شوية من واجهة شاومي، الأداء هنا كان مستقر، وما فيش أي تقطيعات أو جليتشات، الواجهة كانت سلسة، والتنقل بين التطبيقات كان سريع وحقيقي. أداء الواجهة هنا مختلف عن أداء موبايلات الفئة الاقتصادية من شاومي، فما تقلقش من موضوع السوفت وير على البوكو اكس 7 برو. ولكن المختلف في الموبايل ده هي مميزات الذكاء الاصطناعي اللي بيدعمها، علشان الموبايل ده يديك كده كومبو محترم في الإمكانيات، زي مثلا ميزة AI Translate اللي من خلالها بتترجم أي نص موجود، وبتدعم من ضمنهم اللغة العربية، أو ميزة AI Summary اللي بتترجم لك، وبتلخص. مميزات قوية لتحرير الصورة، زي ميزة AI Image Expansion، ودي بتقدر من خلالها توسع أو تكبر حجم الصورة من خلال توليد أجزاء جديدة ليها، أو ميزة AI Eraser Pro اللي من خلالها بتحذف أي حاجة مش عاوزها داخل الصورة. وطبعا الموبايل بيتوفر على مميزات ثانية بالذكاء الاصطناعي، ولكن أنا هسيبك تكتشفها بنفسك.
نروح بقى لموضوع الكاميرات. الموبايل هنا بيجي بكاميرا أمامية بدقة 20 ميجا بكسل، بفتحة عدسة F/2.2، وبتقدر تصور فيديو 1080p لحد 30 إطار، وللاسف الكاميرا الأمامية مش بتدعم تصوير فيديو 4K. وكاميرتين في الخلف، كاميرا أساسية بدقة 50 ميجا بكسل، بمستشعر من سوني، وهو الـ Sony IMX766، وبفتحة عدسة F/1.5، وبكاميرا Ultra Wide بدقة 8 ميجا بكسل، وبفتحة عدسة F/2.2. والموبايل هنا بقى بيقدر يصور فيديو 4K لحد 60 إطار من خلال الكاميرا الأساسية. تجربة الكاميرات هنا تقدر تقول عليها متوسطة، اعتمادك كله هيكون على الكاميرا الأساسية اللي هتديك صور ممتازة في النهار والاضاءات العالية، دايناميك رينج كويس، ألوان طبيعية، ولكن أداء الكاميرا بيقل في الاضاءات الضعيفة أو الداخلية، مش بتكون بنفس القوة اللي بتديها لك في الاضاءات العالية. أما عدسة الـ Ultra Wide كان أداؤها مقبول إلى حد ما، ومش هتقدر تعتمد عليها بشكل كبير، هي والكاميرا الأمامية في الاضاءات العادية. ولكن الموبايل من حيث التطور بالنسبة للبوكو اكس 6 برو، فهو هيديك تجربة تصوير أفضل بالتأكيد. في المجمل، الموبايل هيديك تجربة تصوير كويسة، ولكن مش هتقدر تعتمد عليها بشكل كبير لو عاوز موبايل للتصوير بشكل خاص. ولكن كنت أتمنى برضه إن الموبايل ده يتوفر على عدسة للزوم. تجربة الـ 4K في الموبايل كانت ممتازة الحقيقة، واعتمد عليها بشكل كبير. ولكن أنت في المجمل بتديني إمكانيات محترمة في كل شيء، وبتقلل لي شوية في تجربة الكاميرات، وده بالنسبة لي أنا كمستخدم بيرضيني، لأن اللي بيهمني إن الموبايل يكون متوازن في الإمكانيات، أفضل ما تديني ميزة قوية جدا على حساب باقي المواصفات.
كمان بقى من ضمن الترقيات اللي حصلت في البوكو اكس 7 برو هو دعمه للمعمارية الـ IP68 ضد الماء والغبار بشكل كامل. بصراحة، البوكو اكس 7 برو فاجئني في حاجات كتيرة، وتطور كبير عن الاصدارات اللي فاتت، سواء في التصميم المميز والمختلف، الشاشة اللي بتيجي بمميزات قوية، والأداء والمعالج الخرافي في الألعاب، ودعم ببجي الـ 120 فريم، كمان البطارية الـ 6000 ملي أمبير اللي هتقعد معاك اليوم مرتاح جدا، والشاحن المميز 90 وات، وتجربة الكاميرات اللي تقدر تقول عليها متوازنة في ظل الإمكانيات اللي بيجي بيها الموبايل، ودعمه كمان لأقوى معمارية ضد الماء والغبار، ومميزات الذكاء الاصطناعي اللي بيدعمها الموبايل. صفقة قوية لأي حد عاوز موبايل جيمنج، وللناس اللي بتدور على موبايل متوازن في الإمكانيات، البوكو اكس 7 برو هيديك التجربة دي. ولكن بالنسبة للناس اللي عاوزة موبايل للتصوير بشكل خاص، فالأفضل تشوف بدائل ثانية. ولكن بقى البوكو اكس 7 برو أفضل صفقة حاليا ممكن تشتريها، خصوصا إن سعر الموبايل في حدود الـ 350 دولار لنسخة الـ 12 جيجا رام مع مساحة تخزين 512.
أما بخصوص سعر الموبايل في السوق المصري، فالموبايل متوفر حاليا في حدود الـ 20500 لـ 24000 جنيه، ولكن لازم تتأكد الأول قبل ما تشتري إن الموبايل معفي من الضرائب من المكان اللي هتشتريه منه، دي بقت نقطة مهمة جدا قبل الشراء. أما بالنسبة لسعر الموبايل في السعودية، هو 1250 ريال، وفي الإمارات في حدود الـ 1260 درهم. دي كانت مراجعتنا للموبايل البوكو اكس 7 برو. أتمنى أكون قدرت أفيدك في فيديو النهاردة، فلو عجبك الفيديو ما تنساش تدعمني باللايك، واشتراك في القناة، ولو عاوز مراجعة لموبايل معين اكتب لي ده في الكومنتات. كان معكم أحمد من قناة Mort X، وأشوفكم على خير في الفيديو الجاي. سلام.