ازاي تتعلم تسويق الكتروني صح ؟ | المحاضرة #1| محمد الفقي

في سؤال مهم جدا بيجي في بال كل الناس اللي شغاله في مجال التسويق الإلكتروني أو التسويق بشكل عام، أول ما بيلاقوا مجال معين، أياً كان نوع المجال، سواء بقى عقارات، سيارات، عيادات، أياً كان نوع المجال، وبيلاقوا فيه شركة معينة أو صاحب مهنة معينة ناجح جداً في إعلاناته، إعلاناته مكسرة الدنيا وعنده ستايل معين كده في الإعلانات، فأول حاجة بتيجي على بالهم هو: "عملوها إزاي؟" "إيه هي المعادلة اللي عملوها علشان ينجحوا جداً في إعلاناتهم بهذا الشكل؟"

وعشان كده، أو انطلاقاً من هذا المنظور، قررنا إننا نعمل سلسلة جديدة اسمها "سلسلة عملوها إزاي؟" هنناقش فيها كل مجال على حدة، والمجال ده إزاي نقدر ننجح فيه، سواء أنت شغال في هذا المجال، أو صاحب شركة في هذا المجال، أو حتى مسوق إلكتروني وجالك عميل من هذا المجال.

وده طبعاً زمان أنا نزلت لكم على المنتدى، أنا مش هشتغل فيه لوحدي، لأن أنا مش هصور لوحدي وأعمل كل حاجة لوحدي، فمحتاج مساعدتكم إنكم تنزلوا لي في الكومنتات هنا كل المجالات اللي أنتم حابين إننا نتكلم عليها في الفترة الجاية، وهنتناقش كده ونعمل لهم حلقات منفصلة، كل مجال لوحده.

وعشان ما نضيعش وقتنا ونخلي وقت الحلقة طويل جداً، فخلينا نقول نخش في صلب الحلقة على طول. وحلقة النهارده هتتكلم على الأساسيات اللي لو أنا دلوقتي شغال في مجال التسويق، سواء التسويق الإلكتروني أو التسويق التقليدي أو التسويق بشكل عام، إيه هي الأساسيات أو النقاط الركيزة الأساسية اللي أنا ألقي نظرة عليها وإني أتابعها كخطوات قبل ما أخش أي مجال، أياً كان نوع المجال، حتى لو أنا ما عنديش أي خبرة فيه.

في خطوات أساسية كده بنمشي عليها الناس اللي هي بتقعد تهول الموضوع على السوشيال ميديا علشان تبين قد إيه هم واو جداً، وقد إيه هم شغالين بقى لهم سنين في هذا المجال وعندهم خبرة طويلة جداً. خليني أقول لكم إن في خطوات معينة دي ثابتة، حتى لو واحد بقى له 30 سنة شغال في هذا المجال. طبعاً أكيد التسويق الإلكتروني ما بقالوش 30 سنة، بس خليني أقول لو واحد بقى له فترة طويلة جداً من أول ظهور التسويق الإلكتروني، مهما كانت خبرته، برضه هيتبع نفس الخطوات دي.

ففي خطوات أساسية بتكون مشتركة ما بين كل المجالات، وكل مجال بقى من دول ممكن نزود عليهم خطوة أو اتنين، هنتكلم طبعاً فيهم بالتفصيل في الحلقات الجاية إن شاء الله، ولكن ده بشكل عام اللي أنت هتعمله أول ما تخش أي مجال جديد.

وخلينا كده نتكلم بالتفصيل عن الأساسيات دي ونقول إن هي عبارة عن أربع خطوات أو أربع نقاط أساسية. طبعاً أكيد كلكم أو كل الناس اللي دخلت في مجال التسويق سمعتها، ألا وهو "The Four Ps". إيه يا محمد دي؟ وبعدين معلش يا محمد، يعني خلينا نتكلم كده بالعربي، بلاش كل حاجة نقعد نقولها بالإنجليزية ونشتت نفسنا ونلاقي نفسنا مش فاهمين أي حاجة خالص.

فخليني أقول لكم، اوكي، أنا هتكلم بالعربي معاكم، كل حاجة، ولكن في مصطلحات هي معروفة أصلاً في مجال التسويق باللغة الإنجليزية، فأنا هقولها عشان تكون عندك خبرة عنها باللغة الإنجليزية وهترجمها لك باللغة العربية، فبالتالي عشان تكون أنت كده "ماسك العصاية من النص" زي ما بيقولوا كده.

فـ "The Four Ps" دي عبارة عن اختصار لأربع نقاط أساسية، ألا وهما: Product، Price، Place، Promotion. وترجمتهم بالعربي، ألا وهو: المنتج، السعر، المكانة بتاعة البراند بتاعتك، والإعلانات أو اللي هو الدعاية. يعني مهما كان المجال بتاعك، سواء كبير أو صغير، بيتبع الأربع أساسيات دول.

هنتكلم عن كل نقطة من دول خطوة خطوة، ونقول هم عبارة عن إيه بالظبط. ونبدأ بأول خطوة، والترتيب ده هو الترتيب الصحيح. خليك ماشي معايا، لو أنت معاك قلم وورقة، يا ريت نرجع تاني كده للقلم والورقة وتركز معايا شوية.

خلينا نقول كده أول نقطة معانا، ألا وهي Product. طبعاً واضح جداً من اسمه إن هو المنتج. والمنتج فيه برضه... محمد، لا ثواني بقى كده، ركز معايا وخليك مبسط لنا المعلومة. طيب، بص بقى يا سيدي، ركز معايا كويس جداً. أول حاجة، خليني أقول لكم إن الـ Product عبارة عن "What's?". طيب، واحدة واحدة كده. الـ "What" يعني "ماذا؟". ماذا يعني إيه؟ إيه هو المنتج ده؟ تمام؟ إيه هو المنتج؟ لازم أدرس المنتج، هو عبارة عن إيه؟ حلو كده؟ هو مين؟ مين اللي بيحتاجه؟ مين اللي بيحتاجه؟ يعني أنا هدرس العميل، مين هو اللي بيحتاج هذا المنتج؟ تمام؟ فين بيدور عليه؟ يعني العميل ده لما بيجي يحتاج هذا المنتج، بيدور عليه فين أو بيشتريه منين؟ تمام؟ بيشتري هذا المنتج، أو إمتى بيحتاج هذا المنتج؟ فـ الـ Four Ps لو أنت درستهم في نقطة، هتكون لميت كل المعلومات. الموضوع بسيط جداً. قلم وورقة، أربع نقاط أساسية اللي إحنا اتكلمنا عليهم، واللي هم الـ Four Ps. هنقول النقطة الأساسية الأولى، اللي هي الـ Product، جواها أربع نقاط فرعية. الأربع نقاط الفرعية دول هو عبارة عن إيه المنتج؟ مين اللي بيحتاجه؟ إمتى بيحتاج هذا المنتج؟ وفين بالظبط لما بيجي يدور عليه بيروح يدور عليه فين؟ طبعاً الترتيب بتاع النقاط الفرعية دي ممكن ترتبها براحتك أنت خالص، ولكن الترتيب الصحيح اللي هو تعرف المنتج بالظبط هو عبارة عن إيه، مين اللي بيحتاجه، فين بقى وإمتى دول ممكن يا إما ده يجي الأول يا إما ده يجي الأول، ما فيش فيه مشكلة خالص، ولكن دول النقاط اللازم تكون عارفهم كويس جداً.

تيجي بقى النقطة التانية معانا في الترتيب الصحيح. محمد، ثانية واحدة، إحنا كنا سمعنا الناس قبل كده بتتكلم بتقول لك إن قبل الـ Price، مكانة البراند نفسه قبل موضوع الـ Price. خليني أقول لك، ثانية واحدة كده، دراسة التسويق الصحيح بيقول لك إن الـ Price الأول وبعدين الـ Place. هتقول لي طب فهمني النقطة دي؟ هقول لك ركز معايا كويس.

إن أنت طرحت النقطة دي، خليني أركز إيه مع بعض شوية. لما أنت النهارده بتحدد السعر، بتعرف السعر عبارة عن إيه؟ هل أنت هتبيعها بالغالي ولا تبيع بالرخيص؟ يعني أنت النهارده عايز تبقى إيه بالظبط؟ عايز تبيع بسعر غالي جداً، سعر غالي جداً، وتبان قدام الناس إن أنت سعرك عالي، وقدام الكواليتي بتاعتك إن أنت برضه كواليتي عالي، والكلام ده كله هيختلف تماماً على إنك أنت تبقى سعرك قليل وكواليتي بتاعتك قليلة، صح كده؟

طيب، ده إيه علاقته بالـ Place بقى؟ بمنتهى البساطة، أنا النهارده بمنتهى البساطة، لو أنا جيت مثلاً مسكت أوتيلات، الأوتيل أو الفندق. الفندق النهارده في فندق سعر الليلة فيه بـ 100 درهم، في فندق تاني سعر الليلة فيه بـ 2000 درهم. بمنتهى البساطة، أنا لو عرفت النهارده إن أنا السعر الفندق بتاعي 100 درهم، هقدر أطلع المنافسين بتوعي اللي في نفس الرينج بتاعي، تمام كده؟ اللي هو بقى بيبيع بـ 200 وبيبيع بـ 150 بيبيع بـ 80 والكلام ده كله، وأبدأ أعمل الـ Place بتاعي، أقدر أحدد الـ Place بتاعي فين بالظبط على الليستة بتاعة المنافسين وأقدر أنافس معاهم.

أما لو أنا حطيت الـ Place الأول، الشيراتون بقى ومش عارف إيه والكلام ده كله، إيه اللي هيحصل؟ النهارده لما ألاقي الفور سيزون بيعمل بـ 2000 الليلة، والشيراتون بيعمل بـ 2500 الليلة، وهكذا، وأنا أصلاً بعمله بـ 100، هحس إن أنا واو، يعني أنا مكاني كويس جداً وأنا الأوفر بتاعي كويس جداً، ولكن هنقول نسبة وتناسب، يعني النهارده أنا لما أجي أنافسهم، لا، ما فيش وجه مقارنة، لأن ده شيراتون وده أنا. فبالتالي لازم الأول أعرف أنا سعر كام، ببيع بكام، عشان أعرف أطلع المنافسين بتوعي اللي في السوق اللي بنفس الأسعار بتاعتي.

فنيجي هنا مرحلة تاني خطوة هي الـ Price أو السعر. وده هو الترتيب الصحيح. فإحنا نعرف النهارده سعرنا كام. يعني أنا النهارده لما يجي عميل بيقول لي والله أنا ببيع عقارات، هقول له سعر العقارات بتاعتك كام بالظبط؟ لما يجي يقول لي سعر العقارات بتاعتي مثلاً والله مليون ومليون وخمسمية ومليون و300 والكلام ده كله، هكون عارف مين هم المنافسين بتوعي في الخطوة اللي بعديها، ألا وهو الـ Place، وأقدر أحط الـ Place بتاعي أو بتاع المنتج بتاعي أو الخدمة أو العميل نفسه. تمام كده؟

فالـ Price هبدأ إن أنا، أو السعر، هبدأ إن أنا أدرسه كويس جداً، هو السعر غالي ولا قليل، مقارنة بما بين السوق، مقارنة كمان ما بين جودة المنتج نفسه.

وتيجي الخطوة التالتة بقى دلوقتي في الترتيب الصحيح، ألا وهو الـ Place، أو مكانة البراند أو الخدمة أو المنتج. وأبدأ أشوف طبعاً دلوقتي أطلع ليستة كلها وأبدأ أحط الـ Place بتاعي أو العميل بتاعي فين بالظبط في الليستة دي عشان أقدر أنافس وأنا داخل السوق. تمام كده؟

بعد ما أنا حطيت الليستة وعرفت إن أنا والله مكاني في الترتيب الرابع أو الخامس. طبعاً أنا هعرف منين إن أنا ترتيب رابع أو خامس؟ بمنتهى البساطة، من الخدمات والمنتجات اللي بيقدمها المنافس بتاعك. لو هو بيقدم حاجات أكبر بكتير منك وسعره أفضل ومكانة أفضل وعنده سابقة أعمال أكتر ومثلاً خبرة يعني سنين قبليك بكتير، طبعاً أكيد هو هيكون قبلك. يعني في نقاط كده أساسية: عدد الخدمات اللي بيقدمها المنافس بتاعك، سعره، بتاعه، مكانة فين في السوق، يعني مكانه فين في المدينة اللي أنت فيها، هل هو ليه فرع واحد ولا أكتر من فرع؟ هل هو ليه فرع وأنت ملكش فرع؟ فكل الكلام ده كله بيبقى عامل أساسي في ترتيب الـ Place بتاعك. توزيعه على الخريطة، عنده كام فرع، والكلام ده كله، سنوات خبرته، هل هو قبلك بقى له فترة طويلة جداً ولا لسه جديد؟ وفي نفس الوقت هل هو عنده عملاء كتير وعنده سابقة أعمال كتير ولا لا. تمام كده؟

حطيت دول، عرفت إن أنت فين بالظبط. وطبعاً لازم يعني هنقول مش لازم تكون يعني 100% أو 100% صحيح الـ Place بتاعك، حطه بالشبه. يعني النهارده لما تيجي مثلاً تقول لي والله أنا في المرتبة الخامسة، وأنت فعلياً في السابعة، لكن ما تقوليش أنا في المرتبة التانية وأنت أصلاً في المرتبة التاسعة. يعني مرتبة أو اتنين أو تلاتة عادي، لكن اللي هو بيحط كده بالشبه كده وخلاص، يعني أنا لا أقوى واحد في السوق، لا مش بتيجي.

حددت النهارده الـ Place بتاعي، أنا في المرتبة فين بالظبط، هبدأ بقى هنا هكون عارف مين هو المنافس الصريح بتاعي اللي هو قدامي بقى، ومن المنافس اللي هو يعني بعيد شوية عني. المنافس الصريح بتاعي هو الأعلى مني بخطوة أو خطوتين. يعني أنا في المستوى الرابع، فأنا بنافس المستوى الثالث والثاني. مش هتنافس الأول دلوقتي، لكن الأسهل بالنسبة لي التاني والتالت. حلو كده؟

هبدأ بقى أخش على المستوى أو هنقول الخطوة الرابعة في الـ Four Ps، ألا وهو الـ Promotion، أو الدعاية أو الإعلان. طب ليه نقطة الـ Promotion أو الإعلان جات آخر حاجة أصلاً في القايمة دي؟ مع إنها ممكن تيجي الأول. لأن إحنا دلوقتي أول ما نخش أي سوق عايزين نعمل إعلانات ونكسر الدنيا. هقول لك لا، لأن النهارده لازم تكون عارف أنت مين، بتنافس مين، سعرك إيه، وإيه هو المنتج بتاعك، عشان تعرف تعمل له التسويق الصحيح.

هل أنت هتسوق بالمحتوى؟ أنت هتتكلم عن مميزات المنتج وقد إيه هو مفيد والكلام ده كله، والتارجت الناس بس، أو تستهدف الناس بهذا الشكل؟ هل أنت تستهدف، هنقول مثلاً، نعمل دعاية بأن فيه عندنا، وفيه عندنا عروض أو تخفيضات أو الكلام ده كله؟ ده كله بيتبع على إيه؟ بيتبع للخطوات الأولى.

النهارده لما تكون عارف سعرك، هو عارف إن أنت ممكن تعمل مثلاً تخفيضات والكلام ده كله، هيكون في خطوة الـ Promotion سهلة عليك تقول والله أنا هنزل بإعلان عن... لكن لما تيجي تبدأ من الآخر بقى، اللي هو أول خطوة لك بقى إن أنت تعمل إعلان على طول، بمنتهى البساطة ممكن تقول والله للعميل: "أنا عايزين نعمل بقى دلوقتي بما إننا داخلين على النص التاني من رمضان، فإحنا عايزين نعمل بقى تخفيضات وخصومات والكلام ده كله علشان العيد". والكلام ده هيجي العميل يقول لك: "لا والله، أنا مش متعود أعمل تخفيضات، لأن أنا السعر بتاعي كويس وثابت والكلام ده كله، أنا ما بعملش تخفيضات". هتلاقي نفسك داخل في حوار.

وبعدين طب إيه فكرة الإعلان التاني اللي أنا عامله له؟ إن أنا أقعد بقى ندور على أفكار إعلانات؟ طب ما تدرس الأول المنتج، ادرس الأول الـ Place بتاع العميل بتاعك، ادرس الأول الـ Product نفسه، ادرس الأول السعر بتاعه هو عبارة عن إيه، وشوف بقية الأسعار الموجودة في السوق عبارة عن إيه، وانطلق من هذا الأساس.

فبالتالي، لما تيجي تسوق لأي منتج أو أي خدمة، أول حاجة لازم تعرفها هو الـ Four Ps، زي ما إحنا قلنا قبل كده، عبارة عن Product، Price، Place، Promotion. وبعد كده تبدأ على طول بعدها في الخطوة بتاعة الإعلان نفسه، أو خطوات الإعلانات، أو خطوات الاستراتيجي، أو استراتيجيات الإعلانات اللي هننزل بها السوق، سواء على الديجيتال أو حتى على العام.

كده لو هو تسويق تقليدي. فاتمنى يكون الفيديو ده ما كانش طويل جداً جداً عليكم، ويكون وضح لكم نقاط الأساسية في مجال التسويق. وإن شاء الله في المحاضرات الجاية، أو هنقول الحلقات الجاية من "سلسلة عملوها إزاي؟" طبعاً هاخد من التعليقات اللي موجودة تحت على الكومنتات، التعليقات بتاعتكم اللي هي خاصة بالمجالات.

ممكن نمسك مجال مجال كده، ممكن ننزل على، ننزل على المنتدى، هنقول استفتاء كده سريع: إيه هي المجالات اللي أنتم عايزينها؟ هنقول والله هي عقارات، كذا، سيارات، عيادات، مطاعم، وتبدأوا. أكتر حد هيصوت، أو أكتر تصويت هيجي على مجال محدد، هيكون هو ده الحلقة اللي بعديها، هو ده موضوع الحلقة اللي بعديها.

السلسلة دي هتكمل معانا لحد ما إحنا نغطي جميع المجالات على بالكم، أو جميع المجالات اللي هي من وجهة نظرك وأنت محتاجينها. يعني أنا معلش يعني، ما يكونش أنتم كلكم شغالين في العقارات وأنا أجيب لكم المطاعم. لا، يعني ده هيأثر على حاجتين: هيأثر أول حاجة على وقتكم، لأنكم أنتم مش هتتفرجوا على الفيديو. تاني حاجة، هيأثر على القناة، إن بقى لها فترة أصلاً ما نزلش فيديوهات، وبالتالي أكيد مش هتكملوا فرجة على الفيديو. فالرجوع يعني، أتمنى إن هو يكون الرجوع قوي جداً وبمساعدتكم طبعاً أكيد في انتشار هذا الفيديو وشير هذا الفيديو عشان تساعدوا بناس آخرين، وكمان تساعدوا به القناة، لأن طبعاً انتشار الفيديو بيساعد جداً.

وطبعاً اللايك بتاعك الجميل وكومنتك اللطيف ده بيساعد أكتر على انتشار الفيديو سريعاً في أول دقائق من يعني مشاهدتك للفيديوهات بتاعة هذه القناة. وبس كده، أتمنى تكون حلقة النهارده كانت حلقة خفيفة على قلبكم، وأشوفكم على خير إن شاء الله في الحلقة الجاية. وطبعاً ما تنساش اللايك بتاعك الجميل وكومنت وشاهد معايا حد من الأصدقاء. إن شاء الله من برنامجكم "عملوها إزاي؟" كان معكم محمد الفقي. سلام.