لا تحزن... تشعر أن الجميع سبقك وعمرك يضيع؟ اسمع هذه الرسالة | د. كريم علي

صباح الخير والنور والسرور. يعني التريد حافيًا ليه كثير من والشمس طبعًا من غير الفطار ليه فوايد كتيرة. بيقلل التهابات الجسم، ويقلل التجلطات لأنه بياخد من الشحنات الموجبة اللي على كرات الدم الحمراء، وبيحسن التهابات الضهر، وبيقلل الكورتيزول، وبيعمل مساج لبطن القدم للناس اللي بتهتم بالطب الصيني. بطن القدم فيها كل أجزاء الجسم. المهم حاولوا كده. الرسول صلى الله عليه وسلم قال لنا: "الاحتفاء". فحاولوا تمشوا كده على قد ما تقدروا في على النجيله 10 دقايق أو ربع ساعة كل يوم.

مش دي نقطتي. نقطتي في ناس كتير قوي بقابلها في الحياة بحس إن حاسين إن ساعتهم متأخرة. لسه ما اشتغلش، لسه ما بقاش غني، لسه ما اتجوزش، لسه ما خلفش، لسه ما سافرش. فكل أصحابي سبقوني، كل الناس سبقتني.

ما فيش حاجة اسمها كل الناس. في حاجة اسمها إن ربنا حطك في الوقت والمكان بالظبط اللي أنت فيه، يعني اللي لازم تبقى فيه دلوقتي. لو أنت دلوقتي فقير، لازم تعدي مرحلة الفقر في السن ده عشان تلاقي قدام كذا وكذا. لو أنت أعزب دلوقتي، لازم تبقى في السن ده أعزب عشان تبني في نفسك حاجة أو في شخصيتك حاجة، أو لسه بيعد ليك الزوجة اللي توائم المكان اللي أنت هتوصل له كمان سنة، مش دلوقتي. تاخده دلوقتي؟ لو قابلتها دلوقتي هتاخدها وتقع كمان سنة. تكون عيلت شوية، تقابل واحدة أعلى شوية فتنطلق وهكذا.

فالله يخليك، ما فيش حاجة اسمها ساعتي متأخرة، وما فيش حاجة اسمها فاتني القطر. اركب الطيارة يا حبيبي! فاحنا في مصر بنقول: "كل تأخيرة وفيها..." اكتبوا لي تحت فيها إيه؟ خيرة. دايماً ربنا بيختار الأفضل، و"كل شيء أنزلناه بقدر".

إمتى هتبقى معاك فلوس؟ وإمتى هتسدد دينك؟ بس أنت بتعمل اللي عليك إنك تسعى طول الوقت. بس يعني مش بقول لك نام، اسعى، اسعى طول الوقت. ولكن من زمان كنا بنقول النقطة دي لكل الناس اللي عاوزة تنجح: أنت في إيدك كل حاجة، أنت تستطيع إخراج المارد، أنت تغير الكون، إلا في حاجة واحدة.

يعني إيه؟ يعني أنا أختار طريقي؟ أوكي. أنا أختار خطواته؟ أوكي. أختار الخطة؟ أوكي. أغير الخطة؟ أوكي. مين الرفيق؟ أوكي. أصر وكل ما أقع أكمل وآخد كل الأسباب؟ أنا في إيدي كل ده. ولكن التايمنج مش بتاعك. وتقولي يبقى كل الموضوع بقى ما فيهوش ربنا؟ ربنا حاطط إيده لازم... فربنا بيشوفك تعمل كل حاجة ويسخر لك الأمور اللي حتى لو أنت مش فاهمها، بس هي دي اللي هتوصلك للي أنت عايزه عشان تصل في الوقت المناسب لخط النهاية، أو مش خط النهاية، خط الجايزة. فالوقت مش بتاعك، عامل الوقت عامل إلهي.

ما فيش بني آدم... حتى تعرفوا حتى في إنك تخس؟ تخس. أنا هخس يا دكتور 10 كيلو في شهر. عملتها يا دكتور؟ أنا ثلاث شهور هبقى سيكس باكس. عملتها؟ نو. بتظبط أكلك وتنام، تقلل كورتيزولك، ما تاكلش سكريات، تمنع المخبوزات، تمنع، تظبط القولون، تنام كويس، تعمل كتلة عضلية. إمتى بقى هخس؟ إمتى هشوف السيكس باكس؟ توقيت إلهي. فربنا دايماً عنده الوقت، ولكن إحنا نسعى.

فالله يخليك، أوعى تظن إنك متأخر. أنت جاي في ميعادك بالظبط. أوعى تظن إن الناس سبقتك. ناس اتجوزت في الثمانينات، في العشرينات، وحياتهم باظت في الستينات. ناس اشتغلوا بقوا مليونيرات في الثلاثينات وحصل لهم مشكلة في الأربعينات. في ناس اتأخروا للأربعينات وجالهم كل حاجة وعاشوا حياة سعيدة. فأنت ما تعرفش. كل واحد عنده الكويس والـ... مش بقول ده لازم ده يحصل له ده، لا. بس كل واحد عنده كولكشن. خليك في الكولكشن بتاعك وفي ساعتك. خليك في ساعتك، ما بتوصش ساعة غيرك. وقتك مظبوط بالظبط. أنت مش متأخر. أنت هتوصل في الميعاد. يومكم جميل.