Transcription
Assalam o Alaikum Nazreen. Mera naam Arsalan Jahid Khan hai aur aap mera YouTube channel dekh rahe hain. Nazreen, kal Zila Bajaur mein ek bohat hi afsosnak waqia pesh aaya jis mein ek bomb dhamakey mein mukamee Assistant Commissioner aur zila intizamiya ke kuch logon ko shaheed kar diya gaya. Sawal yeh hai ke kya yeh hamla ek farde wahid par hamla tha ya yeh hamari riyasat par hamla tha aur agar yeh Pakistani riyasat par hamla tha to Pakistani riyasat ko ek bharpoor jawab dene ki zaroorat hai.
Yeh hamla kal dopahar 2:00 baje pesh aaya jab Assistant Commissioner sahab apni gaadi par mukamee ilakey ka dawra kar rahe the aur usi doran ek remote control ke through bomb dhamaka kiya gaya aur unko shaheed kar diya gaya aur is dhamakey ki zimmedari Tehreek-e-Taliban Pakistan ne qabool ki hai. Nazreen, yeh ek mahez sirf waqia hi nahin balke ek silsile ki kadi hai.
Bajaur jo ke FATA ka hissa tha, ise 2018 mein Khyber Pakhtunkhwa ke saath jim kar diya gaya tha. Ise ek zile ka darja de diya gaya tha. Aur ise jim karne ka maqsad tha ke pure ilakey ko qoumi dhara mein le aaya jaye. Yahan ke logon ko taraqqi karne ke mowake diye jaye. Intaha pasandi ko kam kiya jaye. Ek behtreen police ka system introduce karwaya jaye. Adalati system ko fal banaaya jaye aur taleemi nizam ko behtar banakar yahan ke naujawan tabkey ko usi tarah mowake diye jaye jaise ke Pakistan mein doosre naujawanon ko milte hain.
Ab sawal yeh hai ke FATA ki wo tamam agencies jin ko zilon ka darja de diya gaya, kya wahan par dahshatgardi khatam hui? Kya wahan par hum intha pasandi ko rok sake? Kya wahan par logon ko taraqqi karne ke mowake mil sake? Main aapke samne kuch haqayiq rakhna chahta hoon. Pakistan saal 2025 mein Global Terrorism Index mein doosra mulk ban chuka hai, jahan par sabse zyada dahshatgardi ke waqiat hote hain. Saal 2024 mein Khyber Pakhtunkhwa mein 670 hamle hue, jis mein 5800 jaan chali gayi. Saal 2025 ke pehle chhe mahino mein ab tak Khyber Pakhtunkhwa mein 250 hamle ho chuke hain. Yeh haqayiq riyasat Pakistan ke liye bohat se sawal khade karte hain.
Ab yahan par dekhna humne yeh hai ke Assistant Commissioner sahab ko hi kyun nishana banaya gaya? Kya yeh koi ittefaqia hamla tha? Ya yeh ek socha samjha paigam tha? Nazreen, civil intizamiya ka kirdar in ilakon mein riyasat Pakistan ki mojoodgi ka sabse pehla aur sabse moasar zariya hai. Dahshatgard tanzimein jaanti hain ke agar hum civil intizamiya ko nishana banayenge to isse riyasat Pakistan kamzor hogi. In ilakon mein to pehle hi civil intizamiya ko bohat se masail ka samna hota hai. Assistant Commissioner jaise odhedaron ko aksar security protocol dastyaab nahin hote. Iske sath sath wasail ki gair munsaafana takseem riyasat ko kamzor karti hai aur isi cheez ka faida yeh dahshatgard tanzimein uthati hain. Yeh Pakistan ke un soft targets pe hamla karti hain jinse wahan ke mukamee logon ka riyasat ke upar se etibaar uthta chala jaye. Yahi wajah hai ke is tarah ke hamle karke riyasat Pakistan ki writ ko challenge kiya jata hai aur is tarah ki karwaiyon ke jawab mein riyasat ka radde amal bohat mahdoud hota hai. Aur ab tak hum do tarah ke radde amal de chuke hain, ek fauji karwai aur doosra mali imdad ka elaan.
Main samjhta hoon yahan par riyasat ko ahm policy tabdiliyon par gaur karna hoga. Sabse pehle to in tamam jimshuda ilaqon mein digital surveillance, safe city systems aur intelligence coordination unit ko fari tor par mutaharrik karne ki zaroorat hai. Doosra, civil afsarano ke liye khusoosi hifazati courses aur security protocol waz kiye jaye taake unki jaan mehfooz banayi ja sake. Teesra, zilli sattah par cross institutional security planning ko mutarif karwaya jana chahiye. Aur chautha, yahan ke mukamee naujawanon ko intha pasandi se dur rakhne ke liye in ilakon mein de-radicalization centers banane chahiye jahan par unko ek moderate Islam sikhaya ja sake, unko ek aam zindagi ki taraf laaya ja sake, unko ek achchi taleem di ja sake taake unka bhi mustaqbil baaki Pakistani bachchon ki tarah roshan ho sake.
Nazreen, Bajaur mein Assistant Commissioner sahab ki shahadat ek waqia nahin, ek warning hai. Agar riyasat Pakistan ne in jimshuda ilaqon mein apni policies ko mutaharrik na kiya to khuda na khasta humein is tarah ke manzar dekhne padte rahenge aur hum inke aadi ho jayenge. Comments mein apni ray zaroor den ke aap kya samjhtein hain ke hum in jimshuda ilaqon mein kis tarah se apni policies ko mazid behtar banakar inko qoumi dhara mein la sakte hain, dahshatgardi intha pasandi ko kam kar sakte hain aur wahan ke logon ko baaki mulk ki tarah wo suhooliyat faraham kar sakte hain jo har Pakistani ko mussar hai. Main aglee video mein ek nayay topic ke saath aapke samne hajir hounga. Bahut shukriya.