كيف يمكن أن يتحول الذكاء والتحليل الى عائق

تخيل أن ذكائك ممكن يكون هو السبب الرئيسي لتعطيل كل الأهداف اللي بتتمناها. غريبة، بالعكس. إنسان ذكي عنده قدرة عالية على التحليل هيفكر زيادة عن أي حد تاني ويحلل زيادة عن أي حد تاني. فتبدأ تكتشف مخاوف وسيناريوهات مرعبة أكتر من أي حد تاني. فتلاقي نفسك لا مفر من إنك تعمل خطط وحلول لكل احتمال منهم، لأن هي دي طريقة عمل عقلك. بتجبرك دايماً توصل لليقين، بتحاول تقفل كل الاحتمالات السيئة وما تسيبش مجال إلا لأنك تنجح وبس، كل ده من قبل ما تبدأ.

وبما إن اليقين شيء يستحيل حيل الوصول ليه، بينتهي بيك الحال إنك ما تبدأش. والسيناريوهات اللي رسمتها كانت مجرد فكرتك عن اللي ممكن تواجهه. لما تبدأ بتلاقي حاجة تانية خالص. ده انت حتى يمكن لما تبدأ تكتشف إنك مش عايز الحاجة دي. بنيت فكرة عنها من حد عجبك منظره وهو بيعملها ولقيت تنفيذها مختلف تماماً. فتلاقي إن أي إنسان انت شايفه أقل ذكاء منك نفذ وحاول وفشل وتعلم. شاف الواقع عامل إزاي فنجح. وانت المثالية خلتك في مكانك قاعد بتحلل سيناريوهات غير واقعية. بالتالي يحصل المثير للسخرية. من كتر خوفك من الفشل أكدت فشلك. تفكيرك وذكائك وتحليلك تحولوا لنقطة ضعف مش قوة.

كل قدرة ربنا وهبها لينا سمح لنا معاها بحرية توظيفها. ممكن تنفعك وممكن تضرك. لكن شوية وبتستوعب إن أنا واضح إن مش ذكي زي ما كنت متخيل. أنا لو ذكي فعلاً هشوف الدنيا على حقيقتها. إني آه هخطط وأعمل حساب كل حاجة، لكن في النهاية لا مفر من إني أتصالّح مع النقطة العامية اللي هتفضل موجودة مهما حاولت. المخاطرة إني ممكن أبدا وأضيع وقت ومجهود عادي. بتحصل ثغرة وجودها طبيعي وحتمي. ومحاولتي إني أفلّها مش بينم عن ذكاء مني. الحقيقة أنا لو ذكي هيبقى عندي فضول أخلص من مرحلة الاحتمالات دي في أسرع وقت وأبدأ. عشان على الأقل أعرف إذا كنت فعلاً شاطر ولا لأ. هقدر ولا لأ. أنا ليه كل ده سايبه لغز وبحاول أشوف له حل وأنا على البر؟ خليني آخد فكرة حتى من على الوش. يمكن أغير رأيي أو يمكن على الأقل أفهم معلومة كانت ناقصاني تغير المعادلة كلها.