Transcription
السلام عليكم ورحمه الله وبركاته. ازيكم؟ يا رب تكونوا كويسين وفي أفضل حال.
خد بالك لو في حياتك شخصية استغلالية وأنانية، وطول الوقت بيحاول إنه يخليك تنفذ رغباته وطلباته، أو تبقى ماشي على هواه، أو تبقى خاضع ليه خضوع تام من غير ما يبقى عندك أي نوع من الإرادة أو رد الفعل اللي تنتصر بيه لكرامتك، أو إنك تبقى مشغول بحياتك، أو إن يبقى ليك أولويات ثانية غيره. الشخص ده مش هيعرف ينفذ الخطّة دي أو يمشيك في الطريق ده من غير ما يجردك من ثلاث أسلحة أو ثلاث أشياء مهمين جداً وحيويين جداً في حياتك.
أنا لو شخص أناني واستغلالي ومتلاعب وعايز أشغلك عند مزاجي، مش هينفع أنجح في ده من غير ما أجردك من الثلاث أشياء دول. فركّز معايا جداً عشان هقول لك كلام مهم جداً هيفرق معاك جداً. في البداية، ما تنساش تعمل لايك للفيديو وتعمل شير. اعمل سيف للفيديو وخليه دايماً عندك موجود في قائمة المفضّلات عشان خاطر هتحتاج له في وقت تعوزه، صدقني.
طيب، أول حاجة أي شخصية سامة أو مؤذية عايز يجردك منها هي قدراتك الماليّة. إنك تبقى عندك فلوس، عندك دعم، عندك سيفينج، عندك فلوس متشالة لوقت تعوزه، عندك الحاجة اللي تخليك صوتك عالي. مش صوتك عالي يعني بتزعق، صوتك عالي يعني حر ومطمئن، بتعرف تقول "لا"، عارف تقول إنك وقت تعوزه هتتسند على قرشين دول. احتجت وعندك مشكلة مش هتبقى محتاج له. هو عايزك دايماً محتاج له، عايزك دايماً بتطيله، عايزك دايماً متورط، يورطك في مشاكل وقساط وقروض ويدخلك في مسؤوليات مش بتاعتك، ويتهرب من مسؤولياته عشان أنت تلاقي نفسك مغصوب، أو أنت تلاقي نفسك مضطر تدفع الديون بتاعته، أو تدفع المسؤوليات بتاعته، المدارس بتاعة الولاد، عشان خاطر هو بيستهبل وعامل نفسه مش شايف وبيتدلع وبيتراجع. الحقيقة إن بغض النظر عن صعوبة الموقف، فهذا متعمد. متعمد ليه؟ عشان تبص وراك تلاقي معاكش حاجة. تيجي بعد كده قررت تمشي أو عايز تقول رأيك أو عايز تاخد قرار تجاه هذا الشخص، للأسف الشديد مش هتعرف. للأسف الشديد هتلاقي نفسك مكبل، مكبل بالحاجة، مكبل بالعوزة، مكبل بفكره إن أنا طب هروح فين؟ طب هعمل إيه؟ طب ما هو بكره، ما هو أنا ضيعت فلوسي، ما هو أنا صرفت، ما هو أنا كلفت. الحقيقة إن هو ده المطلوب، إنك أنت تبقى مجرد من قدراتك الماليّة، مش شايل حاجة للأيام، مرتبك مهدر في 50 بند، دايماً مش قادر إنك أنت تاخد قرارات ليها علاقة بتطويرك أو بعلاجك أو بأي شيء. أنت على الحديدة وعلى البلاطة طول الوقت، أو إن أنا أجبرك إنك أنت تبيع عقار، أو أجبرك إنك أنت تسيب شغلك المهم. في الآخر، إن الأمور ما بتمشيش بالرضا. رضا، وإنك أنت مردود الأشياء دي حتى لو عملتها عشان خاطر ترضي الشخص ده، بتحس إنك دايماً مستغل. هي القصة كده، إن دايماً هي إيه المشكلة؟ إن الناس تراضي بعض، ما فيش مشكلة، بس أنت تبقى حاسس إن أنت مرضي، إن استثمارك ده بيظهر استثمارك في العلاقة، وده اللي أقصدُه. لكن في النهاية أنت بتلاقي شخص بيلاعبك الثلاث ورقات، بيضحك عليك. دايماً تلاقيك أنت مثلاً بتصرف، بتصرف، بتصرف، والشخص تكتشف فجأة إنه شايل فلوس ومخبي وكانز وأنت ما تعرفش عنه حاجة. عايز يستحوذ على كل مواردك ويبقى عارف عنك كل حاجة، وأنت ما تعرفش عنه أي حاجة، ولا بيخبي فين، ولا شايل إيه، وتكتشف إنك أنت اللي متورط. فده أول شيء، فكرة التوريط المالي أو إنك تبقى عندك حرية ماليّة.
الحاجة نمرة اثنين اللي مش هيسمح لك بيها أبداً إن يبقى ليك ناس، ناس ترجع لهم، تسألهم، يطمنوك، لو عايز تفضفض معاهم، لو يشوروك، يحذروك، تبقى متونس بيهم، ناس يحسسوك دايماً إنك مش لوحدك، إن ضهرك مش عريان، إنك مش واقف لوحدك، "إحنا معاك، إحنا في ضهرك، إحنا سندينك". ما ينفعش يكون ده موجود. لازم أضرب إسفين بينك وبين كل الناس دي، ولازم من وقت للتاني أشكك في الناس دي، ولازم لازم أهددك إنك لازم تسيب الناس دي، ولازم أعرفك إن الناس دي وحشة وأنا الوحيد اللي بحبك، ولازم أعرفك إنك لازم تختار: يا أنا يا هم. ولازم طول الوقت أضرب، أختلق مشاكل وحوارات في مناسبات تخص الناس، أو في، أو أقول عليهم كلام مش كويس، أو أشوه سمعتهم، أو أكرههم فيا عشان ما يبقوش موجودين ورجلهم على العلاقة معانا أو على بيتنا. فيبقى أنا ضربت عصفورين بحجر، عزلتك وحرمتك من من الدعم واستفرضت بيك. هي القصة كده. فتلاقي طول الوقت أنت محاصر، هتلاقي نفسك طول الوقت لوحدك، هتلاقي نفسك طول الوقت بتبص وراك ما فيش حد. وخد بالك العزل كمان ممكن يجي أو انعزلك على الناس إن أنا، إن أنا يعني أشغلك بيا زيادة عن اللزوم لدرجة إنك أنت مالكش مزاج ولا نفس عايز تروح تشوف حد ولا تقابل حد ولا ترد ترد على حد ولا تتكلم مع حد. العزل ممكن يكون إن أنا أخليك تتعلق بيا لدرجة إنك أنت بتعمي عينيك عن ودانك عن كل نصيحة وكل حد بيقول لك "خد بالك، ارجع لورا، الكلام ده مش تمام، الكلام ده مش سليم، العلاقة دي مش تمام". ومع ذلك أنت بقيت عامل زي المدمن، مش شايف ولا حاجة، عايز غير الجرعة، جرعة وفتفوته الاهتمام اللي بيديها لك هذا الشخص المؤذي عشان يفضل مسيطر عليك ويفضل مستحوذ على دماغك ويغسل دماغك بمزاجه ويرصها ويرتبها ويرتب كل حاجة فيها حسب مصلحته وهواه، ويبقى دايماً أنت مؤمن بروايته المزيفة، ودايماً مصدق كلامه، ودايماً مصدق إن الناس اللي حواليك وحشة وإن هم غير منكم وإن هم مش مش عايزين مصلحتك وإن هم وحشين وإن هم بصين لكم في حياتكم، وكلام فارغ من هذا القبيل، ولبست أنت بقى الفخ ده.
الحاجة الثالثة، أوعى تفتكر إن في شخصية مؤذية هتبقى عايزة لك شخص واثق من نفسه. انسى، انسى. أنا لازم طول الوقت أكرهك في نفسك، أخليك تصدق إنك وحش، إنك فاشل، إنك ضعيف، إنك مقصر، إنك مش قد كده، إنك مش مالي العين، إن عندك مشكلة، إن أنا رضيت بيك، إن أنا أحمد ربنا إن أنا رضيت بحد زيك. في النهاية أنت لازم تشعر إنك قليل، وتشعر إنك لما تبص لنفسك في المراية كده ما تبقاش حبيبها، ما تبقاش فخور بنفسك، ما عندكش ثقة في نفسك ولا ثقة في قراراتك ولا ثقة في شخصيتك، وتحس إنك دايماً بتتساءل، بتتشكك في في قدرتك وفي مهاراتك وفي ما تملكه من موارد ومن نعم ربنا أنعم بها عليك. في النهاية المطلوب إنك تبقى ضعيف، تبقى هش. كونك أصبحت شخص هش يسهل التلاعب بيك وإيذاءك وكسرك والسيطرة عليك.
فدي ثلاث حاجات لك لازم تاخد بالك منهم وتحافظ عليهم زي عينيك، وتبقى ناصح وتشيل لوقت عوزة. لما تكون علاقة مؤذية وعلاقة فيها تلاعب وفيها خيانة وفيها كذب وتدليس، تبقى آمن. عامل حساب الأيام والظروف، ما حدش ضامن فيها حاجة. تبقى عامل حساب إنك ما تقفلش الباب بينك وبين الناس اللي بيحبوك وتحرق كل مواكب الود والد لمجرد إن فلان بيوقع بينك وبينهم. تبقى عامل حساب إنك لازما تحافظ على ثقتك بنفسك واحترامك لذاتك مهما كلفك ده ومهما كان، لأن ده حائط الصد وصمام الأمان اللي الشخص ده إذا هده أنت بقيت عريان وبقيت مالكش أي لازمة وهتبقى شخص خواف وشخص ضعيف وما عندكش حدود. فثقتك في نفسك هي أصل الحكاية وهي كل الحكاية. فبالثلاث حاجات دول إذا حميتهم أنت في أمان. قدر استطاعتك أنت هتبقى قادر تاخد القرار وقادر تتعامل وقادر تحمي نفسك.
أتمنى أكون ساعدتك في بعض الفهم وبعض الوعي. أتمنى إنك أنت تقول لنا رأيك في التعليقات وتشاركنا الفكرة وتقول لنا بتتعامل إزاي مع المشاكل اللي زي دي. واعمل متابعة للقناة لو كنت أول مرة تشوف محتوى بتاعنا. ما تنساش تفعل خاصية كل الإشعارات.