Transcription
قصة حياة معظمنا: ماسك الموبايل، مسلسلات، ألعاب، نوم. مش عاجبك حالك؟ عايز أغير الوضع ده، أعمل إيه؟
أنا من بداية الأسبوع هبدأ أظبط حياتي، وهبطل كل حاجة غلط، وأعمل كل حاجة صح. تعدي لحظة الحماس دي، ثاني يوم تستوعب إن اللي قلته ده محتاج مجهود جبار، فتاجّل. وما تبدأ تضايق من حالك. ريبيت.
هقول لك على حل: إحنا اتعلمنا الصورة النمطية إن مجهود صغير يقابله نتيجة صغيرة. تذاكر قليل تجيب نتيجة قليلة، تشتغل قليل تجيب تقييم قليل، وهكذا. وده يمكن في السيناريوهات دي صح، لكننا عممنا القاعدة وبقينا نشوف الحياة كلها كده.
بقيت شايف إن لو عايز أغير حياتي، طبعًا لازم أعمل مجهود كبير جدًا علشان ربنا يديني فرصة. لازم لازم أكون استعديت واستهلت. أغلب الوقت آه، الفرص بتيجي للمجتهد، لكن ساعات الفرص بتيجي لإنسان تنتشله من الضياع والفشل، وتدّي له طوق نجاة ينقل حياته نقلة كبيرة. ربنا عايز كده.
لازم تفهم إن في حاجات كتير حلوة ممكن تحصل لك بمجرد إنك خرجت من الضِل للنور. حطيت نفسك في طريق الفرص، يمكن واحدة تخبط فيك. ما تعرفش قد إيه مع الوظيفة يمكن تتقبل. يقبلوني أنا؟ أيوه. انزل التمرين، يمكن تسخن وتحبه. اتكلم مع ناس بتفهم في فكرة المشروع اللي على بالك. اتحرك.
اعمل المجهود البسيط اللي أنت مستقِل بيه وشايفه ولا هيقدّم ولا يأخّر. ما تفضلش مستخبي وتحكم على نفسك إنك ما تستاهلش، ومستني اللحظة اللي تبقى جاهز فيها 100%. أنت ضامن وقتها أصلًا هتنجح ولا لأ؟
اعتبر دي إشارتك. روح استكشف. خد فكرة. خلي الدنيا تقول لك أنت تستاهل ولا لأ. يمكن تطلع صح، ويمكن تشوف حاجة أو تقابل حد يغير حياتك.