ازاي اعمل المهام الي عليا بدون مزاج ؟

سؤال حلو من أحمد: إزاي أقوم أعمل المهام اللي عليا مع إني ماليش مزاج أعمله؟ الله عليك يا أبو حميد! بص يا أبو حميد، خلينا ناخد المزاج نطلعه بره المعادلة ونحطه بعيد كده أهوت، ونقوم نعمل الحاجة من غير مزاج.

شيل المزاج اركنه على جنب دلوقتي، خلي المزاج ده بعد ما تعمل الحاجة. وحقيقي، بعد ما هتبدأ في عمل الحاجة هتلاقي إن مزاجك جه، هتلاقي إن المزاج حضر، هتلاقي إن الطاقة والنشاط والإقبال زادوا.

ففكرة انتظار المزاج علشان نعمل عمل الحاجة ده شيء خطأ تمامًا ومش عملي ومش واقعي؛ لأن أنت طول الوقت مش هيبقى مزاجك جاي.

المزاج ده بيجي نوادر، يعني لابد إن الأمور تصطف كده ورا بعضها كتير قوي عشان يبقى لك مزاج: تكون نايم كويس، قمت فطرت الفطار بتاعك، شربت القهوة، الجو جميل، ما فيش أخبار مزعجة، ما فيش رسائل واتساب، ما فيش اتصالات مؤلقة.

فلا، المزاج هي حاجة لا يعتمد عليها على الإطلاق في إنك تنجز الحاجة اللي المفروض تنجزها. فخد المزاج اركنه على الترابيزة، وقوم اعمل الحاجة اللي أنت هتعملها، ما تنتظرش المزاج.