Transcription
لو سمعت مني الكلمتين دولات مش هتحتاج تسمعهم من حد.
لما بتشوف شخص واثق في نفسه قدام الكاميرا وهو بيتكلم مع عميل، وهو في اجتماع، وهو بيتعامل كده مع الناس في العلاقات بتاعته. أنت ما بتشوفش شخص اتولد كده أو عنده موهبة كده و ونازل من بطن أمه واثق في نفسه. لأ، أنت بتشوف شخص عنده أرشيف من اللحظات اللي خرج فيها بره منطقة الراحة ورجع سليم.
ده الشخص اللي قرر في يوم إنه يتكلم في ميتنج مهم قوي رغم إنه كان هيموت من التوتر واتكلم ولخبط في الكلام وكل الناس اللي قاعدة لاحظت التوتر في صوته، بس اكتشف بعدين إن ده مش نهاية العالم وإنه ما خسرش وظيفته ولا حاجة وإن أصحابه ما اتريقوش عليه. فقرر إنه هو يعمل ده كتير عشان يبقى كويس فيه.
أنت بتشوف شخص سجل فيديو دقيقتين اثنين وقعد يعيد ويزيد فيه 50 مرة. وقرر إنه ينزله على السوشيال ميديا رغم إنه كان مرعوب وخايف من رأي الناس. وبعد شوية اكتشف إنه حياته ما وقفتش بسبب كام كومنت فقرر يعمل ده كتير.
أنت بتشوف شخص حاول يشتغل في المبيعات ونزل بالفعل وقعد يتكلم مع العملاء رغم إنه هو عنده حساسية شديدة من الرفض واترفض طول اليوم وما قفلش ولا بيعة. بس اكتشف في آخر اليوم إنه قدر يضحك على نكتة سمعها على السوشيال ميديا أو فيلم كوميدي كان بيتفرج عليه. مش نهاية العالم. فقرر ياخد الموضوع تحدي ورجع يحاول يبيع تاني وتالت ورابع لحد ما بقى سوبر.
أنت بتشوف شخص قرر يرفض طلب لحد عارف إنه هو بيستغله، بيستغل الطيبة بتاعته. رغم إنه كان خايف إنه يخسر الشخص ده. رفضله الطلب. وفعلاً خسر الشخص ده بس اكتشف بعد شوية إنه كسب احترامه لنفسه. عجبه الإحساس ده. وقرر يرسم حدود في كل علاقاته.
فالثقة بالنفس بتتبني بالإثباتات مش بالتوقعات. أنت بتثبت لنفسك بشكل عملي أنك بتقدر تقوم لما تقع. مش أنك تتوقع أنك مش هتقع. أنت بتثبت لنفسك أنه ألم المحاولة أهون بكثير من ألم التردد. ليه؟ لأن ألم المحاولة كده كده هيقل مع التكرار. إنما ألم التردد هيزيد مع الوقت.
ف عشان كده بقول أنه الثقة بالنفس بتتبني باللحظات اللي أنت بتخرج فيها بره منطقة الراحة بتاعتك وترجع سليم. لو كثرت من اللحظات دي في حياتك، لو كثرت من اللحظات دي في يومك، مش هتحتاج تسمع كلمة زيادة عن الثقة بالنفس وأسرار الثقة بالنفس وكيف تزيد ثقتك بنفسك لأنك هتكون عايشها وبتتنفسها بشكل عملي.