أنت أفضل مما تعتقد… اكتشف ٥ نقاط قوتك الحقيقية التي لم تعرفها

تخيل معايا كده ان انت قاعد في جلسة صفا مع نفسك وعمال بتفكر في نفسك وفي مستقبلك وفي الحاجات اللي انت بتعملها. وقام هوب كده مرة 1 يجيلك فكرة عن ان الناس اللي حواليك مميزين وانت لا. هل مثلا انا مش مميز لو انا ما عنديش نقط قوة زيهم؟ ليه الناس كلها بتسبق في طريقها وانا واقف محلك سر في النقطة اللي انا فيها؟

ثانية 1 بس قبل ما تقولي ايوه دي حالتي انا عايز اقولك دي مش حالتك انت بس دي حالة تمانين في ال100 من الناس. وده مش كلامي ده كلام دراسة اتعملت في جالوب اللي بتقول ان في 8 من اصل 10 بني ادمين مش حاسين ان هم مميزين. يعني تخيل معايا كده لو بنتكلم على مدرسة او جامعة ففي 100 طالب مثلا قدامك في تمانين منهم شايفين ان هم بلا ميزة او بلا قيمة. لو بنتكلم على شغل وشركة كبيرة فيها 1,000 موظف ففي 800 موظف منهم حاسين ان هم مش في مكانهم الصح او مش مستغلين قدراتهم صح او اصلا مش عارفين قدراتهم.

بس عشان انت شخص واعي فانت عارف ومدرك ان انت شخص مميز. ولكن عامل بالضبط كده زي اللي بيدور على الكنز اللي موجود تحت بيتهم ومش لاقيه. اهو ده بقى اللي احنا هنتكلم عليه النهارده. ازاي الاقي السمكة الكبيرة اللي موجودة تحت رجلي او ازاي الاقي نقطة القوة بتاعتي واللي غالبا ما حدش هيعرفها في العالم كله غير انا. الفيديو ده هيكون اول نقطة تحول حقيقي ليك عشان تطلع لسليم المجد او تدعي عليا.

السلام عليكم انا مايكل راشد وانت بتشوف برنامج الزتونة. تعالو نبدا في الموضوع على طول ونسال كده السؤال المهم. هو احنا ليه مش بنلاقي نقط القوة بتاعتنا بسهولة؟ هل الاجابة هي سوء حظ ام غباء من الاخرين؟ الحقيقة ان الاجابة هي غباء من الاخرين. لو جينا بصينا للطريقة اللي احنا اتعلمنا بيها فمثلا لو انت كنت درجاتك وحشة في المدرسة في مادة معينة فهتلاقي ان الناس اللي حواليك وخصوصا يعني المدرسين بيحاولو ان انت تركز على المادة دي وبيحاولو يخليك تجيب فيها مجموعة اكبر وتستهلك طاقة كبيرة جدا في ان انت تحل نقطة ضعف موجودة عندك. انما كم واحد عامة يعني في المنظومة التعليمية بيهتم بفكرة الحاجات بقى اللي انت قوي فيها انك تطورها وتنميها؟

سيبك يا سيدي من هذا المثل بتاع التعليم وهاديكي مثل هيخليكي تحبيني جدا. نفترض دلوقتي انتي ام وبتحاولي ان انتي تربي اولادك بشكل كويس ولكن ما بتعرفيش تطبخي فشوفي كده انا حسيت ان انتي ابتديتي تركزي معايا. كم بقى وقت هتستهلكيه في يومك عشان تتعلمي طبخة جديدة او عشان تشوفي انتي هتعملي اكل ايه النهارده؟ فبدل ما انا كنت ممكن استخدم الوقت ده او على الاقل اقسمه بشكل كويس ما بين نقط القوة اللي عندي ونقطة الضعف انا حاولت اني استثمر معظم وقتي في اني احل نقط الضعف وتجاهلت نقط قوتي.

طيب عشان الرجالة اللي هتكتبلي في التعليقات تحت انت بتدعو للنسوية وبتقولهم ما يطبخوش. انا بس عايز اقولكم الفكرة الاساسية هنا هو ان احنا محتاجين نوازن ونحاول ان احنا نركز على نقاط القوة اللي موجودة عندي عشان اعرف اكون بيها انسان متميز. لان الناس المتميزة في هذه الحياة الناس الناجحة مش هي اللي بتشتغل على نقط ضعفها عشان تخليها كويسة ولكن هي اللي بتشتغل على نقط قوتها عشان تخليها اكبر من كده بكتير وتقدر توصلها لمناصب مكاسب كبيرة جدا. وهو ده بقى اصلا محور كتابنا النهارده اللي هو اسمه او ازاي اعرف نقط القوة الموجودة عندي.

فتبقى من الدراسات اللي عملها مركز جاروب واللي هو مختص بشكل كبير جدا في اعداد القادة واعداد الناجحين في هذه الحياة لقو ان الناس الناجحة في الحياة هم اللي بيركزو على ايه؟ على نقاط القوة. انما تركيزي على نقطة الضعف هيعملي ايه؟ هيخليني انسان اوكي تمام. كل انسان في الدنيا ليه مجموعة من المميزات. اذا انا لعبت على مميزاتي اكتر هاعرف اجيب نتيجة افضل. فمثلا صانع محتوى اخر يتسم بالفكاهة وبيعرف يضحك وبيعرف يضحك الناس. لو انا حاولت اني اقلده لو حاولت اني اقدم محتوى فكاهي زيه هافشل جدا. ما هو انا دمي مش خفيف زيك. انت شخص ربنا ادالك ملكة فلما تستخدم الملكة دي تقدر تجيب بيها نتيجة كويسة جدا. هو برضه في نفس الشيء لو جه قعد مكاني وحاول ان هو يتكلم على كتب او احصائيات او ايا كان ممكن ما يعرفش يقول كلام جد لمدة دقيقة كاملة. فاذا هي دي الفكرة الاساسية ان انا ادور دايما على نقط قوتي والعب عليها مش ادور اني اغير من نقط ضعفي.

وعشان الثقافة دي يمكن ما كانتش موجودة عندنا زمان ويمكن عشان كان في ثقافة المقارنة او ان انا دايما بقيس نفسي بالناس اللي حواليا بقعد كده وافكر واقول ياه نفسي اكون زي فلان ده. انا عايز يكون عندي ملكة الحديث امام جمهور زيه كده بالضبط او انا عايز اكون شاطر في هذه الشغلانة زيه كده بالضبط. وبتناسى انا مين او انا ممكن اقدم ايه. وخليني النهارده كده استجمع انا كمان نقاط قوتي واقولك ان احنا هنتكلم دلوقتي على خمس حلول موجودة من كتاب ساعدك ان انت تلاقي نقطة القوة اللي بتميزك واللي لما تشتغل عليها تجيب نتيجة احسن.

الطريقة ال1 اللي موجودة من الكتاب اللي ممكن بيها تقدر تلاقي نقطة القوة اللي موجودة عندك هو ان انت تراقب طاقتك وحماسك في اي شيء انت بتعمله. مثلا انا ما عنديش مشكلة ان انا اقعد اصور بالساعات وده بيديني طاقة وحماس. فممكن دي تكون نقطة القوة بتاعتي. ممكن تكون نقطة القوة بتاعتك هو ان انت بتحب تتكلم مع ناس كتير اكتر مني وبالتالي نقطة قوتك هنا هو ان انت ممكن تكون شخص اجتماعي او ممكن تكون شخص بتشتغل في مجال زي المبيعات او النيجوسيشنز والتفاوض. وعلى النقيض في ناس لما بتعمل حاجة معينة بتحس ان هي مش قادرة تماما ما عندهاش اي طاقة واي حماس. ممكن ده يكون دليل ان دي مش نقطة قوتها.

وبمناسبة الطبخ ورقة وقلم بقى كده معايا يا ست الكل وابتدي كده اكتب او اكتبي معايا خمس انشطة انا باعملها في شغلي او في يوم الطبيعي بحس دايما ان الوقت بيعدي فيهم وبحس ان انا ما عنديش مشكلة ان انا اعملها. نتجنب الانشطة اللي انا فيها مش باعمل حاجة زي مثلا ان انا قاعد على الكنبة او بتفرج على فيلم. لا انا عايز الانشطة اللي انا بمارسها اللي انا بعملها بشكل واعي اللي انا بروحلها عشان انا بحب اني اعملها او لما بعملها مش بحس بالتعب زي باقي الانشطة. ال2 اهي دي ممكن تكون اول اول اشارة خضراء ان انا لقيت ايه عنصر قوة اساسي اقدر استند عليه.

الطريقة ال2 من هذا الكتاب اسمها تكتشف نمط النجاح الخاص بيك. زي ما قلتلكو من شوية ربنا خلق كل واحد فينا ليه ميزة مختلفة وليه طريقة في ادارة الامور مختلفة. يعني مثلا لو انا دلوقتي صاحب شركة ممكن ابتدي افكر اني ممكن ادير هذه الشركة عن طريق الاهتمام بالافراد اللي شغالين فيها. شخص اخر ممكن يدير هذه الشركة بنجاح عن طريق ان هو يبتدي يركز على الصورة الكبيرة والشركات الاستراتيجية. ممكن واحد تالت يفكر ان هو ممكن يدير هذه الشركة عن طريق ان هو يعمل جوا الشركة والناس تكون تكون بتشتغل مع بعض وبتحب بعض. وممكن واحد رابع يبتدي ان هو يفكر ان هو ممكن يعمل سيستم ادارة متكامل يكون فيها عارف الموظف بيعمل ايه بالضبط كل يوم وليه او ليه زي حاجات معينة بتقول ان هو عمل الشغل بتاعه بشكل كويس ولا لا ويقيس الاداء بتاعه كل شوية. وتخيل معايا كده كلنا في الاخر ممكن ننجح. وده اللي احنا بنسميه نمط النجاح. اني عشان اوصل لاي جول مش بالضرورة اني اكون باعمله بنفس الخطوات اللي بيعمله شخص تاني ولكن في الغالب انا عندي نمط معين عشان اعرف اوصل لكده.

هاديك مثال تاني عشان تفهم. في ناس المذاكرة بالنسبة لهم تنفع جدا في جو هادي ويكون ما فيش اي موسيقى خالص ولا اي ضوضاء خالص حواليهم. وفي مجموعة من الناس تانية تحب تذاكر مع بعض. وفي مجموعة من الناس تالتة تحب تشغل اغاني وهي بتذاكر او موسيقى خفيفة وهي بتذاكر. انا المهم عندي ان انت تذاكر مش المهم عندي ان انت تذاكر ازاي. فده اسمه نمط انت بتمشي عليه عشان توصل للنجاح اللي انت عايزه او نمط النجاح ده لو انت جبته كده وقمت حللته هتلاقيه بيقول كلام كتير جدا عن نقاط القوة اللي موجودة عندك. يعني مثلا المدير اللي كان بيحب يحلل كل حاجة عشان يقدر يوصل للنجاح وممكن تكون عنده نقاط قوة تحليلية. وانا شرحتهالك من شوية على فكرة وانا بتكلم ان احنا عندنا غالبا اربع نقط للنجاح في اي شيء. في نمط تحليلي في نمط استراتيجي او تفكير استراتيجي في نمط تاني خاص بالناس يعني او بناء العلاقات وفي نمط رابع خاص بفكرة الموتيفينج او ان انا اكون بحمس الاخرين. والله العظيم انت لو قريت الكتاب ده عشان تطلع الاربع افكار دي لوحدك كده من غير الفيديو ده تبقى انت برنس. معلش انا برضه عارف نقط قوتي. انا بعرف الخص المعلومة.

طيب حلو جدا. هل بقى كده معناه ان انا عرفت نقاط قوتي بس؟ لا في بقى طريقة تالتة ممكن تستخدمها هي ان انت تسمع اراء الناس اللي حواليك. يعني نتخيل مثلا ان انتي كل شوية بتسمعي كلام زي ايه؟ والله انتي صاحبتي جدا وانا بحب كل شوية اجي اتكلم معاكي لاني برتاح لما بتكلم معاكي. نفترض يعني ان في اكتر من بنت قالتلك فكرة زي كده فده ممكن يكون اشارة واضحة لان انا عندي نقطة قوة هنا في ان انا اسمع الناس واتعاطف معاهم. واحد تاني يروح لواحد صاحبه في المشاكل ويقعد يقوله بص انا عندي مشكلة وانت اللي هتقولي الحل بتاعها. ده معناها ان انا ممكن اكون شخص بارع في حل المشاكل شخص تحليلي ويتسم بالافكار المبدعة. صدقوني الناس تعرف عننا حاجات كتير جدا احنا ما نعرفهاش عن نفسنا. وابسط دليل على هذا الموضوع لما انتشر تريند كده على السوشيال ميديا لما كانت ناس بتكتب كده مقولة لو انا ممكن اشتغل شغلانة تانية ممكن اشتغل ايه؟ الناس اللي كانت بترد وبتكتب حاجات احنا كنا بنستغرب اللي هو ازاي بيقولو الكلام ده عننا. وده بشكل بسيط جدا لان احنا مش بنفكر في نفسنا بطريقة منطقية معظم الوقت. احنا بنفكر كتير في مشاعرنا المشاكل اللي موجودة عندنا وبالتالي بنهمل نقط قوة هي موجودة عندنا وباينة عند كل الناس.

وطبعا الكلام ده ينقلنا للنقطة ال4 اللي موجودة معانا النهارده وهي ان انت تحاول تتعلم حاجات جديدة. وصدقني يمكن 50% من مشاكلك تتحل اذا انت ابتديت تتعلم الحاجة اللي انت نفسك تعملها عشان بجد هتشوف هل هي مناسبة ليك او لا. طب انا هاضحكم. انا في واحد صديق ليا مش هاقول اسمه عشان ده يعني كلام مهم جدا ومش هينفع ان انا اقوله ولكن دي حقيقة يعني. هذا الصديق شغال في جهاز حساس في الدولة مش هينفع اقول اكتر من كده. ولكن هذا الصديق كان بيفكر ان هو يعمل يعني عايز يغير من هذا الجهاز اللي هو واضح يعني ان هو جهاز ليه علاقة بالامن لفكرة ان هو عايز يعمل حاجة بتاعته. اهو فالمهم هذا الصديق ابتدا يفكر كتير قوي وطلع باستكشاف ان هو يفتتح شكل من اشكال المطاعم. فانا نصحته وقلتله ابتدي اسال ناس شغالين في اماكن زي كده وحاول تتعلم نظم ادارة مكان زي ده وحاول تتعلم اكتر ازاي مكان زي ده ممكن يكون بيشتغل وبينجح. وهو وهو بيتعلم ابتدا يكتشف في الطريق ان دي مش الشغلانة اللي هو برضه بيدور عليها لانه ابتدا يشوف الشغلانة دي بشكل مختلف. في اوقات كتير احنا بنبقى شايفين حاجات من برا مبهرة بالنسبة لنا وجميلة زي مثلا انا بحب اتفرج على محتوى معين واقول الله انا نفسي اكون زي الشخص ده. ولكن لما ابتدي اتعلم مثلا فكرة زي صناعة المحتوى ممكن ابتدي اقول ايه لا والله الموضوع ممكن يكون بعيد عليا شوية او ممكن يكون بياخد طاقة كبيرة مني او يمكن ده ما يكونش نقطة قوتي. او العكس يحصل. لما تبتدي تتعلم حاجة تلاقي نفسك بتتعلم فيها بسهولة وتلاقي نفسك عايز تدي فيها اكتر وتلاقي عايز تتعلم حاجة واتنين وتلاتة. فده دليل على ان دي نقطة قوتك.

وطبعا قبل ما نروح لنقطة رقم 5 والاخيرة اللي موجودة معانا النهارده وطبعا واحنا بنتكلم على فكرة زي التعليم انت اكيد عارف وانا عارف ان انا هاقولك على برنامج الكوتشنج اللي احنا بنقدمه من ذات ان هو اصلا برنامج في الاساس بيساعدك ان انت تتعلم اكتر من حاجة في نفس الوقت. فبيساعدك ان انت تعرف نفسك وتعرف ايه الحاجة اللي انت ممكن تكون بتعملها. كمان يساعدك لو انت عايز تشتغل في مجال الكوتشينج. هو برنامج غير حياة ناس كتيرة مش عشان البرنامج يعني خرافي وما فيش زيه في الدنيا ولكن عشان البرنامج بيسمحلك ان انت تعيد اكتشاف نفسك من اول وجديد. والبرنامج اون لاين فده بيتاحلك برضه ان انت تشترك من اي مكان في هذا العالم. فلو انتو عايزين تعرفو اكتر عن هذا البرنامج ممكن تتواصلو معانا من خلال اللينك الموجود في ال تحت.

الطريقة ال5 اللي موجودة معانا النهارده واللي ممكن تقولك نقاط القوة بتاعتك اللي هي اليوميات. فكرة اليوميات بمنتهى البساطة ان هو زي كشف حساب انا بكتبه لنفسي. يعني مثلا اجي في اخر اليوم كده وابتدي افكر هو انا عملت ايه النهارده او لو في حاجة معينة حصلت في نص يومي وانا اقدر اكتبها اكتبها برضه في نص يومي. سواء بقى بكتبها على الموبايل او بكتبها في ورقة او ايا كان. الفكرة ان وانا بكتب عن نفسي ببتدي اتعرف اكتر هو انا مين. تلاقي بقى مثلا انت كل شوية عمال تكتشف مواهب انت استخدمتها في يومك ولكن انت ما خدتش بالك منها غير بس لما جيت كتبتها. وبعدين تعال بقى كده في اخر الاسبوع وبص على كمية المواهب او كمية الحاجات الكويسة اللي انت عملتها دي واسال نفسك سؤال لو انا طورتها ممكن اوصل لايه؟ هل ده ممكن يساعدني اكتر ولا لا؟

عارفين يعني لو هاقولك زيتون عن كل اللي احنا قولناه ده من شوية هاقولك ايه؟ هاقولك ان مشكلتنا بشكل كبير قوي هو ان احنا بنقلد بعض. انا لسه ما اعرفش انا مين ما اعرفش نوع القوة اللي موجودة في حياتي ما اعرفش اي حاجة في الحياة ولكن بطلع واشتغل في الحاجة اللي شايف ان هي بتجيب فلوس كويسة او في الحاجة اللي الناس اللي حواليا بتقولي اه هي حاجة كويسة او في اي حاجة تيجي قدامي وخلاص. والمحصلة لهذا الشيء هو نفس الدراسة اللي كانت موجودة في اول الحلقة ان تمانين في ال100 من الناس تقريبا هي مش لاقية نفسها. ورغم هذا الاحساس بان انت مش مميز الا ان انت عارف من جواك لو انت يعني شخص مؤمن ان انت شخص مميز جدا. ولذلك انت عندك جاب او عندك كده زي فجوة موجودة في تفكيرك. انا المفروض اكون مميز ولكن انا مش مميز. طب يا رب انا عملت ايه غلط؟ يمكن الحاجة الغلط اللي انت عملتها هو ان انت بس ما جيتش وقت انك تكتشف انت مين او ما عتش تدور على الكنز اللي موجود تحتك ده.

ولكن خليني اقولك برضه في الاخر جملة اقفل بيها الحلقة دي. هتفيد بايه نقط القوة اللي موجودة عندك لما تعرفها اذا ما كنتش ناوي تستخدمها. انا هاستنى مشاركتكم في الحلقة دي وانكو تكتبولي في التعليقات اللي تحت ايه اكتر حاجة سمعتوها وحسيتو ان هي بجد تلمسكم او تفرق معاكم. او يا سلام بقى لو حد كتبلنا ملخص الحلقة دي عشان يعني غالبا هنكسل نكتبه على الاسكرين دلوقتي. ولو انتو عجبكو المحتوى ده ما تنسوش برضه انكو تدعموه عن طريق ان انتو تعملوله لايك وتعملوله شير او مشاركة مع اصحابكو. وفي النهاية لا يسعني غير اني اقولكم شكرا ليكم على المتابعة واشوفكم على خير الحلقة الجاية ان شاء الله. كان معاكم مايكل راشد برنامج الزتونة.