Transcription
هو أنا طبيعيه ولا عندي خلل؟ إيه ده ليه كده يا بنتي صلي على النبي كده وفهميني إيه اللي حصل.
مافيش يا ستي أنا بحب الباد بويز، بحب الراجل اللي بيتجاهلني اللي عنده شوية مايند جيمز كده وحاجات توكسك. وكمان يا ريت يا ريت لو بيعرف بنات عليا كده ويجنني وراه. الحاجات دي بموت فيها.
إيه ده يا ساتر يا رب ليه كده؟ في حد بيعمل في نفسه كده؟ طب يعني بالنسبة للجود بويز بقى؟ لا الجود بويز دول أنا بتجاهلهم خالص، دول مملين جدا وما فيش أي حاجة اكسايتد كده في العلاقة. العلاقة كده بتبقى اتمه كده بتخانق بتخنق منهم قوي.
ما تقلقيش ما فيش خلل ولا حاجة، هي بس إن انت محتاجة تعرفي السبب أو التحليل النفسي لانجذابك للباد بويز، وليه بتنفضي وبتكرفي للجود بويز اللي هم أصلاً المفروض إن انت ترتبطي بحد فيهم. تابعي الحلقة للآخر عشان تعرفي الأسباب النفسية ولو عرفتي السبب هتعرفي إن شاء الله توقفي النمط ده.
الحلقة دي والله بدون مبالغة تقدر بمئات الجنيهات، مش هقول ملايين عشان مش هبانغ. تمام؟ ليه بقى؟ لأن الحلقة دي فيها تحليل نفسي مبني طبعاً زي ما إحنا متفقين ومتعودين في كل الفيديوز مبني على علم. تمام؟ وبصوا بس على الديسكربشن بوكس هتلاقوا فيه المصادر. قبل أي حاجة ما تنسيش اللايك الجميل، السبسكرايب الأجمل، وفعلي الجرس عشان يوصل لك كل جديد. آي لاف يو.
أول سبب من منظور التحليل النفسي بيخليني أنجذب للباد بوي للشخص السام وبيخليني أسيب الراجل الكويس فعلاً هو التكرار القهري. إيه هو التكرار القهري؟ بناءً على طفولتنا لو إحنا اتعودنا على نمط حب مشروط، نمط فيه تجاهل فيه تهميش بنكبر بننجذب وبنكرر تاني نفس نوع العلاقة اللي إحنا اتعودنا عليها واحنا صغيرين. فهتلاقي نفسك بتنجذبي للباد بوي، للراجل اللي بيتجاهلك، الراجل اللي عنده شروط عشان يرتبط بيكي أو عشان يتقدم لك أو عشان يكمل معاكي.
كل ده هو تكرار للنمط اللي كان بيحصل معاكي في الطفولة. كنت بتتحبي حب مشروط، حب مشروط يعني لو عملتي حاجة معينة أو عملتي اللي أنا عايزه هحبك، لو ما عملتيش اللي أنا عايزه لا مش هحبك. أو كان فيه تجاهل أو تهميش. والتجاهل ده ممكن يكون بسبب الانشغال مثلاً إن مقدمي الرعاية كانوا مشغولين، عندهم شغل، عندهم حوارات، أياً كان، فكانوا بيتجاهلوكي.
فين بقى التكرار القهري في الموضوع؟ التكرار القهري ده هو إن عقلنا الباطن بيعيد نفس التجربة تاني عن قصد. العقل الباطن مش العقل الواعي. بيبقى عايز يعيد نفس التجربة تاني بس عشان المرة دي هيصلحها، هيصلح القصة دي. يعني بيحصل زي إسقاط نفسي. يعني أنا مثلاً مقدمي الرعاية عندي كانوا بيتجاهلوني، اوكي، هروح أرتبط بشخص بيتجاهلني. ليه بقى؟ لأن عقلي الباطن عايز يثبت إن لا المرة دي، المرة دي الشخص ده أنا هخليه يهتم بيا ويديني الاتنشن وما يتجاهلنيش.
العقل الباطن ده بالنسبة له والله ده النمط اللي أنا أعرفه، أنا معرفش نمط غير كده عن الحب. فهيقوم بشكل انتقائي جداً يختار لك أكتر شخص هيكرر معاك نفس النمط تاني ويتجاهل ويبعد كل الأشخاص اللي ممكن تقدم لك شكل مختلف في الحب إن هم يقدرك يحبوكي يحترموكي. أنت مش هتبقي شايفة إن ده أصلاً حب. الحب في إن أنت تتجاهله أو إن أنت تكون عصبي أو إن أنت تكون خاين، أو حتى الخيانة ممكن يبقى فيه جرح خيانة في الطفولة. رجعي للفيديو كنت عاملاه عن صدمات الطفولة.
تاني سبب حاجة اسمها التعزيز المتقطع. يعني إيه التعزيز المتقطع؟ خلينا كده نقولها بشكل عام، الاهتمام المتقطع. ياه دي طبعاً اللعبة المفضلة عند أي باد بوي. أقل باد بوي هتلاقيه عنده الحتة دي قوي. شوية يهتم بيكي ويبقى فيه رش كبير جداً وشوية شوية يسحب ومش عايز ومش حجبه. ف للأسف أنت بتقعي في الفخ ده لأن أنت بتكوني محتاجة دوبامين. الدوبامين عندك بيعلى لما بيحصل اهتمام بشكل مكثف وبعدين فجأة مالقيش الشخص ده وكأنه اتبخر من حياتي.
فبيحصل إيه؟ ده الدوبامين بقى، لا ده أنا أقعد أفكر بقى هو إيه اللي غيره وأقعد أراقبه أون سوشيال ميديا وأخمن وأكلم صحابي ونقعد بقى نعمل تحليل نفسي ليه ولشخصيته آخر فترة. طب ده كل دي حاجات محفزات للدوبامين وكل دي حاجات الدوبامين ده اللي هو هرمون السعادة، سعيدك جداً يعني أنت في العلاقة. أنت مبسوطة من من القر والفر، أنت مش مبسوطة في العلاقة نفسها. يعني لو الشخص ده هيبقى ثابت كده وهيديك اهتمام بشكل طبيعي أنت مش هتبقي سعيدة.
وده عموماً نوع من أنواع الإدمان. في ناس مدمنة على علاقات مؤذية. دايماً اعرفي إن المخ بيكافئك على اللا يقين. أي حاجة أنت مش متأكدة منها هتلاقي مخك ده إيه الشطارة والحلاوة دي؟ خدي شوية دوبامين. ده أنت جامدة جداً. هاتي بقى حاجة أنا متأكدة منها؟ لا معرفش، مش هديكي دوبامين. فعشان كده السكرول داون مثلاً، سكرول داون على السوشيال ميديا لمدة ساعات دي كلها محفزات دوبامين. أنا معرفش الفيديو الجاي ولا الريل الجاي هيبقى عبارة عن إيه. دي أغلب العلاقات اللي أنتم بتسموها إن أنا في علاقة مع شخص نرجسي، هو مش نرجسي، هو بيتعامل معاك بالطريقة اللي مخك بينبسط بيها، بيبقى فيه هرمونات سعادة بيها. أنت كده حابة تبقي مع باد بوي، مع شخص يتلاعب بيكي ويتلاعب بكيميا دماغك؟ أكيد أنت مش حابة كده.
ثالث سبب وهو أنماط التعلق. التعلق غير الآمن مثل التعلق القلق مثلاً. ده مش بيحس بأمان ولا بيحس براحة مع الحب الهادي، الحب اللي ما فيهوش عواصف، اللي ما فيهوش أب اند داون، اللي ما فيهوش اهتمام متقطع، اللي ما فيهوش العيب نفسية. ما بيعرفش يحس بأمان ولا بيعرف يحس بهدوء مع شخص ثابت أو متزن. ما بيعرفش يحس بده. هو متعود على القلق، متعود ينام كده على المخدة دماغه بتجيب في أفكار، متعود على العلاقات اللي فيها أون أند أوف اللي فيها أبس أند داونز كتير. هو مش متعود على الاستقرار في العلاقات.
فالتعلق القلق دايماً بيجري ورا الحب. هو عنده مفهوم إن أنا أجري ورا الشخص، أجري ورا الحب، أخاف أخسره، أخاف يزعل، أخاف يبعد. دايماً هتلاقي الحب عنده نابع من الخوف. أخاف يحصل حاجة ويسيبني. مش هتلاقي الحب عنده نابع من الأمان لأن هو تعلق قلق وأي تعلق غير آمن على فكرة هتلاقي الحب عنده نابع من الخوف مش الأمان لأن هو غير آمن.
طيب أنا كده اتلخبطت، إزاي أفرق ما بين أول سبب قلتيه في الفيديو اللي هو التكرار القهري والسبب بتاع أنماط العلاقات؟ طيب لو أنا دلوقتي قدامي شخص بيحبني حب حقيقي وحب واضح مش متلاعب ما فيهوش أي سمة من سمات الباد بويز خالص وهو راجل جود جداً تمام وحسيت إن هو مش حقيقي، الحب ده مش حقيقي ده فيك.
أكيد الراجل ده بيمثل. على الجزء الثاني من الفيديو هو ليه بقى بتجاهل الجود بوي؟ يعني خلاص عرفت إن أنا بنجذب وبحب الباد بوي جداً. ليه بقى يجي لي شخص جود وراجل كويس جداً أحس إن أنا مش طايقاه نفسي ولا طايقاه؟ وإيه العلاقة؟ إيه ده؟ إيه الملل ده؟ وحاسة بنفور كده.
يقول لك ده جن عاشق، أعوذ بالله. ربنا يجعل الكلام ده خفيف عليهم والله. بس ليه بقى؟ ليه ده بيحصل؟ عشان الراجل اللي هو الجود بوي أو المسمى يعني إن هو جود بوي أو الست الجود اللي بيحصل إن هم بيدولك حب فيه راحة نفسية. يعني علاقة فيها راحة نفسية وخلية من القلق. والراحة النفسية دي أنت ما تعرفش طعمها. أنت ما جربتش طعم الراحة النفسية قبل كده. فما تعرفش ده إيه. مخك مش متعود عليه. مخك دايماً بيبعدك عن الحاجات الغير مألوفة وبيشدك للحاجات المألوفة.
ف للأسف جداً إن الراحة النفسية مش مألوفة. مش مألوفة للأسف. ماعرفش طعمها إيه. ف مخك مش هيختارها. مخك مش بيختار الأصلح ليك أو الأصح ليك. مخك بيختار المألوف ليك. المخ مش بيحب المفاجآت. فدايماً بيختار لنا الحب القديم اللي هو الحب من مقدمي الرعاية.
وفي نهاية الفيديو أتمنى أكون كنت خفيفة كده عليكي وما قلبتش عليكي المواجع ولا حاجة. ودائماً اعرفي عرفي إن معرفة المشكلة هي 50% من حلها. إن أنا أعرف أصلاً إن فيه مشكلة وأحط إيدي على المشكلة. طول ما أنا مش عارفة فين المشكلة وبيحصل إيه هتفضل دايماً الموضوع يتكرر معايا. ده أولاً. ثانياً قولي لي لو حابة نعرف طرق بقى العلاج إزاي بقى نتشافى من حبنا للباد بوي ده ونحب بقى الجود بوي اللي فعلاً يستاهل الحب. وأوعي تكوني نسيتي اللايك الجميل والسبسكرايب الأجمل وتفعيل الجرس عشان يوصلك كل جديد. أشوفك على خير الحلقة الجاية.