عادات بتضعف قوّتك الذهنية!!

في ثلاث عادات سلبية بتخلي أي إنسان هش مهما كان ناجح في حياته. الناس بتلاقي شكلها قوية في الشغل، في الفلوس، في النجاحات، في العلاقات. لكن أول ما الضغط يزيد في حياتهم، بينهاروا بسرعة جدا، ويمكن يفقدوا كل حاجة تعبوا عشانها. مش لأنهم ضعاف، لكن لأن فيهم ثلاث عادات أو ثلاث سلوكيات بتسحب منهم كل قوة احتمالهم الذهنية باستمرار.

أول عادة هي الشكوى المستمرة. أنت كل مرة حرفياً بتشتكي، بتدي نفسك رسالة إنك ضحية وإنك ضعيف. الشكوى بتنشط نفس المسارات العصبية اللي بتتعامل مع مسارات الخطر، فبتخلي المخ يشتغل دايماً في وضع النجاة طول الوقت. يعني حتى لو المشكلة خلصت، هتفضل حاسس إنك محاصر وإن المشكلة لسه مستمرة. وده بيستهلك طاقتك النفسية أسرع بكثير من أي مجهود بدني بتعمله.

تاني عادة هي السعي المستمر وراء الراحة. الدماغ مصمم على إنه يدور على مناطق الأمان بس. النمو والطموح دايماً بيتطلب عكس كده. كل ما تتجنب المواقف اللي بتخوفك، بتدي ساعتها إشارة عصبية للمخ إنه في خطر محتمل في المنطقة دي أو في الموقف ده، فبيكبر الخوف جواك في كل مرة أكتر. لكن لما تتعلم حرفياً إنك تواجه، الجهاز العصبي مع الوقت بيتاقلم. الراحة الزايدة بتخليك إنسان هش، والمواجهة الصغيرة اليومية بشكل متكرر هي اللي بتبني المتانة والقوة النفسية.

ثالث وآخر عادة هي اختلاق الأعذار. وإحنا شطار جدا جدا في اختلاق الأعذار. كل عذر بتقوله لنفسك بيقلل إحساسك بالسيطرة على حياتك. وده اللي علماء النفس بيسموه العجز المتعلم. لما تبرر فشلك كأنه قدر مش اختيار، الحقيقة إن كل عذر بتديه لنفسك بيقفل باب لتجربة جديدة أو موقف جديد كان ممكن يغير حياتك.

والخلاصة: لو عايز تبني عقل قوي فعلاً، ابدأ بالعكس من اللي إحنا قلناه. بطل تشتكي، واجه التعب ومنطقة الراحة، ما تديش لنفسك أعذار بشكل مستمر. ولما تعمل كده، هتكتشف إن القوة مش في الظروف اللي حواليك، ولكن في طريقة استجابتك ليها.