لماذا فشلت الصومال فى طرد الإمارات

اللي حضرتك شايفها دي تبقى شنطه فيها 10 مليون دولار اتصدرت من طياره اماراتيه في مطار مقديشيو في الصومال. خير يا جماعه، ايه اللي بيحصل؟

قال لك الفلوس دي احنا ما نعرفش انت جايبها ليه ولا لمين ولا حتى استاذنتنا قبل ما تدخلها، ولا نعرف ايه المقابل اللي انت عايزه من وراها. مش يمكن عايز تستخدمها في اسقاط النظام؟ مش يمكن عايز تستخدمها في تقسيم البلد؟ او يمكن عايز تستخدمها في تمويل الفصائل المسلحه؟ بص يا فندم، الفلوس دي خلاص كده، شكرا، احنا هنصدرها.

فما كان من الامارات، اللي كانت في الوقت ده حليفه لدوله الصومال، كانوا هم الاثنين حبايب، الا انها قفلت مستشفى الشيخ زايد الموجوده في الصومال. الامارات كنوع من التعاون والتحالف مع دوله الصومال فتحت لها مستشفى خيري في قلب العاصمه مقدشي، والمستشفى اتسمت وقتها باسم الشيخ زايد الله يرحمه. لكن بمجرد ما الحكومه الصوماليه صدرت فلوس الامارات، الامارات عملت ايه؟ قفلت المستشفى الخيري.

الكلام ده كان امتى؟ الكلام ده كان في شهر ابريل سنه 2018. ورغم ان المشكله انتهت وقتها، الا ان المشكله اتكررت تاني اليومين اللي فاتوا، لكن المره دي بشكل أثقل وأصعب. فجأة كده لقينا الصومال بتلغي كل اتفاقياتها مع الامارات، خصوصا الاتفاقيات الامنيه. خلاص كده، متشكرين جدا، الامارات مش هتستنى دقيقه واحده بعد كده في الصومال.

وهنا حضرتك كانت قد تظن ان دي مشكله كبيره للامارات، لكن خليني اقول لك انها لا مشكله كبيره ولا حاجه، لان قرار الغاء الاتفاقيات ده في حد ذاته الصومال مش هتقدر تنفذه. بل وخد الأتقل، الصوماليين نفسهم ما اعترفوش بالقرار وقال لك ان الامارات عندنا أهم من الحكومه الصوماليه اللي بتحكمنا. وبالتالي صحيح في قرار صدر بالغاء الاتفاقيات، لكن تقدر تسميه قرار مع وقف التنفيذ، قرار مالوش قيمة. بالبلدي كده، مجرد حبر على ورق.

وهنا تيجي الأسئلة المهمة: ازاي الامارات قدرت انها تبوظ قرار الصومال بالغاء الاتفاقيات الامنيه اللي بينهم وبين بعض؟ الامارات عملت ايه؟ طيب ايه اللي الامارات عملته خلاها مكروهه قوي كده من حكومه الصومال؟ وايه اللي الامارات عملته خلاها محبوبه قوي كده من شعب الصومال؟ ازاي الشعب الصومالي يتحدى قرارات حكومته لمجرد انه عايز بس يرضي الامارات؟ والسؤال الأهم من كل اللي فات، هل في دوله ثالثه هي اللي أكبرت الصومال على الغاء كل اتفاقياتها مع الامارات علشان تطردها من مضيق باب المندب وخليج عدن؟

أقول لك الله ينور عليك، هي دي الأسئلة المهمة. تعال بقى نجاوب عليها.

علاقة الامارات بالصومال بدأت بشكل واضح سنه 2014. وقتها الامارات قالت لك أنا بعتبر الصومال دوله حليفه، وعلشان كده أنا مش بس هدرب لها الجيش بتاعها، ده أنا كمان اللي هدفع مرتبات الجنود والضباط. وبعدها هبني للشعب الصومالي مستشفى خيري في العاصمه مقدشي. وفضلت العلاقات بين البلدين تمام وزي الفل لحد ما جت سنه 2017 والامارات قررت انها تقاطع أو تحاصر دوله قطر. أزمة قطر الشهيره لما حصلت مشاكل بينها وبين السعوديه والامارات ومصر والبحرين. وقتها الامارات كانت من بين الدول اللي طلبت الصومال بشكل رسمي انها تقطع علاقتها مع قطر. الا ان الصومال قالت لها: لا، انت عندك مشاكل مع قطر دي حاجه تخصك، أنا ماليش دعوه، عايزة تخسريني قطر ليه؟ خصوصا وان الامارات والسعوديه ومصر والبحرين رجعوا اتصالحوا مع قطر في النهايه. يعني الصومال كان عندها حق، كانت قاريه المشهد من بدري. لكن هنا العلاقات بين البلدين بدأت تتهز، بدأت تتكسر.

وفعل بعدها في سنه اللي هي سنه 2018، الصومال أعلنت بشكل رسمي انها صدرت 10 مليون دولار على طياره اماراتيه كانت موجوده في مطار مقدشي. فالامارات رفعت سماعه التليفون على الحكومه الصوماليه: انتوا ليه خدتوا الفلوس؟ قال لك لان الفلوس دي احنا ما نعرفش عنها حاجه. جايبينها الصومال تعملوا بيها ايه؟ فردت الامارات وقالت ان دي رواتب الجيش الصومالي، مش أنا اللي بدفع لك رواتب الجنود والضباط بتوعك، دي فلوسهم، دي رواتبهم. الا ان الصومال قالت لك: لا، دي فلوس زيادة عن فلوس رواتب الجيش. بالبلدي كده، الحكومه الصوماليه كانت شاكه ان الامارات بتعمل حاجه غلط من وراها، والفلوس دي جايه علشان تدفع في الحاجه الغلط اللي بتحصل.

طيب الامارات ردت على الكلام ده وعملت ايه؟ أقول لك انها نفذت ثلاث إجراءات أثقل من بعض ضد الحكومه الصوماليه. أول إجراء انهم قفلوا المستشفى الخيري اللي فاتحوه في مقدشي، زي ما حكينا من شويه. والاجراء الثاني بانوا قاعده عسكريه في صومالي لاند المنشقه عن دوله الصومال. وهنا حكومه الصومال أعلنت احتجاجها الرسمي. اكن انت رايح تدعم الإقليم اللي انشق عني، بتدعم الحركات الانفصاليه اللي بتحاربني.

طيب هل الامارات تكتفي بكده؟ الاجابه طبعًا لا. قامت ماضي عقد امتياز لتشغيل ميناء بربره اللي بتمتلكه صومالي لاند وبيطل على مضيق باب المندب. العقد ده كانت قيمته كام بقى؟ 442 مليون دولار. يعني تقريبا نص مليار دولار. انت مش خدت مني 10 مليون دولار؟ طيب أنا دفعت لصومالي لاند نص مليار دولار، أبقى خلي الـ 10 مليون دولار ينفعوك.

طيب هل تكتفي الامارات بكده؟ الاجابه برضه لا. قامت مكمله على اللي باي من أقاليم الصومال ومدربه جيوشهم وقواتهم الانفصاليه. وبالتالي الامارات هنا بعد ما كانت بتضرب قوات الجيش الصومالي اللي هو جيش الدوله، دلوقتي بقت بتضرب القوات الانفصاليه وجيوش الأقاليم اللي انشقت عن الصومال كدوله. وهنا أكيد حضرتك شايف ان اللي عملته الامارات ده بيعتبر جريمة مش كده؟ طيب خليني أقول لك ان اللي عملته الامارات بالنسبة لحكومة الصومال كارثة، مش مجرد جريمة. الجريمة بتتلم، إنما الكوارث ما حدش بيقدر يلمها. وهو ده بالظبط الكمين اللي وقع فيه الشعب الصومالي كله.

سيادة المواطن، علشان تقدر حجم المشكلة اللي بتعيشها الصومال دلوقتي، لازم تعرف الأول ان الصومال عاملة زي أمريكا. لو أمريكا متكونة من مجموعة ولايات، فالصومال هي كمان متكونة من مجموعة أقاليم. لكن الفرق بين الصومال وأمريكا ان الولايات الأمريكية كل واحدة منهم بتحكم نفسها بنفسها، ليها قانونها ودستورها وقواتها والميزانية بتاعتها. إنما الصومال ورغم انها متقسمة لأقاليم، الا ان الأقاليم دي كلها المفروض تتبع الحكومة الفيدرالية الموجودة في الصومال. طب ليه بنقول المفروض؟ لان المفروض مرفوض.

أقاليم الصومال بدأت تنشق عن الحكومة الفيدرالية وتهيء وتأسس دولة مستقلة عن الصومال. وحتى الأقاليم اللي لسه جواها سن التمسك بالدولة الصومالية ورفضت إعلان نفسها كدولة مستقلة، قررت انها تتمتع بالحكم الذاتي. خلاص يا فندم، أنا مش هستقل عنك وهفضل جزء من دولة الصومال، لكن برضه هحكم نفسي بنفسي، انت مالكش دعوه بيا. كم إقليم في الصومال بقى عملوا الكلام ده؟ كم إقليم انفصلوا عن دولة الصومال؟ وليه أصلًا مهم إننا نسأل سؤال زي ده؟

علشان تعرف إنك لما تنزل تحت عند مضيق باب المندب، فانت مش بس هيبقى مطلوب منك تتعامل مع الصومال لوحدها، ولا جيبوتي لوحدها، ولا إثيوبيا لوحدها، ولا كينيا، ولا حتى إريتريا. ده كل دولة من الدول دي جواها أقاليم انشقت عنها وأعلنت نفسها دول مستقلة. فانت بدل ما كان المطلوب منك تتعامل مع ثلاث ولا أربع دول، بقى مطلوب منك دلوقتي تتعامل مع 10 ولا 20 دولة. طب ولو ما قدرتش تتعامل مع كل الدول دي وتحمي مضيق باب المندب، في غيرك هيقدر يتعامل معاهم. زي ما إسرائيل عملت كده ونزلت صومالي لاند واعترفت بيها، وفاضلها شوية وتبنى لك قاعدة عسكرية على أراضيها. إثيوبيا نفسها اتعاملت مع صومالي لاند وعايزة تاخد منها ميناء بربره اللي بيطل على مضيق باب المندب.

تمام كده عرفت خطورة اللي بيحصل في الصومال وخطورة تقسيمها. خطورة تقسيم الصومال لا تقل أبدًا بأي حال من الأحوال عن خطورة تقسيم السودان وليبيا. تقسيم الصومال معناه إن مضيق باب المندب ما بقاش بتاعك خلاص، اتاخد منك.

طيب إيه الأقاليم الصومالية اللي انشقت بقى وليه انشقت أصلًا عن الصومال؟ هحكيلك.

أكبر إقليم في الصومال اسمه الصومال الإيطالي، اللي هو بيبدأ من الجنوب وانت طالع لحد ما توصل لنص الصومال. طب ليه اتسمى بالصومال الإيطالي؟ لأنه كان تحت الاحتلال الإيطالي لحد سنة 1960. الإقليم ده لوحده، علشان بس تعرف خطورته وأهميته، فهو هو بيشكل 13 منطقة من بين الـ 18 منطقة اللي بيشكلوا الصومال كله. مساحة كبيرة جدًا. لذلك تلاقي العاصمه الصوماليه مقدشي موجودة في الإقليم ده. أيوه، برضه فين المشكلة هنا؟

المشكلة إن بمجرد ما اندلعت الحرب الأهلية في الصومال سنة 96، الإقليم المهم ده واللي بيعتبر العمود الفقري للصومال، هو نفسه بدأ يتقسم. وده ليه؟ لان الحرب الأهلية اللي اندلعت بعد عزل الرئيس سياد بري، اندلعت أصلًا بسبب الفراغ السياسي. فاغلب الفصائل المسلحة اللي كانت بتمثل المقاومة ضد نظام سياد بري، بدأت تتخانق بينها وبين بعضها على السلطة. "إيه ده؟ إحنا خلاص انتصرنا على الرئيس الديكتاتوري سياد بري، حررنا البلد منه ومن نظامه أخيرًا. الحرب انتهت. طيب هنعمل إيه بقى دلوقتي؟" قال لك نحارب بعض، نحارب بعض واللي ينتصر فينا هو اللي يتولى الحكم. فاندلعت الحرب الأهلية، واللي كان من بين نتائجها تقسيم إقليم الصومال الإيطالي اللي بيعتبر أكبر إقليم في الصومال.

طيب الإقليم ده لما اتفكك أو اتقسم، اتقسم لإيه؟ اتقسم لأربع كيانات أو أقاليم صغيرة.

1. **إقليم بونتلاند** الموجود في شمال شرق الصومال. هتلاقيه تحت صومالي لاند على طول. سكان الإقليم ده جم سنة 1998 وقال لك: متشكرين جدًا يا جماعة، إحنا تعبنا من الحرب واللي بيحاربوها، بصراحة كده إحنا عايزين نرتاح منكم من مشاكلكم. وقاموا جايبين العقيد عبد الله يوسف علشان هو اللي يحكمهم، وبعدها أعلنوا الحكم الذاتي. خلاص يا فندم، متشكرين جدًا، إحنا هنحكم نفسنا بنفسنا.

2. **ثاني إقليم اسمه جنوب غرب الصومال.** الجماعة اللي عايشين في جنوب غرب الصومال قال لك: واشمعنى إحنا كمان هنعلن الحكم الذاتي وهنختار مدينه بداو علشان تبقى عاصمه للإقليم، واختاروا العقيد حسن محمد علشان هو اللي يتولى رئاسه الإقليم. خد بالك، الإقليم ده مدعوم عسكريًا وسياسيًا من إثيوبيا. وهنا حضرتك بتلاحظ إن إثيوبيا استغلت الحرب الأهلية علشان تخطب برجليها في قلب الصومال علشان تأسس كيانات مستقلة ليها موالية ليها في الأراضي الصوماليه.

3. **بعد كده انشق إقليم جديد عن الصومال اسمه جالكايو.** الإقليم ده عمل حاجتين أغرب من بعض. أول حاجة إنه انفصل زيه زي باقي الأقاليم اللي بتنفصل عن الصومال. قال لك: أنا هحكم نفسي بنفسي. طيب تمام، ما فيش مشكلة. انت أكيد متضايق من أقاليم الصومال وعايز تعيش لوحدك بعيد عنهم؟ قال لك: أيوه فعلاً أنا حاسس بكده. بس اسمح لي أعمل علاقات دبلوماسية مع إقليم بونتلاند. علاقات دبلوماسية إيه يا فندم؟ ده انتوا الاتنين عايشين في بلد واحدة، انتوا الاتنين عايشين في قلب الصومال. وبعدين انتوا مش انشقيتوا عن بعض علشان مش طايقين بعض؟ لما انتوا حابين بعض قوي كده، ما تضموا على بعض تاني وتوحدوا الصومال بدل ما هي عمالة تتقطع وتتقسم؟ قال لك: لا، إحنا مرتاحين قوي كده. بس برضه هنعمل علاقات دبلوماسية مع بعض.

4. **طيب اللي بعده، خلال الحرب الأهلية اللي اندلعت في التسعينات، رجال الأعمال الصوماليين شافوا إن الكلام ده مش نافع، إحنا لازم نلاقي حل للحرب اللي عمالة تحرق في البلد.** يعملوا إيه ويتصرفوا إزاي؟ قال لك: إحنا هنعمل حاجة اسمها قوات المحاكم الإسلامية. وفعلاً القوات دي اتشكلت واتسلحت واعتبرت الشريعة الإسلامية هي المنهج الوحيد اللي هتنهي بيه الحرب وتحافظ بيه على استقرار الصومال. وفعلاً قوات المحاكم الإسلامية دخلت الحرب ضد مجموعة من الفصائل المسلحة الثانية وقدرت تنتصر عليها وتسيطر على أغلب مناطق إقليم الصومال الإيطالي اللي كان عمال يتقسم ويتفكك بسبب الحرب الأهلية. قوات المحاكم الإسلامية بقى سيطرت على أغلب المناطق اللي فيه، واللي من بينها وأهمها العاصمه مقدشي.

5. **طيب اللي بعده، إقليم جوبالاند.** الإقليم ده صحيح هو كمان انفصل عن الصومال، لكن مشكلته مع حكومه الصومال إن رئيسه كل ما يخلص مدة رئاسيه ويدخل في الانتخابات اللي بعدها، هو برضه برضه اللي ينجح. بقى على كده بتاع ثلاث انتخابات. طب والحكومه الصوماليه عملت معاه إيه؟ هقول لك كمان شويه. لكن خلينا دلوقتي نسيب الجنوب ونطلع على الشمال.

**شمال الصومال، إقليم صومالي لاند** الموجود في الشمال، قال لك: بص بقى، أنا ندمت على اليوم اللي قررت فيه إني أتحد مع الصومال كدوله. انتوا كرهتوني في نفسي ليه يا فندم؟ كرهناك في نفسك، عملنا فيك إيه؟ حكينا اللي حصل لإقليم صومالي لاند بالتفصيل وليه انفصل عن الصومال كدوله في حلقة حرب الصومال. وبالتالي صومالي لاند هو كمان انفصل.

6. **يجي من بعده إقليم أوغاديين أو إقليم الصومال الغربي.** الإقليم ده مش بس انفصل عن الصومال، ده انفصل وصل وانضم لإثيوبيا. أنا مش عايز أبقى تابع للصومال، أنا عايز أبقى تابع لإثيوبيا بس. مهم تبقى عارف هنا إن انفصال الإقليم ده بالذات حصل قبل الحرب الأهلية سنة 1954.

7. **يجي من بعده إقليم جنوب غرب الصومال.** حضرتك تقول لي: إحنا حكينا قصته من شويه. إقليم جنوب غرب الصومال ده؟ أقول لك: لا، ده إقليم غيره، لكن موجود برضه في جنوب غرب الصومال. المختلف بقى في الإقليم ده إنه قرر ينضم لكينيا. يعني خرج من الصومال خالص وانضم لكينيا واتسمى من بعدها باسم إن إف دي، والعاصمه بتاعته اسمها جريسا. طيب الصدمة فين هنا بقى؟ الصدمة إن الشعب الصومالي اللي بيعيش في الإقليم ده قرر في سنة من السنين إنه يعمل استفتاء على الاستمرار في كينيا أو العوده للصومال. "أنا حاسس إنكم مش مرتاحين، تيجوا نرجع للصومال؟" وفعلاً كانت نتيجة الاستفتاء إن الأغلبية أجمعت على العوده للصومال. "أيوه، إحنا عايزين نرجع للصومال." لكن ترجع فين يا فندم؟ نفس اللي حصل لصومالي لاند لما حاولت تتراجع عن الوحدة مع الصومال، هو اللي حصل مع إقليم إن إف دي لما حاول يتراجع عن الوحدة مع كينيا. الجيش الكيني لغى نتيجة الاستفتاء وقال لهم: الإقليم ده من النهارده بقى بتاعي.

8. **يجي من بعده إقليم العفر والعيسى المعروف النهارده باسم جيبوتي.** أيوه، دوله جيبوتي اللي حضرتك تعرفها النهارده كانت مجرد إقليم من أقاليم الصومال، لكنه انشق عنها ودول العالم اعترفت بيه وبقى عضو في جامعه الدول العربية والأمم المتحدة وغيرهم من المنظمات الدولية. بالمناسبة، الإقليم ده كان معروف زمان باسم الصومال الفرنسي، وده لأنه كان بيخضع للاحتلال الفرنسي قبل ما يستقل عنه سنة 1977. لما استقل عن فرنسا، بقى مش يرجع للصومال؟ لا، الإقليم ده استقل عن فرنسا من هنا وقام منفصل عن الصومال وغير اسمه لدوله جيبوتي.

فهي دي الصومال يا سيد المواطن، دوله متقطعه بسكينه. لك أن تتخيل إن هي دي الدولة اللي بتحمل القرن الأفريقي، هي دي الدولة اللي مطلوب منها تأمن مضيق باب المندب، بوابه البحر الأحمر وبوابه قناه السويس، والجسر اللي بيربط بين آسيا وأفريقيا وأوروبا. هي دي الدولة اللي انت قاعد في السعوديه والأردن والسودان ومصر ومطمن إنها واخده بالها من مضيق باب المندب وخليج عدن. دوله بتحاول تبقى دوله. هي كانت دوله عظيمه وشعبها كان ولا يزال شعب عظيم، لكن ظلمته الحرب الأهلية، وظلمته أطماع الدول اللي بدل ما تساعده يوحد شعبه ويلم في أرضه، شجعت تقسيمه ودعمت حركاته الانفصاليه علشان يستمر في تقطيع نفسه بنفسه.

وهنا يجي سؤال مهم: هل الشعب الصومالي استسلم كده خلاص ووافق إنه يتقسم وأرضه تضيع من بين إيديه؟ الإجابة طبعًا لا. الحكومة الصوماليه لسه لحد النهارده بتحاول إنها تلم شمل الصوماليين وترجع الأقاليم اللي انفصلت عنها. لكن للأسف، حكام الولايات المنشقه نفسهم بيحاربوا الإجراءات اللي بتاخدها حكومه الصومال. يعني بيحاربوا بعض منهم فيهم. خد عندك مثلا، وأنا هنا هديلك مثالين بس، في اثنين من الأقاليم المنشقه قبل ما نرجع للامارات وسبب إنهاء وجودها في الصومال. هديلك مثال بإقليم بونتلاند أو ولايه بونتلاند وإقليم جوبا لاند.

إقليم بونتلاند ده مشهور في الصومال وأفريقيا كلها بحاجتين: امتلاكه للنفط، والحاجة الثانية هي القرصنه. فاكرين فيلم كابتن فيليبس اللي قام ببطولته الفنان توم هانكس؟ الفيلم ده بيحكي قصة سفينه حاويات اسمها إم في ميرسك ألاباما اتخطفت يوم 8 أبريل سنه 2009 على حدود الصومال. اهو اللي خطف السفينه دي بقى كانوا مجموعه من القراصنه الصوماليين من إقليم بونتلاند. فإقليم بونتلاند ده صحيح وصل للعالمية، لكن للأسف من باب السرقة والقرصنه. طبعًا ده مش تعميم، الشعب الصومالي من أطيب الشعوب في العالم، لكن فعليًا أعمال القرصنه كانت بتتم من على أراضي بونتلاند لحد ما المجتمع الدولي نشر سفن حربيه في المنطقه، ده غير إن شركات الشحن بدأت تطلع مقاتلين على السفن لحمايتها. يعني تبقى سفينه شحن تجاريه وعاديه جدًا، لكن لو حاولت تقرب منها تلاقي فيها ناس بتضرب عليك نار. الإقليم ده بيحكمه واحد اسمه سعيد عبد الله. وفي يوم من الأيام، الحكومه الصوماليه قررت إنها تغير نظام الانتخابات لحاجه اسمها النظام الرئاسي. النظام الرئاسي ده معناه إن التصويت في الانتخابات هيتم بشكل مباشر، شخص واحد يساوي صوت واحد. حضرتك تقول لي: وهي الانتخابات كانت بتتم إزاي قبل كده؟ أقول لك بنظام العشائر، بمعنى إن الكلمه كانت لشيوخ العشائر، وبالتالي النظام ده ما كانش بيضمن الحفاظ على حق كل المواطنين في التصويت. افرض أنا من قبيله أو عشيره معينه، لكن عايز أنتخب حد غير اللي شيخ قبيلتي عايز يختاره، في الحاله دي صوتي في الانتخابات هيضيع، لان شيخ قبيلتي أو عشيرتي هو اللي هيختار مش حد تاني. فالحكومه الصوماليه قالت لك: لا، كل واحد يصوت بنفسه ولنفسه. وهنا مين اعترض؟ رئيس إقليم بونتلاند سعيد عبد الله. وده بكل بساطه لان علاقته بالشيوخ العشائر بتضمن له نجاح سهل في الانتخابات الرئاسيه، خصوصًا بعد ما نجح في انتخابات الولايات الثانيه، نجح للمره المره الثانيه في انتخابات الرئاسه. فما كان منه إلا إنه اعترض وقال لك إن الحكومه الصوماليه بتنتهك القانون والدستور وعايزه تغير النظام الانتخابي. وبعدها أمحشت قوات الإقليم ونشرتهم في كل حته علشان يفرض عليها سيطرته الأمنيه.

طيب هو إقليم بونتلاند مهم قوي ليه كده علشان الكل يتخانق عليه؟ أقول لك إن بعيدًا عن النفط اللي تم اكتشافه في الإقليم، فالإقليم بيطل على خليج عدن وبيعتبر البوابه الأولى لمضيق باب المندب والبحر الأحمر، وهو ده اللي يهم الدول اللي بتتخانق دلوقتي على النفوذ في البحر الأحمر. أما لو اتكلمنا عن ثرواته الداخليه، فالإقليم بيمتلك ميناء اسمه ميناء بصاصه، والناتج المحلي للإقليم تقريبًا 2 مليار دولار كل سنه. وده إيه؟ ده في ظل الحروب والاشتباكات وعدم الاستقرار السياسي اللي ماثر أصلًا على استخراج النفط. أمال لو البلد استقرت وشركات التنقيب اشتغلت على آبار النفط والغاز، أكيد الأرباح هتزيد. وبالتالي إقليم بونتلاند بيمتلك دخله الخاص اللي يمكنه من الاعتماد على نفسه بدون ما يحتاج للحكومه الصوماليه في حاجه.

طيب تعال لآخر إقليم اللي هو إقليم جوبا لاند. جوبا لاند زيه زي غيره من الأقاليم الصوماليه قرر إنه ينفصل عن الدوله ككل. واتولى رئاسه الإقليم واحد اسمه أحمد محمد إسلام الشهير باسم "أحمد مدوبي". الراجل ده عنده مشكله مع حكومه الصومال وهي إنها معترضه على نتيجه الانتخابات بتاعته. كل ما يعمل انتخابات رئاسيه هو اللي ينجح، بقى له على كده ثلاث انتخابات. فما كان من الحكومه الصوماليه إلا إنها بلغته بشكل رسمي إنها رافضه نتيجه الانتخابات بتاعته. طب وهو رد على الكلام ده وعمل إيه؟ رفض خطاب الحكومه واستمر في الحكم بقوه السلاح. "أنا اللي هحكم جوبا." طبعًا هو لما بيدافع عن نفسه بيقول إنه جاب انتخابات رئاسيه ما حدش ليه عنده حاجه. إلا إن حكومه الصومال في ردها عليه قالت له: خلاص ولا تزعل نفسك، إحنا هنغير نظام الانتخابات من تصويت عشائري لتصويت فردي. بدل ما شيوخ العشائر اللي انت متفق معاهم هم اللي بينتخبوك وينجحوك، إحنا هنخلي المواطن الصومالي هو اللي ينتخبك. كل مواطن ياخد بعضه ويطلع على اللجنه الانتخابيه ويختار الرئيس اللي عايز يحكمه. لكن طبعًا مين هنا رفض؟ رئيس إقليم جوبا لاند. قال لك: ما فيش الكلام ده، نظام الانتخابات ده هيفضل نظام عشائري واللي مش عاجبه يشرب من خليج عدن.

طيب هنا حد من حضراتكم ممكن يسأل سؤال مهم: هي العشائر كسبانه إيه من الخناقة دي؟ ليه بتدي له أصواتها؟ أقول لك لأنه لما بينجح في انتخابات الرئاسه بيرد لهم الجميل ويوزع عليهم مقاعد في البرلمان ضمن نظام اسمه "أربعة ونص". بمعنى إن أغلبيه مقاعد البرلمان بتتوزع على أكبر أربع عشائر في الإقليم، أما اللي باقي من قواعد البرلمان فبتتوزع على العشائر الصغيره وغالبا بتكون نص حصه العشائر الكبيره. ومن هنا جه تسميتها باسم "أربعة ونص". وبالتالي اللي بيحصل هنا إن العشائر بتنجحه في انتخابات الرئاسه، فيقوم هو يكافئهم بمقاعد مجلس النواب، فيقوموا هم ينتخبوه تاني باعتبار إنهم اللي من حقهم يختاروا رئيس الدوله أو رئيس الإقليم. جمعيه ودايره يعني.

طيب هل الرئيس الصومالي يكتفي بكده؟ الإجابة طبعًا لا. ما هي لازم تولع، لازم الصومال تتقطع أكتر ما هي متقطعه. رئيس الصومال مطلع قرار بإلقاء القبض على رئيس إقليم جوبا لاند بتهمه إيه يا فندم؟ بتهمه الخيانه وانتهاك الدستور والتخابر مع دوله أجنبيه. خد بالك، مين اللي بيتهم مين؟ رئيس الصومال بيتهم رئيس إقليمه جوبا لاند اللي هو كان إقليم في الصومال قبل ما ينشق وينفصل عنه. طب ورئيس إقليم جوبا لاند رد على الكلام ده وعمل إيه؟ قام هو كمان مطلع قرار باعتقال الرئيس الصومالي ذات نفسه بتهمه إيه يا فندم؟ بتهمه الخيانه والتحريض على التمرد. ما هي التهم ببلاش بقى. وبالتالي كده بدل ما رئيس الصومال كان بيحاول يضم الإقليم مره تانيه تحت مظله الدوله، الدوله الصوماليه ككل، دلوقتي بقى هم الاثنين مطلعين مذكرات اعتقال لبعض، هم الاثنين عايزين يقبضوا على بعض.

هل الخناقة انتهت على كده؟ الإجابة طبعًا لا. الحكومه الصوماليه حركت جيشها لمناطق إقليم جوبا لاند بحجه تسلم المهام الأمنيه من قوات الاتحاد الأفريقي. لكن رئيس إقليم جوبا لاند قال لك: ما فيش الكلام ده، لا مهام أمنيه ولا اتحاد أفريقي، كله يروح على بيته، امشي يلا انت وهو من هنا. ولما الجيش الصومالي رفض يمشي، اندلعت الحرب بينهم يوم 11 نوفمبر سنه 2024. مين اللي كسب الحرب؟ إقليم جوبا لاند. الجيش الصومالي اتهزم واضطر ينسحب من الإقليم.

وهنا، وبعد ما حضرتك عرفت كل حاجه عن أقاليم الصومال اللي انفصلت واللي انشقت، أقاليم الصومال اللي عماله تضرب في بعض وتحارب في بعض لحد ما بقى لها مصالح مختلفه عن بعض مع دول أجنبيه هي كمان مختلفه عن بعض، بتدرك إن الصومال علشان ترجع دوله واحده تاني محتاجه اللي يساعدها ويمد لها إيد الرحمه، مش يروح يدعم كل فصيل لوحده علشان يحافظ على تقسيمهم وانفصالهم بالشكل اللي يحقق له مصالحه ويخدم له أجنداته.

وهنا حصلت الخناقة بين الامارات وحكومه الصومال. الصومال عايزه يبقى لها رأي، عايزه تبقى صاحبه قرار، فرفضت تمشي ورا الامارات في خناقتها مع قطر. ومن بعدها رفضت إن الامارات تدخل فلوس مجهوله المصدر والغرض لأراضيها. الصومال رفضت كل ده، حتى ولو كان الثمن إن الصومال تخسر مرتبات الجيش اللي الامارات كانت بتدفعها، حتى ولو كان الثمن إن الامارات تقفل المستشفيات الخيريه اللي فتحتها للشعب الصومالي، حتى ولو كان الثمن إن الامارات تغضب على النظام الحاكم في الصومال. كل ده ما فرقش مع الصومال وقررت إنها تصادر فلوس الامارات اللي اتضبطت في مطار مقدشي. ورغم إن الامارات حاولت تدافع عن نفسها وتشرح للصومال إن الفلوس دي رايحه لمرتبات الجيش، ما خد بالك الامارات برضه ممكن تبقى مظلومه، إلا إن الحكومه الصوماليه ما اقتنعتش وصادرت الفلوس كلها. الكلام ده كان سنه 2018.

لحد ما تيجي سنه 2026 والصومال تتفرج صوت وصوره على الامارات وهي بتدعم إقليم صومالي لاند وهي بتستثمر في أراضيه وبتساعده على الانفصال. كل يوم أكتر من اللي قبله. اتفرجت على الامارات وهي بتبني قاعده عسكريه في صومالي لاند وبتستحوذ على ميناء بربره لمده 30 سنه جايه. اتفرجت على الامارات وهي بتدرب قوات إقليم بونتلاند وبتوسع من تواجدها في ميناء بصاصه المطله على خليج عدن ومضيق باب المندب. اتفرجت على إسرائيل حليف الامارات وهي بتعترف لصومالي لاند وبتعلنها دوله مستقله عن الصومال كدوله. وده رغم إن الامارات طلعت بعدها بيان أكدت فيه على وحده الصومال وسلامه أراضيه، يعني بتحاول تثبت لحكومه الصومال حسن نيتها. إلا إن حكومه الصومال برضه كانت بتتفرج صوت وصوره على الامارات وهي بتدعم الميليشيات المعادية للسعوديه في اليمن واللي اتسببت في اندلاع حرب كامله انتهت بانتصار السعوديه وسيطرتها مره تانيه على جنوب اليمن.

فما كان من حكومه الصومال إلا إنها لغت كل اتفاقياتها مع الامارات علشان بس تخرجها من الأراضي الصوماليه. خلاص كده، شكرا، إحنا مش عايزين حضرتك هنا تاني.

لكن هنا حصلت المشكله. حكومه الصومال لما لغت كل الاتفاقيات اللي بينها وبين الامارات، كان الغرض من تصرفها هو الحفاظ على وحده الأراضي الصوماليه وتوحيد أقاليمه مره تانيه. إلا إن الأقاليم المواليه للامارات زي صومالي لاند وجوبا لاند وحتى بونتلاند رفضوا قرار إلغاء الاتفاقيات وقال لك: إحنا مالناش دعوه بالكلام ده، إحنا مستمرين في التعاون مع الامارات وما عندناش معها أي مشاكل. وده معناه إن قرار حكومه الصومال تبل وتشرب ميته، لان بكل بساطه الامارات لسه موجوده في الصومال متحالفه مع أقاليمه المطله على خليج عدن ومضيق باب المندب وحتى المحيط الهندي. وبالتالي مصالحها شغاله وما عندهاش أي مشكله. القرار تقريبًا حبر على ورق. وده لان النتيجه الموجوده على الأرض بتقول إن الامارات لسه موجوده في الصومال وقادره تأمن مصالحها.

وهنا يفضل السؤال لحضرتك: تفكيك وتقسيم الصومال لمجموعه أقاليم كلهم بيدوروا الضرب في بعض، بيصب في صالح مين؟ المستفيد من تقسيم الصومال؟ مين المستفيد من تقطيع الصومال اللي بتمتلك مفاتيح البحر الأحمر ومضيق باب المندب وقناه السويس وخليج عدن؟