وصايا العريس "10 مواضيع لازم نفتحهم قبل الجواز.. وبعده"!!

كل سنه وحضراتكم طيبين. الشتاء داخل. والشتاء ده يعني إيه؟ أنا بسميه موسم تزاوج البني آدمين. أه، رغم إن الأعراس والأفراح بتكتر كتير في الصيف عشان الإجازات، بس دايماً الشتاء هو اللي بيبقى عايز الكثير من الحب. فالنهارده نتكلم عن موسم تزاوج البني آدمين. حضرتك هتقول لي: "لكن إحنا نعرف إن مواسم التزاوج دي بتبقى في ممالك أخرى، الحيوانات والطيور والكلام ده". لكن اللي أنا عايز أقول لحضرتك، وإنت ممكن ما كنتش تعرفه، إن الجواز في مملكة الحيوانية أو الطيور والحيوانات وكده شق. يعني مش كلهم زي ما حضرتك متخيل. يعني أي ذكر وأي أنثى. حاجة ما تشوفش ناشيونال جيوغرافيك وديسكفري وبلانت أفريكا والحاجات دي. طب اسمع يا سيدي. في طيور بتقعد تتعب وتتفلسف عشان تبني عش معقد قد يلفت انتباه الأنثى. عشان لما الأنثى، اسم النبي حارسها، تشوفه، تشوف العش ده، تطب، تحس بالأمان. ما هو اللي تعب عشان يعمل ده كله، أكيد أحس معاه بالأمان. علماء الطيور والبط والله بيقولوا كده. النوع ده موجود. بيقول لك إن في سمك بيغير لونه عشان يعجب ويلفت الانتباه. وفي ضفادع بتصحى تسهر طول الليل تغني بصوتها المزعج عشان أنثى واحدة ترد عليه. وإحنا مش عارفين ننام. جوه الذكر شقيان طول عمره. حبايب عيني والله. حبيب عينيا. وطلع المهر والتعب والشقا في كل الأمم. العلماء ما قالولناش يا ترى بقى لما يطلقوا مين هياخد العش؟ وهل العش من حق الزوجة ولا بيرجع للزوج في الآخر؟ المهم العلماء بيقولوا حاجة مهمة جداً. إن مظاهر الحب اللي هو فكرة الله شوف الحمامة بتبوس الحمامة في منقارها. ربي يرزقني زوج صالح يحن عليا زي الحمام بجناحه ومنقاره. العلم قال إن مظاهر الحب في المملكة الحيوانية هي مجرد تكتيك للبقاء. مفيش مشاعر. الحيوان بيشبه الإنسان في نقطة غريزية. ألا وهي الاستمرارية. ولا استمرارية بدون تكاثر وتزاوج. وكل أمة بقى وتقاليدها. هناك بيبنوا عش. وهنا بنكتب قايمة. لدرجة إن العلماء قالوا لك إن الطاووس. الطاووس بيهتم بالتباهي بشعره بريشه الجميل عشان يجذب طاووسة أحلامه. بالرغم إن ده تكتيكياً غير آمن. ليه؟ ريشه متقل ومخليه ظاهر كفريسة. لسان حاله: "عشانك يا طاووسة أدخل أدخل نفسي في حوسة". برضه الغباوة في جنس الذكور. لما تتنيل تحب. واضح مغفلين. الموضوع يكسب. ولو الستات حدانا. عزيزي الراجل عرفوا. عرفوا الموضوع ده. إن الحيوانات والطيور بيعملوا في بعضهم كده عشان يعجبوا. ممكن يكبروا الموضوع. مثلاً مثلاً. في طيور اسمها الفردوس في غينيا. بتقعد تنظف قدام العش في الساحة اللي هو هيرقص قص فيها. اللي هيتزف فيها على العروسة. ويزينها بالزهور قبل ميعاد الفرح بأسبوع. تخيل. ستات تعرف إن ذكر فرس البحر لمؤاخذة بيحمل. بيحمل مكانها. البطريق بيقدم لبطريقته حجر صغير. وهي تبص ويفضل قاعد مستني موافقتها أو رفضها. متوقف عنها هتقبل الحجر ولا لا. العنكبوت الأسود يا حبيب الذكر بتاعه. حبيب قلبي. بيقدم عمره. بيتاكل كل بعد التزاوج. حياة أو موت حرفياً. إحنا بقى مش هنجيب سيرة الكلام ده. إحنا بشر الحمد لله رب العالمين. ربنا كرمنا. فهنتعامل بشكل مختلف. إحنا هنحمل الكلام الماسخ ده. إحنا لينا بقى إيه؟ ولا تانية في الحلقة. أنا بس حبيت أقول لك الشوية اللي فوقها. عزيزي الذكر عشان الكلام اللي جاي ممكن إيه تشوف إن إحنا مظلومين فيه. فوريتك إيه مقاس الذكر في كل الأمم. في كل الممالك. حيوانات وطيور وتحت البحر. قبل ما يدخل بقى بموسم التزاوج البشري. لازم أقول لك كلمتين. قبل ما تتجوز. ولو حضرتك اتجوزت اسمعهم وانصح بيهم. يمكن تفيد الغلبان اللي بيزوق عشه ومستني يرقص رقصته الجميلة أو الأخيرة. أصحابه اللي من دور أول يدوا له بقى الجينسنج والعسل الجبلي ونص الحباية اللي هيسند بيها عرمه أو يوسع بيها خياله. إحنا بقى اللي بعد الفوقة. لما تروح السكرة وتيجي الفكرة. يا سيادة العريس. حضرتك هتدورها إزاي؟ لا لا هي مش لوغاريتمات خالص. بس لازم الدماغ تكون حاضرة. عايزة فهم وإدارة. خد مني 10 زيتونات. بلاش نصايح. أهو أنا عارف إنك عارف كل حاجة في موضوع الجواز ده. فنسميها زيتونة. خد مني 10 زيتونات عشان ربنا يكملها على خير. إحنا يا صاحبي ذكور غنابة. لا نحمل زي فرس النهر لمؤاخذة. ولا ينفع نتاكل ليلة الدخلة زي العنكبوت الأسود. بورقة وقلم واكتب ورايا. الله يصلح حالك. الحب مش كفاية. أول نقطة لازم ناخد بالنا منها عزيزي الزوج وعزيزتي الزوجة برضه. إن الحب مش كفاية. أنا ما قلتش مش مهم. بس مش كفاية. وده واقع وعلم. واقع بنشوفه في محكمة الأسرة. وعلم أكده الدكتور جون جوتمان اللي في جامعة واشنطن. واحد من أهم الاستشاريين في مجال العلاقات الأسرية. اللي أكدوا بعد ما تابعوا 3000 حالة زواج. إن العلاقات الطويلة المستمرة. العلاقات اللي بتصمد. مش المبنيه على الحب. ولكن المبنيه على القدرة على إدارة الاختلاف. ووجود مساحة من الاحترام المتبادل. ده كلامه. قال لنا إنك ممكن تحب وتعيش وتتصور. وفي الآخر ينفض المولد. الحب مش كفاية. لازم تعرف. لازم حضرتك تعرف كويس جداً هي بتدور إزاي الحياة الزوجية بتدور إزاي. بتدور بالتفاهم وبالتواصل. وبوجود معاني كتير. مش أولهم ولا أهمهم الحب. الحب مش أهم حاجة. مفيش الكلام ده. الزيتونة التانية. واسمع مني بقى. عايز تسمع هتسمع. هما هيقولوا غير كده. الزيتونة التانية بتقول إن الجواز هيغيره. هيتغير بعد الجواز. هيتظبط بعد ما نعيش مع بعض. قلناها كتير. قلناها كتير. ما تعشمش كتير يا عريس. ما تعشميش كتير يا عروسة. الجواز ما بيغيرش بني آدمين. ما بيغيرش حد. الناس بتتغير لما تقرر تتغير. لما تصدق مع نفسها. وده مش سهل خالص. واحد ما اتغيرش عشان أبوه ولا أمه ولا سمعته ولا مستقبله ولا الصح ولا المنطق. هيتغير عشان واحدة لسه مكتشفه إن هي موجود على سطح الأرض من شهر ولا سنة؟ مش نعل بقى. ثلثين عهود الحب كذب. والثلث الأخير صدق. ما في وعد اللي قاله قاله هو عشمان أو طمعان أو سكران. فيا صديقي يا عزيزي الزوج من الأول. أو الزوجة لو حبيتي تسمعيها. ما هي تسر الاثنين. من الأول وعلى الأبيض. ما حدش هيتغير عشان حد. الجواز مش عصا. مش عصاية سحرية. فخليك مستعد لده. لو كنت من اللباني حياة على الوهم والوعد والعشم. صدقني الجوازة دي مش هتتم. الزيتونة التالتة. أوعى عاد تبيع الدنيا عشانها. أقرب طريق من نقطتين خط مستقيم. صح؟ طب بص. لما تيجي تضحي عشان اسم الله عليها حلوة وانت بتحبها. ضحي بما لا يربك حياتك. هتبيع الدنيا عشانها؟ طب وهتعيش معاها فين؟ تبعت الدنيا عشانها؟ بص عشان تبقى فاهم. الحب مش إنك تاخد. الحب إنك تدي. وعشان تدي لازم تكون مليان ومستقر ومتزن. أوقات كتير بنلعب دور روميو وعنتر وذكر العنكبوت الأسود لمؤاخذة. ونرجع نزعل بعدين. ما تبيعش الدنيا عشان حد. لأنك مش هتعيش في كوكب بلوتو. هتعيش وسط الناس اللي أنت بعتهم عشان النوس. اقطعوا روميو يا أخي. ويخرب بيتها السيمة اللي قيموا الحب. الحب والمشاعر بالتضحية والجنون والهبات. الجواز بنى مش هد. تعاون مش أنانية. اتزان مش شطط. واللي تحبها المفروض تخليك تحب الدنيا. مش تحارب الدنيا. عشان الزيتونة الرابعة بتقول كلمة حاضر بتريح. لما تتقال بعقل. حاضر. لما تقولها الزوجة لجوزها لازم تكون صح. تتقال أصولها. لأن في حاضر معناها أنا واثقة فيك. وفي حاضر أنت صح. وفي حاضر لحد ما تكون قادر تتكلم. وفي حاضر عشان أنا بشتري خاطرك. وفي حاضر عشان بتقي شرك. وفي حاضر عشان مالوش فايدة الكلام. والراجل أي راجل على فكرة محتاج يسمع حاضر. بس الراجل الصح بيعرف مراته إن حاضر بتريح. مش حاضر بتاع مش عايز نفس. لا حاضر اللي فيها مودة واحترام وعذر. حاضر بتريح لما تتقال بعقل وتفهم. فيا عزيزي الزوج علم مراتك تقول حاضر. بعد ما تفهمها. تقولها ليه وإزاي. تقولها إيه بحب. مش بقله حيلة. عايز مراتك تريحك وتقول حاضر. فهمها. تقولها إزاي. مش تشتكي وتقول مراتي ما بتقولش حاضر. الزيتونة الخامسة. استمتع بتعبك واشتاق للفسحة. إنتوا عارفين إنتوا البيت الشعر اللي أنا بحبه بتاع ابن زيدون اللي بيقول لك: "اغتنم صفو الليالي إنما العيش اختلاس". بيت شعر ليه معنى أو معاني. بيهمنا منهم معنى واحد. اغتنم صفو الليالي. فلو في ليلة حلوة ما تضيعهاش. ولحظة حلوة امسك فيها. وافهم كويس إن الشقا غير التعب. كل الناس بتتعب. حتى البهوات الـ "لافندايه" اللي عندهم شركات وبيركبوا كل يوم عربية شكل بيتعبوا. أقسم بالله بيتعبوا. تعب بيضرب عندهم في ضغط وسكر وتوتر وقلق ومهدئات. بس مش كلنا شقيانين. وأنا هنا بقصد شقا النفس. في واحد بيتعب بس بيغتنم. بيغتنم كل لحظة حلوة يكسر بيها توتر الليالي الطويلة. الجواز. الجواز مش حياة رومانسية. الجواز تعب عادي. بس في لحظات حلوة اختنمها. اشرب كاس الهنا حتى الثمالة. ونام واصحى شوف اللي وراك. واستمتع بتعبك واشتاق للفسحة. وما تتعشمش تبقى كلها فسحة. وأوعى تخلي تعبك فيها شقا. الزيتونة السادسة. بتقول لك إن علمياً بتوع علم النفس بيأكدوا إن ما فيش ست باردة. أوبا. أه والله بيقولوا كده. عملياً على الأرض. تجربة بتثبت إن برود العلاقة. العلاقة الخاصة. وقفلان الست منها. مش بس عشان ناشز واتشرست وفقدت أنوثتها. أه ده موجود على فكرة. ما نكرش. بس التجارب بتقول إن السبب الرئيسي في ده هو الراجل. الرئيسي. مش الوحيد برضه بما يرضي الله. هنقول لنا ولا علينا. الراجل سبب رئيسي. ومش أنا اللي المفروض أقول لحضرتك إن كل ست وليها مفتاح. سواء نفسياً أو جسدياً. وجزء من متعة وجود الحياة الزوجية جاي من الاكتشاف الواعي المستمر لنفسك ولشريك حياتك. مشكلة الراجل الشرقي في الغالب إنه فكر الرجولة يا عيني بتطلع مع الشلب. ماترباش إن الرجولة موقف وممارسة. ومغارمها أكبر من مغانمها. ومن ضمن مغارمها المبادرة. المسؤولية. يعني ما ينفعش تستسهل فكرة إن مراتي باردة لمجرد إن حضرتك كسلت أو فشلت تلاقي المفتاح بتاعها. أو في دماغك تصور أو نمط متخيل إن الست لازم تكون عشان تبقى ست بجد. على فكرة أنا ما بحملكش فوق طاقتك. لا أنا بحترم فيك رجولتك. وبفترض إن مقامنا كرجالة إن إحنا نجيب من الآخر. لا وبعد الآخر بشوية. وحتى لو الكلام بيوجع. وبعد الآخر بشوية. بتقول لك عملياً نادر جداً لما تلاقي ست باردة. أنا أوافقك إن طبيعة الحياة الراس سلاية كسرت غير قليل من أنوثة المرأة. بس حق ربنا إن إحنا كرجالة محتاجين نراجع مواقفنا وسلوكنا. يمكن نلاقي مفتاح يدورها بعد ما كنا مفكرينها ما بتدوروش. ما فيش ست باردة. في نوعين. في ست عدوة أنوثتها. وراجل ما بيعرفش يتعامل مع الأنثى اللي جوه مراته. دول الصنفين اللي موجودين. أبر نفسك. وأوعى تكون من الصنف الثاني. أبر نفسك. وأوعى هتكون من الصنف الثاني. لو هي عدوة نفسها تشيل. بس أنت رضي ربنا. الزيتونة السابعة. وأنا ما عنديش يعني مانع إن حد يزعل مني بصراحة. بس أقولها لك بما يرضي الله. ده الستات اللي هتزعل. بص يا صديقي. أي محاولة لفهم واحدة ست هي محاولة لتبليط البحر. حرفياً. لا الست مش مجنونة. لا بتكلم بجد. مش مجنونة. أصل أصلاً ياما في ستات بـ 100 راجل. وفي ستات عقلهن يوزن بلد 100. مش ده موضوعي. اللي عايز أقوله. سواء الست دي بقى كانت وزيرة. كانت مذيعة. كانت موظفة. كانت ست بيت. هتفضل ست بتفكر وتربط وتركز وتحلم. وحلمها يتحقق. وعندها حاسة سبعة وتسعة. وعيل منهم. مش كلهم. بس غير قليل كتير جداً. أكثريتهم هرموناتهم بتلعب بيهم. يعني عندك تركيبة مش شبه التركيبة دي. وحشة؟ لا. هي بتخليهم أشطر مننا في حاجات كتير. وده برضه مش موضوعنا. موضوعنا إن وحضرتك بتتعامل معاها. آمن إن في في عرف علاقتك بمراتك مبدأ اسمه: "هي كده". هي كده. هي كده. ما تحاولش تفهم كل حاجة. أه والله. راضي وتفهم. مش أفهم. راضي وتفهم وماشي. ماشي الدنيا. وده والله ما استخفاف بمقاب مها ولا بمخها. حوا. حواء لو صدقت هتقول لك إن هي نفسها أوقات مش بتفهم نفسها. فانت عايز تفهمك؟ أقول لك على سر. كتير من الستات لما بييجوا يتكلموا يعني إيه ويتكلموا عن نفسهم. بيقول لك: "بص، إحنا ما بنفكرش زي الستات. إحنا ما بنحبش نراغي زي الستات. إحنا مالناش في شغل الست". هي دي بقى المصيبة. تواعي بالمصيبة. ست بتقول إن هي مش زي ستات. بس لازم لما تيجي تعملها تعملها كست. وتحتفي بأن هي ست الستات. وبعدها على طول تأكد إن هي أعقل من كل الستات ومش زيهم. يا أخي قسماً بالله نزار قباني مبالغ لما قال على لسان واحدة ست: "قل لي ولو كذباً كلاماً ناعماً". أقسم بالله إحنا واصلين للحته دي فعلاً. فما تركزش بقى. قول كلام ناعم بقى. قول كلام ناعم. ها. وقدام اللي حضرتك مش مستوعبه ده. أنا عايزك تستخدم استراتيجية التغافل. لازال التغافل من شيم الكرام. أو استراتيجية السلامة. طوبى لمن نام راضية عنه المدام. عشان قفلة الوش على السرير بتجيب الفقر. ربنا يكفيك شرها. الزيتونة الثامنة. بتقول الراجل ملوش ملكة. دي عبارة بنقولها كرجالة واحنا بنوصي بعض وصايا القوامة. الراجل الصح ما ينفعش يكون ليه ملكة. نقطة ضعف. وأنا موافق جداً على العبارة دي مع إضافة مهمة. ألا ضميره. الراجل اللي بجد ملوش ملكة إلا ضميره. يا ويلك يا عزيزي الذكر لو ليك ملكة. أنا بخلي بالك. ما بقولش تخبي على مراتك مشاعرك. المفترض إن حضرتك تختبر الأول رجاحة مخها. ووقع الحقائق عليها. ومدى حكمتها. لو مراتك خفيفة. أو تربيتها اتفاجأت إن هي بعافية. أو لقيتها كفل لها الشر في مستوايه. فلو مسكت ملكتك وعفقتك هتزعلك. الراجل اللي بجد مش مدعي. أه يعني مثلاً إيه؟ أه بحب الهدوء والراحة والسكس. بس بالأصول. أدوس على أي حاجة بحبها لو الثمن كرامتي واحترامي لذاتي. ماليش ملكة. أه ما بحبش الدوشة مشاكل. وأميل للهدوء والحكمة. ومش بحب التصادم. بس لو ده هيطمع الشخص اللي قدامي فيا في شر. أشتر أنا للحرب. وللحرب أنا. تيجي بقى هتتقل لها يا فلان. هتوزن. توزن. مالكش ملكة. بس محترم. ترمي من غير طغيان. بترفع راسك باحترام. مش بكبر. مفيش ملكة ليك ولا كسرة. بس في نفس الوقت بتقف عند حدود ربنا. بتقف عند الحق. وما تقفورش في إثبات قوتك. مالكش ملكة. خلي مالكش ملكة. بس لازم تكون عندك ضمير. الزيتونة التاسعة. وبتقول في خديجة وفي عائشة رضي الله عن أمهاتنا جميعاً. ستنا خديجة كانت حنينة وحكيمة واستثنائية. ده كلام سيدك. ست كاملة فيها طبيعة الأم. يعني تعاملها مع سيدنا النبي لما نيجي نشوفه ونشوف فكرة إن هي يعني تسيب جوزها يقعد شهر أو يزيد في غار في وسط الجبل. وهو الشاب الوسيم اللي ليه حضور وهيبة. وده مش طبع. الطبيعة دي مش طبع زوجة أكتر ما طبع أم. يعني عندها حنية وتفهم أكتر ما في غيره وتساؤل. الغيرة والتساؤل أصلاً جبله في النساء. ستنا خديجة ما كانتش كده. وخلي بالك هو ما كانش عنده حجة. ما كانش نبي. ده زوج عايز يقعد مع نفسه شوية. شهر وزيادة في كهف في وسط الجبل. قال ليه؟ بقول كده عشان عشان لما مراتك تقول لك إن سيدك النبي رجع من الجبل يحكي لها. لازم تكون فاهم هو حكم مع مين. وكانت بتعمل معاه إيه. خلاص. وعشان قبل ما تقول لي الراجل يعني المفروض يحكي مع مراته زي ما النبي راح لزوجته. ولا أنا خايف وهي يعني طبطبت عليه. لازم نعرف إن هرولته إليها كان يسبق رصيد كبير ومهم. رصيد كبير ومهم. المهم يا سيدي. على النقيض من ستنا خديجة. هنا نجد ستنا عائشة رضي الله عنها. كانت بتغير جداً. وبتمشي ورا سيدنا النبي بالليل لو خرج. فجأة. يعني شوف رايح فين. وكان عليه الصلاة والسلام متقبل ده جداً. وظل ممتن لدعم خديجة لاخر يوم في حياته. ومتفهم لغيرة عائشة وبيراعي قلة خبرتها وسنها. لأن كانت لسه صغيرة لما تزوجها. رضي الله عن أمهات المؤمنين أجمعين. الشاهد اللي أنا عايز أقوله إيه؟ كلهن نساء. بس ما تدورش على بني آدم جوه بني آدم تاني. هتظلم وتتظلم. في خديجة وفي عائشة. الاثنين اختارهم النبي عليه وعلى آله. اتعامل مع كل شخصية بما تفهمه الشخصية. وتقبل من كل شخصية ما تنتجه الشخصية من سلوك ومشاعر وأخطاء. مش بس فكرة ما تقارنهاش بغيرها. لا. أنا طبعاً كمان يا عزيزي الذكر. إنك تدور على الجمال في الشخصية. بدل ما تغيرها لشكل أنت شايف إن هو الجمال. الناس طبايع يا صديقي. فما تغيرش من طبيعة حد. الزيتونة العاشرة والأخيرة. إن كلنا سمعنا عن الزوج الخاين. والزوجة الخاينة. في حد بقى سمع عن الأب الخاين؟ والأم الخاينة؟ قانوناً مش جريمة شرف. مع إنها بتعرّي ضميرنا يا أخي. قانوناً مش جريمة قتل. مع إنها بتقتل المستقبل. قانوناً مش جريمة سرقة. مع إنها بتسرق أمان البني آدم الصغير. ويا ريته كان سرق حاجة تانية. الأب الخاين هو اللي يدخل عياله طرف في مشاكله. سواء في مشاكله مع الحياة. يعني إنه يلعب ويخبط وعياله يدفعوا الثمن من أمانهم واستقرارهم. اللي ما يعرفش يعني إيه أب وسند وجدار. ولسه بيتنطط كأنه بطوله وغيره يدفع الثمن ده. أب خاين. وفي نوع تاني اللي بيدخلهم بقى في خناقتهم عمهم. ويحاول يستخدمهم. ويقطع في نفسيتهم بخنجر. ده أب خاين. مهما كانت الحجة اللي بيستخدمها. عياله كورقة تأديب بعد الانفصال. ويهرب من دوره مادياً ونفسياً في رعايتهم. ده أب خاين. أمهم وحشة. أنت اللي اخترت. ده يدينك تاني على فكرة. لو أمهم وحشة. ده يدينك تاني. اخترت لهم أم وحشة. وبدل ما تقلل من آثار الاختيار الكارثي ده. خند ودخلتهم طرف في الخناق. لا يا أخويا. أنا مش حمل مهاتيه. الله يرضى عليك. هي وحشة وهي غلطانة وهي شطانه. وعيالك بره الجيم. الراجل اللي عياله تحس بالخوف وهو حي. ما بيسامحش نفسه لو كان راجل محترم. فما بالك بقى لو هو اللي بيصدر لهم الخوف. أو ساعد إن الخوف ده يكون جواهم. أو سابهم فيه. ده يبقى أب خاين. [موسيقى] دول كانوا عاشر زيتونات. حكم. مواعظ. هبل. بكيفك. زي ما تشوف. شوف زي ما تشوف. قلنا نديهم لإخوانا الذكور قبل موسم التزاوج. قبل ما يتحسب على صنف الرجالة. رجالة مش رجالة. ونشوف اللي بيعيط. ونشوف اللي بيول. واللي بيوزع شكواه. واللي اتعرف خضته. وقلع توب الرجالة.