Transcription
اوعى تخسر صحتك النفسيه مهما كانت الظروف أو الأحوال. اوعى تخسر صحتك النفسيه مهما داست عليك الدنيا. اوعى تخسر صحتك النفسيه مهما اتأذيت أو اتوجعت أو فقدت فلوسك أو فقدت أحبابك. إلا صحتك النفسيه، أغلى ما تملك في الحياة هو صحتك النفسيه.
خلي بالك، الدنيا بتلف، الدنيا كلها تقلبات. يقلب الله الليل والنهار. فإذا كانت الدنيا ضدك النهارده، مسيرها تحلو بكرة. فلو حلوت وأنت خاسر صحتك النفسيه، مش هتقوم لك قومة.
أوعى تخسر صحتك النفسيه. في شباب كتير مهتم بلياقته البدنية وعنده أوبسيشن إنه يحافظ على شكله وعلى لياقته البدنية. خلي أغلى حاجة في اهتماماتك هي لياقتك النفسيه قبل لياقتك البدنية. في الكورة، أسهل سبب يخلي مدرب يستغنى عن لعيب غير لائق بدنياً. أوى تكون أنت غير لائق نفسياً. أوى الدنيا تفقدك لياقتك النفسيه. في الجيش والشرطة، أهم سبب لقبولك لائق بدنياً. خليك قدام ربنا لائق نفسياً. خليك قدام الناس لائق نفسياً. خليك في الشغل لائق نفسياً.
أغلى ما تملك، اخسر أي حاجة في الدنيا إلا أنك تخسر صحتك النفسيه. أوى تسمح لإنسان أنه يحطم صحتك النفسيه. أوى تسمح لموقف أنه يأذيك ويخلص عليك نفسياً. أوى تسمح لأي شيء في الدنيا أنه يخليك غير لائق بدنياً. أوى تسمح لأي شيء في الدنيا يخليك غير لائق نفسياً.
أنت لازم تحافظ على صحتك النفسيه. سبع علامات من علم النفس ومربوطين بسنة النبي صلى الله عليه وسلم تعرف بيهم إذا كنت صحيح نفسياً ولا للأسف هتكون غير لائق نفسياً. سبع علامات جايبهم منين؟ من علم النفس. وجايبهم منين؟ جايبهم من سنة النبي صلى الله عليه وسلم.
العلامة الأولى: الابتسامة أو العبوس. لو أنت دائم الابتسامة، أنت صحيح نفسياً. لو أنت دائم العبوس، أنت غير لائق نفسياً. عرفت ليه النبي صلى الله عليه وسلم بيقول لك: "تبسمك في وجه أخيك صدقة". صدقة ليه؟ لأنك بتساعده نفسياً. وصدقة ليك لأنها بتقويك نفسياً. ادي العلامة الأولى. تاخد كام من عشرة في العلامة الأولى؟ هل أنت صحيح نفسياً ولا للأسف معرض إنك تبقى مريض نفسياً؟
العلامة الثانية: الروح الحلوة المبتهجة اللي بتنشر الجو الجميل، أو الروح المكتئبة المتشائمة اللي بيغلب عليها التشاؤم. أنت أنهو نوع من الاثنين؟ أنت روح ولا روح مكتئبة ولا روح دايماً بتدور على السلبيات؟ أنت روح متفائلة ولا روح متشائمة؟ أنت أقرب لأنهي نوع من الاثنين؟ ويجي حديث النبي صلى الله عليه وسلم: "تفائلوا بالخير تجدوه". روحك المتفائلة هتؤدي أن حياتك تكون كلها خير وبركة. ادي العلامة الثانية. تاخد كام من عشرة في الروح الحلوة أو الروح المتشائمة؟
العلامة الثالثة: حسن الظن بالله. هم في علم النفس ما قالوهاش حسن الظن بالله، لكن المعاني اللي قالوها أحلى ما تسمعها من النبي صلى الله عليه وسلم في الحديث القدسي: "أنا عند ظن عبدي بي". ظنك بربنا إيه؟ هيك ظنك بربنا إيه؟ هيسعدني. ظنك بربنا إيه؟ هيسترني. ظنك بربنا إيه؟ هيعوضني بعد الوجع. حسن ظنك بالله دليل إنك صحيح نفسياً، سليم نفسياً. وسوء ظنك بالله والعياذ بالله دليل إنك مش لائق نفسياً. شوفوا الآية الجميلة: "فما ظنكم برب العالمين". ظنك بربنا إيه؟ حسن ظن ولا سوء ظن؟ دي العلامة الثالثة. تاخد كام من عشرة في العلامة الثالثة؟
العلامة الرابعة: كتوم ولا بتفضفض؟ الإنسان الكتوم معرض أنه ينفجر نفسياً. الإنسان اللي بيفضفض وبيحكي مش مع كل الناس، بس مع الناس اللي بيحبها والقريبين ليه واللي بيثق فيهم، ده إنسان سليم نفسياً لأنه بيفرغ الشحنة السلبية أول بأول. بيتكلم مش قافل على نفسه. دي العلامة الرابعة.
العلامة الخامسة: قولي مين صحابك، أقول لك أنت سليم نفسياً ولا غير سليم نفسياً. لو صحابك شخصيات سلبية، شخصيات سيئة، شخصيات أصحاب سوء، أنت أكيد بعد شوية مش هتكون سليم نفسياً لأن البيئة المحيطة بيك بيئة سلبية. لكن لو صحابك صحبة خير، لو صحابك ناس متفائلة، لو صحابك ناس ناجحة، أنت معرض جداً إنك تحافظ على صحتك النفسيه. تاخد كام من عشرة في نوعية صحابك؟
العلامة السادسة: كيف تتعامل مع السوشيال ميديا؟ بتقضي كام ساعة على السوشيال ميديا؟ بتقضي وقت للتسلية، ما فيش مشكلة وما فيش مانع، بالعكس ممكن تكون علامة صحية. بتقضي وقت للاستفادة، للتواصل، حاجة جميلة. لكن بتقضي ساعات طويلة بتعمل سكرولينج في البحث عن اللا شيء، هي دي بقت جزء من حياتك؟ أنت معرض جداً علمياً إنك تبقى غير سليم نفسياً.
العلامة السابعة والأخيرة: تقوى الله. طول ما أنت متفق مع عقيدتك وقيمك اللي أنت مؤمن بيها، بتتصرف زي اللي أنت مؤمن بيه، الداخل قريب من الخارج، أنت سليم نفسياً. أول ما يبقى في فجوة كبيرة بين ظاهرك وباطنك، أنت مؤمن بحاجة، مؤمن ببر الوالدين، لكن أنت ما بتبرش والديك وعمال تكبر الفجوة، أنت معرض إنك تكون غير سليم نفسياً. أنت هتعيا، أنت هتبقى مريض نفسياً نتيجة عدم التقوى. التقوى من أعظم الحاجات اللي تحافظ بيها على صحتك النفسيه. طب والعلم بيقول لك إيه؟ العلم بيقول لك اتفاقك مع ما تؤمن به سر إنك تبقى سليم نفسياً، اللي هي نفس فكرة التقوى.
سبع علامات من دنا، من سنة نبينا. تدي نفسك كام من عشرة في السبع علامات؟ لو عندك درجة قليلة، اجري زودها. لو عندك صحاب سوء، فاشلين، ابعد عنهم. لو أنت شخصية الغالب عليها الابتسام، افرح، أنت شبه النبي صلى الله عليه وسلم. سبع علامات لصحتك النفسيه. أغلى ما تملك صحتك النفسيه، حافظ عليها. اخسر أي حاجة في الدنيا وأوعى تخسر صحتك النفسيه. حياة أحسن للي يكافح في الدنيا أنه يحافظ على صحته النفسيه. شكراً والسلام عليكم ورحمة الله.