Transcription
شركة شاومي أطلقت بشكل رسمي في الساحة العالمية تليفونات سلسلتها الجديدة، سلسلة Redmi Note 14. والّتي تعتبر من أهم وأقوى سلاسل التليفونات اللي ممكن تلاقيها في الفئة المتوسطة. وشاومي أطلقت لنا هذه السنة السلسلة دي بخمسة تليفونات مختلفة، وده علشان تناسب كل المستخدمين في مختلف الفئات السعرية بتاعت الفئة المتوسطة. واحنا في الفيديو ده هنتعرف على أقل موبايل في السلسلة دي من حيث المواصفات والسعر، وهو Redmi Note 14 النسخة الـ 5G. لأن في نسخة ثانية من الموبايل ده، ولكن داعمة لشبكات الجيل الرابع. فاحنا في فيديو النهاردة هنتعرف على كل مواصفات التليفون ده، وعلى كل مميزاته وعيوبه. وهنعرف هل هو أفضل موبايل ممكن تشتريه في الفئة السعرية دي، ولا في تليفونات تانية أفضل منه. بس يا ريت في الأول تدعموني بلايك وشير، وكمان تشتركوا في القناة، وتفعلوا زر الجرس، وتشتركوا في قناتنا الثانية، قناة سراديب. أنا محمود طمان، وأهلًا وسهلًا بيكم في حلقة جديدة [موسيقى].
من أول الحاجات اللي هتشدك وتعجبك جدًا في التليفون ده هو التصميم أو الديزاين بتاعه. فالتليفون بصراحة شكله جميل، وشيك، وعصري جدًا. فهو أي نعم إلى حد ما بيشبه تصميم أجهزة الآيفون بتاعة أبل، خصوصًا يعني من شكل الـSetup بتاع الكاميرات، وكمان الفريم الصندوقي بتاع التليفون. ولكن شاومي في نفس الوقت حطت التاتش بتاعها على التصميم بتاع الموبايل. تليفون بيجي بخامات تصنيع من البلاستيك بالكامل، البولي كربونيت، واللي جودته كويسة، وكمان جودة تقفيل وتصنيع التليفون محترمة، وهتعجبك. والظهر بتاع التليفون بيجي بديول تون بلونين من نفس الدرجة، وده بصراحة عامل شكل حلو للظهر بتاع التليفون. أبعاد التليفون وسمكه ووزنه مناسبين جدًا، ومش هيبقَ لك أي مشكلة خالص في استخدامك للموبايل، ومش هتتعب عليه بسرعة. فالتصميم بتاع الموبايل ده هو بصراحة تصميم جميل وشيك، وعاجبني جدًا، وأنا بعتبره من مميزات التليفون.
أما بقى بالنسبة لشاشة بتاع الموبايل، فهي بصراحة من أهم وأقوى المميزات اللي موجودة في الموبايل ده. شاشة كده هتَخْطَفْ فِكْرَك! والشاشة دي مساحتها كبيرة، 6.67 بوصة، من نوع AMOLED، بجودة Full HD Plus، بكثافة بكسلات 2400 في 1080 بكسل، وده هيدينا 395 بكسل لكل بوصة في الشاشة. ودي كثافة بكسلات جيدة جدًا بالنسبة لحجم الشاشة ده، وفي الفئة السعرية دي. الشاشة بتيجي بأبعاد عرض كبيرة، 20 لـ 9، وبتستحوذ على حجم الواجهة بتاع التليفون كله. وكمان الشاشة دي عليها طبقة من نوع Gorilla Glass الجيل الخامس، وكمان الموبايل بيطلع من العلبة بتاعته ومتَرَكَّب عليه سكرين بروتكتور. الشاشة دي بصراحة هتقدم لك أداء هايل جدًا، وهتعجبك قوي. فالألوان بتاعتها ممتازة من حيث درجة حدتها وتشبعها وسطوعها، هتحس كده إن الشاشة دي شاشة منورة من جمال وحلاوة الألوان بتاعتها، وكل حاجة بتظهر عليها بتكون واضحة ومتشوشوش قوي. ومن أهم مميزات الشاشة AMOLED دي هي إنها بتدعم خاصية الـHDR 10 Plus، واللي هتحسن جدًا من جودة أي فيديو بيتم عرضه على الشاشة لو هو بيدعم الخاصية دي. وبرده من أهم المميزات اللي موجودة في الشاشة دي هي إنها بتيجي بمعدل تحديث Refresh Rate عالي، 120 هرتز، وده هيخلي أي حاجة تشتغل معاك على الشاشة بتاع الموبايل، سواء فيديوهات أو جيمز، تشتغل معاك بشكل سلس وسريع. معدل التحديث العالي ده هيفرق جدًا في تجربة استخدامك للتليفون. وبالنسبة بقى لأداء الشاشة دي تحت أشعة الشمس المباشرة، فأنت مش هتقابل أي مشكلة خالص، الشاشة أدائها ممتاز، مش هتعاني وأنت بتستخدمها تحت أشعة الشمس المباشرة، وده لأنها بتيجي بدرجة سطوع ممتازة بتوصل لغاية 2100 nits. وكمان حواف اطراف الشاشة حجمهم صغير جدًا، تقريبًا مش موجودين، وده مع الشاشة الكبيرة الكاملة بتاع الموبايل، هتحس كده إنها مستحوذة عليك بشكل كامل وأنت بتستخدمها. فبصراحة الشاشة بتاع الموبايل ده هي شاشة جيدة جدًا، وهتقدم لك أداء ممتاز في عرض أي محتوى عليها من أي نوع، وهي من أفضل الشاشات اللي ممكن تلاقيها في الفئة السعرية دي.
شاومي دايمًا مميزة إنها بتحاول تقدم لنا أفضل أداء في تليفوناتها في مختلف الفئات السعرية، في أي فئة سعرية يعني هي بتنزل فيها التليفون بتاعها، وده بصراحة متوفر وموجود في التليفون ده. فالموبايل بصراحة بيجي بمعالج مميز جدًا من MediaTek، وهو Dimensity 7025 Ultra، واللي طبعًا داعم لشبكات الجيل الخامس. فهو معالج Octa-Core، ثماني النواة، بيجي بتردد لغاية 2.5 جيجا هرتز، بدقة تصنيع 6 نانومتر. التليفون بيجي بثلاث نسخ: نسخة بسعة تخزين 128 جيجا بايت مع ذاكرة عشوائية 6 جيجا رام، والنسخة الثانية بتيجي بسعة تخزين 256 جيجا بايت مع ذاكرة عشوائية 8 جيجا رام، والنسخة الثالثة بتيجي بسعة تخزين 512 جيجا بايت مع ذاكرة عشوائية 12 جيجا رام. ودي أرقام بصراحة ممتازة، وهتكون كافية جدًا مهما كانت استخداماتك. والمعالج اللي موجود في التليفون ده بصراحة هو من أحسن المعالجات اللي ممكن تلاقيها في الفئة السعرية دي كلها. معالج محترم، هيقدم لك أداء متوازن ما بين كل المهام والاستخدامات. يعني في المهام اليومية المعتادة زي استخدام تطبيقات السوشيال ميديا، والتصفح، والمكالمات، والشات، وكل الحاجات دي، التليفون هيقدم لك أداء ممتاز جدًا، مش هيبقى لك فيه أي مشكلة من أي نوع. كل الحاجات دي هتقدر إنك تستخدمها بمنتهى الكفاءة. تليفون هيقدم لك فيها أداء ممتاز جدًا من غير أي مشاكل خالص. وبرده أداء التليفون ده في الـMultitasking، والـمهام المتعددة، هيكون أداء محترم وهيعجبك. هتقدر إنك تفتح أكثر من تطبيق في الخلفية، وتتنقل ما بينهم بشكل سلس وسريع، وده من غير ما يقابلك تهنيج أو لاق في الموبايل. ونفس الكلام ده برده ينطبق على أداء التليفون ده في الجيمز. فأنت هتقدر تلعب كل الجيمز الخفيفة والمتوسطة من غير أي مشكلة خالص، هيشتغلوا معاك بشكل ممتاز، مش هيبقى لك أي تهنيج أو تثقل في التليفون وأنت بتلعب الجيمز دي. وبرده في الجيمز الثقيلة اللي بجرافيك عالي، الأداء هيكون جيد جدًا، هتقدر إنك تلعب الجيمز دي على أعلى إعدادات جرافيك برده من غير أي مشاكل خالص. فبصراحة من ناحية الأداء مع التليفون ده، اطمئن جدًا إنك هتاخد أحسن أداء من التليفون في كل حاجة أنت محتاجها من الموبايل، سواء استخدامات يومية أو جيمز، من غير أي مشاكل.
تجربة التصوير أو الكاميرات هي من أفضل وأمتع التجارب اللي ممكن تمر بيها مع الموبايل ده. فالـ Redmi Note 14 النسخة الـ 5G من شاومي بيقدم لك كده كومبو من الكاميرات مميز جدًا، هيقدم لك تجربة تصوير محترمة جدًا، هتلبّي كل احتياجاتك. فالتليفون جاي بكاميرا خلفية ثلاثية. الكاميرا الأساسية بتيجي بدقة 108 ميجا بكسل، بفتحة عدسة F/1.7، وهي كاميرا Wide، وبتدعم الـAutofocus، وكمان ملحقة بمثبت OIS. والكاميرا الثانية فهي كاميرا Ultra Wide، الخاصة بالتصوير بزاوية واسعة، وبتيجي بدقة 8 ميجا بكسل، بفتحة عدسة F/2.2. والكاميرا الثالثة والأخيرة فهي كاميرا ماكرو، وبتيجي بدقة 2 ميجا بكسل، بفتحة عدسة F/2.4. والثلاث كاميرات دول ملحقين بفلاش LED من قطعة واحدة. وزي ما قلت لك إن الكاميرات دي بصراحة بتقدم لك تجربة تصوير مميزة، فأنت هتقدر باستخدام الكاميرا الأساسية بتاع الموبايل في الإضاءة القوية أو في ضوء النهار إنك تاخد بيها صور قوية جدًا، وده في كل حاجة في الصورة، ألوان ممتازة، درجة حدتها وتشبعها هايلين جدًا، هيعجبك قوي، هتحس كده إن الصور هتنطق من جمال وحلاوة الألوان بتاعتها، تفاصيل كتير وواضحة ودقيقة، والألوان مظبوطة ما فيش لون داخل على الثاني. تجربة تصوير مميزة جدًا بصراحة وهتعجبك جدًا، مش هتلاقيها غير في التليفونات أغلى من ثمن الموبايل ده بفرق ملحوظ. وبرده بالليل أو في الإضاءة الضعيفة، جودة الصور ما بتقلش كتير، والصور بتفضل محافظة على جودتها بنسبة كبيرة، كمية النویز والتشويش اللي بيظهروا فيها بيكونوا قليلين جدًا، وهتفضل صور محترمة وهتعجبك. هتقدر تعتمد على الموبايل ده إنك تاخد بيه صور بالليل، صور مميزة. وكمان هتقدر باستخدام الكاميرا الـUltra Wide إنك تاخد صور واسعة بأكبر مساحة ممكنة، واللي أدائها بالنهار أو في الإضاءة القوية بيكون أداء كويس، هتقدم لك تجربة جيدة، ولكن بالليل طبعًا الجودة بتاعت الصور دي بتقل جدًا، وبيظهر فيها نویز وتشويش كتير. وبصراحة هو ده المعتاد يعني في معظم أو كل الكاميرات الـUltra Wide في الفئة السعرية دي، وفي الفئة السعرية الأغلى كمان. وهتقدر باستخدام الكاميرا الماكرو إنك تاخد صور قريبة بكمية تفاصيل كتيرة، وأداؤها أداء مقبول جدًا، شبه كل الكاميرات الماكرو برده اللي موجودة في الفئة السعرية دي، وفي الفئة السعرية الأغلى. وكمان تجربة الذكاء الاصطناعي في التليفون ده هي تجربة هايلة وهتعجبك جدًا. فأنت هتقدر باستخدام مميزات وخصائص الذكاء الاصطناعي اللي موجودة في التليفون ده إنك تعدل في الصور بدرجة كبيرة جدًا، وإنك تطلع صور ممتازة بأشكال مختلفة، وهتقدر إنك تعدل على الصور دي بشكل كبير وبأريحية علشان في الآخر تاخد تجربة تصوير مميزة جدًا، صعب إنك تلاقيها في أي تليفون ثاني في الفئة السعرية دي. ولكن بقى للأسف من أكتر الحاجات اللي ما عجبتنيش في الكاميرات بتاعة الموبايل ده إنه ما بيدعم تصوير فيديوهات بجودة 4K. فأنت يا دوب بس هتقدر تصور فيديوهات بجودة Full HD Plus، بدقة 1080 بكسل، بـ 30 فريم في الثانية. والمثبت البصري، الـOIS، اللي موجود في الموبايل ده هيساعدك إنك تصور فيديوهات ثابتة مش مهزوزة، وطبعًا ده هيزيد من الكواليتي بتاع تصوير الفيديو. وكل الكاميرات دي بتيجي بمثبت إلكتروني EIS.
الكاميرا السيلفي اللي في التليفون هي بصراحة كاميرا سيلفي جيدة، ولكن ما أقدرش أقول عليها إنها أفضل كاميرا سيلفي في فئتها السعرية. فهي هتقدم لك أداء مقبول. فالتليفون بيجي بكاميرا أمامية وحيدة بدقة 20 ميجا بكسل، بفتحة عدسة F/2.2. فهي هتقدم لك أداء مقبول، هتقدر إنك تعتمد عليها في إنك تاخد بقى صور سيلفي إلى حد ما كويسة جدًا، ولكنها برده زي ما قلت لك مش هتكون أفضل كاميرا سيلفي في فئتها السعرية، ولكنها هتقضي معاك الغرض بشكل كامل.
البطارية هي برده من المميزات المهمة والإيجابية اللي موجودة في الموبايل ده. فالتليفون بيجي ببطارية كبيرة بسعة 5110 ملي أمبير، رقم غريب شوية، مش عارف يعني إشمعنى 5110، ولكن هي بتيجي بالسعة دي، وبالتالي البطارية هتكمل معاك اليوم كله من غير أي مشكلة خالص، من غير ما تضطر تشحنها خلال اليوم، خصوصًا يعني إن المعالج بتاع التليفون ما بيستهلك كتير من طاقة البطارية. ولكن أكتر حاجة بتميز البطارية دي هي سرعة الشحن بتاعتها، فهي بتيجي بسرعة شحن 45 وات، ودي سرعة شحن كويسة جدًا بالنسبة لتليفون في المتوسط. فالتليفون هيتشحن معاك من 0 لـ 100% في حوالي ساعة ونصف تقريبًا، وده هيكون من خلال منفذ USB Type-C 2.0. تليفون بيجي بنظام تشغيل أندرويد 14، مع واجهة تشغيل شاومي الجديدة، الـMIUI 14. والتليفون هيتم تحديثه لأندرويد 15 بمجرد ما تطلعوا من العلبة بتاعته. والواجهة بتاعة شاومي الجديدة دي هي واجهة مميزة جدًا، شكلها حلو هيعجبك قوي، وكمان واجهة مستقرة بشكل كبير، ما فيش فيها باجز أو مشاكل يعني ممكن تضايقك من تجربة الاستخدام، وفيها مميزات كتيرة هتعجبك، زي إنها بتدعم وضع الدارك مود بالكامل. شكل الأيقونات والأنيميشن بتوعها جمال جدًا، هتحس كده إنها واجهة فخمة وتم تحسينها وتطويرها بشكل كبير. وكمان فيها مميزات كتير زي إنها بتدعم وضع الدارك مود بالكامل، وهتقدر من خلالها إنك تعمل نسختين من تطبيقات السوشيال ميديا، وتقسم الشاشة لجزئين علشان تستخدم تطبيقين في نفس الوقت. وكمان من أهم المميزات اللي موجودة في الواجهة دي إنها مليانة بخصائص ومميزات الذكاء الاصطناعي الكتير جدًا، اللي هتساعدك أو هتخليك إنك تعمل حاجات كتير جدًا في الموبايل بمنتهى السهولة. ودي بقت سمة بصراحة في كل التليفونات، حتى في الفئة السعرية اللي أرخص من كده. فأنت هتقدر باستخدام مميزات أو خصائص الذكاء الاصطناعي دي إنك تعمل مهام كتير جدًا بمنتهى السهولة والبساطة بدون مجهود بضغط زر. وطبعًا ده هيساعدك في حاجات كتير، وهيزود إنتاجيتك بشكل ملحوظ. وبرده من أهم المميزات اللي موجودة في التليفون ده هو إنه هيجي له تحديثات للسوفت وير لمدة سنتين، وتحديثات أمنية لمدة أربع سنين.
تليفون بيدعم تركيب شريحتين من نوع Nano-SIM، والشريحتين دول بيدعموا الاتصال بشبكات الجيل الخامس، الـ5G. وبرده هتقدر إنك تركب كارت ذاكرة خارجي، MicroSD Card، وده حتى 1 تيرابايت، ولكن في الحالة دي هتضطر تستغنى عن الشريحة الثانية. التليفون بيجي بمستشعر بصمة أسفل الشاشة، Optical، والمستشعر ده دقيق كويس من حيث الدقة أو السرعة بتاعته. وكمان التليفون بيدعم خاصية الـFace Unlock، علشان تقدر تفتح التليفون بتاعك باستخدام بصمة الوجه، الـFace ID، واللي بتشتغل بشكل كويس من حيث دقتها أو سرعتها. وبرده من أهم المميزات اللي موجودة في الموبايل هو إنه بيجي بسماعات ستيريو، والسماعات دي صوتها كويس جدًا من حيث العلو أو نقاء بتاعها، وكمان بتدعم خاصية الـDolby Atmos. فالسماعات الاستيريو الممتازة دي، مع الشاشة الكبيرة الكاملة AMOLED اللي بجودة عالية اللي موجودة في الموبايل، هيقدموا لك مع بعض كده تجربة ملتيميديا هتكون مبسوط بها جدًا. التليفون بيجي بمستشعرات التقارب، ولكنه للأسف مستشعر سوفت وير افتراضي مش هاردوير. وكمان بيجي بمستشعرات التسارع، والدوران، والبوصلة، والـGPS اللي في الجهاز دقيق كويس من حيث الدقة والسرعة بتاعته. وكمان الموبايل موجود فيه مستشعر الاتصال قريب المدى، الـNFC، وده بقى مستشعر مهم وضروري جدًا دلوقتي. وكمان موجود فيه مستشعر الـIR Blaster، علشان تقدر تستخدم التليفون كجهاز ريموت تتحكم بيه في الأجهزة الكهربائية. وكمان الموبايل موجود فيه راديو FM، ومستشعر Gyroscope. والتليفون مقاوم للغبار والمياه بشهادة IP64، وبيجي بإصدار بلوتوث 5.3.
التليفون بيجي بثلاثة ألوان: أسود، وبنفسجي فاتح، وأخضر فاتح. وعلبة التليفون بيجي فيها الشاحن السريع، وسلك توصيل USB Type-C، وجراب للموبايل، ودبوس درج الشريحة، والضمان، وكتاب التعليمات. وسعر بيع التليفون بيبتدي من أول 250 دولار أول ما التليفون ده يكون متاح للبيع في السوق. هسيب لكم لينكات الشراء تحت في صندوق الوصف، علشان اللي حابب يشتري التليفون ده.
Redmi Note 14 النسخة الـ 5G من شاومي هو بصراحة من أفضل وأحسن التليفونات اللي موجودة في الفئة المتوسطة دلوقتي، أو من أفضل تليفونات بداية الفئة المتوسطة. فبصراحة الموبايل بيجي بمجموعة من المميزات والمواصفات المحترمة جدًا بالنسبة لسعره: تصميم فخم وشيك، شاشة ممتازة من حيث دقتها ونوعيتها، معالج محترم جدًا هيلبي كل احتياجاتك بمنتهى السهولة واليسر، كاميرات خلفية هايلة جدًا هتعيشك تجربة تصوير ممتعة، وكمان خصائص الذكاء الاصطناعي اللي متوفرة بشكل كبير جدًا، بالإضافة كمان لكل الخصائص والمميزات الثانية اللي إحنا اتكلمنا عنها خلال الفيديو. بالإضافة كمان لأن سعر التليفون يعتبر سعر كويس جدًا، مش غالي بالنسبة لكل المواصفات دي. وطبعًا أحب أشوف آرائكم وأفكاركم عن الموبايل في التعليقات أسفل الفيديو.
في نهاية الحلقة بشكر كل واحد شاف الفيديو للنهاية، وطبعًا ما تنساش اللايك والشير، ولو دي أول مرة تشوفني، يا ريت تشترك في القناة، وتفعل زر الجرس علشان تكون أول واحد يشوف الحلقات الجديدة. أشوفكم الحلقة الجاية، والسلام عليكم ورحمة الله وبركاته.