🤯انت محترق نفسيًا| علامات المرور بضغوط نفسية تودي الي الاكتئاب

لو حاسس انك بقيت عصبي بزياده، حساس بزياده، نظام نومك واكلك اختلف تماما، حاسس ان مودك، وحاسس ان كل حاجه في حياتك اتغيرت وما قعدتش تستمتع بالحياه زي قبل كده، واللي حواليك بداوا يقولوا لك انت سلوكك اتغير، انت اتغيرت، ما بقتش زي زمان.

بحب ان انا انصحك انك تقف عند المقوله دي، وتقف عند سلوكك وافعالك، وتسمع الفيديو اللي هنتكلم فيه عن هل فعلا التعرض لفترات ضغط نفسي شديده يؤدي الى الاجهاد النفسي.

مين فيكم عنده حلة ضغط اللي بنقول عليها الحلة البريستو؟ الحلة الضغط دي بيبقى معاها كتالوج مكتوب فيه اللحمة تتسلق في كذا دقيقة، سبع دقايق، نحط فيها حاجة معينة، أي أكلة معينة، بيبقى جاي معاها كتالوج انه الحاجة دي علشان تطلع مستوية كويسة بتاخد من كذا دقيقة لكذا دقيقة. لو أنا قلت لك هات الحلة البريستو دي، حلة الضغط، وحط فيها كيلو لحمة، وبدل ما هو مكتوب في الكتالوج بتاعها سبع دقايق، سيبها نص ساعة، يا ترى اللحمة هتطلع شكلها إيه؟ هي مش هتطلع مستوية، هي هتطلع مهرية، يعني هتطلع التكستشر بتاعها أو النسيج بتاعها مختلف تماما ومتغير تماما ومهري زي ما بنقول.

ده بالظبط اللي بيحصل معاك لما تتعرض لفترات طويلة من الضغط النفسي والمسؤولية الكبيرة دون توقف، فبيحصل ما يسمى بالاجهاد النفسي أو الاحتراق النفسي، وده يعني حالة بيوصل ليها الإنسان، بتبقى ليها علامات وليها صفات معينة، وده اللي عايزين النهارده نناقشه. ماذا لو وأنا بسمع الفيديو اكتشفت أن أنا فعلا عندي إجهاد نفسي؟ إيه اللي أنا ممكن أعمله؟ وماذا لو حاسس أن أنا ممكن أكون مؤهل أن يجي لي إجهاد نفسي؟ إيه اللي أنا مفروض أعمله كنوع من الوقاية؟

طب يعني إيه التعرض لفترات ضغط شديدة؟ التعرض لفترات ضغط شديدة ممكن تكون ليها أشكال مختلفة، زي أن أنا أكون متحمل مسؤولية كبيرة على عاتقي ومش بتوقف عن تحمل هذه المسؤولية، يعني ما حدش بيشيل عني المسؤولية، فأنا زي النحلة كده، أنا متحمل المسؤولية ومريح الآخرين وأنا الوحيد اللي شايل الليلة كلها. الضغط النفسي ممكن يجي لما يكون عندي خسارة، قد تكون الخسارة مادية أو مهنية أو شخصية، يعني انفصلت، خسرت شغلي، أو مثلا عندي بزنس خاص بيا فحاسس أن أنا عندي مسؤولية وبخسر، فدايما الإحساس الخسارة أو الفشل يؤدي إلى ضغط نفسي.

ممكن كمان الضغط النفسي بيجي لما أكون واخد الشغل شوية على عاتقي، يعني حتى لو أنا موظف مش شرط يكون عندي بزنس خاص بيا، ممكن أكون موظف ولكن أنا يتهيأ لي أن الشركة دي مش هتنجح إلا لو أنا اشتغلت لحد ساعات متأخرة وكمان خدت الشغل بتاعي معايا البيت وقعدت فضلت اشتغل مبوظ نظام نومي وشغلي وأكلي ليه؟ لأن أنا عندي إحساس بالمسؤولية كبير أو شايل شيلة تقيلة قوي على قلبي ومش بلاقي وقت فراغ أن أنا أفرغ فيه عن ضي.

طب هل فعلا كل اللي احنا قلناه ده، اللي هو الضغط النفسي المتكرر والمتزايد وتحمل المسؤولية لفترات طويلة، هل فعلا ممكن يغير من سلوك الإنسان؟ من سلوك الإنسان يعني مش بس مزاج الإنسان، لا من سلوكه بالفعل، وده للأسف حاجات، دي حاجة الناس ما تعرفهاش قوي، أنه لما الواحد سلوكه بيتغير، بينسى هو إيه اللي عدى بيه علشان يؤدي إلى تغيير سلوكه. إحنا بناخد على آخر لقطة بنقول للإنسان اللي حواليه اللي قصادنا، أنت اتغيرت، أو أنت نفسك بتحس أنك ما عدتش طايق نفسك، بس اللي إحنا بنقوله دلوقتي إن إحنا محتاجين أن إحنا نتوقف ونشوف هل فعلا سلوكي اتغير؟ طب سلوكي اتغير ليه؟ وإيه اللي أنا المفروض أعمله علشان أرجع لنفسي القديمة؟

من مظاهر تغير السلوك عند الإنسان، زي ما قلت، الحساسية الزايدة، يبقى صعبان عليك نفسك على طول لأنك أنت شايل شيلة تقيلة ومش قادر أنك أنت تفرغ عن نفسك أو مش قادر أن أنت تفضفض عن مع حد، ليه؟ لأن هيقولوا عليك أنك أنت مش قد المسؤولية. ففكرة الحساسية الزيادة، يبقى صعبان عليك نفسك، أنك أنت تبقى عندك ميل للبكاء، ميل للعزلة، ودي رقم اتنين من مظاهر تغير السلوك، أنك أنت تكون عندك انحصار اجتماعي أو عزلة اجتماعية، أنت مش عايز تضيع وقت مع أي حد وتتكلم مع أي حد، أنت عايز عايز بسرعة تنجز اللي وراك، أو مكسوف من الخسارة اللي حصلت لك، فالعزلة والانحصار الاجتماعي يدل أيضاً على التعرض لضغط نفسي شديد.

المظاهر أيضاً تغير السلوك أنك أنت تبقى في حالة تفكير دائم، مش عارف تفصل، يعني نايم وأنت بتفكر وبتصحى وأنت بتفكر. من مظاهره أيضاً أنك أنت تبقى نايم وأنت متغب، يعني حامل هم اليوم الجديد، هيصحى يبقى فيه شكله إيه ومنتظر منه إيه، لأنك أنت منتظر دايماً توقف الأسوأ، توقع البلاء، ليه؟ زي ما قلت لأنك أنت متعرض لضغوط ولأنك أنت تعرضت يمكن لخسارات كتيرة، فبالتالي تفسيرك لكل الأمور بيجي ناحية الحتة السلبية، اللي هو ربنا يستر إيه اللي ممكن يبقى بعد كده.

من مظاهره أيضاً الخوف من الفشل والخوف من اتخاذ القرارات.