عاجل | إيران تستعد لسيناريو النهاية و تستعد لتلغيم مضيق هرمز بعد مؤشرات عن تحرك عسكري أمريكي

السلام عليكم، ازيكم؟ الفيديو اللي قدام حضرتك ده فيديو المفروض لمظاهره مليونيه لمؤيدي نظام خامنئي أو النظام الإيراني، حاجة كده زي ما كانت بتطلع في مصر مظاهرات تسمى "آسف يا ريس". دي بقى أنا آسف يا مرشد.

والواقع هنا إن المظاهره دي تم تجاهلها تمامًا من قبل الإعلام الغربي، يعني كل الإعلام الغربي تقريبًا ما شافش المظاهره دي ولا بيعلق عليها، ولا بتنزل وكالات الأنباء ولا في الجرايد الأمريكية أو البريطانية، ما حدش شايف الكلام ده كله.

المفارقة في الأمر إن النظام الإيراني بينزل لك صور للمظاهره دي، وفي نفس الوقت بينزل لك صور للشوارع الإيرانية وهي المفروض خالية من المظاهرات والكلام ده كله. فهل إحنا كده قدام نهاية التظاهرات في إيران؟ ولا وفقًا لـ "صنداي تايمز" البريطانية إحنا في الأيام الأخيرة للنظام الإيراني؟ كلام أول مرة هتسمعه، لأن ببساطة كده نازل في الإعلام البريطاني، مش حتى الأمريكي، فيما يخص تحليل موقف للي بيحصل في إيران.

وهل إيران تلغم مضيق هرمز وتبتدي في ضرب القواعد الأمريكية والإسرائيلية؟ ولا والله الأمر ده خلاص اتنسى وما فيش أي تدخل أمريكي؟ خاصة إن اللي قال كده سفير أمريكا لدى إسرائيل مايك هوبكابي، طلع قال لك: "على فكرة ما فيش أي تحركات عسكرية أمريكية لضرب إيران حاليًا". هي الصح، وإحنا رايحين على فين؟ عاوز تعرف؟ هقول لك. عشان أقول لك لازم أحكي لك القصة الأول.

نقلت هيئة البث الإسرائيلية عن السفير الأمريكي لدى إسرائيل مايك هاجابي قوله إن تدخل الولايات المتحدة فيما يجري داخل إيران غير مطروح للنقاش حاليًا، مؤكدًا أن الجميع يراقب ما يريده الشعب الإيراني. وأضاف هاجابي أن الاحتجاجات في إيران تتسع وتشكل مؤشرًا بالغ الأهمية، معربًا عن أمله بأن يكون عام 2026 عام تحقيق إرادة الإيرانيين.

قبل ما أخش في الموضوع، قبل ما أكشف لك التفاصيل، خليني أقول لك إن إحنا معانا راعي قوي جدًا ومحترم جدًا وهو "أبشر بزنس". لو عاوز توسع شغلك في السعودية والإمارات وما عندكش وقت تدور كتير ولا تمشي ورا إجراءات وتضيع وقت، يبقى لازم أقول لك على حل من الآخر. لأن ناس كتير قوي بتبقى عاوزة تتوسع في السعودية والإمارات، وهنا بيسألوا كتير، بس صدقني السؤال الكتير ده بيصدمك بآراء مختلفة، وكل واحد يقول لك رأي مختلف، وقليل جدًا ممكن تعتمد عليه. عشان كده أنا برشح لك "أبشر بزنس"، ناس محترفة وعارفين هم بيعملوا إيه، ولما بيساعدوك كأنهم بيساعدوا نفسهم بالظبط، مش مجرد عميل.

أنت مش محتاج تسيب شغلك وتمشي ورا إجراءات وورق، وانتهى وقت ولا تدخل نفسك في متاهات. هم بيظبطوا لك كل حاجة من أول ما تفكر لحد ما شركتك تشتغل. غير كده، الناس في "أبشر بزنس" محترفة للغاية، والشفافية عندهم مش مجرد كلام، ده سيستم ماشيين بيه الفريق كله، وكل خطوة واضحة ومفهومة. "أبشر بزنس" بتخلص لك الرخص التجارية الخاصة بشركتك، مش بس كده، بيخلصوا لك تأشيرات الإقامة، برضه بيخلصوا لك الحسابات البنكية الخاصة بشركتك اللي بتدوخ ناس كتير جدًا. كل ده بشفافية كاملة وأسعار واضحة من أول خطوة. مش بس كده، "أبشر بزنس" بتقدم لك استشارات في الضرائب والتسويق والمحاسبة وتسجيل العلامات التجارية، يعني بيخلوك تبدأ شغل على طول من غير ما تضيع وقت. صدقني لو عاوز تتوسع في الخليج، يبقى "أبشر بزنس" هو المكان الصح. هسيب لحضراتكم الرابط بتاعهم في الوصف أسفل الفيديو لو حابب تتواصل مع "أبشر بزنس"، وبرشحهم ليك بشدة.

نخش في الموضوع على طول. الجديد اللي معايا النهارده ممكن يكون مختلف بالنسبة لحضرتك وأول مرة هتسمعه فيما يخص الأيام الأخيرة للنظام الإيراني. إيه اللي حصل بالضبط وإحنا رايحين على فين؟ الحقيقة اللي حصل امبارح إن إيران ابتدت تتعامل إن المظاهرات اختفت، وعاوز أقول لك إنهم ابتدوا إنهم ينزلوا مظاهرات تأييدًا للنظام، ابتدوا إنهم يبثوا صور إن والله كل حاجة مستقرة.

وإمبارح برضه عملوا حركة كانت غريبة جدًا بالنسبة لي، دعوا سفراء ألمانيا وبريطانيا وفرنسا وقعدوهم كده قدام شاشة بيعرضوا فيها إن في عملاء لـ "الموساد" أو هم ده ما يعلنوا عليه إن عملاء لـ "الموساد" هم اللي بيقتلوا المتظاهرين، يعني مش الأمن هو اللي بيقتل المتظاهرين، لا، عملاء "الموساد" بيقتلوا المتظاهرين عشان المظاهرات يعني تشتد بشكل كبير جدًا. ليه؟ لأن خد بالك عدد القتلى في إيران وصل 2000 قتيل وفقًا لـ "رويترز" ووفقًا لـ "صنداي تايمز" بالمناسبة، الحلقة دي معظمها من "صنداي تايمز".

فقال لك 2000 متظاهر اتقتلوا إمبارح في إيران.

في المشهد الإيراني الراهن، يقف الجميع أمام لحظة مفصلية تتقاطع فيها العوامل الاقتصادية بالرهانات الأمنية والتجاذبات الدولية. بينما تراجعت حدة التظاهرات المطالبة بالإصلاحات الاقتصادية، شهدت العديد من المدن الإيرانية مسيرات حاشدة مؤيدة للحكومة تدعو إلى الاستقرار والوحدة الوطنية ورفض الفوضى. وفي تطور لافت على وقع الاحتجاجات المتواصلة، وزير الخارجية الإيراني أعلن أن طهران مستعدة للحرب كما هي مستعدة للمفاوضات.

وده رقم كبير جدًا، خاصة مع وعد الرئيس الأمريكي اللي المفروض أدى انطباع للمتظاهرين إن الرقم ده مش هيتشاف بدون تدخل أمريكي. خلاص، وإحنا إمتى؟ إحنا كان بنتكلم في 200 متظاهر ودونالد ترامب عمال يهب النظام الإيراني، وصلنا لـ 2000 متظاهر ودونالد ترامب ما عملش أي حاجة.

طيب، الواقع هنا بيقول لك كذا نقطة مهمة جدًا. أول نقطة خدت بالي منها إن والله الصحف العالمية ما عندهاش أرقام دقيقة وما عندهاش تحليل موقف بالضبط للي بيحصل في إيران، ليه؟ لأن النت مقطوع. وفي مفارقة كبيرة جدًا، إيه هي؟ خد بالك إن "إيلون ماسك" ماسك حركة مجموعة "ستارلينك"، ماشي؟ وأنا جبت فيديو لحضرتك قبل كده للأقمار الصناعية الخاصة بـ "ستارلينك" وهي واقفة فوق طهران عشان يغطوا المظاهرات. و"ستارلينك" دي هتبقى نقطة الاتصال الوحيدة في إيران، خاصة بعد ما إيران قطعت الإنترنت في إيران. لازم تعرف إن "ستارلينك" هتبقى هي المنفذ الوحيد للمتظاهرين إنهم يكلموا العالم الخارجي وينقلوا اللي بيحصل في إيران والوضع الداخلي.

إلا إن في مفاجأة خدت بالي منها إن إيران عرفت تعطل 80% من خدمة "ستارلينك"، ودي مفاجأة كبيرة جدًا. الروس نفسهم ما يعرفوش يعملوها، ماشي؟ ومش بشيد بالنظام الإيراني، أنا بس بحاول أوريك مدى إجرام. خلاص، لازم تعرف إن إيران عطلت 80% وفقًا لـ "فوربس". ارجع للجريدة لو أنت مش مصدق. هم بيقول لك إن حتى نقطة الاتصال الوحيدة بالداخل الإيراني معطلة من جانب إيران، فدي نقطة مهمة جدًا.

يوم السبت تم قطع أيضًا خدمة الهاتف الجوال، ويوم أمس أفادت تقارير صحفية أنه ولأول مرة تمكنت السلطات في إيران من التشويش على خدمة الإنترنت الفضائي التي توفرها شركة "ستارلينك" بفضل وحدات متنقلة لتمكين الناشطين والمتظاهرين من التواصل فيما بينهم والتواصل مع العالم أمام الرقابة المحلية المفروضة على شبكة الإنترنت المحلية. تقارير صحفية إيرانية أشارت إلى أنه رغم وجود عشرات الآلاف من وحدات "ستارلينك" العاملة داخل إيران، إلا أن الخدمات عُرضت للتشويش.

فأنت بتشوف حاليًا اللي فرض عليك النظام الإيراني إنك تشوفه، اللي هو مظاهرات مؤيدة للنظام الإيراني، إنما أنت مش قادر تشوف النقطة الحقيقية. وبالمناسبة، لازم حضرتك تعرف إن "الموساد" حاليًا وأجهزة الاستخبارات العالمية كلها بتحاول تهرب أطباء "ستارلينك" عشان المتظاهرين يعرفوا يستقبلوا إشارات الإنترنت اللي جاية من الأقمار الصناعية. بس زي ما بقول لحضرتك، إيران قدرت إنها تعطل 80% منهم. فدي أمور مهمة جدًا.

الحقيقة أنا واقف قدام كذا نقطة. أول نقطة هي مقالة نزلت في "صنداي تايمز" البريطانية كاتبها اتنين كتاب، كاتب اسمه "ديفيد شارتر" وده موجود في واشنطن، وكاتبة اسمها "جابرييل وينجر".

وجابرييل وينجر لما تيجي تبص على شكلها هتلاقي شكلها حلو، بس هي موجودة في تل أبيب، فهي شكلها مش حلو. طيب، الاتنين كتاب بيقولوا لك إيه؟ والله بيقولوا لك وفقًا للمقالة اللي أنا كنت جبتها قبل كده من جريدة "أتلانتيك"، إن خيارات دونالد ترامب للتعامل مع ملف إيران خيارات صعبة، كلها خيارات سيئة. تدخل عسكري عنيف هيؤدي إن إيران تقصف إسرائيل وتقصف القواعد الأمريكية. تدخل عسكري مش عنيف يبقى أنت بعت متظاهرين وضربت ضربة رمزية كده إنك أبقيت بوعدك، بس الضربة الرمزية دي قوت النظام الإيراني وأضعفت المتظاهرين، لأنك كده خونت المتظاهرين وخليت النظام الإيراني يخش يتوحش بقى. خلاص، أنت كده كلمتك طلعت فشوش. فرضت عقوبات وابتديت تتكلم مع النظام الإيراني يبقى أنت برضه إيه؟ بعت المتظاهرين.

فالحقيقة دونالد ترامب كل خياراته سيئة، بس الصحفيين بيقولوا لك إيه؟ بيقول لك لو هو دونالد ترامب خياراته سيئة، ما بالك بالنظام الإيراني؟ خياراته أسوأ بكتير. ليه؟ فقال لحضرتك لازم تعرف إن النظام الإيراني ده بقى له 47 سنة في الحكم، بس خامنئي اللي جه بعد خميني ده بقى له 36 سنة في الحكم. الراجل عنده 86 سنة وما عينش خليفة لحد دلوقتي، وده أمر خطير جدًا. ليه؟ بتتكلم على راجل يعني قواه العقلية مش زي قوة عقلية لراجل عنده 30 أو 40 سنة. ده بقول لحضرتك 86 سنة، أمر القوة، القوة العقلية مهمة جدًا للتعامل مع الموقف. هو الأشد قسوة على النظام الإيراني، خاصة إن لازم حضرتك تعرف إن كل الناس عمالة تسأل: إيه المختلف في المظاهرات دي؟ وماحدش بيسأل: إيه المختلف في النظام الإيراني؟ النظام الإيراني كل شوية بيضعف، مش بيتحسن. بالمناسبة، إحنا بنتكلم على 47 سنة، النظام الإيراني مش هو نفس النظام اللي أسقط الشاه سنة 1979. ده إحنا بنتكلم عن نظام طالع من عقوبات، طالع على حرب الـ 12 يوم اللي هي استنزفت جزء كبير من صواريخه، طالع مظاهرات كل شوية تتجدد ضده. فانت بتتكلم على نظام مهترئ أو نظام ضعيف أو بيضعف، ماشي.

ثاني حاجة بيقول لك إن المرشد ما عينش خليفة لحد دلوقتي، حلو. هل هينفع يعين دلوقتي؟ استحالة، لأن هو لو جه يعين مثلًا ابنه اللي هو مكتبى، ابن خامنئي، لازم تعرف الانقسامات هتدب داخل النظام الإيراني. فحالياً النظام الإيراني أبرز حل يتعامل معاه هو إنه يتجنب الخلافات، ومن ضمنها عدم تعيين خليفة لخامنئي. وده أمر خطير كان على راجل عجوز وما عندوش خليفة.

الأمر الثاني، خلي بالك، النظام الإيراني اختبر إن هو شاف الروس والصينيين بيبيعوا فنزويلا. وأنا لسه عامل حلقة قلت لحضرتك إن روسيا سلمت فنزويلا للأمريكان عن مفتاح، يعني ما بعتوش خبراء، ما عملوش صيانة لمنظومات الدفاع الجوي. مسؤولة العلاقات الروسية الأوروبية السابقة طلعت قالت إن روسيا سمحت لأمريكا بالتعامل في فنزويلا مقابل إن الأمريكان يدوا الضوء الأخضر لروسيا إنهم يرتكبوا مزيدًا من المجازر في أوكرانيا أو يكفوا تسليح أوكرانيا أو الكلام ده كله.

فالنظام الإيراني شايف إن أبرز داعميه مش بس خانوه في حرب الـ 12 يوم ما قدموش له أي دعم، لا، دول لسه مقدمين قربان للأمريكان، الراس بتاعة الواد مادورو، مادورو سلموه كده، ماشي. فالنظام الإيراني حاليًا مش في موقف قوي.

طيب، الأمر الثالث قال لك: خلي بالك إن أصلًا حاليًا أنت بتشهد مشهد غريب جدًا إن النظام الإيراني ابتدى يعتمد على الحرس الثوري الإيراني وقوات الباسيج من اللازم. يعني مش النظام الإيراني عارف يكلم شعبه بدون اعتراض، ولا حتى يقود المشهد بشكل سياسي صرف. لا، ده ابتدى إنه يتعامل مع الحل العسكري. فانت تدي سلطات للباسيج اللي هي قوات الأمن الداخلي والحرس الثوري الإيراني أكتر من اللازم، وده أمر يقول لك إن في استياء من المرشد للمشهد ده. يعني ده مش مشهد سياسي صرف، لا، ده أنت عمال تستخدم آخر قوة بالنسبة لك.

والحقيقة إن الاثنين كتاب بيقولوا لك: على فكرة، لازم ما تتوقعش قوي النظام يسقط، بس لازم تعرف إنه في أيامه الأخيرة. ليه؟ لأن لازم تعرف إن النظام كل خياراته سيئة، حتى حاليًا هو خياراته أسوأ من السابق. والاثنين كتاب بيحذروا، بيقول لك: خلي بالك لو حصل انشقاق في قوات الباسيج بالذات، لازم تعرف إن دي بداية نهاية النظام الإيراني. اشمعنى قوات الباسيج؟ قال لك والله دي أقل تدريبًا من الحرس الثوري الإيراني، وفي نفس الوقت الجنود بتوعهم كلهم من الطبقة الفقيرة جدًا، مش من الطبقة الوسطى زي مثلًا الحرس الثوري الإيراني أو الكلام ده كله. لا، الطبقة الفقيرة جدًا ومش مدربين كويس.

يعني، فقال لك: خلي بالك، أول انشقاق يحصل في قوات الباسيج ده، ده أمر. الأمر الثاني، خلي بالك إن مش كل القادة الإيرانيين على قلب رجل واحد. أنت هنا بتتكلم على أول اختبار للقادة اللي لسه تم تعيينهم بعد ما إسرائيل جزت الصف الأول من القادة الإيرانيين اللي كانوا موجودين وهم الأكثر ولاء لها. أنت بتتكلم في حرب الـ 12 يوم، إسرائيل عملت كم من الاغتيالات في القادة المقربين جدًا من خامنئي كتير جدًا. فايران لسه معين قادة جدد، وده أول موقف يعتبروا فيه قدرتهم على الولاء وعلى الطاعة.

خلال هجمات الـ 12 يومًا بين إيران وإسرائيل، حددت إسرائيل القائمة لتصفية كبار ضباط في الجيش وفي الحرس الثوري بالتوازي مع قائمة العلماء، وضمت القائمتان نحو 25 اسمًا يجب قتلهم في آن واحد في الضربة الافتتاحية، أبرزهم علي حاجي زاده، قائد القوات الجوفضائية التابعة للحرس الثوري الإيراني.

فده أمر مهم جدًا يجب إنك تنظر له بشكل كبير جدًا. أما الأمر الأخير، قال لك والله كل اللي بيحصل حاليًا هي محاولة إنهم يعيشوا وقت أطول أو يبعدوا النهاية، بس النهاية جاية جاية. ليه؟ تاني، إيران ما عندهاش حلول اقتصادية تقدمها للثوار، والظروف الاقتصادية زي الزفت وهتفضل زي الزفت وهتسوق، هتسوق ليه؟ هتسوق لأن إمبارح دونالد ترامب طلع وقال لك والله إحنا هنفرض عقوبات مضاعفة على النظام الإيراني. يعني شوف كل اللي فات ده، وإنه تقريبًا يعني خلى حياة الإيرانيين جحيم داخل إيران عشان ينزلوا في المظاهرات، دونالد ترامب إمبارح قال لك: لا، ده في عقوبات اقتصادية تانية، وأي حد هيتاجر مع إيران متاجرة عادية مش شرط أسلحة هيتم فرض عليه جمارك والكلام ده كله. فهو بيضيق الخناق على النظام الإيراني.

فالموضوع لازم تعرف إن المظاهرات دي هتتجدد تاني بشكل أو بآخر، لأن المتظاهرين مش لاقيين يعملوا إيه، فهينزلوا.

الرئيس الأمريكي دونالد ترامب فرض تعرف جمركية بنسبة 25% على كل الشركاء التجاريين لإيران.

طيب، ده بالنسبة للنظام الإيراني. ما بالك بأمريكا؟ الحقيقة هنا هنروح لجريدة "فاينانشيال تايمز". جريدة "فاينانشيال تايمز" قالت إيه؟ قالت يا جماعة لو أنت شايف النظام الإيراني خياراته سيئة، فلازم تعرف إن النظام الأمريكي أو أمريكا ودونالد ترامب دلوقتي في موقف صعب جدًا. ليه؟ هو وعد متظاهرين إنه هيتدخل، صح؟

فاللي ضغط دونالد ترامب هو دونالد ترامب، يعني اللي ضغط دونالد ترامب إنه لازم يتصرف ضد إيران هو كلمة دونالد ترامب اللي قطعها على نفسه نتيجة لغروره بعد اختطاف نيكولاس مادورو. فـ "فاينانشيال تايمز" تقول لك: على فكرة، التدخل في إيران مش نزهة. لازم تعرف إن في فرق كبير جدًا بين اللي عمله الجيش الأمريكي في فنزويلا وبين اللي ممكن يعمله في إيران. ليه؟ قال لك أصل فنزويلا على مرمى حجر من أمريكا، يعني فنزويلا دي في أمريكا الجنوبية، وأصلًا أمريكا عندها قواعد، بورتوريكو عندها لها قواعد قريبة جدًا من فنزويلا تسمح لها بالتحرك أي وقت. إنما إيران ده بعيد قوي، بعيد عن إيد الجيش الأمريكي. ثاني حاجة، فنزويلا ما عندهاش خليج أو مش محاطة بحلفاء أمريكا، ده فنزويلا محاطة بأعداء أمريكا، بكولومبيا، بكوبا، بالمكسيك، كل دول أمريكا ما تبكيش عليهم. وفنزويلا ما عندهاش صواريخ تصل لأمريكا. أديك شايف إمبارح الدفاعات الجوية مهترئة وما فيهاش صيانة ومنظومات الدفاع الجوي أي كلام، ما بالك بالصواريخ؟ طبيعي ما فيهاش صيانة برضه.

أما إيران، لا، عندها صواريخ ومحاطة بحلفاء أمريكا. فالثمن هيبقى غالي في التدخل في إيران. فـ "فاينانشيال تايمز" بتقول لك برضه خيارات أمريكا للتعامل مع إيران أمر لازم تعرف إنه شديد الحساسية ومكلف جدًا بالنسبة لأمريكا. بس ما حدش قال لدونالد ترامب يقطع وعود للمتظاهرين ويرفع من طموحاتهم اللي هو نزلوا وأنا في ضهركم. طب هم نزلوا، هتعمل إيه؟ أنت ما تحركتش لحد دلوقتي. بيقول لك 2000 متظاهر مات، ما تحركتش عسكريًا. دونالد ترامب، الإشارات اللي طالعة منه يقول لك إيه؟ يقول لك: على فكرة، أصل الإدارة الإيرانية كلمتني إمبارح وعاوزين زين يتفاوضوا والكلام ده كله. طب أنت لما تطلع تقول الكلمتين دول، ما ده أمر يحبط المتظاهرين. ماشي.

طبيعي النظام الإيراني لازم تعرف إنه لو اتضرب ضربة عسكرية قوية من أمريكا هتبقى نهايته. ماشي. النظام الإيراني حاليًا في نسخة ضعيفة، المظاهرات بتضغط عليه، ولو تلقى ضربة لضرب مراكز القيادة والسيطرة، لاحتياج قيادات إيرانية جدد، لعمل هرجلة في المشهد الداخلي لنظام خامنئي. المرة دي خامنئي احتمالية كبيرة ما يعرفش يناور زي حرب الـ 12 يوم ويعين قادة جدد بدل اللي ماتوا، مش هيبقى عنده.

فالصحف عاوزة تأكد لك النظام الإيراني ضعيف، بس دونالد ترامب متخوف من التدخل عسكريًا نتيجة للخيارات السيئة جدًا اللي قدامه. ماشي. فده أمر مهم جدًا.

أما على الجانب الآخر، فحضرتك لازم تعرف إن المستشار الألماني طلع إمبارح وقال لك: على فكرة، النظام الإيراني في أيامه الأخيرة. ده إيه ده؟ بعد ما إيران جابت السفراء وعرضت عليهم إن "الموساد" بيقتل المتظاهرين في شوارع إيران والكلام ده كله، دلوقتي المستشار الألماني طالع يقول لك: إيران في أيامها الأخيرة. زي ما حك منه كده. طبعًا الكلمة دي يعني شلت وحطت النظام الإيراني وازاي أنت تقول كده؟ ده إحنا نظام قوي وإن إحنا أقوياء جدًا والكلام ده كله.

بس في نقطة مهمة قوي، لو المستشار الألماني قال كده، فهو عنده تقدير موقف. ده أمر. أمر ثاني، لو إيران بتوري إن والله في متظاهرين بيتم قتلهم على أيدي عملاء "الموساد"، فدول مش كلهم متظاهرين. إحنا بنتكلم على 2000 واحد مات، أكيد مش "الموساد" قتل كل دول. ده أمر. لو صح رواية إيران إن والله في عملاء لـ "الموساد" بيقتلوا متظاهرين في الشوارع، فانت هنا قدام حرب أهلية مكونة من ثلاث جهات: الحرس الثوري الإيراني نزل في الشارع، المتظاهرين في الشارع، وعملاء "الموساد" في الشارع. فده أمر خطير جدًا.

بس الملاحظ إن أهم نقطة بالنسبة لي هو التراجع الإسرائيلي عن المشهد، وإن إسرائيل بتخلي أمريكا هي اللي تقود الموقف. إزاي؟ إمبارح إسرائيل قالت وأكدت إن والله إسرائيل مش هتدخل في مشهد في إيران، وإن والله إسرائيل مش هتتوجه أي ضربة لإيران ومش عاوزة تتحرك عسكريًا والكلام ده كله. إسرائيل من ساعة بداية المظاهرات وقيادة دونالد ترامب لكلامه إنه هيوجه ضربة لإيران، إسرائيل بتحاول تكثف تمامًا الرسائل اللي طالعة إنها مش هتحرك ضد إيران. بعتوا رسالة للنظام الإيراني عن طريق بوتين، قالوا له: كلم إيران وقول لهم إحنا مش هنتحرك عسكريًا دلوقتي. عمالين ينزلوا في الصحف إن إسرائيل يعني مش هتتحرك عسكريًا ولا هتعمل أي حاجة.

فليه هم بيعملوا كل الكلام ده؟ والله بيعملوا كل الكلام ده عشان يبانوا في دور الضحايا، لأن إيران بتقول إيه؟ لو اتضربنا هنضرب إسرائيل أول حاجة. قال لك هنجيب إسرائيل من قفاها، هنضرب إسرائيل. فإسرائيل عاوزة تبان في دور الضحية وتبان عكس حرب الـ 12 يوم إنها في حالة دفاع عن النفس عشان أمريكا تسندها للنهاية. واخد بالك؟ وتاني حاجة عشان تبعد عن إيديها تهمة إن والله هي ماجرت عملاء لـ "الموساد" بيقتلوا في متظاهرين أو بيقتلوا في الحرس الثوري الإيراني، فعاوزين يبعدوا نفسهم عن المشهد ده إن لهم دور في تأجيج المظاهرات. بس في نقطة مهمة جدًا إن صحيفة "جيروزلم بوست" طلعت تقول لك: على فكرة، عملاء "الموساد" شغالين على الأرض في إيران بشكل مكثف جدًا. ده اللي قالته الـ "جيروزلم بوست" إمبارح، واللي بيحاول يفضح إن إسرائيل ليها دور بالفعل في إيران وشغالة على فكرة.

ده طبيعي جدًا، ما فيش حد هيشوف مظاهرات نازلة ضد نظام وهيسيبها، خاصة بتتكلم عن 15 يوم أو حتى 16 يوم من المظاهرات المتتالية ضد النظام الإيراني. فالمظاهرات دي بوقت كبير تسمح بتدخل خارجي. فطبيعي إسرائيل شغالة، بس عاوزة تبان في دور الضحية. لو إيران اتضربت هتضربها، فتقول لك: شفت إحنا اتضربنا إزاي؟ إحنا لازم نرد. ماشي. فده أمر مهم جدًا. إسرائيل بتسقف على المشهد في إيران ليه؟ لأن كل يوم بيعدي النظام الإيراني بيتشتت عن العمل العسكري، بيروح إنه يحاول يحل الأمر بتاع المظاهرات. النظام الإيراني بيصبح أضعف يوميًا، والخلافات بطبيعة الحال داخل النظام الإيراني شغالة، يعني في خلافات في وجهات النظر، الناس أكيد مش راضية على اللي بيحصل. فإسرائيل بتسقف.

ودونالد ترامب لازم إنه يتحرك بشكل أو بآخر، ما ياخدش المشهد اللي بيتم بثه في الإعلام الإيراني إن والله كل حاجة هادية ومؤيدي النظام هم اللي في الشارع ومعارضي النظام راحوا خلاص. فده المشهد حاليًا.

دونالد ترامب لوح مباشرة بإمكانية التدخل العسكري في إيران رغم دعوات من المسؤولين الأمريكيين، ومن بينهم نائبه جيدي فانس، للتفاوض الدبلوماسي.

"ننظُر للأمر بجدية، والجيش يدرس الوضع، ونحن نبحث عن خيارات قوية بخصوص إيران."

إيه الكويس بالنسبة لدول الخليج والشرق الأوسط كله؟ والله الكويسة ما تحصلش حرب. ماشي، بس دي حاجة في تقديري إنها يعني ما ينفعش. خلي بالك، كل المشهد بيقول إن أمريكا هتتحرك ضد إيران. إمتى وإزاي ما حدش يعرف. بس في الآخر، حتة إن الشرق الأوسط يتجنب قتال دي حاجة صعب إنها تحصل في إيران. إن إيران لازم تضرب، لازم تضرب. ثاني حاجة، حتى لو المشهد هدي في إيران، إسرائيل هترجع تاني الحرب. حرب في غزة النهاردة نزل تقرير قال لك والله إسرائيل تستعد لعودة الحرب في غزة في شهر مارس القادم. اهو حط لك خط، قال لك شهر مارس القادم هترجع الحرب بكذا. فهنشوف الدنيا ماشية إزاي.

في الآخر، يا رب أكون شرحت لحضرتك الموضوع بشكل مبسط. ويا رب انصر مصر، رب انصر العرب، ويا رب انصر فلسطين، يا رب تحيا مصر. سلام.

أنت مش عارف إحنا مين؟ إحنا اللي الناس بتيجي لنا من كل مكان عشان تشوف بلدنا. إحنا اللي لينا العين، إحنا حضارة بقى لها سنين، والعالم مش عارف سرها. إحنا خفة دم بتضحك القلب.

وكرم بيضرب به المثل، جدعنة وشهامة مش موجودة في زمننا، ورحمة بتطلع من عينينا قبل قلبنا.

إحنا بسمة بتفتح ألف أكلة حلوة بتدي بلدنا طعم. إحنا الأمانة والذكرى الحلوة اللي ما بتتنسيش. إحنا حكاية، حكاية تعجب. خلي أفعالنا تحكي عنا. ربنا أدانعمة لازم نحافظ عليها ونوريها للعالم كله. وري ضيوفنا إحنا مين؟ إحنا مصر.