إفهم فيروس ماربورغ مع #دكتوروليدشوقى

أخبار مرعبة جداً للناس، زي ما أنتم شايفين الخبر اللي ورايا ده. قاعد يقول للناس: "رعب عالمي بسبب فيروس ماربورج". أخبار كتيرة قوي، ده فيروس ماربورج تفشى في إثيوبيا، وهبدي كتير وفيديوهات كتير وناس كتير، وكمية رسائل رهيبة جاية لي: "يا دكتور اتكلم عن فيروس ماربورج".

فبقول لهم: "يا جماعة ما فيش حاجة". طبعاً كثر الرسائل يخليني أعمل فيديو عشان خاطر أقول للناس الحكاية. وأنا عارف طبعاً الفيديوهات المطمئنة للأسف ما بتوصلش زي الفيديوهات المرعبة، ولكن إحنا مش بنقول غير الصح. هم بيقولوا ده عشان خاطر عايزين يعملوا ترند ويوصلوا المشاهدات. طب إيه القصة؟ وليه أنت طالع تطمنا عن ماربورج اللي حتى منظمة الصحة العالمية قاعدة بتحذر منه؟ طب وإيه الجديد؟ يعني هو كم مرة منظمة الصحة العالمية تقول كلام واحنا نقول: "خدوا بالكم الكلام ده مالوش أي أساس من الصحة وهاجس" ويطلع فعلاً هاجس؟ ما فيش جديد. يعني ما انتوا انتوا اعتدتوا علينا بنطلع نقول الكلام ده ويطلع الكلام ده في الآخر هو الصح.

فالقصة ليه بقول لك أنا ما تخافش من ماربورج فيروس؟ أنا لما ببص كدكتور لماربورج وأبدأ أعمل الريسيرش بتاعي والبحث بتاعي عشان أقول لك ده مخيف ولا لا، ببص أول حاجة: المود أوف ترانسميشن. يا ترى ده بيتنقل إزاي؟ يا ترى ده فيروس جديد ولا لا؟ يا ترى حصل منه أوت بريك يعني انتشار أو محاولة انتشار قبل كده كذا مرة ولا لا؟ وفي كل مرة كان سلوكه يحصل فيه إيه؟ يا ترى هقدر أسيطر عليه ولا بيتنقل بطريقة مرعبة زي مثلاً كان كورونا بيتنقل في الجو ما كناش عارفين نسيطر عليه؟ هل يا ترى هذه الشروط تتوفر في هذا الفيروس ولا لا؟ فده اللي إحنا هنقوله.

هو الخوف بيخوفوا الناس إن هم يقولوا لهم الوفيات فيه 80% طبعاً، وده رقم طبعاً يخلي أي واحد في الدنيا يترعب. ولكن في كلام كتير جداً مش قايلينه عن هذا الفيروس القديم جداً هنقوله مع بعض النهارده. وآخر حاجة ببص عليها: هل يا ترى حصل تحور في هذا الفيروس؟ فبقى سلوكه اتغير؟ يعني فيروس قديم واتغير سلوكه دلوقتي؟ ففي حاجة جديدة نطمن منها الناس أو نقلق منها الناس أو نقول لهم خدوا بالكم. تعالوا نجاوب على كل هذه الأسئلة وأنت بنفسك هتقول بعد كده: يا ترى ده شيء مخيف ولا يا ترى ده فشل إعلامي؟ فشل إعلامي، ترندات بس.

رقم واحد: هل حدث تحور؟ لا. يبقى نرجع للقديم ونجيب من الأول. هل يا ترى هذا الفيروس ينتقل عن طريق الهواء أو طريق الرزاز؟ لا. أمال بيتنقل عن طريق إيه؟ يتنقل عن طريق الاختلاط بالإفرازات بتاعة خفافيش الفاكهة اللي موجودة في دول جنوب أفريقيا والدول المحيطة بها. هل يا ترى هذه الخفافيش بتاعة الفاكهة والفيروس ده أصلاً موجود مثلاً في دولة زي مصر أو العراق أو سوريا أو لبنان؟ أو لا. هو في الدول اللي إحنا بنقول عليهم اللي هم أنجولا، جنوب أفريقيا، زيمبابوي، وطبعاً إثيوبيا جنبهم. الدول بتاعة جنوب أفريقيا والدول الأفريقية ناحية الجنوب هي الأكثر إن تلاقي فيها حاجة زي كده.

طب هل يا ترى الفيروس بعد ما خدناه من هذه الخفافيش ينتقل من إنسان لإنسان؟ أيوه. ولكن إزاي؟ عن طريق الإفرازات والدم بتوع هؤلاء المرضى وينتقل عن طريق الاختلاط المباشر لفترة طويلة. يعني واحد عايش معاه في البيت ومش واخد احتياطاته، أو دكتور بيعالج عيان ومش واخد احتياطاته اللي هي إيه؟ لابس جوانتي، بيغسل إيده كويس، ما ياخدش اختلاط بهذه الأشياء. لما يكون واحد في مستشفى ناخد الفضلات بتاعته والحاجة بتاعته بعد حالة الوفاة أو بعد ما يخف ويطلع ونغسلها كويس بالمياه السخنة أو إن شاء الله حتى نحرقها. ده هو الكلام.

طب باقي نعرف مين هم الأعراض دول بتوع الأمراض دي، ولكن قبل ما أقول أعراضه لازم أقول لك من إمتى ابتدى عشان تفهم كلامي كويس قوي وتقدره. ما إحنا هنا علم الصفحة دي مش أي هاجس. وأرجوك دوس شير، طمن كمية كبيرة من الناس، ما توقفش الفيديو ده عندك. على فكرة القلق النفسي بيخلي الناس تمرض. فطمن الناس ودوس شير ووصل الفيديو ده بأقصى قدرة تقدر تعملها.

فلما نيجي نتكلم عن التاريخ المرضي عشان تعرف إن أنا بقول لك على أساس علمي، هذا المرض ابتدى من سنة 1967. وخليني أقرأ لكم الحالات، لأن طبعاً مش هحفظ الأرقام بالظبط زي ما أقرأها لكم. 1967 ظهر هذا المرض في 31 حالة، مات منهم سبعة. فقال لك الوفيات 23%. رغم إن ممكن يكون في حالات ما كانتش شديدة، الله أعلم. دول اللي اتحلل لهم ودول اللي ابتدينا نقول في فيروس جديد ساعتها. 1967. بعد كده وهتلاقيني أقول نسب وفاة غريبة: 0%، 100%، 80%. ليه؟ لأن عدد الحالات صغير زي ما هتشوف بعد كده.

الفيروس ده الناس نسيته واختفى تماماً وابتدى يعمل أوت بريك تاني ويظهر تاني من خفافيش الفاكهة يصيب ناس. فصاب في سنة 1975 ثلاث حالات، مات منهم واحدة. قال لك ثلاثة مات منهم واحدة يبقى 33%، ولكن هذا الرقم رقم رقم مش 33% ولا حاجة، يعني رقم غريب. فتلاقي إن إحنا بنقول: ما ينفعش أقول نسبة وفاة إلا عندك عدد كبير عشان تبقى دقيقة.

يعني بعد كده، لأن كمان الفيروس ده عشان يتشخص لازم ياخدوا عينات ويبعتوها للدبليو إتش أو ويعملها ويعملها بي سي آر والتحليل بتاعه مش موجود في كل العالم. فالموضوع شوية تريكي. سنة 1982، بعد شوف كام سنة، كل سبع سنين تطلع موجة زي كده، ظهر حالتين مات منهم حالة. فقال لك الوفيات 50%. سنة 1987 ظهر حالة واحدة وماتت، فقال لك الوفيات 100%. سنة 1990، حالة واحدة وماتت. حالة واحدة مش ظهر حالة، يعني هو دي اللي حللوا لها ولقوا عندها عندها المرض ده بأثر رجعي بعد ما ماتت يمكن أو بعد ما كانت محجوزة في المستشفى واشتبهوا في ده عشان بس تبقى فاهم. حالة واحدة وماتت. 1998، 98 كان في من 1998 لسنة 2000 ظهر 128 حالة في السنتين دول. أسف، كان مات 128 حالة ودي كانت نسبة الوفاة 83%. فنسبة عالية طبعاً.

من سنة 2000 لـ 2006 ظهر 252 حالة ومات 227 حالة بنسبة 90% وفيات. بس ليه؟ ما هو ممكن يكون جه حالات بسيطة وما وصلتش للمستشفى؟ ما نعرفش ده. لأن ما فيش تحليل زي ما بقول روتيني، ده أنت لازم تبعت العينات بطريقة معينة. سنة 2007 ظهر أربع حالات مات منهم حالة واحدة. واسكتنا. 2008 كان في حالة جاية مسافرة أمريكا هنا وعاشت. وسكتنا تاني. كان في 2008 حالة برضه مسافرة نيوزيلندا واتوفت. يعني تبقى مسافرة من دول جنوب أفريقيا. 2012 كان في 15 حالة. شوف سكتنا أربع سنين تاني. 15 حالة في أوغندا مات منهم أربع حالات. فقال لك الوفيات 27%. 2022 في أنجولا. والمهم كل شوية من ثلاث سنين أنا طلعت قلت لك 2005 كان 12 حالة وهكذا.

فالفكرة إن هو كل أربع خمس سنين هذا الفيروس يصيب شوية ناس، يقول لك الفيروس ده عمل كذا، فتبدأ تلاقي الناس عملت نفس الموجة ونفس الترند والإعلام خوف الناس. طالما ما فيش حالات تانية جديدة السلسلة بتتكسر بسهولة. ما إلا الناس اللي بتتعامل مع العيانين دول بياخدوا احتياطاتهم خلاص على كده. ما فيش عدوى بتتنقل وانتهينا.

فليه الزعر؟ ليه أصحى ألاقي العنوان ده: "رعب عالمي بسبب فيروس ماربورج". فيروس والصحة تكشف حقيقة ظهوره وتحرك عاجل من التعليم. تدخل عشان تدخل على الخبر تدوس على اللينك تدخل تلاقي كلمة: "الصحة تكشف زور تحققه بمصر". إن مصر قالت: "ما ما فيش عندنا حالة". وتحرك عاجل من التعليم. التعليم بتقول: "ما عندناش حاجة". طب ليه العنوان ده؟ على فكرة أنا لا ألوم على جريدة أو منصة بحالها، لأن كله كده. ده كله كده. يعني أنا مش بقول لك إن هذا الشخص ليه كده، ده كله كده.

طيب، ولكن الحمد لله كلامنا بيوصل بيكم وأنا عارف إن إحنا بنوصل للناس عن طريقكم وبنوصل للملايين لما بتدوسوا شير. يعني قبل كده الفيديو بتاع بتاع الفيروس بتاع الإنفلونزا اللي عملناه عشان خاطر في واحد برضه ماسك الناس وقعد يقول لهم: "فيروس كورونا 2025". الراجل ده يا جماعة بيكذب، أرجوكم بيكذب، ما تسمعوش كلامه. أرجوكم هذا الكلام ليس له أصل من الصحة. ده فيروس إنفلونزا أي كليد كي دي التحاليل والبي سي آر بتاعه، وهو فيروس إنفلونزا جديد آه، بس إنفلونزا تبع فيروسات الإنفلونزا والعائلة بتاعتها. وأنا قلت روشتة علاجه موجودة. وصلتوها حضراتكم بشكركم لأكثر من 7 مليون واحد ولا 8 مليون واحد في يوم. وده هتوصلوه كده برضه عشان خاطر الناس تطمن وموجود على الصفحة وموجود على اليوتيوب. روشتة علاج الفيروس اللي هو تعب الناس حالياً يعني.

طيب، إيه يا ترى الأعراض؟ مش عايزك تشغل نفسك قوي بيها، بس هعرفها لك من باب العلم بالشيء عشان انتوا إيه بقيتوا دكاترة أشطر مني يعني. فالأعراض بتاعته: فترة الحضانة من خمس لعشر أيام بيبدأ برعشة وسخونية وألم في العضلات زي معظم فيروسات الدنيا كلها. على اليوم الخامس بيبقى في حاجة مميزة إن يبقى في طفح جلدي وألم في الصدر وألم في المعدة والطفح الجلدي على الصدر والمعدة. شوية ترجيع وألم بالصدر واحتقان في الزور. بعد كده تبدأ الأعراض تدخل في سكة تانية بقى إن يجيله صفراء، يجيله التهاب في البنكرياس، نقص شديد جداً في الوزن، ويبدأ يجيلهم نزيف، فشل في الكبد، يدخلوا في غيبوبة ويموتوا.

ولكن كمان ما فيش خوف يا جماعة من حاجة زي كده، لأني زي ما قلت الموضوع مش أنت أصلاً ما بتتعاملش مع ده. والوقاية اللي بقولها بقول لك لو أنت مسافر دولة من هذه الدول، لما تجيب فاكهة لازم تغسلها كويس، لما تطبخ الأكل اطبخه في البيت أحسن وخد بالك من نفسك إن أنت تغسل إيدك كويس. حاجة بديهية يعني كل الناس بتعملها يعني. فاهمين؟ ربنا يوفقكم ونشوفكم على خير في فيديو جديد ووعي جديد وسلام.