تحدى

لو بدأت تلاحظ على نفسك عادة بدأت تدخل حياتك مؤخرًا، أو بدأت تقلق من شيء معين ويجي لك وساوس وهواجس، وبقيت فترة داخل في حالة نفسية مش كويسة، زي إنك مكتئب شوية، أو بتتجنن، أو تخاف من الكلام مع الناس والخروج، أو جالك خوف من حاجة ما كانتش بتخوفك قبل كده.

أحسن نصيحة تفتكرها في الوقت ده هي: إياك تتقبل! إياك توافق وترضخ وتوطي راسك قدام الفكرة! ما تستسلمش وتقول لها: حاضر.

لما يجي لك خوف من فكر أو فعل معين، ما تقولش: أنا آسف، خلاص مش هعمل ده. لا، ده أنا هعمل ده بالذات وهعمله كتير، علشان ما يتحولش لعقدة.

لأنك بالشكل ده هتديها قوة السيطرة عليك. بإيدك بتتحول لوحش مخيف، أنت اللي مكنته.

هخاف من البحر فمش هقرب له تاني؟ حاسس إني عيان كل يوم ونفسي أكشف عشان أطمن فهاك يوميًا؟ خايف من الكلام قدام الناس ليطلع شكلك وحش فمش هتتكلم؟ لا، قاوح، تحدى، الحق نفسك من البداية، واجه الخوف من أول يوم تحس بيه.

ما تخافش لما يجيلك فكرة تستلم وتضايقك طول ما أنت قادر تقاومها. طول ما الفكرة موجودة لكن مش قادرة تكبرك تعمل حاجة، مش قادرة تخوفك، عايش حياتك عادي بالرغم من وجودها، بتعمل الحاجة حتى وأنت قلقان.

خاف بس لو سيطرت عليك وبدأت توديك وتجيبك على كيفها.

أغلب العادات والمشاكل في الدنيا بتكون أسهل لما تلحقها من بدري. وقتها ممكن تتلحق بفيديو خفيف زي ده، قبل ما تتحول لحاجة أكبر وتحتاج أكتر من فيديو بكتير.