Transcription
السلام عليكم. دعم السكن وصل لحالته النهائية ديال جميع المستجدات والشروط النهائية باش تستفد من دعم السكن لفترة 2026-2028، غادي تعرفها اليوم مزيان.
إذا، غنبداو بالشروط اللي كانت قبل 2026 واللي مكملة دابا في الفترة ما بين 2026-2028. ومن بعد غنجيو للشروط اللي استجدات والامتيازات كذلك اللي استجدات.
أول شرط باش تستفد من دعم السكن هو تكون مغربي الجنسية. ورد البال، مغربي الجنسية فين ساكن؟ واش في المغرب؟ واش في فرنسا؟ أمريكا؟ ماشي شغلنا. أي واحد عنده جنسية مغربية من حقه يستفد من دعم السكن، واخا ما ساكنش في المغرب، واخا له 20 عام ما جاش للمغرب.
ثاني شرط، ما يكونش عنده سكن. سطر على هذه اللي جاية: رئيسي بسميته. حنا غنجيو لهد "رئيسي" لأنها من بين الأمور اللي استجدات ولا غيدار فيها تغيير للدعم ديال السكن في الفترة ما بين 2026-2028.
ثالث شرط من الشروط اللي كانوا وما زالين، أنك تكون ما عمرك استفدتي من دعم السكن، سواء بهذ الطريقة الجديدة ولا بالطريقة القديمة ديال السكن الاقتصادي. دوك البارتمانات ديال 20 و 25 مليون، أنك تكون عمرك شريتي فيهم. واخا شريتي وبعتي، واخا دابا ما عندكش سكن رئيسي بسميتك، بعتي ذاك السكن الاقتصادي اللي شريتي، مادام استفدتي منه، ما عندكش الحق في هذا الدعم ديال السكن.
مزيان. هذه هي الشروط اللي خص توفر فيك أنت كشخص باغي تستفد من دعم السكن. إذا، راه ماشي مهم خدام ولا ما خدامش، واش مزوج ولا ما مزوجش، ماشي مهم واش عندك الولاد ولا ما عندكش الولاد. بزاف الإشاعات كتنتشر أن هذا الدعم السكن مديور للأسر. هو مديور للأسر، ولكن اللي كيدفع عليه هو الشخص. وما كيشرطوش عليه يكون مزوج ولا عنده الولاد ولا كبير ولا صغير. يقول لك لا، أنت فتي 60 عام ما نعطيوكش دعم السكن. ما كيشرطوش السن. الشروط اللي ذكرت في الشخص هي دوك الثلاثة اللي ذكرت الأولين، ومازال فيهم تسهيلات في التغييرات الجديدة لدعم السكن ما بين الفترة ديال 2026-2028. أنا جاي ليها.
وما كيشرطوش كذلك واش راجل ولا مراة. لدرجة باش نعطيكم مثال: الراجل ما عندوش سكن بسميته، والمراة ما عندهاش السكن بسميتها، وعندهم جوج ولاد مثلا كبار ما مزوجينش كاع، بنت ودري. يقدر الراجل يدفع يستفد من دعم السكن إلا فيه الشروط اللي ذكرت قبيلة، ويستافد. ومرته تدفع وتستافد. واخا الراجل استفد وشد الدار وبسميته، مادام المراة ما عندهاش الدار بسميتها، حتى هي تدفع تستافد. وولدهم عندهم شي ولد كبير مثلا، يدفع حتى هو ويستفد. وبنتهم ساكنة معاهم نفس الدار، ما عندهاش سكن بسميتها، وما عمرها استفدت من دعم السكن ولا من السكن الاقتصادي، ومغربية، تدفع تستفد.
إذا، هذ الشروط بثلاثة اللي ذكرت قبيلة هما اللي كيطلبوا منك كشخص مغربي ما عندكش السكن الرئيسي. دابا غنجيو لهذ القضية وما عمرك استفدتي من السكن الاقتصادي ولا من دعم السكن.
دابا ندوزو للشروط ديال هذا السكن. شنو هو هذا السكن؟ هذا واش أي سكن؟ لا. كاين شروط كذلك للسكن. يكون على الأقل جوج بيوت. تكون شادة بيرميدايتي (رخصة السكن). أقدم حاجة يناير 2023. إلا شدا بيرميدابيتي هاد الدار ولا هاد البارط قبل يناير 2023، ما مقبولاش. تكون أول بيعة ليها. رد البال، ماشي تباعت لشي حد وهذاك الحد غيعاود يبيعها لك. واخا تكون شادة رخصة السكن في الفترة من يناير 2023 لفوق، تكون يلاه شداتك، ولكن تباعت لشي واحد وهذاك الواحد غيبيعها لك. وبين قوسين، هذا الشرط داروه لمصلحة الشركات والمنعشين العقاريين باش ضروري تمشي تشري بني جديد يلاه تبنى ويلاه غيتباع أول مرة.
الشرط الأخير اللي كيحدد القيمة ديال الدعم والقيمة ديال السكن اللي مدعوم. بمعنى، إلا بغيتي تشد دعم ديال 10 المليون، خصها الدار هاد البارط تكون 30 مليون لتحت الثمن ديالها. وإلا بغيتي تشد دعم ديال 7 المليون، سبارط ولا هاد الدار ولا حتى فيلا، ما تفوتش 70 مليون. تكون ما بين 30 مليون و 70 مليون. لأن اللي تحت 30 مليون غتشد 10. ورد البال، علاقة بهذا الشهر، راه ما كاينش حلي وديك مزيان، راه ما كاينش دعم أنك تبني. تقول أنا عندي شي بقعة، دعم السكن يعطيوني 10 ولا 7 باش نعاون نبنيها. ولا ديك الخبار والإشاعات اللي انتشرت ديال دعم السكن ولا بناء السكن في العالم القروي، ما كاينش هاد القضية هادي. ما كاينش دعم السكن. هذا البرنامج اللي كاين دابا اللي غيسالي في 2028، ما كاينش دعم أنك تبني، سواء في المجال القروي ولا المجال الحضاري. ما غيعطيوكش دعم إلا عندك شي بقعة ولا أرض باش تبنيها.
وآخر آخر شرط معلم، هو أن هاد الفلوس اللي غيعطيوك ماشي غيعطيوها لك وتشري، يقول لك سير صافي الدار ولات ديالك، دير فيها ما بغيتي. لا. غتمشي تجبدها من المحافظة الملكية، غتلقى أنه كاين الرهن، كاين اليد ديال الدولة بـ 7 المليون ولا 10 المليون على حساب شحال شديتي. علاش أخويا هاد الرهان هذا؟ وشحال غيبقى تما؟ هذه من الأمور كذلك اللي فيها مستجدات وتسهيلات. هاد الرهن باش تحيد مرتبط بواحد الشرط أساسي. كيقولوا لك: "حنا كدولة دعمناك باش تسكن، ما دعمناكش باش تكري، ما دعمناكش باش تبيع، ما دعمناكش حتى باش تخليها خاوية تمشي لها في الكونجي ولا في العطلة ولا كذا". كيقولوا لك خمس سنين خصك ديرها سكن رئيسي. وملي تسال هاد الخمس سنين، ولد الناس، تدي الضريبة ديال النظافة ديال ديك الخمس سنين اللي خلصتي، وتدي لاكارط بالعنوان ديال ديك الدار اللي شديتي عليها الدعم، وتمشي تدفعهم في إدارة الضرائب. ديك الساعة عاد الملكية ديالك كيتحيد منها الرهن ولا اليد ديال الدولة.
إذا، هذ المدة خمس سنين ما عندك حق لا تكريها، لا تبيعها، لا حتى تخليها خاوية. نفتحوا القوس، بالنسبة للمغاربة المقيمين بالخارج، يكفي تكون عندك هاديك الدار هي اللي عندك هنا في المغرب بسميتك، واخا تكون ما كتجيش لها كاع ديك الخمس سنين. مزيان.
ندوزو مباشرة للمستجدات اللي غتكون ما بين الفترة ديال 2026-2028. حل لي ودنيك مزيان. هاد الفيديو غيعطيك الحالة النهائية والشروط النهائية ديال دعم السكن.
قلنا في الشروط اللي خصها توفر فيك أنت قبيلة: ما يكونش عندك سكن بسميتك. شحال هادي، واخا يكون باينة سميتك بشي ملك مثلا على الشياع، شي دار وراثية، وسميتك داخلة في ديك الملكية، ما يعطيوكش دعم السكن، ما تستفدش منه. يقول لك: "أنت عندك ملك في سميتك"، واخا أنت ديك الدار عندك فيها واحد الحصة، أنت فيها وراث، أربعة ولا خمسة، ولا ماشي ضروري وراث. أي عقار على الشياع، أي فيه مجموعة ديال الشركاء، بانت فيه سميتك. كانوا قبل 2026 كيرفضوا لك الدعم، تيقول لك: "ما تستفدش منه". مستجد دابا: إلا عندك شي ملك على الشياع، أي في أكثر من شريك، راه تستافد من دعم السكن إلا دفعتي.
المستجد الثاني كيخص ديك القضية ديال الرهن. أن الدولة كتعطيك ديك الفلوس وكتبقى راهناك بها. شحال من واحد كيتنادم مع الحد تيقول لك: "أنا ما بقيتش باغي على الدار، خويا غيدي ديك 10 ولا 7 المليون ديالهم، أنا هاد البارطمان ولا الدار ما بغيتهاش". ولا أخويا: "أنا بغيت نخليها خاوية، نرد لهم فلوسهم ونخليها خاوية، نبقى نمشي لها غير في الصيف". ولا أخويا: "أنا بغيت نكريها". ولا أي سبب. الدولة كتقول لك: "لا، ما عندكش الحق تبيعها، وذاك الرهن ما يتحيدش ضروري خص تسنى خمس سنين". ماتبيعش هاد الدار وما تصرفش فيها حتى دوز ديك الخمس سنين ونتاكدوا أنك درتيها سكن رئيسي.
دابا ولا عندك الحق بالقانون ترفع الرهن. عنده جوج حلول: تسنى ديك الخمس سنين بالطريقة اللي قلنا قبيلة، تسكن فيها خمس سنين سكن رئيسي. ولا ترفع الرهان في أي وقت. تقدر تشريها اليوم، دوز يومين ثلاث أيام، تمشي تحيد ذاك الرهن بشرط ترد لهم فليساتهم. شديتي 7، ردها لهم. شديتي 10، ردها لهم. وهذا الغرض باش ترفع الرهان وترد لهم فلوس الدعم. يمكن لك تمشي لإدارة الضرائب. إلا ما ساعدوكش ولا قالوا لك: "حنا ما مكلفينش بهذا الشيء"، للمندوبية ولا الإدارة ديال السكن والتعمير. ولا بغيتي كاع تهنى، تكلف النوطير. تقول: "أخويا، هاك ها 10 المليون ديالهم ولا ها 7 المليون ديالهم، سير أخويا دير لي رفع الرهن من الدولة باش نبيعها الدار ولا باش مثلا نولي نتصرف فيها كي بغيت، نكريها ولا نخليها خاوية ولا اللي كاين".
المستجد الأخير، قبل ما نجي لآخر حاجة اللي هي الطريقة كيفاش غتدفع الدعم السكن وتستفد منه. المستجد الأخير هو غيبدا في شهر سبعة. هو أنك إلا خلصتي هاد الدار هاد البارطمان كاش بالفلوس، إلا كان 30 مليون الفوق، بدايه شهر سبعة، خلصتيها كاش فلوس، غتزاد عليك 2% في المصاريف. نعطيو مثال: مثلا 30 مليون، لأن ملي كتشيد الدار أنت بـ 30 مليون، را عندك واحد المصاريف، راه كتوصل تقريبا جوج المليون فوق ما بين النوطير والتسجيل والتحفيظ. إلا خلصتيها كاش ابتداء من شهر 7 2026، غتزاد عليك 6000 درهم، اللي هي 2% ديال ديك 30 مليون. إذا، باش تفادي هذا الشيء، إلا كنت غتشري في الفترة اللي غتبدا من شهر 7 2026، منين تبغي تخلص ديك الدار ديك البارطمان، خلصها بشيك بنكي، بتحويل بنكي، بفيرمون، بشي طريقة إلكترونية. المهم ما تخلصهاش كاش.
نجيو دابا للطريقة باش غندفع دعم السكن باش هاد الفيديو ما قلت، يكون الدليل ديالك. إلا بغيتي تستفد من دعم السكن، أول حاجة، كنحط عيني على الدار ولا البارطمان اللي غنشري، السكن اللي غنشري، وكنمشي نتفاهم مع مولاه. وباش نربح الوقت، نشوف واش فيها الشروط اللي ذكرنا قبيلة.
ثاني حاجة، كنمشي لتليفوني مثلا، ولا شي بيسي، ولا نمشي عند شي مول سير ولا مول المكتبة، إلا كنت حتى أنا ما فاهمش هادشي ديال المنصات والمواقع والتطبيقات. إذا، كنمشي للتطبيق ديال دعم السكن وكنتسجل فيه بلاكارط ديالي. هنا أنت كشخص، كيقلبوك. ملي كتسجل بلاكارط ديالك، تيمشي يقلبوا واش فيك الشروط اللي ذكرنا قبيلة: مغربي، ما عندكش السكن دابا رئيسي بسميتك، ما عمرك استفدتي من دعم السكن ولا السكن الاقتصادي. إلا فيك هاد الشروط، فيضار في سبع أيام كيجاوبوك بالموافقة.
كتاخذ ديك الموافقة، وكتمشي أنت وذاك السيد اللي غيبيع ليك عند النوطير. كتقول له: "أنا جاتني الموافقة، أنا كشخص باش نشد دعم السكن". النوطير كيدير لكم وعد بالبيع مع ذاك السيد اللي غيبيع ليك. كيشد النوطير ذاك وعد بالبيع، كيدفعو دابا هو في المنصة. أنت دابا سالات خدمتك، بدات الخدمة ديال النوطير. إذا، كيدفع ذاك وعد بالبيع، وعد بالبيع فيه المراجع ديال العقار ديال ديك الدار اللي غتشري ولا ديك البارطمان اللي غتشري وغتستفد من دعم السكن. كيدفعوا في ديك المنصة باش دابا هاد المرة ما شافوك أنت واش فيك الشروط، يشوفوا دابا الدار، ذاك السكن، ذاك البارطمان، واش فيها الشروط ديال الدعم اللي ذكرنا قبيلة. إلا فيها الشروط، كيجاوبوا بالموافقة، وكيصيفطوا الدعم للنوطير، ماشي لك أنت. كيصيفطوه في الكونط ديال النوطير.
وبمناسبة، هاد الخطوات را كتبقى متبعة في ذاك التطبيق. ذاك التطبيق اللي تسجلت فيه أول مرة، كتبقى متابعهم. ما كتشوفش في هاد الصورة، كيعطيوك فين وصل الطلب ديالك، واش نوطير دفع في المنصة، واش جاوبوه، واش دازوا الفلوس. راه كتبقى أنت متبع ذاك التطبيق في تليفونك ولا في البيسي ولا أي حاجة.
إذا، النوطير ملي كيدوزوا له الفلوس ديال الدعم من بعد الموافقة، كيعيط لكم تيقول لكم: "أجيو دابا ديروا العقد النهائي". لأن عنده 30 يوم. الوقت اللي كيدوزوا له الفلوس، الدولة كتعطيه 30 يوم. كتقول له: "خصك دير لنا العقد النهائي وتعاو تحطه في ديك المنصة باش نعرفوا هذاك السيد شرى". إذا، كيعيط لكم النوطير تيقول لكم: "أجيو دابا نكتبوا العقد النهائي. أنا غنعطي السيد اللي غيبيع ليك الجزء ديال الدعم (سبعة ولا 10)، وأنت كمل له الباقي، وغندير لكم العقد النهائي وندفعو في المنصة".
والا مثلا أنت ما كملوش لك الفلوس، ولا وقع شي مشكل، ولا شي حاجة، ودازت المدة ديال 30 يوم، النوطير كيرجع الفلوس للدولة.
إلا شفتي هاد الفيديو، كون أكيد غتولي فاهم في هاد الدعم السكن وما عنده حتى شي سر بالنسبة لك. الله يعاونكم.