تطور خطير.. إيران تضرب إنجلترا وتستعد لغزو الخليج بعد احتلال جزيرة خرج! وترامب يعلن تدمير إيران

إيه الأخبار يا جماعة؟ صباح الخير. كل سنة وأنتم طيبين.

يعني تطورات مش طبيعية. يعني لما نسمع النهارده إن ضربت إيران جزيرة بريطانية موجودة في المحيط الهندي وبصاروخين، والجزيرة دي على بعد 3800 كيلو، لازم نقول لا ده كده الموضوع كبير. 3800 كيلو! إحنا المعلومة اللي عندنا إن الصواريخ الإيرانية مداها 2000 كيلو، لكن لما تصل المدى لـ 3800 كيلو ده معنى كده إن هي تقدر تضرب أوروبا كلها. معنى كده إن الوضع وضع مرعب، مش وضع عادي. لما نعرف إن إيران صاروخها وصل لقلب المحيط الهندي وقرب وضرب جزيرة بريطانية، فيا جماعة الموضوع مش هزار. يعني اللي بنسمعه ده كلام مش هزار. ودييغو غارسيا دي أهم جزيرة وأهم قاعدة حربية موجودة، وفيها طبعًا إنجلترا وأمريكا.

آه، الكلام إن الضربة ما أثرتش لأن هناك طبعًا في دفاع جوي قوي، بس الفكرة في وصول الصواريخ. أنا لحد دلوقتي مش فاهم الصواريخ إزاي طلعت من إيران وصلت لقلب المحيط الهندي 3800 كيلو. وهنا في نقطة جوهرية، خلي بالك إن ترامب لما قال إن إيران خطر هو ليه حق. لما الصاروخ يقدر يصل لجزيرة ملك إنجلترا، معنى كده إن هي ضربت إنجلترا يا جماعة. النهارده إيران ضربت إنجلترا. ونفس المسافة دي تقدر تصل من إيران لقلب أوروبا، يعني بكرة لو إيران حبت تضرب قلب أوروبا هتضربها. فالموضوع فيه كلام خطير جدًا.

في المقابل بقى، ترامب قال لك إحنا قضينا على إيران، ومن الناحية الحربية إحنا تمكنا من إيران. ماشي يا سيدي. وقال لك إن إحنا بنستعد عشان ناخد جزيرة خارق. الجزيرة دي يا جماعة هي اقتصاد إيران، لو خدها ترامب كده اقتصاد إيران كله في إيديه. فردت إيران، والكلام حد طلع وطلع محللين على قناة الجزيرة وقالوا إيه: "إحنا لو تم احتلال الجزيرة دي هننزل على الجزر بتاعة دول الخليج ونحتلها." خلي بالك، دول الخليج: السعودية والكويت وقطر والإمارات. الإمارات أصلًا عندها جزر محتلة أساسًا لإيران. كلهم عندهم جزر في الخليج. فإيران قالت لك إيه: "لو تم احتلال خارق هننزل نحتل إحنا كمان جزر خارجية." بس خلي بالك، إيران لو عملت كده هيبقى عندها مشكلة لأن هي ما عندهاش غطاء جوي، فأي تحرك للجنود هيصطادوه. ده غير أصلًا الأسطول بتاع إيران مضروب، وحتى لو زوارق أو أي حاجة الطيران هيصطاده على طول. فهو ما عندوش القدرة دي، بس هو هدد بالكلام ده. فأنت بتتكلم عن تهديدات بتطلع من ترامب وتهديدات في المقابل بتطلع من إيران.

بس عشان نكون عندنا يعني حق ونقول الكلام بحق ربنا يعني، إيران بتنفذ الكلام. أنا مؤمن إن إيران هتطلع من الحرب دي خسرانة خسرانة. الكلام ده بيزعل ناس كتيرة جدًا مني، بس هي دي الحقيقة يا جماعة. الخسائر اللي حصلت في إيران غير عادية. لكن العقيدة الإيرانية، وده أنا مش عايز أقول كلام صعب بس أنا بحب أدخل التاريخ، بس معلش افهموني يا جماعة، وأنا ما بتكلمش في دين صدقوني خالص. الغرض من كلامي مش دين. كلنا عارفين إن العقيدة عند الإخوة في إيران والإخوة معظم الإخوة في العراق وحتى جزء من لبنان واليمن عمومًا يعني، الاثنى عشرية أو العقيدة الشيعة الاثنى عشرية فيهم عندهم مثل أعلى، مثل أعلى الإمام علي بن أبي طالب والإمام الحسين. خلي بالك، الإمام الحسين لما دخل حرب، والحرب دي غير متكافئة، بيفكرني المشهد ده بمشهد الموجود حاليًا. أمريكا ممكن نشبهها بالدولة الأموية اللي دخلت حرب مع الإمام الحسين اللي ما كانش عنده إمكانيات خالص، إمكانيات ضعيفة بالنسبة للدولة الأموية في ذلك الوقت. يعني النتيجة كانت إيه؟ كان في شجاعة من الإمام الحسين، كان في استبسال من الإمام الحسين والمجموعة الصغيرة اللي معاه، ووقفوا بقوة، بس في النهاية تم قتل الإمام الحسين. في النهاية الدولة الأموية هي اللي حكمت، ودي نقطة مهمة جدًا. عشان كده أنا لما بشوف المشاهد بتاعة إيران وأقول إن إيران بتقف بقوة وإيران بتستبسل وإيران بتتحرك بعقيدة وبتحاول تكون مقاتلة بقوة، بس ده مش معناها إن هي هتطلع منتصرة. وده اللي بيزعل الناس مني على فكرة يعني، لأن الانتصار في الواقع قصة ثانية والمكاسب في الواقع قصة ثانية خالص. بس مش عايزين نعطل نفسنا في الكلام ده كتير. ويا عم ده مش دين صدق يا سيدي، ده مش دين يا أستاذة أنيس. ده التاريخ، ده اسمه تاريخ مهم جدًا. اربط السياسة بالتاريخ، ده مهم جدًا. وأي حد بيفهم إن دايمًا التاريخ مهم جدًا مع السياسة لأن بيفهمنا أمور كتيرة جدًا، أمور ممكن تبقى تفهمها بأبسط من كده بكتير.

طيب، خلينا نكمل، خلينا نكمل لأن الكلام اللي جاي كلام كلام مهم جدًا وهيفرق معانا. بصوا يا جماعة، ترامب بقى إيه؟ بص على الخريطة وقال لك إيه: "بصوا يا جماعة، أنا هقفل الحنفية على إيران، ومن الآخر كده أنا هعطل لهم الدنيا وهاخد هاخد جزيرة خارق اللي هي بيطلع منها أكتر من 90% من البترول اللي موجود في إيران. لو خدت الجزيرة دي إيران انتهت." خلي بالك، النهارده العاصمة الإيرانية معظمها كانت ظُلمة، وده معناه إن النهارده تم ضرب البنية التحتية للكهرباء. خلي بالك، الشعب الإيراني كل شوية يلاقي إيه: الوضع بيسوق، شوية الماية بتضرب، شوية الغاز بيتضرب، النهارده الكهرباء قطعت شرق وجنوب وغرب. أعتقد العاصمة طهران ما فيش كهرباء. فده بيقول لك إيه: إن كل يوم الوضع هناك بيسوق، ومع ذلك هم مستمرين في الضربات وضربات مش سهلة. المهم، فقال لك إيه: "إن أنا هضرب هاخد الجزيرة." وبالفعل في قوات أمريكية وبأعداد مش قليلة بتيجي للخليج. وزي ما قلت لك قبل كده إن في سفينة برمائية جاية وفيها 2200 جندي. بس الغريب بقى إن ترامب قال لك إحنا انتصرنا خلاص، بعد ما نتنياهو إمبارح قال لك نفس الكلام إحنا انتصرنا، وأنا هبدأ أرجع الجيش الأمريكي لأمريكا. خلي بالك، أنا من ثلاث أيام قلت لك إن أمريكا هتنسحب خلاص. فترامب هيعمل عملية نوعية، عملية نوعية من خلال التحكم في الجزيرة أو التحكم أو كمان هينزلوا جنود عشان ياخدوا اليورانيوم المخصب، وبعد كده هيلم القوات بتاعته ويتحرك على أمريكا وهيسيب إسرائيل مكملة في الحرب. ودي نقطة مهمة جدًا. إسرائيل هتكمل بعد ما أمريكا تمشي، ودي الخطة اللي محطوطة. ليه؟ لأن إسرائيل الشعب هناك موافق على الحرب، كملوا الحرب وكله تمام. أمريكا عايزة أسعار البترول تنزل، عايزة تتحكم في مضيق هرمز وتقفل على كده الحرب، لكن إسرائيل عايزة تدمر كامل إيران.

طيب، إيه الجديد بقى؟ إن هو لو سيطر على الجزيرة دي، زي ما قلت لك، إيران مش بس هتضرب الخليج وضربات صعبة جدًا، هتفكر في احتلال جزر خليجية. طيب، إحنا دلوقتي بقالنا بقينا أكتر تقريبًا شهر في الحرب دي، داخلين على شهر قريب، والوضع لسه وضع صعب جدًا، وده شيء خطير جدًا على المنطقة. عشان كده في مواجهة مباشرة مع إيران جوه أرضها، ده هيحصل هيحصل لأن لازم تقفل، لازم تخش في مواجهة مباشرة عشان تقدر تعدي المرحلة دي. عشان كده بدأوا يبعتوا المارينز زي ما قلت لك، ثلاث وحدات جايين في الطريق، ثلاث وحدات مارينز. يعني السيناريو هيكون سيناريو بري قادم قادم. المشكلة إن ترامب في نفس الوقت اللي بيقول لك فيه أنا في قوات جاية في الطريق، يقول لك إيه: "على فكرة يا جماعة، أنا مش هعمل ضربات برية، ولو هعمل ضربات برية مش هقول لكم." يعني دي طريقة ترامب اللي إحنا عارفينها كلنا.

طيب، بلوتكو بقى، بلوتكو بقى بتقول لك إيه؟ الخطوة دي لو حصلت إيران مش هتسكت. يعني أول ما تخش بري إيران أكيد مش هتسكت، ده طبيعي جدًا. هترد، بس هترد فين؟ مش هترد على الجزيرة، لكن هترد بضربات على الخليج، هترد بضربات على الناقلات البترولية، هترد إن هي هتولع المنطقة باللي فيها، وممكن على فكرة الضربات كمان تخرج خارج الجزيرة، ممكن للأسف تصل لقناة السويس، وده شيء أنا بحذر منه. إيران في مرحلة انتحارية. يعني بدل ما هفتح مضيق هرمز، لا ده أنا هقفل لك كمان البحر الأحمر. بدل ما نفتح، هتيجي تفتح لي وتاخد البترول بتاعي، لا ده أنا هضرب لك البترول اللي في المنطقة كلها. عشان كده في ناس جوه أمريكا نفسها بيقولوا: "اهدوا يا جماعة شوية، مش لازم تنزل تنزل بري، خلينا في الضرب الجوي، البري دوت هيخلي إيران تتجنن أكتر." المشكلة إن ترامب عايز حل سريع لأن الوقت برضه مش في صالحه، وعايز يفتح المضيق بأي طريقة. وكل شوية يقول لك إيه: "دي مش مشكلتي، دي مشكلة الصين، دي مشكلة اليابان." "تعالى يا يابان، تعالى يا صين، وأنا ما عنديش فايدة بالمضيق." طب يا سيدي، ما هو إيه لو مش مشكلتك أنت بتتكلم ليه؟ أنت عندك مشكلة كبيرة إن سعر البترول غالي. آه، أنت مش محتاج بترول من منطقة، بس محتاج بترول سعره ينزل. فما تقولش مش مشكلتك، يعني ده كلام عيب يعني تقوله يعني.

نيجي بقى للحته السياسية: لو العملية دي فشلت وترامب ما قدرش يفتح المضيق، كده ترامب اتشلوح وهتبقى المشكلة أكبر. لأن ترامب ساعتها هيعمل حرب أكبر وهيجيب قوات أكبر لأن هو في النهاية لازم يخلص. الفكرة إن هو هيجيب قوات اقتحام. أمريكا بالفعل بدأت على فكرة، أمريكا ضربت بطيارات A-10 اللي هي شكلها قديم قوي. الطيارات دي قديمة جدًا، بس هي عاملة زي الدبابة وبتطير على ارتفاع دبابة طايرة بالظبط. طيارة ضخمة جدًا، والطيارة دي يا جماعة بصراحة خطيرة جدًا، بتقدر تضرب يعني أي حاجة قدامها: زوارق بقى، تصطاد درونز زي العصافير، طيارة قوية جدًا. وبالفعل أمريكا بدأت تخش في خطوة ثانية وتستخدم الـ A-10، ودي طيارة من الطيارات الصعبة جدًا بيسموها الدبابة الطائرة. ليه أمريكا بتعمل ده حاليًا؟ عشان المضيق اتقفل فعليًا من أول مارس، وحاليًا البترول عدى الـ 100 دولار وصل 110 ممكن يوصل لـ 120، فإحنا في وضع صعب. وول ستريت جورنال بتقول لك إيه بقى؟ بتقول لك إيران مش قاعدة بزورتين وخلاص، لا دي عندها شبكة كاملة وعندها زوارق سريعة وعندها ألغام بحرية وصواريخ ودرونز انتحارية. يعني الموضوع مش سهل، أوعى تفتكر إن الموضوع سهل. آه، أنا بقول لك إن إيران خدت ضربات ثقيلة جدًا، إن إيران وضعها صعب جدًا، وإن إيران مش منتصرة، ما أقدرش أقول عليها منتصرة. لكن في ميزة كبيرة جدًا بالنسبة لنا إحنا إن إيران خلت الحرب دي صعبة وخلت أمريكا تعرف إن دخولها في حرب تاني ده شيء متعب وممل ومقرف ومشكلة. فده بيدي انطباع إن أمريكا عشان تخش حرب ثانية في المنطقة عايزة 20 30 سنة كمان، وده شيء جيد. وده أفضل حاجة عملته إيران لصالح المنطقة، مش لصالحها لأن الوضع مش في صالحها ولازم نعترف بكده. وأنا ما أقدرش أضحك عليك وأطلع أقول لك إيران قاعدين بقى مروقين وبيرقصوا والحياة هناك فلة زي ما الناس بتعمل. أنا بسمع ناس بيقولوا حاجات عجيبة: أمريكا بتدمر وإسرائيل بتعيط وإيران بيرقصوا كل يوم وقاعدين بيرقصوا. لو عملت لك كده يبقى أنا راجل نصاب زي النصابين اللي بيقولوا الكلام دوت.

خلينا نكمل. أمريكا بتقول إنها دمرت أكتر من 120 قطعة بحرية، رقم كبير. بس السؤال: هو ده كل اللي عنده إيران؟ لا، لأن في حاجات ما ظهرتش لسه. الخبر بقى الأهم إن العملية دي مش يومين وتخلص، دي محتاجة أسابيع عشان تقدر تأمن الممر، عشان تقدر تأمن ممر ومضيق هرمز ده صعب جدًا. أنا بشوفه يكاد يكون مستحيل، وترامب لازم يفهم ده. لأنك لازم تأمن الشواطئ، تأمن الصواريخ اللي هتطلع عليك وأنت هناك، فالموضوع صعب جدًا ويكاد يكون مستحيل.

طيب، تعالى بقى نروح لإيه لموضوع الاغتيالات بقى. نروح لموضوع الاغتيالات، ده موضوع مهم جدًا. وبس المرة دي بقى اغتيالات الأمريكان مش العكس. بصوا يا جماعة، اسمعوا الكلام ده، الكلام ده شديد جدًا. كلنا عارفين إن في عمليات اغتيالات غير عادية حصلت لكل المنطقة بتاعتنا ما عدا إسرائيل. يعني إيه؟ يعني أنت شفت إيران تقريبًا كل قادة إيران اغتالوا واللي تحتيهم واللي تحت تحتيهم واللي تحت تحتيهم. نفس الكلام حماس، نفس الكلام حزب الله. طيب، كده إسرائيل وأمريكا عندهم قدرات غير عادية في الاغتيال مش موجودة عند إيران ولا موجودة عند الجماعات اللي في المنطقة. بس إيران قالت لك إيه بقى؟ قالت لك: "لا، إحنا هنغتالكم حتى لو بعد حين." اسمع يا سيدي. قال لك إيه: متحدث باسم الجيش الإيراني طلع يقول من غير لف كده: "مش هتكونوا آمنين لا في منتجع ولا في مصيف." يعني إيه؟ يعني أنت حضرتك سياسي أمريكي إنجليزي إسرائيلي حبيت بقى تصيف، ولادك رايحين حتة، هنجيبكم في المستقبل، هنجيب هنودي لكم ناس تفرقع نفسها تكون شغالة في المكان. أي حد ليه علاقة بيكم وليه علاقة بالحرب من بعيد هنعمل عمليات اغتيال. وده اللي قلته وحذرت منه إن هم عندهم ذئاب منفردة ده في كل حتة في العالم ويقدروا يزرعوا ناس. آه، حاليًا ما عندهمش القدرة، لكن في المستقبل الموضوع مش صعب. لما الموضوع ينام والدنيا تهدى وأنت فاكر إن حرب إيران خلصت، إن شاء الله حتى بعد 10 20 سنة يقدروا يعملوا العمليات ديت. فهو قال لك إحنا مش هنسيبكم، ده المتحدث باسم الجيش الإيراني. ومش هتكونوا آمنين أبدًا في أي مكان في العالم. ده طبعًا اسمه نقل الحرب من جبهة عسكرية لجبهة مفتوحة عالميًا. وخلي بالك، في الاعتقاد إن ممكن تحصل عمليات ضد أمريكا وضد أي دولة هتشارك في الحرب دي، وطبعًا إسرائيل منهم يعني. شبيه بعملية 11 سبتمبر، وهيبقى في استهداف أمريكي لأن زي ما قلت لكم الموضوع بالنسبة لهم إن أنت دمرت الدولة الإيرانية.

الواقع بيقول إيه يا جماعة؟ الواقع بيقول إن الحرب دي هي واحدة من أصعب الحروب، حرب الخليج الثالثة أنا بسميها. أصعب بكتير من حرب العراق. واحدة من أقوى الدول في المنطقة، أنا بشوف إيران على فكرة قوة ضخمة جدًا. والناس اللي بتستهين بإيران لا، إيران دولة صرفت مئات المليارات من البترول والغاز وخيرات إيران عبر 40 سنة على التسليح والتسريح السري وبنت أماكن محصنة اتكلفت المليارات، وده جه على حساب الشعب الإيراني. فتخيل الدولة دي لما تيجي فجأة كده تلاقي إسرائيل خططت إن هي تدمر ده كله في شهر أو شهرين، فالموضوع مش سهل. وإيران الفرق بينها وبين العراق إيه؟ اسمعوا الحتة دي، حتة مهمة جدًا. العراق لما وقعت يا جماعة ما كانش فيه فكر، يعني إيه؟ يعني الشعب العراقي لما صدام كان موجود وبيحكم ما كانش عنده بقى فكرة إن أنا عندي علماء بأعداد ضخمة، عندي صناعة ضخمة، عندي صناعة سلاح، ما كانش في الكلام ده خالص في العراق خالص ولا عنده بحث علمي. لكن إيران قبل الضربة الأمريكية الإسرائيلية كان عندها الكلام ده: عندها عقليات، عندها علماء نوويين، عندها كمان صناعة متقدمة جدًا على فكرة. فأنت عندك عقليات، فالحرب دي لو وقفت في لسه عقليات موجودة في الشعب الإيراني. فالواقع في إيران هيكون مختلف عن الواقع في العراق، وده اللي مش عايزاه إسرائيل. عشان كده إسرائيل بتقتل اللي تحت، إسرائيل مهتمين باللي تحت أكتر من اللي فوق. إسرائيل الغرض رجوع إيران مش الحكومة الإيرانية، أوعى تفتكر إن إسرائيل عايزة توقع النظام يبقى أنت مش فاهم إسرائيل، يبقى أنت دماغك في حتة ثانية خالص. اللي عايز يوقع النظام أمريكا. إسرائيل عايزة توقع الدولة بتسقط الدولة بالفكر بالعلماء بكله لأن إيران بالنسبة لها خطيرة، فهي عايزة تعطلها 30 40 سنة. وعشان كده ترامب قال لك إن دولة إيران تتعطل 10 سنين، وزير الدفاع الإسرائيلي قال لك هتتعطل عشرات السنين. فرق في الكلمتين كبار جدًا.

في النهاية يا جماعة بشكركم، وأتمنى يكون الكلام بتاعي وصل لكم. لو سمحت، الكل يعمل إعجاب على الفيديو، الكل يشيره، ده مهم جدًا بالنسبة لي. لو حضرتك مش مشترك اشترك، وأشوفكم على خير إن شاء الله بكرة في فيديو قادم. مع السلامة.