الفانوس السحري | سامح حسين #قطايف

ربنا سبحانه وتعالى فاتح لنا خزاينه، بيقول لنا: شيلوا اللي تقدروا عليه، الخير كتير ومش هيخلص. اطلب أنت بس، مش هتلاقي حد يكرمك كده، ولا هتلاقي حد يعمل معاك اللي ربنا سبحانه وتعالى بيعمله معاك. اطلب منه هو بس، من غير ما تشرك معاه الأسباب. سلام عليكم.

طول عمري عندي هواية السرحان. بمجرد ما بنفرد بنفسي، بدوس على زرار وهم كده، وأدخل العالم السحري بتاعي اللي صنعته من خيالاتي، واللي أهم ما يميزه أنه عالم بلا حدود، النسخة البريميوم يعني، من العالم الحقيقي بتاعي. بمعنى أن كل اللي ما بقدرش أحققه في الواقع، بحققه في خيالي. مرة أتخيل أن بقيت أغنى واحد في العالم، ومشغل ماسك عندي، ومرة أحلم إني جبت جون في كأس العالم، ومرة أحلم إني عزمت الباتشينو على كابتشينو. المهم، في يوم قررت أخص كل الأحلام دي في حلم واحد، وهو أن يبقى معايا الفانوس السحري. بمجرد ما أطلب، المارد هيحقق لي كل اللي نفسي فيه، وده كان أجمل أحلامي على الإطلاق، لأنه فتح لي بوابات لأحلام ثانية كتير قوي، المارد بتاع الفانوس هيحققها لي. لحد ما بدأت أتعلق بالفكرة الأسطورية دي، وأقول: ياه لو تبقى حقيقة. أنا مش عايز أقول لك بقى أن بدأت أدخل على النت، أدور على طريقة عمل الفانوس السحري في البيت.

وبعدين، في يوم فكرت قد إيه أنا خيالي ساذج ومحدود. مش عشان بجري ورا حلم مش هيتحقق، لكن علشان أنا في إيدي الأحسن منه، وسايبه، وبجري ورا الخيال. أنا عندي كنز اسمه الدعاء، إني أرفع إيدي للسماء، وأقول: يا رب. لو فكرت شوية بس، أنا بطلب من مين؟ نظرتي للموضوع هتختلف. أنا بطلب من الغني اللي يملك خزاين السماوات والأرض. بطلب، اطلب من الكريم اللي كل خلية في جسمي وكل نفس بتنفسه، جميل من جميله عليا. بطلب من اللي ما حدش غيره هيحب طمعي فيه. يا أخي، شوف الأنبياء كانوا بيطلبوا من ربنا إزاي، واتعلم منهم. كانوا بيطلبوا المعجزات، وربنا سبحانه وتعالى كان بيديها لهم. مش عشان هم أنبياء، لكن علشان عندهم يقين أنه كريم، وأي شيء هتطلبه منه مش هيعجزه، والكتير عندنا قليل قوي عنده. شوف سيدنا زكريا طلب من ربنا إيه؟ طلب يكون عنده ولد وهو طاعن في السن، وزوجته عاقر. يعني أي حد يقول لك مستحيل يخلف، لكن هو ولا فارق معاه الكلام ده. كان عارف كويس قوي هو بيطلب من مين، فربنا سبحانه وتعالى أده له سيدنا يحيى.

سيدنا سليمان لما طلب من ربنا، قال له إيه؟ قال: رب اغفر لي وهب لي ملكا لا ينبغي لاحد من بعدي إنك أنت الوهاب. ما قالش كفاية المغفرة لوحدها، لا ده عايز معاها الملك. وما قالش اطلب أي ملك وخلاص، لا الملك لا ينبغي لأحد من بعديه. ختم كلامه جملة عظيمة قوي: إنك أنت الوهاب. الوهاب غير الواهب، الوهاب يديك مرة واحدة، الوهاب كل ما تطلبه منه هتاخد، وبلا حساب ولا أسباب. سيدنا يونس كان في بطن الحوت، فيه ظلمة وسواد أكتر من كده في موقف يقول لك إن الحياة شطبت، أصعب من كده، ومع ذلك دعا ربنا، فربنا نجاه. سيدنا عيسى طلب من ربنا ينزل له مائدة من السماء، ما هي دي معجزة. سيدنا موسى طلب من ربنا الميه، استسقى لقومه، ربنا طلع له الميه من قلب الصخر، ما هي دي معجزة. سيدنا إبراهيم طلب من ربنا يوريه إزاي بيحيي الموتى، ما هي دي معجزة. الأنبياء يا جماعة ما كانوش بيستعظموا أي طلب على الله، وما كانوش بيتكسفوا يطلبوا من ربنا. كانوا أذكى البشر، وعارفين كويس قوي إنهم قدام كنز مفتوح. أنت بقى مكسوف تدعي ربنا ليه؟ ما تقوليش ذنوبي بقى وبتاع، والله العظيم ربنا بيدي الطائع والعاصي. ربنا سبحانه وتعالى لو هيعاملك بذنوبك، مش هيسيبك على وش الدنيا أصلا. ما تتكسفش واطلب، ثم إنه هو أصلا اللي أمرنا نطلب منه: "وإذا سألَك عبادي عني فإني قريب أجيب دعوة الداعي إذا دعان"، وقال في موضع آخر: "وقال ربكم ادعوني أستجب لكم". الجمله دي يا جماعة أصلا في اللغة العربية اسمها جملة شرطية، "أستجب لكم" ده اسمه جواب الشرط، زي لما تقول كده: ذاكر تنجح. ده عرض مفتوح يا باشا، اطلب هتاخد. بس ثانية واحدة، هتاخد اللي أنت عايزه، هتاخد اللي أنت محتاجه ويناسبك. ده المارد بتاعك هو اللي ممكن يجيب لك اللي أنت عايزه. تقول له عايز أكل، يجيب لك كل الأكل اللي في الدنيا. مش مهم بقى بعد كده تموت بالتخمة. تقول له عايز قوة، يديك قوة مفرطة تدمر بيها نفسك وغيرك. لكن ربنا سبحانه وتعالى ما بيديش كده. ربك كل عطاؤه خير، ومنعه برضه خير. ولو معاه فلوس يعمل خير في واحد، الفلوس تصلحه، لو معاه فلوس هيعمل خير، يدي له فلوس، وفي واحد ثاني الفقر يصلحه ويقربه. في واحدة نفسك تتجوزها، وبتدعي ليل نهار تبقى مراتك، بس أنت شايف تحت رجلك، لكن ربك سبحانه وتعالى شايف الأبعد، شايف أن حياتكم مع بعض هتبقى جحيم. في شركة رايح تعمل فيها انترفيو، وكل أملك تتقبل كموظف، وتدعي وتدعي وتدعي، وتلاقي نفسك أترفضت. بس مين قال لك إنك بعد 10 سنين مش هتبقى صاحب الشركة دي؟ يبقى لازم وأنت بتدعي يكون عندك ثقة في اللي بتدعيه، وبتطلبه منه، إن دايما شايل لك الخير. عشان كده قال بعدها: "فليستجيبوا لي وليؤمنوا بي". الأحوال، إحنا عندنا كنز، ربنا سبحانه وتعالى فتح لنا خزينة، بيقول لنا: شيلوا اللي تقدروا عليه، الخير كتير ومش هيخلص. اطلب أنت بس، مش هتلاقي حد يكرمك كده، ولا هتلاقي حد يعمل معاك اللي ربنا سبحانه وتعالى بيعمله معاك. اطلب منه هو بس، من غير ما تشرك معاه الأسباب، وتولح عليه كمان في الطلب. ادعي دايما دعاء المضطر، عشان أنت فعلا مضطر، عشان طلبك لو ربنا سبحانه وتعالى ما صدقش عليه، مش هتطول. ما حدش في الدنيا يقدر يديك حاجة ربنا سبحانه وتعالى مش موافق إنك تاخدها. ما تدعيش ربنا نزاها، ما تدعيش ربنا وأنت بتجرب، ما تدعيش ربنا تحصيل حاصل. يا أخي ما فيش مسؤول إنسان زيك هيمشي لك خدمة وأنت رايح تطلبها منه وحاطط إيدك في جيبك وبتقول له: مش فارق قوي يعني معايا طالب يتنفذ ولا لا. ما بالك بقى لو بتعمل كده مع ملك الملوك. اطلب، واتمنى. أنت في نعمة كبيرة قوي، أنت قدامك مانجا بخيرات، اوعى تبخل على نفسك. وكل سنة وأنتم طيبين. [موسيقى]