هل الطرقعة دليل على خشونة مفصل الركبة ؟ | تشخيص خشونة الركبة

للأسف، خشونة الركبة أصبحت لسان حال الكثير من الناس.

كثير جداً من الناس يقولون إن لديك خشونة ركبة، في حين أن أحياناً كثيرة جداً قد لا يكون لديك خشونة ركبة.

وأحياناً يستعجل الإنسان ويقول هذا التشخيص بسرعة، من باب أنه يريحك أو يعطيك المعنى التقريبي، أو للأسف يكون تشخيصاً خاطئاً.

عشان أشخص كدكتور خشونة الركبة، أشخصها بطريقتين يجب الجمع بينهما، وما ينفعش أفصل ما بينهم.

أول حاجة الكشف الإكلينيكي بتاعي، وهقول لكم إيه الملاحظات اللي ألاحظها على المرضى دول عشان نقول إنهم فعلاً عندهم خشونة ركبة.

الحاجة الثانية وهي الراديولوجي إكزامينيشن أو الفحص عن طريق الأشعة، وأشهرها طبعاً الأشعة السينية، اللي تعرفنا الأشعة العادية خالص، هل فعلاً الركبة دي فيها خشونة ولا لا.

نبدأ بأول حاجة وهي الفحص الإكلينيكي، وده بيبدأ من كلامي مع المريض حتى في التليفون، من غير حتى ما أشوفه.

ببدأ أسأله: "أنت عندك كم سنة يا دكتور؟" هي هتفرق طبعاً، لأن مرض خشونة الركبة اللي بنتكلم عنه ده بيجي نتيجة التآكل أو عوامل الزمن.

ربنا خلق ما بين عظمة الفخذ وعظمة الساق حاجة بنسميها الغضاريف أو المنسكاي.

المنسكاي دول أو الغضاريف الداخلية بتاعة الركبة عاملة زي المخدات، بتفصل ما بين العظمتين دول.

المخدات دي مع الوقت ومع السن ومع عوامل الزمن، بتبدأ تتآكل وتنشف، فيحصل خشونة، والعظمتين دول يبدأوا يقربوا من بعض.

عشان كده، أول حاجة مهمة جداً هي السن.

ما ينفعش بأي حال من الأحوال يكون سنك أقل من 45 سنة وتقول إن عندك خشونة ركبة، ما لم يحدث لك حادث.

تقول لي: "يا دكتور، يعني إيه يحدث لك حادث؟" هقول لك يعني مثلاً عملت حادثة، حادثة عربية، اتخبطت.

في الحالات دي، بالفعل ممكن يجي لك خشونة في المفصل بتاع الركبة قبل سن الـ 45.

إلا في حالات برضه أن يكون وزنك ثقيل جداً بقاله فترة طويلة جداً، يعني بنتكلم في حالات 5% تقريباً من الناس.

لأن خلينا نقول بالبلدي كده، العمر الافتراضي بتاع المفصل بتاعك هو أكبر من كده بكتير.

فعشان يجي لك خشونة قبل الـ 45، في الغالب أنت أجريت في حق هذا المفصل.

يعني عملت حوادث، وزنك زايد لفترات طويلة، بتمشي كتير وبتعمل مجهود عنيف.

كل ده متجمع مع بعضه هيعمل لك خشونة قبل السن ده.

فزي ما قلت، أول حاجة بعملها عشان أشخص خشونة، سنك يكون كبير، 50، 55 سنة أو فوق.

الحاجة الثانية، يجي لك ألم وتيبس صباحي في مفصل الركبة، يدوم من 30 ل 60 دقيقة في الأكثر.

يعني أول ما بتصحى الصبح بدري، طبيعي أنت لسه صح من النوم، المفروض ما يبقاش فيه ألم.

لا، أنت بتلاقي عندك ألم وتيبس في الرجل.

تيجي تفرد رجلك، تحس أنك مش عايز تفردها، حاسس بشعور عدم راحة.

الألم يستمر معاك من 30 ل 45 ل 60 دقيقة.

لو ده موجود، علامة صح في احتمالية أن يكون عندك خشونة ركبة.

العلامة الثالثة، لما نيجي نفحص المفصل ونتحسر المفصل كده، ونيجي عند فوق عظمة الق من تحت هنا، اللي بنسميها الجوينت لاين أو خط المفصل.

نضغط هنا، اللي هو لما تيجي تبص على ركبتك من قدام، تحت الصابونة بين الصابونة وعظمة الساق.

تضغط على الحتة دي، يجي لك ألم مع الضغط.

تيجي تضغط في الحتة دي كده، تحس أن فيه وجع.

لو ده موجود، ففي احتمالية كبيرة أن يكون عندك خشونة في مفصل الركبة.

الحاجة الرابعة، والكتير جداً منكم بيفتكرها الحاجة الأولى، ويبدأ يهلع ويقلق جداً، هي الطقطقة أو الإحساس بتاع الخشونة كده أو الخروشة اللي بتحصل داخل المفصل.

عايز أقول لك مبدئياً، لو عندك طقطقة بدون ألم، مش ده اللي بنتكلم عليه.

الطقطقة اللي بنتكلم عليها دي هي طقطقة بالألم، بتحس فعلاً المفصل مكحت ومعصور من جوه، وفي خروشة مزعجة جداً.

لو ده موجود، فده من علامات خشونة الركبة.

طقطقة بالألم.

الحاجة الخامسة والأخيرة، أن يكون عندك نقص في المدى الحركي.

طبيعي ركبتك تفرد لحد الآخر بالشكل ده، تبقى مسطرة، وتتني لحد ما رجلك تلمس عضلات المؤخرة بتاعتك بالشكل ده.

تتني ثاني كامل، أو تعرف تجلس جلسة الصلاة بكل أريحية.

لو حسينا أن المدى الحركي ده قليل بشكل واضح في الثني أو في الفرد، فده علامة مهمة جداً من علامات خشونة الركبة.

وكده نكون خلصنا الجزء الأول من الفحص الإكلينيكي لمفصل الركبة بتاعك.

الحاجة الثانية طبعاً أني ببدأ أبص على أشعة المريض.

طبيعي مفصل الركبة الأشعة الطبيعية بتاعته تكون بالشكل اللي أنت شايفه دلوقتي.

المفصل كويس، المسافة ما بين عظمتي الفخذ والساق تكون كويسة.

في حالات خشونة الركبة، طبعاً بدرجاتها، الخشونة أربع درجات بشكل أساسي.

بيبدأ يحصل تقارب ما بين عظمتي الفخذ وعظمة الساق.

التقارب ده طبعاً له درجات، بيبدأ من خشونة من الدرجة الأولى زي في الصورة اللي أنت شايفها دي، لحد ما يوصل لحد الدرجة الرابعة، والمفصل بيكون مطحون أو متآكل كله تقريباً.

وطبعاً الراديولوجي إكزامينيشن أو الفحص عن طريق الأشعة هو ده اللي بيخلينا ناخذ القرار القاطع بعد ما نكون كشفنا على المريض بشكل كويس، إن فعلاً عنده خشونة ركبة.

وبس كده يا أبطال، يا رب يكون الفيديو عجبكم.

ولو عجبكم، لا تنسوا اللايك الجميل.

عرفوني تحت في التعليقات، حابين تشوفوا إيه ثاني على قناة مص جينك من مشاكل عايزين تعرفوا علاجها.

ولو بالفعل عندك مشاكل وعايز تعرف علاج طبيعي أكثر، تلاقي تفاصيل العلاج الطبيعي كلها، سواء كان في العيادة أو أون لاين، موجودة تحت في الديسكربشن.

كان معاكم دكتور حازم طارق.

أشوفكم في الفيديو الجاي إن شاء الله يا أبطال.

سلام عليكم.