Transcription
ازاي تكتشفوا الشخصيه السامه من اول قاعده؟ هقول لحضراتكم على 10 علامات تبين لكم ان الشخصيه دي سامه علشان تتجنبوا اذاها او على الاقل تعرفوا تتعاملوا معاها ازاي. لكن قبل ما ابدا اذكر حضراتكم بالاشتراك في القناه وعمل لايك للفيديو علشان يوصل لغيركم وانتفعوا بيه.
كتير من الناس بيكتشفوا ان هم كانوا بيتعاملوا مع شخصيه سامه يكتشفوا ده بعد شهور او حتى سنين وبعد ما يكونوا اتاذوا نفسيا او استنذفوا عاطفيا. لكن الحقيقه ان الشخصيات السامه غالبا بتسيب اشارات او علامات واضحه من اول لقاء او من اول قاعده. المشكله اننا احيانا بنتجاهلها. لو الشخصيه السامه حد غريب نبعد عنه تماما. لكن لو الشخصيه السامه دي حد قريب مننا هنا بتبقى للاسف مشكله. لازم نعرفه علشان نحمي نفسنا منه قدر المستطاع.
السلام عليكم ورحمه الله وبركاته. اهلا وسهلا بحضراتكم في كبسوله نفسيه جديده مع الدكتور صالح عبد الكريم المستشار النفسي والتربوي. وكبسوله النهارده بعنوان: ازاي تكتشف الشخصيه السامه من اول قاعده؟ 10 علامات مهمه.
أول علامه تكشف الشخصيه السامه انه بيتكلم عن كل الناس بشكل سيء. تلاقيه بيحكي عن صاحبه الخاين، قريبه السيء، مديره الظالم، جاره المؤذي. يحكي وكان ما فيش حد كويس في حياته ابدا. طيب ليه دي علامه خطيره؟ لان الشخص المتزن ممكن يشتكي من شخص او اثنين. لكن لما كل الناس يطلعوا وحشين فغالبا المشكله مش في الناس كلها. المشكله في الشخص السام نفسه. هو اللي بيسقط ذاته على الاخرين. بينسب عدوانه للاخرين. بيشوف الغل اللي جواه في الاخرين. ولازم هنا تسال نفسك لو هو بيتكلم عن اقرب الناس ليه بالشكل الوحش ده هيقول عنك ايه لما تسيبه وتمشي؟ اللي بينقل ليك اسرار غيرك هينقل اسرارك للغير. الشخص السام يا جماعه مالوش امان للاسف.
ثاني علامه تكشف الشخصيه السامه انه دايما شايف نفسه ضحيه. كل قصه عنده نهايتها واحده: انا المظلوم والناس كلها ظلمتني. لو فشل في الشغل يقول المدير هو السبب. لو خسر صديق يقول الصديق هو السبب. لو حصلت مشكله اسريه يقول الاسره هي السبب. طيب ليه العلامه دي سامه؟ ليه؟ ان الشخص الناضج بيعترف بنصيبه من الخطا. لكن الشخصيه السامه بتهرب من المسؤوليه وبتلقي اللوم على الاخرين دايما.
ثالث علامه تكشف الشخصيه السامه انه بيحب يتحكم في كل حاجه. من اول قاعده تلحظ انه عايز يفرض رايه. يقطعك كتير. يستهين بوجهه نظرك. يضيق الاختلاف جدا. المشكله هنا انه ما يبحثش عن حوار. لا بيبحث عن سيطره.
رابع علامه تكشف الشخصيه السامه انه بيقلل من الناس تحت اسم الهزار. يقول كلمه جارحه وبعدين يقول كنت بهزر معلش. او يسخر من الشكل او من المستوى المادي او الاخطاء الشخصيه. وطبعا في فرق كبير يا جماعه بين الهزار الحقيقي اللي بيضحك الطرفين. والهزار اللي بيقصد به الشخص ده سخريه واستهزاء وتنمر. الهزار ده بيضحكه هو. لكن للاسف بيضايق الاخر.
خامس علامه تكشف الشخصيه السامه اللي بيتفاخر بشكل مبالغ فيه. دايما تلاقيه يتكلم عن نجاحاته وفلوسه وسيارته ومعارفه وامكانياته. وكانه في مسابقه لاثبات انه الافضل. تلاقيه دايما بياخد الكلام لحساب نفسه. لو قلت له انا كنت تعبان امبارح مش هيقول لك سلامتك. هيقول لك يا ده انا الاسبوع اللي فات جاللي دور كنت هموت فيه. ما بيسمعش علشان يفهمك. هو بيسمع علشان يستنى دوره في الكلام ويبهرك. طبعا بيعمل كده لان بعض الشخصيات السامه عندها احتياج دائم للشعور بالتفوق على الاخرين. وده طبعا بيدل على شعور داخلي بالنقص.
سادس علامه تكشف الشخصيه السامه انه بيستهلك طاقتك النفسيه. بعد ما تقعد معاه ساعه بس تحس انك مرهق جدا. متوتر جدا. مستنزف نفسيا جدا. والسبب لان كلامه مليان شكوى وغضب وتشاؤم وانتقاد. وكانك قاعد جوه سحابه من الطاقه السلبيه.
سابع علامه تكشف الشخصيه السامه انه لا يحترم الخصوصيه. من اول مقابله يبدا يسالك مرتبك كام؟ عندك مشاكل مع زوجتك او عندك مشاكل مع زوجك؟ او ليه اطلقتي؟ حسابك كام في البنك؟ الشخص الصحي طبعا يعرف ان الثقه تبنى تدريجيا. انما الشخصيه السامه فتتعامل وكان من حقها معرفه كل شيء فورا. بيبقى دايما مستعجل. عاوز يدخل حياتك ببلدوزر ويبهرك بسرعه علشان يكسر حدودك. وممكن من اول قاعده تلاقيه بيشكر فيك بطريقه مبالغ فيها جدا. ويقول لك انا عمري ما ارتحت لحد كده. انت ملاك. احنا اكيد توام روح. الاطراء المبالغ فيه ده من غير مواقف حقيقيه تبرره بيبقى فخ علشان يخليكي تفتحي له قلبك واسرارك بسرعه ويصطاد.
ثامن علامه تكشف الشخصيه السامه ان شخصيته بتتغير حسب اللي قدامه. يعني تلاقيه لطيف جدا مع صاحب النفوذ. لكن متكبر مع الضعفاء. تلاقيه محترم مع المدير. لكن سيء مع العامل او الموظف. وعلشان تعرفه كويس لاحظ ازاي بيتعامل مع الناس اللي هو مش محتاج ليهم. يعني تلاقيه معاك انت في قمه الذوق واللطف والابتسامه. وفجاه تلاقيه اتحول 180 درجه وهو بيتكلم الويتر في الكافيه او الجرسون في المطعم او السايس في الجراج. يتكلم كلم معاهم بزعيق بتناكه بقله ذوق. الوش اللي بيتكلم به الضعيف او اللي بيقدم له الخدمه دي هو ده وشه الحقيقي. اللي للاسف هيكلمك بيه بعد كده لما يضمنك وتختلفه في اي شيء.
تاسع علامه تكشف الشخصيه السامه انه لا يحترم حدود الاخرين. لو انت قلت مش حابب اتكلم في الموضوع ده هيستمر في الضغط عليك علشان تتكلم في الموضوع ده. ولو اعتذرت عن عمل اي شيء او تقديم اي خدمه لانها مش في امكانياتك حاليا او انت مش عاوز تعملها. يحاول احراجك او اجبارك انك انت تعمل له الحاجه دي. طبعا الشخص المتزن بيحترم كلمه لا. بيحترم خصوصيه الاخر وحدود الاخر. انما الشخص السام بيعتبر ده تحدي ليه.
عاشر علامه تكشف الشخصيه السامه انه يخليك تشعر بالذنب طول الوقت. ودي من اخطر العلامات. يعني مثلا يخطئ وبعدين يخليك تعتذر. ياذيك وبعدين يقنعك انك انت اللي حساس زياده. يتصرف معاك بشكل سيء وبعدين يجعلك تشعر انك انت السبب. والنتيجه انك انت هتشك في نفسك بالرغم انك انت ما عملتش اي حاجه غلط.
دلوقتي قلت لحضراتكم على 10 علامات تعرفوا بيها الشخصيه السامه. هضيف لحضراتكم سبع علامات سريعه تعرفوا بيها اكت الشخص السام. اول حاجه انه ما بيفرحش نجاح الاخرين. اثنين كتير الحسد والمقارنات. ثلاثه ما بيعتذرش ابدا. اربعه بيستغل طيبه الناس. خمسه بيحب اثاره المشاكل والدراما. سته بينقل الكلام بين الناس. سبعه يكثر الوعود ولا يفي بها.
واختم كلامي بقاعده مهمه في الموضوع ده. الشخص الصحي او السليم او المتزن بعد ما تقعد معاه بتحس براحه واحترام وتقدير. انما الشخص السام فغالبا بيسيبك متوتر او مستنزف نفسيا او شاكك في نفسك.
طبعا يا جماعه مش اي شخص عنده صفه من الصفات اللي قلتها لحضراتكم دي يبقى شخصيه سامه. لان كلنا عندنا عيوب واخطاء. لكن لما تلاقي عده علامات مجتمعه وبشكل متكرر ومستمر ساعتها لازم تكون حذر وتبعد عن الشخصيه السامه دي. ان كان امره ما يهمكش. لكن المشكله لو كان زوج او زوجه او اب او ام او احد الاقارب او المدير مثلا. في الحاله دي هتقلل التعامل معاه قدر المستطاع وتحط حدود نفسيه واضحه للتعامل معاه وتثق في نفسك وتبقى عارف ان المشكله مش فيه علشان ما تشكش في نفسك وتحس بالذنب. والاهم من ده كله عشان تجنب اذاه.
وانا عاوزك تدعي له بظهر الغيب ان ربنا يهديه او ربنا يشفيه. لانه غالبا مر بمشاكل في طفولته ومش عارف يتجاوزها ويتشافى منها. وبتطلع المشاكل دي على خلق الله. واحيانا ما بيبقاش واخد باله. وعلى فكره هو برده تعبان بس مش عارف يتعامل مع نفسه ازاي. وللاسف برده مش عارف يجيد التعامل مع الاخرين. طبعا هو محتاج جلسات نفسيه متخصصه علشان يكون شخصيه سويه.
وفي النهايه لو عاجبك موضوع الفيديو اعمل لايك وشارك الفيديو مع كل اللي انت عايزه يعيش سعيد. وما تنساش تعمل اشتراك في قناه اليوتيوب وتفعل زر الجرس والضغط عليه عشان توصلك كل الفيديوهات اللي جايه. شكرا لحضراتكم والسلام عليكم ورحمه الله وبركاته.