سلطنة عُمان تهدد بالحرب.. صلالة وقناة السويس يدفعان الثمن..ماذا فعلت إيران؟!

سلطنه عمان بتهدد ايران بالحرب في رساله حاسمه. سلطنه عمان، اه حضرتك، سلطنه عمان اللي بتهدد وبتكشف كمان الأجندة السرية للضربات الإيرانية.

ايه القصة؟ خد بال حضرتك إن ضرب إيران لميناء صلالة العماني ما مرش مرور الكرام. ده واحد من أهم المواني في منطقة الخليج. استدعى اتصال فوري من جلالة السلطان هيثم بن طارق البوسعيدي، سلطان عمان، مع الرئيس الإيراني مسعود بزشكيان. والرسالة كانت حازمة: إن العدوان ده ما يتكررش تاني، وإلا العواقب هتبقى وخيمة. تهديد حقيقي بالحرب. اه، هي دولة حيادية تهتم بشؤونها الخاصة، لا تتدخل في شؤون الغير، لكن ده مش ضعف. هي ليها طريقها، ماليش علاقة بشؤون غيري، بس أنا اللي يجي في طريقي. الغدر الإيراني بالضربة دي بيفكرنا بتاريخ الغدر الإيراني بالدول العربية.

سلطنه عمان هي الصديق المخلص العربي والوحيد بين كل الدول العربية. حقيقة، لنظام الإيراني من سنة 1979، 79، ما فيش اتفاق لإيران مع الغرب قدر يخفف الضغط عن إيران إلا ومر بمباحثات رسمية أو حتى غير رسمية في مسقط، عاصمة سلطنة عمان. يمكن ده بيفكرنا بحقيقة إن كل الدول العربية اللي بتضربها إيران النهارده كانت منخرطة بالفعل في وساطة حقيقية ومن القلب، وباسم الإسلام والجيرة والتاريخ قبل الحرب والمصالح، عشان أمريكا ما تضربش. الضربة دي، ومع ذلك، أول ما الحرب قامت، قام الغدر الإيراني ضرب الوسطاء، وكأنه بيعاقب الدول اللي فكرت في يوم من الأيام تحترم المصير المشترك والتاريخ الإسلامي المشترك بين العرب والفرس.

لكن زي ما قلت لك وزي ما بقول لك كل يوم، هي أجندة. حتى لو في ضغط شعبي إن اللي يقف مع إيران أو ضد إيران ده ليه قصة. لا، أنا بفهمك القصة فيها إيه. وكل الدعم الإيراني إنها تشيل إسرائيل. الغريب إن ميناء صلالة العماني وقت الضرب، لا كان فيه بوارج حربية أمريكية ولا مصالح أمريكية، وقطعاً ما فيش لإسرائيل حاجة لا في ميناء صلالة ولا سلطنة عمان من الأساس. هي القصة قصة. هنا بقى قواعد عسكرية أمريكية، بس ميناء صلالة العماني ومحطة مهمة جداً يا صديقي في طريق الحرير الصيني الجديد اللي أمريكا وإسرائيل ضربته. وده يرجعنا تاني لـ فكرة الأجندة السرية للضربات الإيرانية، وإزاي إيران رغم علاقتها القوية مع الصين، لكن في الواقع الأمر بتستهدف كافة محطات طريق الحرير الصيني. مش واخد بالك؟

لما الحوثي ضرب صواريخ بأوامر إيران في 2003، 2024، و2025، الصواريخ دي خلت البحر الأحمر منطقة حرب، والملاحة البحرية في مضيق باب المندب اتضربت، وقناة السويس كمان نفس القصة. دول أهم محطتين لطريق الحرير الصيني. في حين يا صديقي، إن صواريخ الحوثي على إسرائيل ما قتلتش ولو عسكري إسرائيلي ولا أصابت أي هدف حيوي في دولة الاحتلال. لأن اللي أعرفه عن الحروب إنك تقصف قواعد عسكرية، رتل دبابات، مطار بالطيارات بتاعته، ولا حتى قاعدة مشاه. إنما تضرب الشط بتاع إيلات وتقول لي بضرب في المينا وما فيش خسائر مادية أو بشرية، يبقى شوف الهدف الحقيقي للضربات دي إيه، وشوف قناة السويس ومضيق باب المندب خسر كام في ثلاث سنين بسبب التحركات دي.

إحنا مش ضد إيران، وفي نفس الوقت مش مع إغراق دولنا كلها تحت إيد إن إيران عندها مشروع. فكر كده فيها. فكر. اه بيضربوا، بس النتيجة إيه؟ شوف مين زرع جماعات الإسلام السياسي من غرب الصين لإقليم بلوشستان باكستان، ودلوقتي بنشوف إيران اللي هي بيحكمها جماعة من الإسلام السياسي الشيعي برضه بتكمل مهمة الإسلام السياسي السني، وبتكمل ضرب اللي في اللي تقدر عليه من محطات بقى لطريق الحرير الصيني، سلطنة عمان واليمن والبحر الأحمر، يعني مضيق باب المندب، يعني قناة السويس. مين اللي وطن جماعات الإسلام السياسي في كل محطات طريق الحرير من غرب الصين لشرق مصر؟ بالشكل ده، أنت لو عايز تشوف خريطة انتشار جماعات الإسلام السياسي وارهاب الجماعات دي في القارة الآسيوية، يبقى كأنك بالضبط بتتتبع محطات طريق الحرير الصيني. بتضرب المحطات دي؟ طب إزاي؟ ده الصين بينها وبين إيران مصالح، بتبعت ناس. اه حضرتك، ما هي كده ماشية كده كلها.

أقصى لـ أكبر ترانزيت بين آسيا وأوروبا. مصر بتربط معاها بخط رورو. أكبر ترانزيت لمستلزمات الإنتاج لآسيا بتحتاجها. في اللي بيحصل هناك ده. ثاني وثالث، إن إيران بتضرب النمور الاقتصادية الآسيوية واقتصاد الصين والهند، مش الغرب. وده هدف غربي من سنين. إيران بتستهدف يا صديقي مصالح صينية وخليجية أكتر ما بتستهدف مصالح أمريكية وإسرائيلية. ولازم نمتلك الشجاعة ونقول الكلام ده ونشاور عليه وما نسكتش أمام هجمات شعبوية عايزانا نسقف لإيران وخلاص عشان كم صاروخ على إسرائيل. إسرائيل ما خسرتش طيارة ولا دبابة ولا قاعدة عسكرية واحدة، لا من بداية الحرب دي ولا من أول ما إيران بدأ الطوفان الأقصى في 7 أكتوبر 2023. وده يخليك تشكك في جدول الحرب دي من الأساس. هي مش الحرب خسائر؟ ما تيجي تشوف كده. ولا إحنا عايزين بس بروباجاندا؟

اللي بيحصل دلوقتي لعبة جيوسياسية كبيرة جداً. لعبة خطوط التجارة العالمية وممرات الطاقة وطريق الحرير الجديد اللي بقى هو المعركة الحقيقية في القرن الـ 21. كل الضربات اللي حصلت في المنطقة خلال السنين الأخيرة، سواء في البحر الأحمر أو الشريج أو دلوقتي في عمان، بتستهدف ممرات التجارة اللي بتمثل العمود الفقري لطريق الحرير الصيني الجديد. طب الغرب من السنين بيقول إيه؟ بيقول إن أخطر مشروع استراتيجي على الهيمنة الغربية هو مشروع الحزام والطريق الصيني. أخذت بالك من المعلومة دي كذا مرة؟ اه، اتقالت. طيب المشروع ده ببساطة معناه إن الصين تبني شبكة طرق ومواني وسكك حديد وأنابيب طاقة تربط آسيا بأوروبا وأفريقيا بعيداً عن السيطرة الغربية التقليدية، ويكون التواجد فيها في المقام الأول لأمريكا. يعني لو المشروع ده نجح بالكامل، هتتغير خريطة القوة الاقتصادية في العالم كله، وبالتالي هتلاقي أمريكا تحل في مراكز متأخرة وتتقدم بدالها قوى كتيرة، أبرزها الصين.

لكن عشان المشروع ده ينجح، لازم خطوط الملاحة تكون آمنة. طب وده بيحصل دلوقتي؟ لا، اطلاقاً. لازم باب المندب يكون آمن، لازم البحر الأحمر يكون آمن، لازم قناة السويس تكون مستقرة وآمنة، ولازم مواني زي صلالة وجبل علي تكون خارج دايرة الصراع من الأساس. فاكر أنت إسرائيل بتفكر من وقت للتاني تعمل قناة بن غوريون؟ ما تنفعش للملاحة لأن موجود الفلسطينيين أو حماس هيضربوها من وقت للتاني. فانت بتلعب على النقطة دي. هم كمان بيلعبوا على دي. لكن اللي حصل خلال آخر ثلاث سنين عمل العكس تمام. الملاحة في البحر الأحمر تعطلت، شركات الشحن العالمية بدأت تلف حوالين أفريقيا بدل قناة السويس، تكاليف النقل زادت، تكاليف الترانزيت نفسها زادت، تكاليف التأمين زادت، والضغط الاقتصادي وقع بدرجة كبيرة على آسيا قبل أي حد تاني. يعني لو بصيت للصورة الكبيرة كاملة، هتلاقي إن المتضرر الأول من الفوضى دي مش رو أمريكا. المتضرر الأول هو اقتصاد آسيا. الدول اللي صناعتها قايمة على التصدير واللي بتحتاج خطوط بحرية مستقرة عشان تصدر. الضربة ضيعها. لفها كده في دماغك يا صديقي وفكر فيها بهدوء بعيداً عن أي توجهات. خليك حيادي وشوف نتائج الحرب.

عشان كده السؤال اللي لازم يتسأل بوضوح: هل الضربات دي فعلاً بتخدم محور مقاومة ضد الغرب؟ ولا بتخدم، من غير ما حد يقول، هدف استراتيجي غربي قديم وهو تعطيل صعود آسيا؟ المشروع الإيراني هنا بيخدم مين بالظبط؟ بيخدم إيران ولا أوروبا ولا أمريكا ولا إسرائيل ولا المنطقة ولا الخليج ولا مين بالظبط؟ ولا الصين؟ تاريخ مليان مفارقات غريبة. أوقات كتير قوى إقليمية بتدخل صراعات وهي فاكرة إنها بتحارب خصومها، لكنها في الحقيقة بتخدم أهداف قوى أكبر من غير ما تاخد بالها. يعني مثلاً، لما تتحول أهم الممرات البحرية في العالم لساحات حرب، أول نتيجة بتحصل إن التجارة العالمية تقل، تقع، تضرب. ولما التجارة تقل، اللي بيتأذى أكتر الاقتصاد الصناعي، الاقتصاد التصديري، الاقتصاد القائم على الإنتاج. ومش أي إنتاج. مش منتج عسكري وخلاص. ما أنا لازم أفرق مين بقى اللي بينتج إنتاج عسكري كتير؟ الغرب. ومين اللي بينتج منتج صناعي؟ الشرق، يعني آسيا. أما الاقتصاد الغربي اللي بقى قائم أكتر على الخدمات والتكنولوجيا والتمويل، بيكون أقل تأثراً بالملاحة البحرية. ومن هنا نفهم استهداف المواني ومحطات التجارة في منطقتنا العربية بالتحديد بيخلق أزمة أكبر في شرق آسيا أكتر ما بيخلقها في الغرب. دي نقطة مهمة لازم تعرف كواليسها ولازم تعرف قصتها.

سيبك من الجانب الشعبي اللي كل ما تكلم وتقول إيران بتعمل كذا، إزاي يبقى أنت بتشجع مع إسرائيل؟ هو لو مش أهلي يبقى الزمالك؟ اطلاقاً حضرتك. كل الدعم لإيران إنها تمسح إسرائيل وتهز كرامة أمريكا. لكن اللي بيحصل على الأرض عكس كده. ضرب مواني ومطارات وبنية تحتية تحت مسمى استهداف القواعد العسكرية اللي أصبحت خالية دلوقتي واللي ما عادش فيها هجمات واللي فيها ناس بشكل واضح اتضربت وخلاص طلعت بره الخدمة. أنت النهارده بتضرب الخليج أكتر ما بتضرب الجانب الآخر في إسرائيل. دي نقطة. واخد إسرائيل ستار للمشروع بتاع حضرتك. لذلك إنك بدأت تشتبك مع دولة زي سلطنة عمان اللي هي حيادية طول عمرها، ما بتدخلش في أي حاجة، وبتقف جنبك في أو أكتر بمعنى أدق، أكتر حليف شرقي واقف مع الجانب أو خليجي واقف مع الجانب الإيراني. دي نقطة. يبقى أنت واخد عداوتك مع إسرائيل ستارة عشان تشارك عن أهدافك. إيه بقى هي الأهداف؟ شفنا بقى في حلقة بكرة من العيار الثقيل جداً السعودية ومصر بيعملوا إيه في الكواليس مع باقي دول الخليج وعشان يشوفوا الهدف الإيراني والمشروع ده آخره في إيه.

لو وصلت لحد هنا، ما تنسيش تعمل لايك وتشترك في قناة اليوتيوب وصفحة الفيسبوك تدعمنا، لأن ده بيسعدنا وبيساعدنا.