ازاي تحوش فلوس غصب عنك في 2026

لو أنا قلت دلوقتي تحب تحوش فلوس غصب عنك وفي سنة 2026 يكون معاك فلوس كتير جدا، ناس كتير جدا هترد عليا وتقول: "يا عم واحنا لاقيين ناكل؟ يا عم هو إحنا معانا فلوس أصلاً؟"

ولكن الحقيقة اللي المفروض أنت تفكر فيها، والحقيقة اللي المفروض أنت تعترف بيها، والحقيقة اللي المفروض أنت تشوفها بشكل كبير جدا، فكرة التحويش عامة مش محتاجة فلوس كتير جدا علشان تحوش، ولكن هي محتاجة طريقة تفكير مختلفة، محتاجة مرونة منك علشان تقدر تتعامل مع الفلوس.

النهاردة هكلمك عن أربع حاجات لو قدرت إنك تستخدمهم بذكاء أو قدرت تستغلهم بذكاء، في سنة 2026 هيكون معاك المبلغ اللي نفسك فيه، أو هتقدر تحوش الفلوس اللي نفسك فيها، أو هيكون معاك المهارة اللي تساعدك إنك تتحكم في أي مال أو في أي فلوس موجودة معاك. الجميل بقى إنك هتلاقي نفسك بتعمل كل ده من غير ما تحس.

إحنا دايماً اتعودنا لما بنيجي نشتري أي حاجة ما بنفكرش الحاجة دي مناسبة لينا ولا لأ. ما بنفكرش الحاجة دي إحنا محتاجينها فعلاً ولا لأ. أوقات كتير جدا ممكن نشتري هدوم وبعد كده نركنها في الدولاب. أوقات كتير جدا ممكن تروح تشتري عربية وأنت مش محتاجها. أو تروح تشتري سيارة مثلاً قطع غيارها عالية جداً جداً أو قطع غيارها مش متوفرة مثلاً.

بس وقتها لو جيت فكرت وقلت: "أنا ليه هشتري عربية قطع غيارها غالية؟" أو "ليه أشتري عربية قطع الغيار بتاعتها مش موجودة؟" ما طبيعي جداً لو احتجت أي قطع غيار هتبقى غالية عليا جداً أو صعب جداً أوصل لها وهدفع فلوس كتير جداً علشان أجيبها.

بس لو أنت مثلاً فكرت بالطريقة الصح وقلت: "أنا هشتري عربية قطعة غيارها رخيصة وفي نفس الوقت جميلة وتكون حاجة شكلها حلو أنا راضي عنها جداً." تخيل معايا أنت على المدى البعيد هتوفر كام؟ تخيل معايا أنت هتكون مطمن إزاي؟

أول قاعدة عندي قبل ما أحط جنيه في أي حاجة: هل الحاجة اللي أنا هشتريها دي هتنفعني ولا هتضيع فلوسي وهتضيع وقتي على الفاضي؟ عايزك تبدأ تسأل نفسك تلات أسئلة مهمين جداً هيكشفوا لك حاجات كتير جداً: هل الحاجة اللي أنا محتاج أشتريها دي هتزود دخلي؟ هل الحاجة اللي أنا محتاج أشتريها دي هتخليني مثلاً أطور من نفسي؟ ولا الحاجة اللي عايز أشتريها دي مجرد إحساس حماسي أنا عايز أحس بيه؟ مجرد شعور جوايا إن أنا حابب أروح أشتري مثلاً لبس، أروح أشتري سيارة، أروح أشتري ده.

لازم تسأل نفسك الأسئلة دي قبل ما تشتري أي حاجة علشان دي هتنقذك من حاجات كتير جداً. أنا لما بدأت أفكر بالطريقة اللي أنا بقولك عليها دي اكتشفت إن 80% من الحاجات اللي أنا بشتريها مالهاش أي قيمة. 80% من الحاجات اللي عندي أنا مش محتاجها. 80% من الحاجات اللي عندي أنا راميها ومش بستخدمها.

كمان خد عندك بقى ملابس واشتراكات وكماليات مالهاش أي ستين لازمة، سفريات وطلعات كتير جداً ما كانتش بتقربني من النجاح ولا كانت بتخليني أطور من نفسي في حاجة غير إني بضيع فلوسي في الفاضي وبضيع وقتي في الفاضي.

لكن لما بدأت أستخدم الأسلوب اللي بقولك عليه ده، وفرت إيه؟ أو كسبت إيه؟ كسبت فلوس، وفرت وقت كبير جداً، والأهم من كل ده إن أنا وفرت طاقة كنت بضيعها في الفاضي. صدقني لو أنت ما عرفتش تتحكم في 1000 جنيه، عمرك ما هتقدر تتحكم في مليون جنيه. لو ما قدرتش تتحكم في مليون، لو جبت لك 20 مليون و50 مليون، أنت عمرك ما هتقدر تتحكم فيهم.

ناس كتير جداً أعرفها بيبقى معاها الفلوس، سواء الفلوس دي جاية من شغل، من سفريات، سواء الفلوس دي جاية من وراثة، سواء أياً كان مصدر الفلوس دي إيه. صدقني الناس دي النهاردة مديونة، النهاردة خسرت فلوسها، النهاردة ما معهاش أي فلوس خالص. وده ليه؟ لأن ما قدرتش إنها تكسب المهارة أو ما سألتش نفسها دايماً قبل ما تصرف الفلوس بتاعتها: "أنا محتاج الحاجة دي ولا لأ؟" منهم اللي كان بيدور على المنظرة، ومنهم اللي كان بيحاول يبين قدام الناس إن معاه فلوس، ومنهم اللي كان بيحاول يبين حاجات كذابة ما خلتوش يكسب أي حاجة خالص في الحياة، زائد إنه النهاردة مدمر نفسياً.

فكل اللي أنا بقولك عليه ده حقيقة واقعية وقاسية جداً كمان. الحياة ما بترحممش حد على فكرة. الحياة هتقول لك: "اعمل مجهود 1000 مرة من المجهود اللي كنت بتعمله علشان أديك 1% من الفلوس اللي كانت معاك." يبقى أنت محتاج تسمع الحلقة دي ومحتاج تركز في كل خطوة أنا بقولك عليها.

لو أنت واحد من الناس معاك 1000 جنيه ومش عارف الـ 1000 جنيه دي بتروح فين ولا عارف الـ 1000 جنيه بتتصرف فين، صدقني لو بقى معاك مليون جنيه هيطيروا في أسبوع.

لو قدرت تتعلم إن كل ما تقول لنفسك: "أنا محتاج أشتري الموبايل ده بس." أنا هفكر الأول، ثاني يوم أشوف أنا هشتريه ولا لأ وأنا محتاجه ولا لأ. استنى بس لثاني يوم، استنى بس ساعة، استنى بس ساعتين. الشعور أو الحماس اللي موجود جواك هتلاقيه اتغير تماماً. ميولك للموبايل ده إنك حابب تشتريه مش هتلاقيه موجود خالص. فما تحاولش تكون اندفاعي وأول ما تقرر إنك حابب تشتري الحاجة دي تجري تشتريها على طول. ده هيأذيك نفسياً.

أول حاجة لازم تحسب الأول أنت محتاج الحاجة دي ولا لأ. ثاني حاجة لازم تخطط الأول الحاجة اللي أنت هتشتريها دي هي هتفيدك في إيه؟ هتكسب منها إيه؟ لازم في نفس الوقت تتعلم إنك تقول "لا". قول "لا" لرغباتك، قول "لا": "أنا مش حابب أشتري الحاجة دي دلوقتي." وبعد يومين أو بعد تلاتة اسأل نفسك: "هل أنت لسه محتاج تشتريها ولا لأ؟" دور وحاول إنك تبحث بشكل كبير جداً تشوف أنت محتاج الحاجة دي تفيدك في حياتك ولا لأ.

فدايماً حط في بالك الفلوس عمرها ما كانت محتاجة مزاج. الفلوس عمرها ما كانت محتاجة مشاعر. أوعى تصرف فلوسك بمشاعرك. دايماً اصرف فلوسك بعقلك. دايماً خليك قائد وأنت بتحاول تختار الحاجة اللي أنت هتشتريها علشان فلوسك دي ما بتجيش بالساهل.

لو عملت اللي بقولك عليه، أوعدك إن في 2026 أنت هيكون معاك فلوس أنت عمرك في حياتك ما كنت تتخيل إنك تقدر تحوش المبلغ ده في فترة من الفترات. أنا في حد بحترمه جداً جداً شفته وهو بيتكلم عن إزاي تقدر تحوش فلوس. الشخص ده أنقذني من حاجات كتير جداً.

خل بالك، اتعلمت منه إن دايماً أعين من مرتبى 30% أو 40%. اعتبر اعتبر نفسي ما أخدتهمش، اعتبر نفسي ما شفتهمش، اعتبر إنهم مش موجودين أصلاً ولا أنا بأخدهم أصلاً. يعني على سبيل المثال لو أنت بتقبض 10000 جنيه، اعتبر نفسك بتقبض 7000 جنيه والـ 3000 اللي بتاخدهم دول حاول على قد ما تقدر إنك تشتري بيهم أي حاجة، إنك تعينهم مع أي حد من قرايبك، إنك تعينهم في حسابك ولكن حساب أنت ما تقدرش إنك تاخدهم دلوقتي.

وحاول على قد ما تقدر شهر أو شهرين جمعت جرام ذهب، خد الفلوس دي وحطها في جرام ذهب وخد الجرام دهب ده وعينه معاك وابدأ استمر على الأسلوب ده وشوف أنت هتحوش كام على آخر السنة. هتستغرب من الفلوس اللي أنت حوشتها. الفلوس دي أنت أكيد هتحتاجها لحاجات كتير جداً أنت حابب تطور من نفسك فيها أو تقدر تاخد المبلغ ده وتبدأ تستثمره في حاجة معينة.

فـ 3000 جنيه أنت لما تيجي تقول لنفسك: "والله أنا في سنة واحدة بس بدل ما أقول أنا بقبض 10، لا أنا بقبض سبعة بس." وتيجي على نفسك سنة واحدة بس، شوف بعد كده أنت هيكون معاك كام.

آخر حاجة ودي نقطة مهمة جداً وعايزك تركز فيها قوي: أنت عمرك ما هتقدر تنجح في حياتك ولا عمرك هتقدر تطور من نفسك ولا عمرك هتقدر تمسك فلوس ولا عمرك هتقدر توصل للحاجة اللي أنت عايزها طول ما أنت مش راضي عن نفسك وطول ما أنت مش راضي عن حياتك وطول ما أنت مش مؤمن بكلمة الرضا.

طول ما أنت مش راضي عن مستواك، طول ما أنت مش راضي عن بيئتك، طول ما أنت مش راضي عن نفسك، هتفضل طول الوقت عايش في قلق وتوتر. التوتر ده هيبدأ يعمل إيه في حياتك؟ هيبدأ يسرق منك التركيز على الأهداف اللي أنت حابب توصل لها. هيبدأ يسرق منك الفرص على كل حاجة أنت حابب تنجح فيها. هيبدأ يسرق منك حاجات كتير جداً أنت هتندم عليها بعد كده.

فالرضا دايماً معناه: البس على قد فلوسي، أعيش دايماً على قد ظروفي، وأشتغل على نفسي دايماً بذكاء بدون أي عصبية خالص. ما أحاولش أقلل من نفسي، ما أحاولش أبين لنفسي طول الوقت إن أنا فاشل أو مش هقدر أنجح أو ق أو بس في نفس الوقت أتعلم وأطور وأحاول أقرب من ناس نجحت في مجالات كتير جداً وشاطرة في مجالات كتير جداً.

حاول إنك تكون موجود في بيئة أو حاول تكون موجود مع ناس نجحت في مهارات ممكن تغير حياتك لو أنت اتعلمتها زي مثلاً لو أنت اتعلمت التسويق الرقمي، أو اتعلمت إزاي تبيع حاجة أونلاين، أو اتعلمت مثلاً صناعة المحتوى، أو اتعلمت مثلاً الجرافيك والتصميم، أو البرمجة. عندك بقى إدارة السوشيال ميديا، عندك التجارة الإلكترونية، حاجات كتير جداً بحر كبير جداً مش هينتهي. دي مهارات كلها بتجيب فلوس، مهارات كلها بتكسبك حاجات كتير جداً، مهارات كلها بتحسن دخلك بشكل كبير جداً بدون ما تكون محتاج لأي حد.

99% من المهارات اللي بكلمك عنها دي تقدر تتعلمها من خلال التليفون بتاعك بس وأنت قاعد في البيت في وقت الفراغ الزمني اللي أنت عمال بتشكي فيه نفسك وعمال بتندب طول الوقت وعمال بتقول: "فلان ظلمني وفلان كذا وفلان كذا." لو قفلت على نفسك كل يوم ساعة أو ساعتين وقدرت تتعلم مهارة واحدة من اللي بقولك عليهم دول، حياتك هتتغير 180 درجة وهتدعي لي بعد كده.

فاهم حاجة حابب أختم بيها: أول ما تقبض لازم يكون في خصم إجباري غصب عن مزاجك وغصب عنك. مرتبك أول ما تمسكه في إيدك اخسم 20% أو 30% زي ما قلت لك. اعتبر الفلوس دي أنت ما قبضتهاش خالص. لو مرتبك زي ما قلت لك 10، كانك بتقبض سبعة. دايماً عيش نفسك في الوضع ده: "أنا بقبض سبعة يا جماعة بس."

تخيل معايا كده أنت تقدر تعمل بالـ 3000 جنيه دول إيه؟ ممكن تحطهم مثلاً في جمعية، ممكن تشتري بيهم ذهب، تقدر تستثمر بيهم بعد كده لما تبدأ تحط مبلغ على مبلغ، تقدر تحطهم في أي حاجة ممكن تحافظ على قيمتهم. تخيل نفسك معايا بقى بعد سنة وبعد سنتين أو بعد تلاتة وأنت ماشي كده بنفس النظام، ماشي بنفس الإدارة اللي بقولك عليها دي، هتشوف فرق كبير جداً هيخضك بعد كده. مش هتتخيل إن حياتك اتغيرت إزاي. كفاية إنك ما بترمييش فلوسك في الشارع، كفاية إنك ما بتضيعش فلوسك شمال ويمين. ده أنت هتلاقي نفسك بتوفر مبالغ كبيرة جداً أنت كنت بترميها أو كنت بتضيعها كده في الأرض وخلاص.

هقولك على عادات خطيرة جداً جداً بتساعد إن أي محاولة تحويش منك علشان تقدر تمسك فلوس تخليها تفشل وتخليك ما تقدرش تمسك فلوس وتخليك دايماً ما تحتاج لأي حد. فلو عايز تفشل صح، اعمل الحاجات اللي هقولك عليها دلوقتي:

أول حاجة: دايماً اصرف فلوسك عشوائي من غير ما تعرف أنت بتصرف فلوسك فين. كل ما يجي في بالك انزل اشتري لبس تنزل تشتري لبس وما تفكرش في بكرة. كل ما يجي في بالك انزل اعمل كذا تنزل تعمل كذا. أجيب هدية لفلانة، أجيب هدية لفلان. كل ما تلاقي نفسك حزين أو كل ما تلاقي نفسك متأثر بمشكلة معينة تبدأ علشان تحسن مودك أو علشان تحسن نفسك تبدأ تاخد بعضك وتروح تشتري تشتري بقى أي حاجة حتى لو أنت مش محتاجها المهم إن مودك يتحسن وخلاص.

أخطر نقطة: إنك تقارن نفسك بالناس. ما فيش حد قارن نفسه بحد إلا أما فشل وما نجحش وما عرفش يطور من نفسه في أي حاجة.

فكرة بقى إنك تنتظر الفرصة السحرية اللي هتغير حياتك وهتخليك أغنى حد في الدنيا ده مش هيحصل. مش هيحصل طول ما أنت ما بتشتغلش على نفسك ولا طول ما أنت ما بتحوشش وطول ما أنت ما بتطورش في نفسك وطول ما أنت ما بتتعلمش. فهي مش هتجيلك كده إلا إذا ورثت من حد.

النقطة اللي بعد كده: لو أنت من الناس اللي ما بتصبرش، لو أنت من الناس اللي دايماً بتستعجل على النتيجة، فعمرك ما هتحقق أي حاجة أبداً.

لو أنت بقى من الناس الجميلة جداً اللي دايماً شايفه إن فشلها بسبب الظروف، بسبب البيئة اللي كانت فيها، بسبب المحيط اللي كانت عايشة فيه، طول ما أنت شايف إن كلمة الظروف هي الشماعة اللي تحط عليها فشلك، عمرك ما هتنجح. لازم تعترف بفشلك وتتعلم منه عشان ده هيكون أول سلمة في طريق النجاح.

فهقول لك على جملة لو حطيتها في ودانك وركزت فيها كويس جداً جداً وقدرت تفهمها كويس جداً: إن ظروفك عمرها ما هتتغير طول ما أنت ما بتتغيرش. الظروف بتتغير مع الشخص اللي بيغير من نفسه. الظروف بتتغير مع الشخص اللي بيبدأ يطور من نفسه. الظروف بتتغير مع الشخص اللي بيحب نفسه. الظروف بتتغير مع الشخص اللي بيبدأ يغيرها قبل ما هي تغيره غصباً عنه.

فأنا بوعدك لو مشيت على اللي قلت لك عليه في حلقة النهارده، حياتك هتتغير 180 درجة وفي 2026 هتمسك فلوس أنت ما كنتش تتوقع إن المبلغ ده أنت تقدر تحوشه. ده غير كمان إن ثقتك في نفسك هتزيد، ده غير كمان إنك هتلاقي نفسك بتطور من نفسك، ده غير كمان إنك هتلاقي تطور في عقليتك رهيب جداً جداً.

فحاول إنك ما تحرمش نفسك من أي حاجة وفي نفس الوقت احترم مستقبلك واحترم بكرة. أتمنى اللي قلته لك النهارده ده يأثر فيك ويفتح لك مجال إنك تشوف حاجات أنت ما كنتش بتحسبها ولا كنت بتشوفها. ولو الرسالة دي وصلتك فعلاً، فما تنساش إنك تعمل لايك وشير وتبعت الفيديو ده للناس اللي موجودين حواليك. سلام.