Transcription
زعل دخل ينام ما قامش. مشهور الموضوع ده. أو زعل دخل ينام، جاله جلطة، أو جاله شلل، أو جاله نزيف في المخ، أو جاله جلطة في قلبه. هل هناك علاقة؟
وأرجوكم، هذا الكلام اللي أنا بفكركم تفاعلوا معاه، وصلوه لكل الناس، لأن بيكم بنوصل. حقيقي نوصل لملايين الناس كل يوم. فهل هناك علاقة ما بين الزعل، وخصوصاً المفاجئ؟ يعني تلاقيه ضرب خناقة في البيت، أو رجع البيت مخنوق، دخل نام، حصلت مصيبة. هل في علاقة علمية وطيدة إن الزعل وأدخل أنام ده يموتني، أو يصيبني بجلطة، أو شلل؟
الحقيقة آه. وتعالوا نشرح مع بعض في خمس دقايق بسرعة. الواحد لما بيزعل ويتعصب قوي، يقعد يزعق، أو يشوف حاجة محزنة، أو يصاب بكارثة. هذا الزعل بيطلع في الجسم ستورم، يعني عاصفة من الهرمونات بتاعة الزعل والقلق والعصبية، على رأسهم الكورتيزون والأدرينالين.
لما بيزيد الكورتيزون قوي فجأة كده، بيبدأ يحبس ملح وميه، فيزود حجم الدم فجأة، فيبدا ضغط الدم يعلى. ولما يزيد الأدرينالين، يعمل حاجتين: يسرع ضربات القلب، ويعمل انقباض شديد في الأوعية الدموية، فيرفع ضغط الدم مرة واحدة.
ولما يزيد ضغط الدم بهذا الشكل العنيف، بيضرب في الجدار بتاع الوعاء الدموي. لو واحد عنده حاجة اسمها أنيوريزم، اللي هو بيبقى تمدد في الوعاء الدموي، بتبقى الجزء ده ضعيف، سهل ينفجر ويعمل نزيف شديد في المخ، أو في أي حتة موجودة في الجسم. وده نتيجة ارتفاع ضغط الدم الفجائي اللي بيحصل، وده يعمل نوع من أنواع النزيف.
الحاجة الثانية، حتى لو ما عندوش ده، الشعيرات الدموية الضعيفة الصغيرة، مع ارتفاع ضغط الدم الفجائي، ممكن يحصل فيها انفجار في الأوعية الدموية، ويبدأ يحصل هذا النوع من النزيف. وأيضاً على النقيض، زيادة ضغط الدم بالشكل العنيف بتزيد من الجروح والإصابة في الوعاء الدموي، وتزيد من احتكاك الصفائح الدموية، وتزيد من فرصة حدوث الجلطات، سواء في القلب أو المخ وخلافه.
يبقى الزعل العنيف بيرفع الضغط مرة واحدة، ويؤدي إلى زيادة فرصة حدوث الجلطات، وزيادة فرصة حدوث النزيف. ده كلام علمي مليار في المية.
طب إيه الحلول؟ الحل إن أنا لو أنا مشدود بهذه الطريقة، ماروحش أدخل أنام على السرير وأنا مشدود. يعني لازم أطلع من المود ده. وخلوا بالكم إن الفيديو ده وقائي لنا كلنا. ما فيش حد فينا ما زعلش في يوم وحس بتنميل في وشه من الزعل، وحس بألم أو تنميل في دراعه. ما فيش حد فينا ماتعرضش لهذا الستورم في يوم من الأيام.
فأقول له: ما تدخلش تنام وأنت في هذه الحالة. أمال أعمل إيه يا دكتور؟ يعني لازم تخلي، خلي هذه الهرمونات الستورم العنيفة دي تهدى وتهدى، بأن أنت توقف تفكر في الزعل ده. تفتكر كلامي ده، وتبدأ. في واحد يهدى لما ينزل يتمشى في الشارع شوية. وفي واحد يهدى لما يروح يفضفض مع حد صاحبه. وفي واحد يتصل بأصحابه وينزلوا على كافيه يقعدوا يهزروا مع بعض شوية، فيخرج من المود.
وفي واحد يرفع سماعة التليفون، أو واحدة ترفع سماعة التليفون على مامتها، على أخوها، على صحابها. احكي مع حد. حاول تعمل لنفسك ديستراكشن. في واحد يقول لك: أنا لما أسمع موسيقى أهدى. في واحد يقول لك: لما أسمع قرآن أهدى. في واحد يقول لك: لما أقرأ في الإنجيل أهدى. في واحد يقول لك: لما أقعد مع أصحابي. أنت عارف الطريقة اللي تهديك. واحد يقول لك: لما أسمع فيلم كوميدي أهدى.
ولكن النصيحة ستبقى غالية جداً: إياك والزعل وتدخل على السرير تنام مباشرة. كل حبايبكم عرفوهم هذه الرسالة. جيدة عامة. الزعل في المطلق مش حلو. الزعل بيعمل متلازمة القلب المكسور، وبيكسر القلب. وأنا حطيت قبل كده فيديو وريتكم فيه فعلاً العضلة بتاعة القلب تحسها مكسورة في النص، وبيعمل ألم في الصدر، وده بياخد وقت عشان الشخص يتحسن منه بعد ما يتحسن الموت بتاعه.
كمان القلق المستمر بينقص المناعة، وبيزود الكورتيزون، وبيسيب الناس بمرض السكر، وبيسيب الناس بمقاومة الأنسولين، وبيسيب الناس بالضغط. بس ده في الاسترس العام في المجمل، اللي ممكن نعمل له حلقة تانية. لكن حلقة النهارده أنا سايبها قصيرة قوي كده عشان عايزها توصل لكل الناس. إياك تزعل وتدخل تنام وأنت زعلان من غير ما تهدي الموتور المولع بتاع جسمك ده وهذه الهرمونات. ربنا يوفقكم ونشوفكم على خير في فيديو جديد ومعلومة يمكن تكون تفيدكم. كلام.