ليه فيه ناس بتعجز أسرع من غيرها بعد الاربعين ؟ إزاي تبطئ الشيخوخة وتعيش عمرك الطبيعي؟

هل الشيخوخة حتمية أم اختيار؟ وهل في إنزيم سري لو عرفت تشغله ممكن يوقف لك عداد الزمن؟

طب تعرف أن في ثلاث حاجات بتخلي جسمك يكبر ويشيخ بمعدل 10 سنين زيادة عن الطبيعي: تعب، وهن، قلة تركيز، وكرش مفاجئ. تفتكر هل كل ده صدفة؟

تعالوا نشوف يا طيبين ليه في ناس ممكن تعجز بسرعة بعد الـ 40 [موسيقى]، وفي ناس ثانية بتفضل شباب أو على الأقل بتمشي بمعدل السن الطبيعي بتاعها.

السلام عليكم، يا رب تكونوا بخير. واحدة من أشهر جمل بحر التغذية: "يو دونت إيج، يو راست" (أنت لا تشيخ، أنت تصدأ).

إزاي جسمي كان في فترة معينة قادر يقوم ببعض الوظائف بصورة كاملة بدون أي تقصير، وعند سن معين قدرته قلت واختلفت؟ زي مفصلات الباب اللي بتصدي ويبقى صعب إننا نحركه. طب إيه السبب؟ ليه المفصلات صدت؟ وهل كلنا معرضين بنفس الدرجة من الضعف ومن الصدأ، ولا في ناس بتختلف عن ناس ثانية؟

تعالوا نشوف أول وأهم عنصر متحكم في الشيخوخة: التيلومير. دي بروتينات بتحمي الكروموزومات اللي موجودة جوه الخلية. بتيجي عند النهاية كده وبتغلفها وبتحميها، ومسؤولة بشكل مباشر عن موت الخلية. كل أما طول التيلومير يقصر، الخلية تموت بشكل أسرع.

يعني إيه الكلام الطلاسم ده؟ وإيه التيلومير؟ التيلومير ده شريط موجود جوه الخلية، تمام؟ شريط أهو، اعتبره ده. كل أما الشريط ده يقصر، يعني مثلاً هو طوله كان 10 سم، بقى طوله 4 سم، ده بيعرض أن الخلية تموت أسرع. طب السؤال بقى، طب إيه اللي بيخليه يقصر؟ صح، عشان نتجنبه. برافو عليك لو سألت السؤال ده، أنت مركز.

اللي بيخلي التيلومير يقصر أن الخلية تنقسم أكتر بكتير من المعدل الطبيعي. إيه ده؟ أنت مش قلت لنا قبل كده أن انقسامات الخلية دي بتدي تجديد للخلية وتجديد للبشرة؟ أن الخلايا بتنقسم كده وبتتجدد؟ بالظبط كده. لكن أوقات معينة، أنت لما تكون عرضة تحت بعض العوامل اللي زيها الإجهاد المستمر والتوتر المستمر، وأن في شوارد حرة وتلوث وملوثات كتير في جسمك، الحاجات دي بتعمل إيه؟ بتبوظ الخلية إلى حد ما، بتعمل لها تلف شوية. فالمخ أو الجسم هيسيب الخلية تلفانة ويسكت؟ لا، يحفز إنزيم اسمه التيلوميراز على انقسام الخلايا، يقول لها: "لأ بقى، انقسمي عشان نصلح لك الضرر ده". فتنقسم لاثنين.

هنا بقى أول مشكلة: أثناء الانقسام، التيلومير نفسه بيقصر شوية. فكان مثلاً طوله 10 سم في الأول، مثلاً يعني، بعد ما تنقسم هيبقى طوله 8 سم. أنت يا عزيزي لو تحت استرس دايماً، بتاكل أكل سيء، دايماً الالتهابات في جسمك زيادة، تحت ضغط نفسي وعصبية، دايماً مش بتلعب رياضة ومش مهتم بصحتك، فدايماً الخلايا عندك، كل خلية هتتلف بسرعة. فلما تتلف، المخ يديها إشارة أن هي تنقسم. فلما تنقسم، إيه اللي بيحصل؟ التيلومير هيقصر. كتر ما الخلايا بتنقسم عندك نتيجة الحاجات السيئة اللي في جسمك، هيخلي التيلومير يقصر بسرعة لحد ما توصل عند طول معين للتيلومير اللي فيه الخلية هتقول: "ستوب، أنا مش قادر أنقسم تاني" وتتحول لخلية ميتة تالفة. لا منها عرفت تفيدك بحاجة، ولا منها أصلاً الجسم عرف يتخلص منها. بالعكس، ده بقت عبء عليك لأنها خلية تالفة.

فهمتوا حتة التيلومير دي؟ مش عارف حاسس أن الموضوع إيه يعني الشرحة طالت. الخصها لك في كام ثانية: انقسامات الخلية كويسة وبتجدد البشرة وبتجدد الجلد والجسم، لكن الزيادة عن الطبيعي بتأثر طول التيلومير، وعند وقت معين التيلومير لو قصر عند طول معين، الخلية بتموت. طب إيه اللي يخليها تنقسم زيادة عن الطبيعي؟ العوامل الأربعة أو الخمسة اللي قلناهم من شوية دول، وهكمل لكم عليهم، بس يعني دول ملخصهم أو معظمهم. حلو كده؟ لو فهمتها بقى وكانت واضحة، ارجوك وقف لي الفيديو دلوقتي واكتب لي تحت في التعليقات عشان أشوف الناس فاهمة ولا إيه.

طيب، ما فيش حاجة تساعدنا يعني؟ إحنا عايشين مضغوطين على طول وحالتنا بالبلة وبناكل أكل سيء وبنقعد ما بنتحركش، وصحة استرس وضغط. هنحاول نعدل الحاجات دي يا أبو حميد. حاضر، هنحاول نعدلها. بس قول لنا كده، ما فيش حاجة تدعم لنا التيلومير ده طالما مهم جداً؟

آخر الأبحاث وأقوى التجارب قالت أن أكتر حاجة بتأثر أو بتقوي التيلومير: الأوميجا 3 الجيدة، يا إما من مصدر طبيعي، يا إما من مكملات طبيعية يكون فيها الـ EPA والـ DHA عاليين، أعلى من 600. يعني معاك من 600 وأنت طالع تمام، يبقوا أعلى من كده. فدور بقى في بلدك على أي حاجة شبه كده. وأنا عملت بالمناسبة فيديو مخصوص، يا ريت تشوفوه لو عايزين تعرفوا أنواع الأوميجا 3 الجيدة.

وطبعاً، المفروض كان يبقى في حاجة أهم وأول، هي الأول تبقى من ده، بس ماشي، خليها اثنين: اللي هي هتقلل العادات والأطعمة اللي بتخلي الخلايا تنقسم أكتر من الطبيعي. السكر، الزيوت، الزيوت المهدرجة طبعاً، زيت الزيتون والحاجات دي مفيدة. الأكل المصنع والأطعمة المصنعة كلها زي اللحوم المصنعة والشيبسيات وغيرها والبسكوتات. ورقم ثلاثة إيه؟ لازم تقلل الحاجات دي لأن جسمك بعد الـ 40 غير قبل الـ 40. هو أنت مش هتموت بعد الـ 40 يعني عشان الناس بس اللي بتهول الموضوع؟ لأ، هو بس في بعض الوظائف الحيوية، زي ما قلنا في الإنترو، قدرة جسمك عليها أو على القيام بها بيقل طبيعي مع التقدم في العمر. بس الفيصل يعني بعد الـ 40 شوية. المهم، رقم ثلاثة: ركز على مادة الريزفيراترول اللي موجودة في الحاجات الملونة، أكترهم العنب الأحمر.

طب ده المتحكم الأول. تعالوا نشوف المتحكم الثاني عشان مهم جداً.

اثنين: المتحكم الثاني: الأوكسديتيف ستريس (الإجهاد التأكسدي). خلاصته إيه في كلمتين تقريباً؟ عندك في جسمك حاجة اسمها الفري راديكالز، دي الشوارد الحرة الضارة، بس ممكن تحصل لك عادي من التمثيل الغذائي اللي هو بيحصل جوه جسمك. لكن عددها بيزيد قوي من الخمس ست حاجات اللي قلناهم من شوية: الاسترس والأكل الضار وقلة الحركة والكلام ده كله.

طيب، المشكلة بقى أن دول لو بنسبة طبيعية، في حاجة اسمها مضادات الأكسدة بتقدر تطفي نار ده وتتخلص منه. أيوه، أنا بشوف الفري راديكالز دي بحسها زي شفتوا شرارات النار اللي بتبقى في الحاجة؟ ده دي شرارات نار جوه جسمك. لو هي بنسبة طبيعية أو بنسبة كويسة ومضادات الأكسدة أكتر، هتبدأ تبدأ تتغلب عليها وتطفي النار بتاعتها. الكارثة بتحصل والإجهاد التأكسدي بيحصل لما تكون الفري راديكالز دي أكتر من مضادات الأكسدة، فتقعد شرارات النار تكسر أو تتلف نهايات العصبية وتتلف حاجات كتير جداً مهمة جوه جسمك. حلها إيه؟ امنع الخمس حاجات اللي قلنا عليهم فوق. بس أنا بس حبيت أوضح لكم أن دي من أسوأ الحاجات اللي بتعجز الخلايا بدري وبتعجز الجسم بدري.

مع ثلاثة: خلينا نكتبها فوق أفضل. ثلاثة: يا عزيزي، السينسنت سيلز. يعني إيه دي كمان؟ عارفين دي يعني إيه؟ دي خلايا بيقولوا عليها خلايا الشيخوخة. أيوه، نيلتها إيه ولا قصتها إيه؟ دي بتيجي منين؟ فاكرين الخلايا اللي التيلومير قصر لدرجة معينة وهي ما قدرتش تنقسم وتوقفت عن الانقسام وقعدت في الجسم؟ لا هي انقسمت ولا الجسم قدر يتخلص منها وقعدت جوه في جسمك كده مربعة. دي خلايا الشيخوخة. طب وبعدين؟ نعمل فيها إيه؟ نقضي عليها إزاي دي؟ هقول لك في حاجة قدام بالاوتوفاجي اللي هو الالتهام الذاتي. هشرح شرحه لك تفصيلياً. هنقضي عليها بالاوتوفاجي، وبالمركبات أو الحاجات اللي فيها كيرسيتين. مادة الكيرسيتين اللي موجودة في البصل وفي التفاح، بس موجودة في البصل أكتر. يعني التركيز على الأطعمة اللي فيها بصل. وعلى فكرة مفيد قوي مادة الكيرسيتين دي للجيوب الأنفية، التهابات الجيوب الأنفية. وكمان بتلاقوها دي على هيئة مكملات حبوب. تمام؟ برضه كويسة جداً. هتلاقوا عليها مكتوب "كيرسيتين".

زي ما شفنا قد إيه الأوميجا 3 النقية النظيفة اللي بتاخدها من المكملات، أو التركيز على الأسماك اللي زي السلمون وزي الماكريل، معاهم لازم تركز على فيتامين د وتشوف الشمس، وأهمية الريزفيراترول الموجود في العنب الأحمر، والكركمين مع رشة الفلفل الأسود اللي قلنا عليها.

مفتاح مهم جداً هيفرقك قوي عن غيرك في كل حاجة في جسمك تقريباً: في إطالة عمر التيلومير، المتحكم الرئيسي في الشيخوخة، في قتل خلايا الشيخوخة نفسها، وفي تنظيف وتنقية الجسم. العنصر ده: الأوتوفاجي اللي هو الالتهام الذاتي. طبعاً أعتقد المصطلح خلاص بقى مش جديد علينا، بقينا كلنا عارفين الأوتوفاجي والالتهام الذاتي. اللي بيحصل إمتى؟ أو ده اللي مش كلنا غالباً عارفينه بالظبط.

علشان تفعل الأوتوفاجي في جسمك وتخلي جسمك بنفسه يأكل الخلايا السرطانية والخلايا القديمة والخلايا الضعيفة والتالفة وخلايا الشيخوخة نفسها، لازم تصوم. وشروط الصيام هنا أنك تمتنع عن الأكل لمدة من 18 لـ 20 ساعة. علشان كده الصيام المتقطع ساحر ورائع بمعنى الكلمة للدايت ولتحسين وظائف الجسم وللذكاء ولكل حاجة، لكن كمان حلوة قوي كمضاد قوي جداً للشيخوخة.

وفي حاجة أقوى من الصيام المتقطع: صيام الماء. أيوه، في ظل العادات الكارثية والأطعمة الضارة المنتشرة في كل حاجة تقريباً حوالينا، واللي غصب عنك هتضطر تاكل منها سواء بإرادتك أو غصب عنك أو أياً كان، صيام الماء أكتر حاجة هتحفز لك الأوتوفاجي، وكأنك بتعمل إعادة ضبط مصنع لجسمك. أكيد مش هتتخلص من كل الآثار السلبية اللي أنت عملتها، لكن على الأقل هتضمن أنك هتتخلص من خلايا سرطانية مؤذية، خلايا شيخوخة بتبوظ الخلايا اللي جنبها. صيام الماء بيتمثل أنك هتقعد 24 ساعة كاملة مش هتاكل فيها أي حاجة، هتشرب بس ميه. لو عندك فيتامين كويس، خده وبس كده. علشان كده اسمه صيام الماء.

لو قدرت تعملها عادة كل أسبوعين مثلاً، كل أسبوع مرة يوم صيام الماء، كل ثلاث أسابيع. والله أنا هو بالمناسبة يعني، إن شاء الله أنا هدخل التجربة دي، بس هيبقى يومين أو ثلاثة. يعني هعمل تجربة صيام يومين أو ثلاثة، وإن شاء الله أصورها لكم فيديو ونشوف إيه التغيرات أو التأثير اللي ممكن يظهر أو يحصل عليا.

خلصنا صيام الماء. التمرين عالي الكثافة. لو جسمك مساعدك تلعب 30 ثانية بأقصى درجة ممكنة، سواء جري أو نط حبل أو تمشي على المشاية في الجيم، أو حتى تجري في المكان. المهم 30 ثانية بأقصى درجة ممكنة وبعدها تريح. ده اسمه التمرين عالي الكثافة. من أكتر الحاجات اللي بتقضي لك برضه على خلايا الشيخوخة نفسها.

طب وماذا عن أهم ثلاث حاجات اللي قلت لنا عليهم اللي لو بتعملوهم ممكن يكبروكم 10 لـ 15 سنة، وأكيد لو وقفتوهم هيصغروكم 10 لـ 15 سنة، أو على الأقل خالص هيمشوكم بمعدل السن الطبيعي بتاعكم؟

أول متهم، وفي الأبحاث مصنفينه أن هو الثالث أو الثاني، أنا مصنفه الأول. المتهم رقم واحد اللي استمرارك عليه فترات طويلة من الزمن مش عايز أقول كلام كارثي وأقول ممكن إيه. المتهم ده: القاعدة الكتير. ناس اليوم بيتسرق منها في القاعدة أو في النوم أو في الاسترخاء من غير ما تاخد بالها، ويوم ورا الثاني ورا شهر ورا الثاني ورا سنة ورا الثانية. العضلات عندها بيحصل لها ارتخاء، الأوعية الدموية بتبدأ تضيق، ضربات القلب، عضلة القلب نفسها بتبدأ تضعف. المكنة بتاعتك أنت، إذا ماشية بتروح في حتت ثانية مش عايزين نروح تروح لها. لو شغلك بيعتمد أنك تقعد لفترات طويلة، لازم على الأقل كل نص ساعة، كل ساعة، كل ساعتين تقوم تتحرك شوية. بس مش ده اللي هيحل لك المشكلة الحقيقة، لأن أنا فكرت وأنا بقول: لو أنا قاعد تسع ساعات وكل نص ساعة هقوم أتحرك خمس دقائق، وبعدين يا فرحتي أنا كده ما عملتش حاجة. لازم كل يوم تمشي لك على الأقل ساعة، نص ساعة يوم ويوم. المهم ما تخليش يومك يتسرق منك وأنت قاعد يا إما نايم يا إما مش بتتحرك.

والمتهم الثاني اللي أكيد كلكم برضه بقيتم عارفينه، بس برضه برضه مش عارفين تحلوه: التوتر المستمر والإجهاد المستمر. الضغط النفسي والتوتر والعصبية. أنك تكون مضغوط ومتوتر ومجهد على طول من أكتر الحاجات اللي بتضرب التيلومير بشكل مباشر، فبتبوظ لك الخلية بشكل مباشر. فيوم ورا الثاني وخلية ورا الثانية، للأسف هتصاب بالشيخوخة المبكرة أكتر وأسرع من غيرك.

أما عن المتهم الثالث: بصوا، مع التقدم شوية في العمر، قدرة الجسم على النوم بتقل شوية. ده يمكن تشوفوه في معظم حبايبنا يعني اللي كبار شوية في السن، الـ 50، الـ 60. بتلاقي إيه؟ بيناموا شوية قليلين ويقوموا فايقين. فأنت من بعد الـ 40 اجبر نفسك أن لأ، أنا عايز أنام من سبعة لتسع ساعات. أنا قلت ليه النقطة دي؟ لو أنت استسلمت أن نومك بيقل تدريجي، اللي هو لأ، ستة، بعدين خمسة، بعدين أربعة، بعدين فاهمني؟ هتوصل مثلاً لعمر قدام شوية، ربنا يدينا ويديك العمر في الخير والصحة، وهتلاقي نفسك بتنام قليل قوي لأن أنت استسلمت لجسمك أو استسلمت للطبيعة، طبيعة أن النوم بيقل كل ما يكبر. فلا، لأ، ركز والتزم أن نومك يبقى من سبعة لتسع ساعات، من ست لثمان ساعات، ما يقلش عن كده. وابعد طبعاً عن الشاشات قبل النوم بساعة، زي ما كلنا متفقين وزي معظمنا ما عارف وما بيعملش كده. التعرض قبل النوم للشاشات بيزود الضوء الأزرق اللي بيقلل لك أصلاً هرمون الميلاتونين اللي بيساعدك على النوم.

عرفت يا طيب أن العجز ليس قدراً، هو نتيجة لقرارات بيولوجية سيئة بتاخدها خلاياك. التغذية الحديثة والفارماكولوجي دي بتقول لك: أنت ممكن تعيد برمجة خلاياك من تاني. قولي بقى بصدق، تتفق مع الجملة اللي قلتها من شوية دي بنسبة كام في الم؟ واكتب لي رأيك في التعليقات. بس قولي رأيك الحقيقي اللي أنت مصدقه. اقتنعت بعد ما شفت الحلقة أو بمعلوماتك السابقة، أنت مصدق في الجملة اللي قلتها دي بنسبة كام في الم؟ واكتب لي نسبتك تحت في التعليقات. مش عارف هنجمع النسب دي هنعمل بيها إيه، بس أكيد هنعمل بيها حاجة مهمة.

اشحن تيلوميراتك، وقف الصدأ اللي بيحصل داخل جسمك، تخلص من خلايا الزومبي. أهم ثلاث مفاتيح. في حاجات تانية ونصائح تانية، أكيد في حاجات تانية ونصائح تانية. بس عشان وقت الحلقة نكتفي بدول. لو حابين نعمل لها جزء تاني، اكتبوا لي تحت في التعليقات. وأنت تحت، أوعى تنسى تعمل اشتراك في القناة وتعمل لايك للفيديو. عايزين نوصل لـ 4 مليون مشترك في الشهرين اللي جايين دول. أشوفكم على خير، دمتم في رعاية الله وأمنه، والسلام عليكم ورحمة الله وبركاته.