نصيحة اخوية - الشيخ علي المياحي

بسم الله الرحمن الرحيم وبه نستعين. وصلى الله على النبي واله الطاهرين. اللهم عجل لوليك الفرج.

استضافت مؤسسة رواد، التي تعنى بتنمية مهارات الطلبة والخطباء والمبلغين، شيخين عزيزين وجلين، هما الشيخ فرحان الساعدي والشيخ أحمد سلمان التونسي. ونشرت المؤسسة بودكاست في الحوار بينهما، وهو حوار فيه نكات لطيفة وفوائد شريفة وكلام يتعلق بالخطاب والخطابة والخطباء.

لكن مما لفت انتباهي أنه في دقائق معينة وقفوا على شيء من الخطاب الروحي. وأنا أعرف من يقصدون وماذا يقصدون، وأعتقد الجماهير أيضاً والناس يعرفون القصد من ذلك. وأنا بكل أدب وكل احترام وكل توقير لهذين الشيخين، أود أن أقف على بعض الملاحظات التي توهم فيها. هناك عبارات غير صحيحة صدرت منهما، وأنا أود أن أرد عليهما.

الشيخ فرحان بدأ كلامه باستغراب أن بعض الناس يقول: "الله صديقي، الله صاحبي، الله كذا". ثم يقول: "الان الصورة مختلفة، يطلع لهم أنه يحب صديقه، حب ولي هي من أساسها لحبيب حبه وصل الحشا، يعني لك صديق أنت عبد". وبعدين يقول: "عيب، هاي اللغة عيب أنه تقول الله صاحبي، الله صديقي، عيب". وهذا كلام مردود عليه. طبعاً هو يقول: "الله صديقي" يعني ينكر أن ننسب الصحبة بيننا وبين الله عز وجل، لأن صديقي يعني صاحبي، وهذا اللي نفهمه الآن. هذا كلام سماحة الشيخ مردود عليه، مردود عليه بالروايات.

والآن أنا أستعرض لكم هذه الرواية في بحار الأنوار للعلامة المجلسي في صفحة 266، وقبلها 260 في الجزء 91. هذه رواية الدعاء، دعاء الجوشن الكبير، الذي مروي عن النبي صلى الله عليه وآله. النبي يروي هذا الدعاء، وعده هنا عبارة: "يا صاحبي عند غربتي". الله يعني يقول له أنت اقرأ دعاء، قل له أنت صاحبي. الدعاء يقول: "أنت صاحبي". في موضع آخر: "يا حبيب من لا حبيب له، يا صاحب من لا صاحب له". فهسه إحنا إذا كان فيها قلة أدب أنه الإنسان يقول الله صاحبي، فخوكون ترد عليه؟ من ترد على النبي صلى الله عليه وآله؟ وأكو نص آخر: "يا رفيق من لا رفيق له". جيد، هذه الرواية موجودة في بحار الأنوار مجلد 91. هذه النقطة الأولى اللي حبيت أن أقف عندها.

النقطة الثانية أنه أنا مستغرب منهما، هذين الشيخين العزيزين، يقولون: "مفردة العشق، مفردة العشق، هذه مفردة خاصة بين الرجل والمرأة في موضع خاص". "عشق الله ما هي المفردة ذات طابع كذا؟" "طابع كذا نعم، بين الرجل والمرأة". "بين الرجل والمرأة، هذا مو حب، عشق، مو حب؟" "اللغة العربية، مؤسسة المفردات". "هذه كلمة عشق لا تقال إلا بين الرجل والمرأة وفي ذروة كذا؟" "صحيح صحيح". "وعشاق كذا، عيب، أنتم ماذا تفعلون؟ فعلتم باللغة، ثم تفعلون بالدين كله لجهل". يعني بموضع خاص تستخدم للحب الشهواني، تستخدم للعلاقة الخاصة بين الرجل والمرأة يسمونه عشق. غير هذه الكلمة أنتم خربتوا اللغة العربية، ومثل ما قال يعني قال: "فعلتم باللغة كذا، تريدون تفعلون بدين كذا". فعلنا باللغة.

الغريب أني مستغرب من سماحة الشيخ، شيخ فرحان، أنت مقاري معاجم، قواميس؟ ما مار عليك؟ ما مر على مثلاً لسان العرب، كتاب الصحاح، تاج العروس؟ ما مر على العين؟ ما مر يعني؟ مقاري هيك تلقي الكلام على عواهنه؟ قدامك هذا كتاب لسان العرب لابن منظور، وهو من المراجع العليا في المعاجم والقواميس. بالجزء العاشر بمادة "عشقه" يقول: "العشق فرط الحب، كثرة الحب، شدة الحب". العشق فرط الحب. وقيل هو عجب المحب بالمحبوب. يكون متى يصير العشق؟ يكون في عفاف الحب، يعني في الحب الشريف. أنت تقول بس العلاقة الخاصة بين المرأة والرجل في الموضع الكذائي، والشيخ أحمد يؤيدك يقول لك نعم، بس هذه. يقول: "ويكون في عفاف الحب، الحب العفيف". يعني سامع الحب العذري والغزل العذري؟ في عفاف الحب ودعارته. يعني يشتغل على الخطين. اكو حب شريف، حب صحيح، مطلق يسمونه عشق، وأكو حب شهواني مذموم يسمونه أيضاً عشق. طيب، ما مر على هذا الكتاب قبل لا تطلق الأحكام شيخنا العزيز؟ ثم الـ... أنت تتكلم على لسان لغة، ما من حقك شيخي، ما من حقك تطلق الكلام هكذا وتقول الحب هو العشق هو خاص بين الرجل والمرأة. وهذا لسان العرب قدامك، وأنا اللي عرضته لك، طبعة دار صادر، صفحة 161.

بعدين استغربت منك، وأنت إنسان متثبت، عهدنا بيك هكذا. إحنا نستمع لك، نستفيد منك. تقول: "أنتم فعلتم باللغة هكذا، تجون تفعلون بالدين هكذا". تقولون عشاق كذا، مثلاً عشاق الحسين، عشاق أهل البيت، يعشق الله، يعشق الصلاة. يقول هذا يدل على جهل من عندكم، وتتعامل مع الناس بهذه اللغة العالية اللي كأنما الناس ما تفهم. سماحة الشيخ، شيخي، أنت ما قاري روايات؟ ما قاري؟ ماكو شيء اسمه عشق صلاة، عشق عبادة، عشق الله، عشق أهل البيت؟ ماكو. خلي أعرض لك، خلي أراويك. إذا ما قاري، أنا راح أعرض لك هذا كتاب أصول الكافي. أصول الكافي من الكتب الرئيسة الأربعة، وأنت تعلم، وإحنا جل ما ننقل من هذه الكتب. أصول الكافي وبحار الأنوار والوافي والتهذيب وإلى آخره. فهذا أصول الكافي، وأنت تقول ماكو عشق بس بين المرأة والرجل، وتتجاوز على الناس تقول ذول عندهم جهل، ما يفهمون. الناس محترمة شيخي، احترم الآخرين، لأنه العالم شلون ينعرف؟ عالم باحترامه للناس، باحترامه للآخرين، باحترامه للمباني، باحترامه للأفكار. تقول ماكو عشق، ماكو عشق للشيء بس بين المرأة والرجل في الموضع الخاص الكذائي. أمامك بحار الأنوار، أصول الكافي، الجزء الثاني للشيخ الكليني، صفحة 480، طبعة دار المرتضى، باب 42. الرواية هكذا عن أبي عبد الله الصادق عليه السلام قال رسول الله صلى الله عليه وآله: "أفضل الناس، أحسن الناس، أفضل الناس من عشق العبادة". شلون هاي؟ أنت تصف هؤلاء جهلة اللي ينسبون العشق لأشياء دينية، والإمام والنبي يقولون أحسن ناس. آخذ بكلامك لو آخذ بكلام الإمام الصادق ورسول الله؟ بماذا نأخذ؟ والناس تثق بنقلك، كون تتثبت. "أفضل الناس من عشق العبادة، فعانقها وأحبها بقلبه وباشرها بجسده وتفرغ لها، فهو لا يبالي على ما أصبح من الدنيا على عسر أم على يسر". هذه بأصول الكافي. سماحة الشيخ، هؤلاء اللي تصفهم بالجهلة يعتمدون على هالرواية، يعتمدون على رواية راويها الإمام الصادق عن رسول الله بالكافي، باب 42، باب العبادة، صفحة 480، أصول الكافي. جيد.

وليس هذا فقط. اللطيف أنه هذه الرواية يشرحها المولى محمد صالح المازندراني، صاحب شرح أصول الكافي، وهو من الشروحات القيمة والكتب المهمة في شرح روايات العترة الطاهرة. المولى المازندراني في شرح أصول الكافي بالجزء الثامن من باب العبادة، صفحة 261 و 262، يجي ينقل الرواية يقول: "قال عن أبي عبد الله عليه السلام قال رسول الله صلى الله عليه وآله: أفضل الناس من عشق العبادة". ثم يقول في تعريف العشق اللي أنت تعتبره حالة شهوانية، واللي يحكون يقولون: "نعشق الحسين، نعشق الله، نعشق أهل البيت، ذول جهلة بنظركم". يقول: "العشق هو الإفراط في المحبة، أي أحبها، يعني أحب العبادة، مو مو الشهوانية، ركز. أي أحبها حباً مفرطاً". ليش أحبها؟ هو ليش عشق العبادة؟ "من حيث أنها وسيلة إلى المحبوب الحقيقي وهو الله، وذريعة للوصول إليه والقرب". هذا يعشق العبادة يعني يعشق من يعشق الوسيلة اللي توصله إلى الله، يعني يحب الله. هذا شيخي بعدين في نهاية الكلام هو يتحدث عن العبارة والعشق وعشق العبادة يقول: "وقرروا في كتبهم الإلهية، يعني الحكماء، أنه هذا عشق العبادة من أعظم الكلمات وأتم السعادات". وربما يظن أو يظن أن بين الكلام تخالفا، وهو من واهي الظنون، ظن واهي، ظن ضعيف، ما متثبت. فإن المذموم هو العشق الجسماني الحيواني الشهواني. هذا المذموم، مو مطلق العشق مذموم. وهذا المولى المازندراني، إذا أنتم جنابكم دارسين علم، يعني دارسين روايات وشروحات، راح تعرف منو المولى المازندراني. والممدوح، اكو عشق ممدوح، والممدوح هو الروحاني، الإنساني، النفساني، إلى آخر كلامه.

فهنا اسمح لي أقول لك شيخي، أنه أنت تجاوزت على كثير من الناس اللي عندهم مواكب مثلاً، اسمهم عشاق الحسين. وهنا راح أضيف لك فد مسألة ثانية وأيضاً مهمة. أنت تدري كلمة عشاق اللي وصفت ناسها بالجهل والكذا، ذكرها الإمام علي؟ تعرف تدري؟ الإمام علي في رواية ينقلها الإمام الباقر يقول على أصحاب الحسين عشاق، وإني هم راح أعرضها قدامك حتى تعرف الموضوع هذا. بحار الأنوار للعلامة المجلسي، وهذا المجلد 41، وهاي الصفحة 182، وهذا الباب اللي قدامك، باب 14، باب معجزات كلامه في أخباره بالغائبات وعلمه باللغات. يعني الإمام علي وبلاغته وفصاحته صلوات الله عليه. الرواية رقم 18، وقال الباقر عليه السلام، هاي الـ 18 روايتين راجعوهن. الرواية الثانية يقول: "وقال الباقر عليه السلام: خرج علي، الإمام علي عليه السلام، يسير بالناس حتى إذا كان بكربلاء على ميلين أو ميل، تقدم بين أيديهم حتى طاف بمكان مكان افترا عليه يقال له المقدفان. فقال الإمام، قال: اسمع هاي رواية الإمام علي. فقال: قتل فيها ما أتى نبي، عرض كربلاء، ما أتى نبي مكتول فيها، وما أتى سبط، كلهم هم شهداء، ومناخ ركاب ومصارع عشاق شهداء". عشاق، اللي أنت تقول الآن عشاق، ذول ضيعوا اللغة، رجعوا ضيعوا الدين. هذا الدين الآن أنا آخذ كلامك لو آخذ كلام أمير المؤمنين؟ أعتمد بودكاست مالتك لو أعتمد رواية؟ آخذ كلام من؟ وبعدين بكل جراءة شيخي تصفون من يتحدث بهذا الكلام جاهل، والعلم كانه عندكم فقط. طيب، كم موكب عندنا اسمه عشاق الحسين؟ ذول بنظركم جهلة؟ كم هيئة اسمها عشاق أهل البيت وعشاق أمير المؤمنين وعشاق الحسن؟ هذول كلهم ما يفتهمون شيخنا. هسه أنتم أشكلتوا باللغة، جاوبناكم باللغة. أشكلتوا بالدين، طلعنا لكم هذا الدين منين تأخذون مصادر معلوماتكم. ما أدري. طيب، الآن داخل وياك، تداخل وياك سماحة الشيخ أحمد التونسي، وهو أخ عزيز ومحترم. وأنا أول ما دخلت للعراق اتصلت به. أنا اتصلت به وقلت له: "أنت ضيف عزيز عندنا، وأي شيء تحتاجه في العراق أنا أكون بخدمتك". وهو شكرني، وبيناتنا فد مودة لطيفة. استغرب من من الشيخ العزيز يقول: "هذا التدين المعلمن، ما أعرف هاي المعلمهن، يا مصدر منين جابها؟ ما أدري. دول نقول ربع الله مثلاً". "وهي قضية التدين المعلمن". "كيف التدين هو حب الله؟" "عشق الله؟" "أم؟" "والأذكار فقط؟ يعني عرض الدين يكون في إطار المشاعر والأحاسيس مع الله؟ سوالف ربع الله؟" مثل شيخي، إحنا ناس نحكي بلهجة أهلنا. أنا ابن الناصرية والعماره وسوق الشيوخ والبصره والفجر والقلعه والكوت والحي. إحنا ناس نحكي بلهجتنا، مثل ما أنت بتونس هم عندك لهجة، وإحنا نحترمها. المفروض تحترم لهجتنا وما تستهزئ بها، تحكيها بطريقة تضحك وكذا. إحنا هذا الحكي نتوقعه من غيرك، نتوقعه من ناس مثلاً. على كل حال، ما نتوقعه منك. المفروض يكون احترام لهجات الناس. على كل حال، إحنا شيبنا وناسنا وعجايزنا يقولون "ربع الله". فإنت إذا مولانا العزيز ما عاجبتك العبارة، هم نقدر نعيب على ونستهزئ بلهجتكم في تونس الموقرة والمحترمة. ما يصير. احترموا لغة العالم، احترموا لهجة الناس. على كل حال، هذا مو موضوعي. هذا عتب خفيف يسمونه.

وبهذا أثناء، وأنت تريد تسولف، داخل وياك شيخ فرحان قال لك: "هو هاي مال طهر قلبك، ترى موجودة بالفكر المسيحي، وطبت على المسلمين". "طهر قلبك، هاي موجودة بالمسيحية أصلاً، وبعدين انتقلت". "يعني هاي قضية طهر قلبك وما طهر قلبك ونظف قلبك وطهر قلبك، هاي قضية مسيحية وطبت علينا". وهنا هاي طامة كبرى. ليش؟ لأن الأئمة كانوا يقولون: "طهر قلبك". يعني الأئمة متاثرين بالفكر النصراني والمسيحي؟ لو شنو؟ وين متاثرين؟ وهنا أني راح أراويك رواية. هذا فروع الكافي، حكينا من الساعة بأصول الكافي، وهذا قدامك فروع الكافي للشيخ الكليني، المجلد الثالث، صفحة 34، باب 29، باب صفة الغسل والوضوء قبله وبعده، والرجل يغتسل في مكان غير طيب وما يقال عند الغسل وتحويل الخاتم عند الغسل. الرواية الرابعة: "عده من أصحابنا عن أحمد بن محمد عن علي بن الحكم عن بعض أصحابنا قال: تقول، شو تقول؟ تقول في غسل الجمعة: اللهم طهر قلبي". هسه منو اللي متاثر بالمسيحية؟ "اللهم طهر قلبي من كل آفة تمحق بها ديني وتبطل بها عملي". بعدين الشيخ يصعد عنده منسوب الاتهام يقول: "أصلاً هاي ماسونية". هسه منو الماسونية؟ الشيعة أصحاب الأئمة؟ هذا الدعاء موجود بكبار العلماء بالشروحات الفقهية. زين، هسه الماسونية منو؟ الأئمة تابعين؟ شلون حكي هذا؟ يعني ليش إحنا لغة التخوين عندنا جاهزة؟ أي واحد نختلف الفكرة قبـ... قبل تهمة ماسونية، عميل، صهيوني، شو شنو؟ شو الموضوع؟ كلمة طهر قلبي تقول هاي موجودة بالفكر المسيحي وطبت على المسلمين. زين، هسه الأئمة ش نقول لهم؟ أنتم متاثرين بالفكر المسيحي؟ لو أنت مشتبه شيخنا؟ طيب، وباثناء ما الشيخ يتداخل ويتهم، من ينس يتكلمون عن طهر قلبي ونظف قلبي وطهر قلبي بالفكر الماسوني والفكر ما أدري شنو. "واذكار، إذا أردت كذا فقل كذا، وإذا أردت كذا فقل كذا، ويصبح الدين فقط مجرد عاطفة قد تكون غير مشروعة إذا". "بالمناسبة، الماسونية هذه فكرتها ترى الماسونية". "واذكار يدخل وياه الشيخ على الخط ويايده طبعاً". ومن يايده يدخل بموضوع ثاني ويقول: "هذا اكو فد لون عند الآخر، ما أدري الآخر منو، ما أعرف. عند الآخر يتحدثون أذكار، تريد كذا، سوي كذا، تريد ما هو الدين كله هيك؟ الدين هو كله سوي هيك ونعطيك هيك؟ المفروض أنت تلغي منظومة الدين كلها، لأن هي كلها قائمة على العمل والجزاء. صلي، أطيعك الجنة. اترك الحرام، ما أحطك بالنار. إذا سويت الحرام، أحطك بالنار. إذا قرأت هـ... يعني أنتم شيخي لازم تنفون الدين كله، لأن الدين كله جنة ونار وجزاء وثواب وعمل وسوي وأطيعك أمن وأطيعك، وأعمل وأطيعك، وهو القرآن كله هيك. هذا يعني مو دين؟ كان دين شنو؟ بعدين يقول هاي الأذكار يقول الإمام: "سوي هيك، نطيك هاقد وبعداد". وهنا أنا هم راح أعطيك رواية هم بيها أعداد وهم بيها أذكار. هذا كتاب عيون أخبار الرضا للشيخ الصدوق، بعيون أخبار الرضا، بالجزء الثاني، صفحة 71، الرواية 289. الرواية عن أمير المؤمنين عليه السلام قال رسول الله صلى الله عليه وآله: "من قرأ آية الكرسي 100 مرة". عدد، خاف تشكل على هذا الحج. "من قرأ آية الكرسي 100 مرة كان كمن عبد الله طول حياته". هاي رواية شيخي، وبيها عدد، وبيها تريد كذا، أعطيك كذا. روح اشكل واعترض على أمير المؤمنين ورسول الله.

وبنهاية كلامي وياكما عندي نصيحة. مشايخنا الأعزاء، مو كل واحد يسولف بالأخلاق لو مطالب قلبية لو كذا تذبونه بالتصوف. خلوا لغة الاتهام بعيدة عنكم. أنتم الناس تتابعكم وتحبكم، ولكم جمهور، والناس تتربى على أيديكم. من نتعلم لغة الاتهام، مصطلحات صوفية وما أدري شنو صوفية، وكله صوفية. أي واحد يسولف بأي شغلة أخلاقية تذبون على التصوف. هذا ما لايق بكم. مدرسة أهل البيت بها تراث روحي أضخم من التصوف ومن غيره، وما محتاجين لا التصوف ولا غير التصوف. فهاي في يعني تهمة التصوف ابتعدوا عنها. إحنا كنا مو صوفية، ولا نؤمن بالصوفية. إحنا نؤمن بالتراث الأخلاقي والعرفاني عند أهل البيت. وأنا أبرأ إلى الله من كل تراث، من كل تراث عرفاني أو أخلاقي من غير أهل البيت. هاي النقطة الأولى.

النقطة الثانية، منو رايح؟ إذا عندكم شي، وأي واحد، أنا أو غيري، ماكو داعي تطلعون بلقاء وتشتغلونه قدام الناس. إحنا عائلة، بيت. تقدر تقدر تتصل سيدنا، شيخنا، مولانا، أنت جاي تقول هاي كذا، هاي زينة، هاي مو زينة. ممكن يقنعك، ممكن يفاجئك، مثل ما أنت هسه شفت بعض الروايات اللي أنت أنكرتها، وممكن يقول لك: "أنا مشتبه، وأنا غلطان، وأنا قدامك هواي غلطت بأشياء، والحمد لله أحاول أصلحها". لكن بهاللغة، بهالشدة، بهالإقصاء، بهالتنكيل، بهالتجريح، ميليق بكم. أنتم طلبة وحوزة النجف تاريخها طويل بالتسامح وبالمحبة. وقدامك المرجع الأعلى السيد السيستاني، شوف شلون يتعامل ويا الناس، حتى مع مناوئيه، شوف شلون يتعامل. إذا اختلفتوا في فكرة، لا تجرحون صاحبها. اشتغلوا الفكرة بعلم. والسلام عليكم ورحمة الله وبركاته.