Transcription
هنبدا منزلة التسليم. منزلة التسليم لله، أما منزلة جميلة بشكل! أما بتهدي القلب وبتريح القلب بشكل! أما تخليك في حالة من السكينة والطمأنينة، ومعندكش مشاكل ومستريح ومش خايف. مش محتاج لأدوية ولا مهدئات ولا أطباء نفسيين، أنت مستريح. قاعدة احفظوها مني: كل حاجة مش في إيدك سلم لله، وكل حاجة في إيدك طلع أحسن ما عندك، وخلصنا وخلص الموضوع.
كل اللي مش في إيدك سلم لله، وكل اللي في إيدك طلع أحسن ما عندك مع التوكل على الله. المنزلة إمبارح، قاعدة النهاردة قاعدة جميلة جداً: عطاؤه عطاء، ومنعه عطاء، ويعطي حين يمنع أكثر مما يعطي حين يعطي. والقاعدة دي هي قاعدة التسليم لله، وقاعدة سهلة، وقاعدة جميلة، وممكن تحفظ الكلمتين دول لأنهم سهلين وتعيش بيهم ويبقوا محفورين في دماغك: كل عطائه عطاء، وكل منعه عطاء.
يعني إيه؟ يعني الحقيقة مفيش منع، يعني الحقيقة كله عطاء. الله أرحم الراحمين وأكرم الأكرمين، الأصل عنده العطاء. ربنا معندوش حرمان ولا بخل -أستغفر الله العظيم- لأن منعه لازم يتفق مع صفاته، فاهمين؟ يعني مينفعش يحصل حاجة في الكون عكس صفات الله سبحانه وتعالى. مش دي عقيدتنا؟ مش إحنا مؤمنين بده؟ هل ينفع تحصل حاجة في الكون عكس صفات الله سبحانه وتعالى؟ طب هو صفاته إيه؟ أرحم الراحمين وأكرم الأكرمين، ليس في صفاته بخلاً وليس في صفاته حرماناً. يبقى مسألة المنع دي إحنا مش فاهمينها، لأن الأصل عنده العطاء، والأصل عنده الرحمة، والأصل عنده أكرم الأكرمين، أجود الأجودين سبحانه وتعالى.
وبعدين هي اسمها أفعال الله الحسنى ولا أسماء الله الحسنى؟ طب ليه ما اسمهاش أفعال الله الحسنى؟ لأن الفعل له زمن، والفعل قد يتغير، أما الاسم فصفة ثابتة لا تتغير. المنع فعل، هل ينفع فعل يتناقض مع صفات الله وأسماء الله الحسنى؟ يبقى ده كاعتقاد لي كمؤمن: أفهم عن الله سمى نفسه بأسمائه الحسنى كلها عطاء، كل الأسماء عطاء، كل الأسماء عطاء الله. طب مال المنع إيه؟ لا، هو في الظاهر منع، لكن هو في الباطن عطاء. الحقيقة يا جماعة لا منع على الإطلاق.
طب بقى ليه بيحصل منع في حياتي؟ أنا بتعب كتير، أنا حياتي كلها ممنوع. في ناس بتقول لك كده: أنا... وبعدين يبدأ يفكر إيه؟ أنا على طول ممنوع، أنا كل ما أحلم بحاجة تتقفل في وشي، أنا مفيش حاجة ماشية، أنا كله متقفل، أنا كله منع في منع في منع في منع. ويبدأ بقى الشيطان يلقي هواجس على دماغه: أنا ليه ممنوع؟ عشان أنا فاشل. أنا ليه ممنوع؟ علشان أنا مش ناجح. أنا أصل أنا غبي، أصل أنا ساذج، أصل أنا ربنا غضبان عليا، أصل أنا منحوس. مش هي دي كل الجمل اللي بتتقال؟ والله العظيم مش صحيح، والله كله عطاء، كله عطاء، لا منع على الإطلاق. ده جزء من إيمانك وتسليمك لله. منزلة التسليم كلها بتبدأ بالفكره دي: كله عطاء.
طيب، أمال بقى اللي شكله منع ده، اللي ظاهره منع، ليه؟ عشان حاجتين، يا إما هما سببين أساسيين للمنع: يا إما عشان يعلمك التسليم له، إنه مالك الملك، وإن الكون كله بيده، فلا تناطح القدر، لأن الكون وما في الكون ملك الله وحده. فسلم سلم سلم، يحول المنع إلى عطاء واسع. ده السبب الأولاني الحقيقي للمنع. عايز المنع يتحول إلى عطاء؟ سلم. لما تتقفل في وشك يا جماعة، يا اللي بتسمعيني، سلم قوي، سلمي لله، سلمي. أو اخبطي دماغك في الحيط! ما أنتِ معندكيش غير تسليم، هو مش في إيدك. سلم سلم سلم برضاك. معقولة تسلم ويضيع؟ معقولة تسلم ليه ويسيبك؟ اطمئني اطمئني بس سلمي لله، سيب نفسك لله سبحانه وتعالى، والله ما هيضيعك، وهيكبر بخاطرك، وهيعوضك. بيتحول المنع إلى عطاء وتضحك وتقول: إحنا كنا فين وبقينا فين! يبقى السبب الأولاني للمنع إيه؟ إنه يعلمك التسليم.
طب والسبب الثاني للمنع؟ الإحسان. تطلع أحسن ما عندك. تخيلوا لو كله عطاء ومفيش أي تحديات ولا حواجز ولا ما يسمى منع في الظاهر، يحصل إيه؟ الناس تتبلد، ما كله بيجي. تقف الحياة. فيمنع لتنضج، فيمنع لتنمو، فيمنع لتخرج أفضل ما عندك، فيمنع لتطور ذاتك، فيمنع عشان تتعلم أكتر. عطاء ولا مش عطاء؟ فيتحول المنع إلى عين العطاء. يبقى أحسن، يبقى طلع أحسن ما عندك.
يبقى السببين الأساسيين لما يبدو منعاً: يا يعلمك الإحسان، يا يعلمك التسليم. وهم دول السببين الأساسيين، وكل المنع في الحياة عشان الحاجتين دول: يا تسلم يا تحسن، يا الاتنين مع بعض.
بصوا يا جماعة، الإحسان مضمون 100%، ضمان من ربنا 100%. "إنا لا نضيع أجر من أحسن عملاً". أنت طب أنت عايز إيه؟ ما أنت واخد 100% طول ما أنت بتطلع أحسن ما عندك، أنت معاك الضمان ده ماشي بيه. كسبان كسبان. كانت المعادلة إيه؟ افهم عن الله إنه كله عطاء، وسلم وأحسن، وانتظر العطاء الواسع واستبشر. والله هتفتح، والله هيكرمك يا ناس يا اللي بتشوفونا دلوقتي وهتشوفوا. بس اعمل اعمل الثلاثية دي: فهمت عن الله، فهمت القاعدة، ها؟ مصدق من كل قوتك إن كله عطاء وإن بدا منعاً، والسببين الأساسيين تسليم وإحسان. هتسلم وتحسن، وشوف العطاء هيجي إزاي.
طب أمال بقية الحلقة إيه؟ بقية الحلقة نماذج، نماذج لأشكال المنع تكتشف إنها عطاء.
النموذج الأولاني، أشهر نوع للمنع: الفلوس. صح ولا لا؟ منع الفلوس. يمنعك المال لأنك مش هتقدر تتحمل الفلوس دلوقتي. الفلوس مش كل واحد يقدر يتحملها، عايزة صلابة داخلية، عايزة قوة داخلية. لو جت الفلوس كتير أنت ممكن تبقى الفلوس اللي سايقاك. فلوس بدون قيم تساوي كارثة، وتقدروا تشوفوا نماذج كتير في الحياة. فيمنع لأنك مش قادر تتحمل الفلوس. لما تكون أكثر صلابة، أو مش لازم أنت، ولادك. لو جت الفلوس الآن كتيرة، ولادك مش هتقدر أنت تتحكم فيهم وتديهم الفلوس، ولادك هيتفسدوا. هيعطيك على قدر تحملك. يا سلام! وكل ما تحملك يزيد. طب أنا عايز أزود الفلوس اللي عندي قوي؟ إحسانك وقيمك ومبادئك من جوه، وقيم أولادك. قارون مقدرش يستحمل لما جت الفلوس، مقدرش. قال: "إنما أوتيته على علم عندي". ماشافش ربنا! أنا أنا. "فخرج على قومه في زينته" منتهى الكبر. "فخسفنا به وبداره الأرض". يمنعك لأنك مش هتقدر تتحمل الفلوس دلوقتي. "ولو بسط الله الرزق لعباده لبغوا في الأرض بغير الحق ولكن ينزل بقدر". إيه القدر ده؟ تحملكم. إيه ده؟ ده يبقى بيحبني! ده الشكل الأولاني من أشكال المنع.
طب ناخد شكل تاني: يمنعك فرص النجاح في الحياة. مش مسألة بقى فلوس، أنا عندي حلم وعايز الحلم يتحقق. عشان تطلع حاجتين: تسليم وإحسان. الحلم مبيحصلش، الحلم مبيحصلش، الحلم مبيحصلش. زهقت وروحت؟ روح أنت الخسران. لا، أنا مكمل إحسان. "ولا يلتفت منكم أحد". متلتفتش على اللي بيحصل حواليك. "وامضوا حيث تؤمرون". دي آية في القرآن. "ولا يلتفت منكم أحد". متقعدش تدور بقى مين عمل فيا إيه وما حصلش إيه. "وامضوا حيث تؤمرون". فيمنع فرص النجاح لأنك لسه منضجتش قوي، النجاح هيطلع ناقص، وهو عايزك تنجح بجد. فيمنع لغاية ما تستكمل إحسانك الداخلي، وتستكمل الفكرة، وتنضج الفكرة، وتبقى جاهزة إنها تتعرض على الناس. يفتح لك. ويضيق ويضيق ويضيق عشان تكشف لنفسك تسليمك وإحسانك وهو بيمنعك فرص النجاح في الحياة.
لازم تتعلم طريقة ربانية ممكن تحطوها من ضمن الفهم عن الله: من قلب الضيق يولد الفتح الكبير. فاكرين سورة الكهف؟ اسمه الكهف. "فأووا إلى الكهف" عشان تنعزل. "ينشر لكم ربكم من رحمته". إيه ده؟ غار حراء. مش غار حراء اللي النبي صلى الله عليه وسلم كان بيقعد فيه لوحده طلعت منه نور الهداية لدين الإسلام للبشرية إلى يوم القيامة؟ إيه ده؟ من غار حراء دي طريقة بقى. لا، في واحدة تالتة: غار ثور. مش كان مستخبي هو وسيدنا أبو بكر في غار ثور وكلهم عايزين يموتوه، وهو من غار ثور يأتي الفتح بالمدينة ونصر الإسلام وعز الإسلام؟ كانت طريقة مش معقولة! الكهف، غار حراء، غار ثور. دي طريقة. حتى ليلة القدر، ليلة محدودة في الزمن والوقت، "خير من ألف شهر". لا، يبقى دي طريقة ربانية. يبقى احفظ الطريقة دي: لما يتأخر عليك الفتح في فرص النجاح في الحياة، بيأهلك ويزكيك، لسه ما استوتش. بص الآية: "ولما بلغ أشده واستوى آتيناه حكماً وعلماً".
نقول القاعدة تاني وكده ودوق حلاوتها يا جماعة، اسمعوها وحسوها: عطاؤه عطاء، ومنعه عطاء، ويعطي حين يمنع أكثر مما يعطي حين يعطي. ساعة المنع انتظر العطاء الأكبر. بس بالشرطين: تسليم وإحسان. جرب. طب جرب. طب جرب تسليم وإحسان في أي حاجة أنت ممنوع منها وشوف هيعمل معاك إيه. أنا معاك يا رب. ما هو التسليم معناه كده: أنا معاك. وتسجد تقول: أنا معاك يا رب. يتأخر ما يتأخر، قدرك ساري وأنا بحب قدرك وراضي ومعاك. يا سلام على التسليم! أو تكثر من الذكر. ما هو الذكر له علاقة كبيرة: "لا حول ولا قوة إلا بالله". ما هي "لا حول ولا قوة إلا بالله" هي دي تسليم. ما هو التسليم كلمة "لا حول ولا قوة إلا بالله".
يبقى دي الطريقة التانية. الحاجة التالتة: يمنعك لترى عظمة قدرته، كيف ستتحول النتائج المؤلمة في صالحك فتسلم له تسليماً. تعال أوريك عظمة الله سبحانه وتعالى. بص هتقفل أهي، هتقفل هتقفل هتقفل هتقفل هتقفل. تعال أوريك العطاء بقى، وكيف تتذوق العطاء دون منع. وإذا كان العطاء هو وحده الأصل في كل شيء، فكيف تتذوق قيمته؟ مثل حلو قوي: صلح الحديبية. النبي صلى الله عليه وسلم والصحابة رايحين يعملوا عمرة بعد كام سنة محرومين من العمرة؟ سبع سنين. وهم أهل مكة وهم أصحاب البلد، ممنوعين يخلوا مكة ولا يطوفوا بالكعبة. إحنا لما بنغيب عن العمرة شوية بيحصل لنا إيه؟ شوق شكله إيه؟ متخيل؟ فهم بقى رايحين العمرة، والنبي شاف رؤيا: "لتدخلن المسجد الحرام إن شاء الله آمنين". رؤيا الأنبياء حق. ولابسين لبس الإحرام وداخلين على مكة. قريش: لا مش هتدخلوا أبداً. تدخلوا والعرب تقول إن أنتم دخلتوا غصباً عننا؟ ما أنتوش داخلين. ارجعوا. أنت متخيل إنك توصل على باب مكة وترجع؟ لا. متخيل توصل مكة لابس لبس الإحرام وترجع؟ ممكن يحصل لك فيها إيه دي؟ في منع أكتر من كده؟ ظاهره بس وهتقعد تعيط زي العيال. فالصحابة تعبانين جداً، والنبي يتفق معاهم على صلح الحديبية، صلح 10 سنين هدنة، مفيش حرب. وتنزل سورة الفتح "إنا فتحنا لك فتحاً مبيناً" تنزل في الوقت ده وهم في التعب الحالي ده وهم محرومين من العمرة بلبس الإحرام. وسيدنا عمر بن الخطاب العبقري يروح للنبي يقول له: يا رسول الله، أفتح؟ هو فين الفتح ده؟ فيقول: نعم يا عمر هو فتح. قال: ألم تعدنا أننا سندخل المسجد الحرام آمنين نطوف بالبيت؟ قال: أقلت لكم هذا العام؟ أنا قلت لكم السنة دي؟ مش قاتلك سيدنا عمر. ويروح لأبو بكر يقول له: أفتح؟ هو فين ده؟ أنا مش شايف فتح، أنا مش شايف غير منع. ده منع مش فتح. توقيت لسه. ويرجع الصحابة مهمومين زعلانين، بس يكملوا تسليم وإحسان، ويبدأوا يستمروا في الدعوة إلى الله. تقوم العرب تقول إيه؟ طب هو كان في خناقة بين محمد وقريش، فإحنا بنحب قريش فمش عايزين نزعلها. طب دلوقتي هما هدنة 10 سنين، طب ما نسمع محمد بيقول إيه؟ ويبدأ إحسان الصحابة في الدعوة إلى الله. فتكون النتيجة إن في أول سنة هدنة يسلم قد اللي أسلموا في الـ 20 سنة اللي فاتوا. فعمر يبكي ويقول: والله كان فتحاً ولم أره. يمنعك لترى عظمة قدرة الله كيف ستتحول النتائج في صالحك فتسلم له تسليماً. "فلا وربك لا يؤمنون حتى يحكموك فيما شجر بينهم ثم لا يجدوا في أنفسهم حرجاً مما قضيت ويسلموا تسليماً". مش هتكمل إيمانك إلا بأنك مش تسليم واحد، يسلموا تسليماً.
عطاؤه عطاء، ومنعه عطاء، ويعطي حين يمنع أكثر مما يعطي حين يعطي. كريم قوي. صفاته كلها كرم. مفيش منع، مفيش منع، كله حلو، كله كرم. اطمئنوا يا جماعة، استبشروا خير، والله هيعوضكم. بس سلمي سلمي، متنطحيش القدر، سيبي القدر يمر في حياتك. سلم سلم وطلع أحسن ما عندك. الإحسان شرط في هذا الدين في كل حاجة صغيرة وكبيرة.
طيب حاجة كمان: يمنعك ليه؟ يمنعك ليتوب عليك من ذنب كبير مش راضي تبطله. الفنان سعيد صالح الله يرحمه في لقاء تدخلوا على اليوتيوب تشوفوه مع الأستاذ عمرو الليثي الإعلامي، فهو بيقول له: أنا كنت بني آدم سيء للغاية، أنا مفيش حاجة وحشة ما عملتهاش، أنا مفيش معصية ما جربتهاش. لغاية ما دخلت السجن فجأة لمدة سنة، منع. فلما دخلت السجن دي كانت أحسن سنة في حياتي، لأني قابلت واحد في السجن قال لي: ما تيجي نطلع فوق سطح السجن. طلعنا فوق السطح، قال لي: بص يا أستاذ سعيد، لو عايز ربنا يكلمك اقرأ قرآن، لو عايز تكلم ربنا صلي. بيقول: وكانت كلمة سحرية دخلت في قلبي، لقيت نفسي بقرا قرآن ولقيت نفسي بصلي وانشرح صدري. الإيمان ما عرفتوش قبل كده. سبحان الله! فتبت إلى الله جوه السجن أثناء المنع. فحلفت لأكفرن عن ذنوبي. فقلت: أنا كل سنة لازم أحج. بقالي 14 سنة عملت 14 حجة متتالية لغاية ما مات. عطاؤه عطاء، ومنعه ولو سجن عطاء، ويعطي حين يمنع أكثر مما يعطي حين يعطي. يمنعك ليتوب عليك من ذنب كبير ما كنتش عارف تتوب منه.
يمنعك إجابة دعوة لأن الخير في تأخيرها، مش دلوقتي. أم مريم أمنيتها تخلف ولد، الولد ده ينصر المسجد الأقصى. سنين ما بتحملش حمل. أخيراً الولد جاي. "رب إني نظرت لك ما في بطني محرراً فتقبل مني". فرحانة جداً، هي نيتها صدقة، محرراً خالص ليك، حر للمسجد الأقصى. طلعت بنت! يا رب أنا بدعي عايزة ولد عشان النية بتاعتي يا رب دي. "وليس الذكر كالأنثى". وبعدين قالت له: "وإني سميتها مريم"، خلاص. "وإني أعيذها بك وذريتها من الشيطان الرجيم". مريم هي اللي هتجيب عيسى. ودعوتك استجيبت، بس بدل ما تكوني الأم بقيتي الجدة. والدعوة حصلت، ولكن تأخيرها. لو عيسى جه في الزمن ده ما كانش هيؤدي دوره. الزمن غير مؤهل لدوره. دور عيسى محتاج يتأجل 20 30 سنة كمان. لا إله إلا الله. لكن دعوتك استجيبت لكن بطريقة الله. عطاؤه عطاء، ومنعه عطاء، ويعطي حين يمنع أكثر مما يعطي حين يعطي.
يمنعك لأن أنت نظرك ضيق، وهو محضر لك خير كبير. ولو خدت دي، إيه ده؟ دي صغيرة. بس أنت شايف الدنيا من ماسورة 5 مللي، وهو محضر لك حاجة كبيرة. يا رب ده أنت كريم قوي وحنين قوي. أنا معاك، أنا مسلم يا رب، أنا معاك. حطني مطرح ما أنت عايز. أنا مش هقف في وجه القدر. أنا معاك، أنا مش هكون عنيد. وأحسن ما عندي. مش هم دول يا رب اللي بيحولوا المنع إلى عطاء؟ أنا هعملهم يا رب.
آخر واحدة: يمنعك لأنك عمال تنجح وكارهيك وحاسديك بيخططوا لإيذائك. فيمنع لتخف الأضواء من حولك فينسوك ولا يؤذوك. ويمكن بعد 20 سنة تكتشف إن كان هيتعمل فيك حاجات ما أنتش قدها، وتسجد لله وتعيط وتقول له: سترتني وأكرمتني. وكان المنع عطاء. أو تيجي يوم القيامة وتقف بين إيديه ويحكي لك رب العالمين: تعال تشوف لما منعتك نجيتك من إيه. وتبكي خجلاً وحباً. خجلاً إن أنت كنت زعلان، وحباً على كرمه.
عطاؤه عطاء، ومنعه عطاء، ويعطي حين يمنع أكثر مما يعطي حين يعطي. فقط سلم وأحسن.